Колхозонь эряф/1941/05/Фкя конфискациянь история
| Иван Франко
|
| Фкя конфискациянь история |
Его превосходительствась ульсь пяк точнай. Аньцек пачкочнесь пингсь вейхкса частти, сон ульсь ни государственннай кудса, ласковайста отвечась швейцарть сюконяманц каршес, ётась кудть сембе кувакадонга кувака коридоронзон эзга, сувсесь кенкшть апак калтыек то сей, то тов канцеляриятненди, штоба получамс столоначальникть эзда тевть молеманц кувалма информация. Эряви азомс, што сонь тяшкава ашезь интересованда информациятне, конашкава тейнза эрявсь содамс, сембе ли чиновникне точна присутствондайхть канцеляриятнень эса.
Его превосходительствась страшна ашезе кельге аф аккуратнайшить, сонь ульсь вельф пара мялезонза, мзярда путнезе эсь визитнай карточканц аф аккуратнай чиновникть письменнай шранц лангс: сон содазе ни, што сюдуфсь шиньберьф кармай улема, мярьгат, отравлендаф, сяс мес фатальнай визитнай карточкась ушеды сонь квалификациянц стакалгофнема, кода Бренев мечсь.
Аньцек тя якамада, ванондомада меле, сась его превосходительствась эсь собственнай канцеляриязонза. Сон ульсь пяк довольнай, мзолчнесь, мзярда обслуживандакшнезе сонь канцелярскяй делопроизводительсь, и ёрдась васенце сельмованфть шрать лангса ащи од газетатнень лангс. Сон морафнельхцень эрь шиня сембе газетатнень, конат улендсть Галицияса, штоба содамс, кодама настроениясь странаса; пяк внимательнайста морафнельхцень сон львовскяй газетатнень, но сембода внимательнайста, конешна, оппозиционнайхнень.
— Улихть ни газетат? — кизефтезе сон канцелярскяй делопроизводительть.
— Тинь услугазонт, Ваше превосходительство, — ульсь ответсь.
Его превосходительствась нежедсь шрать ваксс, косольхть газетатне, и отькорь сельмоса ванозень сембонь, конат нолдафтольхть исяк илять и тячи шобдава. И тяфта, синь ащесть инь цебярь порядокса и мирнайста фкя доска лангса: государственнай „Львовскяй бабанясь“ эсь русскяй прихвостнянц — „Народнай газетанять“ мархта, конань его превосходительствась фалу шнакшнесы. Синь мархтост серцек ащесть сят, конат ульсть анокт услугас: „Масляный пересмотр“-сь, сяда [ 14 ]ичкозне — кати-мзярда кяжись, а тяни пейфтома „Народнай лоскодсь“, а кержи ширеса кафцьке оппозиционнай газетатне: „Львовскяй фуражерсь“ и... мес тя тяфта? Омбоце оппозиционнайсь — „Польскяй сенниксь“ аф сельмоса няеви, аф пилеса кулеви. Коса жа сон? Мезе мархтонза лиссь?
— А коса „Польскяй сенниксь“? — кизефтезе его превосходительствась канцелярскяй делопроизводительть.
— Ашезь канда нинге.
— Тоза чортти. А мес?
Его превосходительствась кяжиясь. Сонь сембода пяк мялецоль ваномс „Польскяй сенникть“ тячиень номеронц. Тя долженоль улемс дневниконь анцяй архипроизведениякс, сонь государственнай политиканцты триумфокс. Кафта шида тяда инголе тифоль условия сонь и редакторть ёткса. Страшнай оппозиционерсь сась тейнза и азсь пяк ёню, пяк оригинальнай мяльхть журналистикать независимостень характеронц ланга, конанц требовасы Галицияса польскяй национальностсь.
— „Ваше превосходительство, — корхтась сон, — мон тонь противникцян, мон демократан, искренняй демократан, кодамкс может улемс аньцек поляксь. Мон, пади, Галицияса аньцек одинокай консеквентнай польскяй демократан и сяс сань тейть. Минь тонь мархтот приятеленьке, оцю сакал господинць, просил монь тиемс тянь. Мон азондыне тейнза национальнай журналистикать независимостенц характеронц колга эсь мяльнень, и сон мярьгсь: „Тон тонць должен изложить тянь его превосходительствати. Сон ули пяк довольнай тонь кулхцондомдот меле“. И вов мон тясан. А монь мялезе? Сон сяшкава простой, кода сембе великайсь. Галицияса польскяй журналистикась ащи стака положенияса, вражескяй элементтнень каршес тюремаса и сяс сонь васенце старанияц должен улемс—арамс аф зависимайкс. Независимостсь — тя монь призывозе. Независимость аф аньцек вяри, но и алу. Независимость чужойхнень, всемогущайхнень тиранияснон эзда, но сяка жа пингть независимость массатнень, партийностть, кода мярьгондихть, политическяй критиконди и доктринанди ювачнематнень нинге ламода тяда кальдяв тиранияснон эзда. Польскяй журналистть должен улемс возможностец выступандакшнемс эсь согражданонзон, нльне эсь подписчиконзон закоренелай предрассудкаснон каршес. Сон должен улемс эсь нациянцты аф слугакс, а учителькс. Сонь должен улемс возможностец всенароднай мнениянь венчть лангса управляндамс, кда види шири, то тага кяржи шири, кода, афкукс, и эряви национальнай интереснень инкса, но тяза васендакиге эряви храбростсь, и храбростезе монь ули. Тяда башка, конешна, эряви тяфта жа материальнай обеспечения, независима журналистикать эзда. Рептильнай фронтт тейне аш кода сявондемс, но административнай или автономнай паксяса мувихть аф кржа цебярь службат, работада кржа, а питнесь пара все-таки. [ 15 ]Фкя тяфтама служба мон, видеть азомс, приметань эстейне. Оцю сакал господинць мярьгондсь, што тейне лезды. Да, кда ба нинге тинь, ваше превосходительство, саль мяленте ёрдамс веснень лангс эсь вескай валонтень... тяда башка, макссян виде вал, ваше превосходительство, што кода-аф кода, полафтса эсь журнальнай тактиказень ся азф мяльнень коряс, и вандыда меле передовой статьяса ули тиф тя направленияса васенце аськолкссь. Иля мезевок аф азан, но надиян, ваше превосходительство, што саты тявок“.
Мзярдонга нинге его превосходительствась ашезь рахсе тяшкава виде ваймоса, кода тя страшнай оппозиционерть, Галициянь единственнай польскяй демократть тумдонза меле. И, афкукс, тя ульсь аф шутка. Сонь ломанень ваймонь содамшиц эста козякодсь, а кие тяфтама козякодомать эзда афоль маря седи потмовань радость.
И вов мес аш месть дивандакшнемска, што его превосходительствать ульсь пяк оцю мялец ваномс „Польскяй сенникть“ тячиень номеронц. Тяфта жа аш месть дивандакшнемс сянь лангска, што сон пяк кяжиясь, мзярда ашезе му эсь шранц лангста пяк учсеф номерть. Сон эрязста ласьксь телефонти.
Дзень, дзень.
— Прошу соединить монь полициянь директорть мархта.
Дзень, дзень.
— Полициянь господин директорсь телефонть ваксса?
— Его превосходительствати услугас.
— Дряй „Польскяй сенникть“ тячиень номероц конфисковандаф?
— Аф содаса, ваше превосходительство. Сейчас кизефтьса.
— Тон, господин надворнай советник, мзярдонга мезевок аф содат. Тя тонь характернай чертаце. Прошу кизефтемс сейчас, мон учан ответ.
Полициянь господин директорсь телефонть эзда аердомстонза лофташкатфоль, кода ловажа. Звонясь и мярьгсь тердемда полицейскяй комиссарть, конац заведывал прессань столть лангса.
— „Польскяй сенникть“ тячиень номероц конфисковандаф?
— Апак, господин надворнай советник.
— Несчастнай ломань. Кода тон морафнят газетат. Тоса улема кати-мезе страшнай. Его превосходительствась страшна кяжияф. Арт тяникиге редакцияв и конфисковандак газетать.
— Пади, прокуратурась тоса мезе-мезе мусь? — аф смелайста мярьгсь полицейскяй комиссарсь, — тейне мезевок ашезь мув.
— Эряскотт куроконе и конфисковандак, мон сейчас корхтан прокуратурать мархта.
Комиссарсь тусь, а полициянь господин директорсь ласьксь телефонти.
— Ваше превосходительствась телефнть ваксса?
[ 16 ]— Мон, господин надворнай советник. Ну, кода тя „Польскяй сенникть“ мархта тевсь?
— Вов тяни самай конфисковандасазь.
— А, стане. Благодарю, господин надворнай советник.
— Бездельникт ня газетчикне, — мотордсь его превосходительствась, страшна возмущеннайготфста аердомок телефонть ваксста, — тяса корхтась тейне ёфси видеста, што шарфтсыне ажиянзон, и мон инксонза азонь ни вал, а тяни, бестиясь, сёрмачни конфискованнай статьят. Тя подлость. Эряви тянь кувалма корхтамс серьёзнайста оцю сакал господинть мархта.
Тя пингова полициянь господин директорсь станяк нинге ульсь телефонть ваксса.
Дзень, дзень.
— Прошу соединить монь государственнай прокуратурать мархта.
Дзень, дзень.
— Телефонть ваксса господин прокурорсь тя?
— Мяле, кинь мархта имею честь?
— Мон полициянь директорсян.
— Ах, шумбрат-эрят, господин надворнай советник! Мезьса могу служамс тейть?
— „Польскяй сенникть“ тячиень номероц конфисковандаф?
— Апак. Мон мезевок ашень му тоса.
— Но тоса кати-мезе улема. Его превосходительствась пяк кяжиякшнесь. Мон кучине ни эсь комиссарозень, штоба аделальхце конфискациять. Сяс прошу господин прокурорть тага весть лувомс тя номерть. Его превосходительствать — совершенна лац шарьхкодеви — ули мялец, штоба тя номерсь улель конфисковандаф.
— А, стане. Вешса. Покорнай слуган.
— Няемозонк.
* * *
Господин прокурорсь телефонть ваксса сяшкава якстерьгодсь, кода, содамок, якстерьготкшнесь аньцек эста, мзярда сонь аляц васенцеда кундазе сонь стирь мархта ащемста.
— Чортсь сявольхце! Тя номерса улемаль кати-мезе аф законнай, а мон вакска нолдайне тянь! Его превосходительствась пяк кяжиякшни! Али тон ёньда лисеть? Тянкса, ватт, квалификационнай листокозон кальдяв заметка пови! Ну-ка кярьмоттяма тага весть тя проклятай номерти!
И дасадяф седиса сон марнек тусь од микроскопно-внимательнай морафтомати, тяфтама микроскопнай и внимательнай, кода маштыхть морафтома аньцек австрийскяй прокурорхне.
— Шкайсь шавозамань! — мотордсь сон, лоткафнемок эсь работанц и крьвястемок папироса, кда тя шава сечкать ёткста можна мумс нелегальщинань хоть фкя видьмоня! Мондейне арам, мекланкт, редакциясь ёфси шарьхкодевиста шарфни [ 17 ]фразеологическяй демократиять эзда государственнай кяшф сюмати. Коса жа тяса кодамовок преступления? Правда, кда тейне фкя минутаняс можналь ба улемс аньцек ломанькс, а аф чиновникокс, то мон аф аньцек конфисковандалине, но попросту ёфси лоткафтолине тя листокть ноляманц. Да месть тянь кувалма корхнемс. Ну-ка, шкабавазть мялец вановоза, варчсаськ тага весть вешендемс!
Сон вешендсь, и станяк мезевок нинге ашезь мушенда, мзярда кенкшне панжевсть, и сувась прессань тефнень мельге ваны полицейскяй комиссарсь, а сонь мельганза — колма или ниле полицейскяйхть, кандомок „Польскяй сенникть“ аньцек шта печатлаф и проста машинаста сявф конфисковандаф номеронзон эзда пачкат. Синь путозь ня пачкатнень государственнай канцелярияв, уголу.
— Номерсь позднандазе и аньцек тяни можналь сявомс типографияста. Фкявок экземпляр нинге апак кучт и апак мик, — отрапортовал полицейскяй комиссарсь.
— Пяк пара, — мярьгсь прокурорсь, — а тяни — аф содасак ли, мес именна конфисковандаф тя номерсь.
— Мон арьсень, што господин прокурорсь сяда лац содасы...
— Мон? Мон онцтонга ашине няе. Вов вешендян пяле част ни и аф мушендан тя номерса мезевок, конац саволь ба конфисковандамс.
— А все-таки тоса кати-мезе должен улемс, — корхтазевсь взволнованнай полицейскяй комисссарсь. — Господин надворнай советниксь строга приказал тейне конфисковандамс сонь моментальна и ся ёткова ульсь лофтана и встревоженнай.
— Шкайсь ванолемань! — ювадсь отчаянияса прокурорсь. — Тяса может дураскадомс ломанць. Или, пади, мон сокоргодонь или туман пачка ванан? Прошу тонь, господин комиссар, озак вов тяза и лезтт тейне вешендемста. Пади, тон улят сяда павазу.
Комиссарсь сюконясь, озась креслав, сявсь кядезонза фкя конфискованнай номер, и канцелярияса ашезь маряв кашт моли, кода праздник шиня. Кафцьке господиттне прасть „Польскяй сенникть“ морафтома... Газетась обязательна должен улемс противозаконнайкс.
* * *
„Польскяй сенникть“ редакциясонза ульсь стама настроения, кодама эряй кудса, коста аньцек што лихтезь ловажать. Ся минутаня сувась главнай редакторсь.
— Сяда чорт! Кодама тя порядка? Пингсь ни пцтай кемонь частт, а ошса косонга аф няеви „Сенникть“ фкявок номероц. Типографиясь палсь? Или сембе машинатне ёньда ётасть?
— Аф, тячиень номерсь конфисковандаф.
— Ко-о-о-д-а ст-ане?
[ 18 ]Главнай редкторсь тетькозень сельмонзон, ваймоц коданга аф таргави, и тейнза аш езь азов сяда лама фкявок вал.
— Вов мезе... Тяса ульсь полицейскяй комиссарсь. Сембе нарядть проста-напроста типографияста сявозе прокуратурав.
— Да, тя жа не может улемс! — ювадсь редакторсь эсь отчаяниянц крхкалмоста.
— Сякокс жа тя истиннай правда!
— Кодама жа туфталонкса конфисковандаф?
— Комиссарть ашель мялец азомс. Катк господин редакторсь моли прокурорти, тоса сембонь содасы.
— Вай, шкабаваз! Вай, шкабаваз! Конфисковандаф тячиень номерсь. Монь мзярдонга прязонга афоль са, што тя возможна, или, пади, кие-кие господатнень эзда последняй минутать навась кодама-кодама кукувонь ал!
Фкявок сотрудник ашезе маря эсь прянц мезьсонга виноватокс.
— Ну, мон содаса ни сембе правдать.
И сон лийкстась государственнай прокуратурав.
* * *
Калт, калт, калт.
— Прошу.
— Шумбрат, господин прокурор!
— А, добрый день, господин редактор! Мезьса могу служамс?
— Прошу, „Польскяй сенникть“ тячиень номеронц конфисковандазь тейне! Аф азсак ли, кодама туфталонкса?
— Пара мяльса. Прошу, ванк.
И сон няфтсь номер, конань эса кой-кодама васттне ульсть ётафт якстерь карандаш са. Ужас! Тя ульсь сонь собственнай передовой статьяц, конань эса сон обещал тяшкава лама его превосходительствати! Сон не мог лувомс карандашса ётаф васттнень, сяс мес сельмонзон инголе кармась всякай пульхкома и шобдалгочнема.
— Но... но... господин прокурор, — мотордозевсь сон.
— Прошу, озак, — пшкядсь гуманнай чиновниксь и шашфтсь тейнза кресла, сяльде сявсь кядезонза номер и ушедсь кайгиста лувома.
— „Австриясь тись польскяй нацияти сяшкава лама рана, сяшкава ламос эксплоатировандакшнезе Галициять, сяшкава ламос угнетандакшнезе и оскорбляндакшнезе национальнай чувствать“ — прошу тонь, дряй тя аф яснай вызов Австриять каршес ненавистти и гордостти.
— Извини, господин прокурор, но тя вдь фразать аньцек васенце пяльксоц, а омбоце пялькссонза сёрматф совершенна шарьхкодевиста: „Мезе должны лувондомс простой историческяй справедливостень актокс, кда тяни, минь политиконьконь выдержаннай и жертволюбивай работаснон сюнеда, [ 19 ]пачкочнетяма минь нацияньконди достойнай пораженияти и Австрияса решительнай влиянияти“. Дряй тя подстрекательства?
— Ах, господин, тонь фразатне кувакат, кие лувсы ушетксонц, может педа-пес аф аделамс, или варжакстта тя фразать лангс:
„Минь нацияньконь Пруссияса драконовскяй преследованияц, нулготькс экстерминационнай войнась, конань тоса проповедондакшнесазь полякнень каршес аф аньцек уйфтома пря философне, Гартманонь кодяпне, но ётафнесыне тевс нинге апак кулентть наглостьса юнкерскяй правительствась“, — прошу арьсемс, тя жа явнай обида правительствати, конань дружескяйхть отношениянза минь монархияньконь мархта. И тейть эряволь, штоба мон нолдалине тейть тянь?
— Но мон жа прошу лувомс тя фразать пезонза молемс, — эняльдсь редакторсь, — вдь тоса жа азф: „Должен улемс тейнек нинге фкя туфталкс, штоба минь сембе вийса кирделеме Австриять ширеса“.
— Тяфта, тяфта! Ня валхнень мон афи конфисковандакшнине. Но азк тонць: фразать васенце пяльксоц все-таки кирди значения, и тя фразась повонды законть кядьс. Или сяфтяма тага колмоце кепотьксть:
„Минь политическяй и автономическяй властеньке няфтсть эсь ширдест стама оцю отсталость, небрежность и легкомыслия, конац саволь наказамс", — ну, господин доктор, тяфтама сюцема минь чиновниконьконь лангс мон, конешна, не могу нолдамс.
— Но, господин прокурор! — ювадсь отчаянияс пачфтьф редакторсь, — мес тон коль лувондат аньцек фразать пяленц? Тя самай фразать омба пялькссонза сёрматф яснайста: „што эрявсь ломаннеда оцю вий минь сембода оцю политиконьконь ширде, штоба минь администрацияньконь уровененц кеподемс сяшкава вяри, кода тянь минь няйсаськ тяни удивления мархта, но нинге аф сатомшка благодарность мархта“. Дряй тя сюцема? Дряй тя издевательства? Дряй тя преступления?
— Тонь мяльце — улеза тонь, а мон иляткшнян монценнеть лангса. Катк судсь решандасы, кие минь эздонк видеста корхтай. Кда ни тяфта, конфискациять кувалма кизефкссь лиссь аф монь эздон, а полициянь дирекциять ширде. Кизефтьк полициянь господин директорть. Кда фкя частонь ётамс сон меки сявсы эсь заявлениянц, то мон аф азан фкявок туркс вал, а кда — аф, тон мон должнан тевть максомс судс.
* * *
Калт. калт. калт.
— Прошу.
— Господин надворнай советникть наинижайшай слугац.
[ 20 ]— Ах! Господин редакторсь! Прошу озамс. Мезе тонь кучензе ширезон?
— Сань тя конфискациянь тевть кувалма.
Полициянь господин директорсь шерьфтезень лафтубрянзон.
— Мезьса жа мон могу тяса лездомс?
— Прокурорсь мярьгсь, што, кда господин надворнай советниксь сявольхце меки эсь заявлениянц, то сон анок нолдамс номерть.
— Сявомс меки? Монь заявлениязень, но мон жа ашень азонда мезевок, значит меки сявондемс тейне аш мезе.
— Но прокурорсь мярьгсь...
— Но аш, аш! Тонга эльбячнят и сонга тяфта жа эльбячни.
— Эста, господин надворднай советникть конфискацияти ашель кодамовок основанияц.
— Ну, месть тон! Кодамовок основанияц! Ватт сей.
И сон няфтсь таяскотф редакторти местнай хроникать эзда якстерь киняса ётаф заметка: „Лев Замьятальский господинць венчандась исяк Ольга Помпинская барышнять мархта. Тя семейнай торжествась праздноваф теснай приятельскяй кругса, но сембе сяка пяк весяласта и виде ваймоса“.
— Маряк, тя ульсь туфталкс конфискацияти! — пешкодсь аф азовомшка удивленнай редакторсь. — Извините, господин надворнай советник? Но тя коданга аф сявови тейне пря ёжес. Тяка лангс, тя кулять пачфтезе тейне фкя господин, конанц лична сонцень ули тянди отношенияц.
— Ули тянди отношенияц? — кизефтезе полициянь директорсь, — а тон содасак сянь, кинь ули тянди отношенияц, ся господинть?
— Да, видеть азомс, исяк мон знакомондань мархтонза.
Пяк благороднай, од ломань.
— Сон няфнезень тейть документонзон, што сон Замьятальский господинць?
— Няфнезень документонзон?.. Аш, но азозе, кие сон.
— Мон тяфта и арьсень. Раз тяфта тиеть, содак, што тон прать недостойнай мистификациянь жертвакс. Лев Замьятальский господинць — тя ёфси аф од ломань, а старшай, уважаемай, кунаркиге ни рьвяяфтф господин, а Ольга Помпинская барышнясь — тя его превосходительствать аванц горничнайц. И тон содак, азондса тянь тейть доверчива, што тячиень номерть конфискациянц колга заявлениясь тиф аф кинге лиянь, а его превосходительствать эзда. Кда содалить тон, кода кяжиясь его превосходительствась тя ничтожнай заметкать няемста.
Редакторсь ащесь фкя вастса, мярьгат, атямсь лангозонза ляцсь, и несколька минута ётамс ашесть сашенда ёженза.
[ 21 ]* * *
Ульсь пингсь кемгафтува част. „Польскяй сенникть“ фатальнай номероц, наконец, лиссь колма частонь позднандамда и сембе инкриминированнай васттнень ёрдамда меле. Тя газетать муцяф и ваймонц потмаксозонза молемс сизеф редактороц сувась эсь вельможнай покровителенц, оцю сакал господинть роскошнайста обставленнай кабинетозонза.
— А, павазу ши, доктор! — приятна ювадсь оцю сакал господинць, и, кресласта апак стяк, венептезе эсь кяденц сайти, приветствиянц каршес.
— Ай, ай, ай, шкайсь ванолензе! Кода тон арать! Лофташкодоть, сизефат! Мезе мархтот лиссь, кодама несчастья?
— Сянь маласан, — мярьгсь пичедезь редакторсь, азондозе сембонь мезе лиссь и путсь эсь покровителенц инголи якстерьса пачкондаф номер.
Тонац ётазень сельмованфса нардаф васттнень и эрьхтезе клоконц шрати:
— Но мон, хоть печкозамазь, аф няян тяса туфтал конфискациянди.
— Мон тожа аф. Передовой статьясь...
— Чудеснай! Сёрматф ёфси стама духса, кода тон тейне корхтать.
— А заметкась...
— Аф приятнай, тя виде, но тя совершенна частнай тев.
— Инь печальнайсь сембе тя историяса, што конфискациять колга заявлениясь тиф сонцень его превосходительствать ширде...
Оцю сакал господинць комотсь вастстонза, мярьгат, сускозе сонь куй.
— Тя не может улемс. Кие тянь тейть азозе?
— Сонць полициянь директорсь.
— Сяда чорт! Тяса кати-мезе аф лац... Тяфта, кода тейне тон азондсак, тянди проста аш кода улемс. Мон должнан вешемс правдать и вешса сонь. Няемозонк, голубчик! Тят ризна пяк тянь инкса, катк тейне тя васенце номерть. Ванды или вандыда меле мон няйса его превосходительствать и корхтан тянь кувалма мархтонза. А тонь тонцень, прошу тонь, катк тячиень конфискациясь аф колсесы мяльцень. Мольхть сяда товолуга ся шири, коза ушедоть тяса. Максан тейть вал, што сембе ули тиф лац.
* * *
Оцю сакал господинць, тя ульсь влиятельнай, великовельможнай, работоспособнай и пяк няевикс особа. Йотась колма шит, пока мувсь пингоц молемс его превосходительствати. [ 22 ]Мзярда кафцьке господиттне корхтасть-тисть то тянь, то сянь кувалма, оцю сакал господинць тонгсь валнят:
— Прошу, ваше превосходительство, кода тя лиссь, эсь ёткова азомс, „Польскяй сенникть“ колмочесень номеронц конфисковандамац?
— Дряй мон содаса? Мон пяк ёрайне няемс тя номерть, а тейне тяса корхтайхть, што сон конфисковандаф.
— Кода стане? Эста аф тон, ваше превосходительство, тиить заявлениять, штоба сонь конфисковандалезь?
— Мон? А монь мезе тоса тевозе? Дряй мон прокуроран?
— А, тя роскошна! — рахазевсь оцю сакал господинць.
— А полициянь директорсь мярьгсь редакторти, што тон, ваше превосходительство, совершенна шарьхкодевиста приказал конфисковандамс тя номерть.
— Мон жа сонь сельме инголенга ашине няенде!
— Вов сон. Конфисковандаф васттне ётафт якстерь карандашса и, эряви азомс, што, монь койсон, ся васттнень эса аш мезевок стама, конац саволь ба конфисковандамс.
— Мекланкт, — мярьгсь его превосходительствась передовой статьять лувомда меле, — статьясь пяк цебярь и, содамок, тиель ба впечатления.
— Думандан, што судсь аф кемокстасы конфискациять.
— Наверна, аф! Наверна, аф! А, впрочем, аф шоряй, кда мярьган максомда судть президентонцты аф оцю пояснения.
И его превосходительствась ласьксь телефонти.
Дзень, дзень!
— Прошу максомс тейне полициянь дирекциять.
Дзень, дзень!
— Тя полициянь господин директорсь телефонть ваксса?
— Тейть услуганди, ваше превосходительство.
— Кальдявста тейне служат, господин надворнай советник. Кода тон мог азомс, бта мон приказал конфисковандамс „Польскяй сенникть“?
— Мон тяфта шарьхкодине, ваше превосходительство.
— Кда тон тяфта шарьхкочнят фалу, господин надворнай советник, то сават моментальна кучемс этапса господатнень палатав. Тон судть президентонцтыге тяфта кучить тянь?
— Да, ваше превосходительство.
— Эста, ульхть добрай, звоняк телефонца тейнза тяникиге, азк, што тя ёфси аф виде, што мон мезевок тяфтама ашень приказандакшне и афи ёрань, и штоба судсь афольхце кемокста конфискациять. Тейне пяк эряви, штоба статьясь улель оду печатлаф станяк, кода ульсь васенда.
* * *
Дзень, дзень!
— Тя тон, господин надворнай советник?
[ 23 ]— Тейть услуганди, ваше превосходительство, — ну, мезе тоса корхтайхть?
— Мон получань телефон вельде ответ судть президентонц эзда.
— Мезе жа сон азсь?
— Краевой судсь пяле частта инголе педа-пес кемокстазе конфискациять.
1899 к.
 This is a translation and has a separate copyright status from the original text. The license for the translation applies to this edition only.
| ||||
| Original: |
| |||
| Translation: |
| |||
