найсь эсь шобда частстонза тяфта ваймонц тарксезе, кода тон тяни...
— Мезевок тоньдить аф азови тейне! — Шуроста мярьгозень валонзон Весовщиков. — мон седизе вргазкс уркоды!..
— Аш мялезе азомска! Аньцек мон содаса — йотай тя эстот. Можеть аф марнек, а йотай!
Андрей пеедезевсь ды хлопадезе Николаень лафту ланкти, а соньць корхтась:
— Тя, брат, идень урма палакс лефкс лаца. Сембе сонь мархтонза сярятьтяма — кемотьне эздонок — сяда аф пяк, лафчне — сяда пяк. Сон эста сявонцы минь ялганькень, коста ламаньць* эсь прянц мусы, а эряфть ды сонь эсонза эсь вастонц ниньгя аф няйсы. Теть арам, што тон ськамот марнек мастор ланкса тяфтама цебярь куярнясят, а сембе йоратядязь тонь сивомс. Тоса йотай афлама пингя, няйсак тоньцькя, што пара вастоц тонь седицень лия мяшцонга аф тонь—кда кальдяв, теть сяда тьождяня ули. Ды афламда визьксоньди арай — месьтеме церькав пряв—яцеть, кда тонь байгоняце стама йолманя, што сон аф и маряви праздник йотконь байгонь пиксомста. Сяда меле няйсак, што тонь звонне марстоньнеса маряви, а ськамонза сире байкня ваяфнесазь сонь эсь унамаснон потмос, кода каруть вайсь шокшсы. Тон шарьхкодят, мезе мон корхтан?
— Можбыть — шарьхкодян! — прянь люкакофтомста мярьксь Николай. — Аньцек мон аф верондан!
Хохолсь пеедезевсь, стясь пильге ланкс, кармась якафтома.
— Монга вага изинь верондакшне. А тон, кода ускф!
— Мес ускфан? — бта кяжиста пеетькстась Николай, хохолть ланкс ванома йоткть.
— А — стамат!
— Вдрук* Весовщиков оцю вайгяльхть пеедезевсь, келиста панжезе кургонц
— Мес тон? — дивандазь кизефтезе хохолсь, каршезонза лоткамок.
— А мон думандань — вага дурак ули ся, кие тонь обижатанза — мярьксь Николай, прянь люкафнема йоткть.
— Да мезьса монь обижасамак? — азозе хохолсь, лафтувонь кмордама йоткть.
— Мон аф содаса! — мярьксь Весовщиков, пеедемгя ды ужяльдемгя мзелгофтозень пеензон. — Мон аньцек сянь кувалма, што пяк—ни визькс улема ся ломаньти, сяда меле, козк сон тонь обижатанза.
— Вана коза тонь яфодензя! — пеедезь мярьксь хохолсь.
— Андрюша! — пцкяць тядясь кухняста.
Андрей тусь.
Ськамонза илядомок, Весовщиков варжаксьць перьфканза, венептезень пильгонц, стака кемоса карьсефть, варжаксць лангозонза, комась, кяденц мархта варжазе эчке пилге пукшонц. Кеподезе кяденц шаманцты, видя мяльс ванозе кядь лапшенц, тоса шарфтозе кядь копоренц вяри. Кядец эчколь, суронза нюрькенят, марнек вельхтяфт тюжя шяерьса. Сон яфиезе кяденц инголенза, стясь.
Коста Андрей сувафтозе самоварть, Весовщиков ащесь ваномать инголе ды васьфтезе сонь тяфтама валса:
— Кунара мон эсь шама кедезень изине няй...
Мзелгоць ды, прянь шуказь, лездозе:
— Сквернай монь шама кедезе!
— А теть мезе сянь кувалма? — кизефтезе Андрей, шамазонза учезь ванома йоткть.
— А вона Сашенька корхтай — шамась ваймоть ваномац! — шуроста мярьксь Николай.
— И вовси ся аф виде — пшкяць хохолсь. — Сонь соньцень шалхкоц — крюкокс, ула пяльксонза — васембеелькс ащихть, а ваймоц — кода тяште.
Весовщиков варжаксць лангозонза ды пеедкстась.
Озасть чайда симома.
Весовщиков сявсь оцю мода марь, пяк салыяфць кши печф, ды спокойнайста, валомня, кода бка, кармась кавляма.
— А кода тяса тефне? — пяшксень куркт кизефць сон.
Ды коста Андрей весяласта азондозе теенза фабрикаса пропагандать касоманц, сон, оду прянь нолдазь, шалхконь пачк моторгоць:
— Ламос тя моли, ламос! Сада курок эряви...
Тядясь варжаксць лангозонза, ды мяшценза саворне кармась шерьхкома тя ломаньть каршес кяжень кеподема.
— Эрямась аф алаша, локшеса сонь аф паньцак! — мярьксь Андрей.
Весовщиков упрямайста яфодезе прянц.
— Ламос! Аф сатни монь терпеньязе!
19
