Biblia/Vetule Testamento/Reges/1Reges 11

1 Reges

11

Le Senior puni Salomon pro su idolatria

¹ Rege Salomon amava multe feminas estranie. In ultra al filia del Pharaon, ille se maritava con feminas de Moab, Ammon, Edom, Sidon, e ex le Hittitas. ² Le Senior habeva clarmente instruite le populo de Israel, dicente les: “Vos non debe maritar vos con tal feminas, proque il es certe que illas diverterea vostre corde verso lor deos”. Salomon, tamen, esseva irresistibilemente attrahite a feminas estranie.

³ Salomon, assi, habeva septe centos uxores regal e tres centos concubinas. Su uxores exerceva un forte influentia super ille. ⁴ Quando Salomon senesceva, su sposas successava perverter su corde e le faceva sequer deos estranie, tanto que su devotion non esseva plus volvite completemente al Senior, su Deo, sicut lo esseva illo de su patre David. ⁵ Ille, de facto, comenciava coler le dea sidonese Astarte, e le detestabile deo ammonita Milcom. ⁶ Salomon faceva lo que non es bon coram le Senior, e non sequeva plenmente le Senior sicut habeva facite David, su patre. ⁷ Item, Salomon edificava un loco de culto super un monte que es a est de Jerusalem^[1] pro le detestabile deo moabita Chemosh e pro le detestabile deo ammonita Milcom. ⁸ Le mesmo ille faceva pro tote su sposas estranie, ut illas poteva incensar lor deos e sacrificar a illes.

⁹ Propter tote isto le Senior deveniva multo irate contra Salomon, proque su corde se diverteva del Senior, le Deo de Israel, justo ille qui le habeva apparite bis.¹⁰ Deo le habeva date precise admonitiones contra le sequer deos estranie, ma Salomon non custodiava lo que le Senior le habeva commandate. ¹¹ Ita le Senior diceva a Salomon: “Proque tu insiste facer tal cosas e non custodiava le prescriptiones de mi Pacto, certo io disrumpera e scindera tu regno e lo dara a tu servitor. ¹² Totevia, pro amor de tu patre David, io non va facer lo durante que tu vive. Io lo scindera, in vice, del mano de tu filio. ¹³ Ma io non divellera tu regno integre: io relinquera a tu filio un tribo pro amor de mi servitor David e pro amor de mi citate electe Jerusalem”.

¹⁴ Le Senior suscitava contra Salomon un adversario, Hadad le Edomita, un descendente del rege edomita. ¹⁵ Durante le campania contra Edom, Joab, le commandante del armea, dum in le mission de sepelir le mortos, occideva cata masculo que il habeva in Edom. ¹⁶ Quia Joab e le integre armea israelita, remaneva ibi sex menses donec illes habeva exterminate cata masculo in Edom. ¹⁷ Hadad, qui in ille tempore esseva solmente un puero, successava escappar con alicunes del servitores edomita de su patre e se refugiava in Egypto. ¹⁸ Illes vadeva ab Midian a Paran; illes prendeva con se alicun homines de Paran e vadeva a in Egypto. Pharaon, rege de Egypto, le dava un domo e un terren, e le suppleva de nutrimento. ¹⁹ Al Pharaon tanto placeva Hadad que ille le dava in sposa su soror affin (le soror de Regina Tahpenes). ²⁰ Le soror de Tahpenes le generava su filio, appellate Genubath. Tahpenes le educava in le palatio del Pharaon inter le filios del Pharaon. ²¹ Durante que ille habitava in Egypto, Hadad audiva que David habeva morite^[2] e que Joab, le commandante del armea, habeva alsi morite. Assi Hadad diceva a Pharaon: “Da me le autorisation de partir, assi io potera retornar a in mi patria”. ²² Le Pharaon le diceva: “Quid te manca hic que tu quere retornar a in tu patria?”. Hadad replicava: “Nihil, ma io te obsecra de permitter me de partir”.

²³ Deo suscitava alsi contra Salomon un altere adversario, Rezon, filio de Eliada, qui habeva fugite de su patron, Rege Hadadezer de Zobah. ²⁴ Ille congregava alicun homines e organisava un banda de razziatores. Quando David cercava de occider les, illes vadeva a Damasco, in ubi illes se stabiliva e prendeva controlo del citate. ²⁵ Ille esseva le adversario de Israel durante tote le regno de Salomon e, como Hadad, illes causava multe enoios. Ille detestava Israel e regnava in Damasco.

²⁶ Jeroboam, filio de Nebat, uno del servitores de Salomon, se rebellava contra le rege. Ille esseva un ephraimita ab Zeredah, cuje matre esseva un vidua appellate Zeruah. ²⁷ Isto esseva le causa del rebellion contra ille: Salomon habeva edificate le terrassas de supporto e reparate le muralias del citate de David, su patre. ²⁸ Jeroboam esseva un homine talentose; quando Salomon videva que le juvene esseva multo industriose, ille lo rendeva prefecto super le fortia de labor del tribo de Joseph.

²⁹ In ille tempore, quando Jeroboam habeva quitate Jerusalem, le propheta Ahija le Shilonita le incontrava per le via; ille duo esseva sol in le campania. Ahija portava un nove mantello,³⁰ e ille sasiva le mantello e lo scindeva in dece duo pecias. ³¹ Pois ille diceva a Jeroboam, “Prende dece pecias, quia isto es lo que le Senior, Deo de Israel ha dicite: ‘Ecco, io va scinder iste regno del manos de Salomon e te da dece tribus. ³² Un tribo remanera a ille, pro amor de mi servitor David e pro amor de Jerusalem, le citate que io seligeva de tote le tribos de Israel. ³³ Io evelle de ille le regno quia illes me derelinqueva pro adorar le dea sidonese Astarte, le deo moabita Chemos, e le deo ammonita Milcom. Illes non sequeva mi instructiones in facer lo que io approba^[3] e in obedir mi regulas e prescriptiones, sicut faceva le patre de Salomon, David. ³⁴ Io non sasira le integre regno de su manos. Io le permittera de regnar per le resto de su vita pro amor de mi servitor electe David, que custodiava mi commandamentos e mi prescriptiones. ³⁵ Io evellera le regno del manos de su filio e dara dece tribos a te. ³⁶ Io lassera a su filio un tribo assi que la dinastia de mi servitor David continua servir me in Jerusalem, le citate que io seligeva como mi habitation^[4]. ³⁷ Io va seliger te, tu dominara super tote lo que tu va desiderar haber e tu essera rege super Israel. ³⁸ Si tu obedira a toto lo que io te comanda de facer, seque mi instructiones, face lo que io approba, e observa mi regulas e commandamentos como faceva mi servitor David, alora io essera con te e estrablira pro te un durabile dinastia, como io faceva pro David. Io te dara Israel. ³⁹ Io affligera le descendentia de David propter isto, ma non pro semper”.

⁴⁰ Salomon cercava de occider Jeroboam, ma Jeroboam escappava a in Egypto e trovava refugio con Rege Shishak de Egypto. Ille remaneva in Egypto usque ad morte de Salomon.

Le fin del regno de Salomon

⁴¹ Le resto del gesta de Salomon, toto lo que ille accompliva e su sagie decisiones es contenite in le libro^[5] appellate: “Le annales de Salomon”. ⁴² Salomon regnava super tote Israel in Jerusalem per quaranta annos. ⁴³Deinde Salomon se poneva jacer con su ancestres^[6] e esseva interrate in le citate de su patre David. Su filio Rehoboam le reimplaciava como rege.

Notas

1. Le monte del Oliveto.
2. Litt. “habeva se ponite a jacer con su patres”.
3. Litt. “in facer justitia”, lo que es juste.
4. O “ut mi nomine sia ibi”.
5. O “rolo” (de pergamena).
6. O “patres”.