| 50 | Николай Островский |
— Мон вальмава ванондонь...
— А-а-а вальмава! Эста получак расчет! Тонь сиведькшнедязь работама... Кярьмедеда тевти! — ювадьсь Струмилсь кочегархненди и тусь ласькезь машиннай отделенияв.
Андрейсь несколька секундат ащесь фкя вастса. Сонь фатязе фкя мысля. Сон колебандась, паньцезе сонь. Но тя мыслясь ни сявезе эсь кядь алонза сонь. Седиец сонь щуфтомсь, кода кодама-кодама вяря вастса комотемода ингеле. И сияк сон комотьсь кенькшти, пякстазе сонь, паньжемать путозе зепезенза. Тяда меле сась меки котелхнень малас, кярьмедсь щярямти и нюрьгезевсь сонь эсонза. Танга ущедсь ювадема гудоксь.
— Тон месть, йоньда лисеть? Андрей! — пешкедсть кочегархне Птахать лангс. — Тон месть, йорат, штоба минь сембень паньцелемезь?
Но Андрейсь ашезень кулцонда синь. Сон коль усксь шярямть алу.
— Брось, Андрюшка! Паньцесамазь жа сембень, — кармась эняльдема Дмитрусь.
Андрейсь шава кяденц марта фатясь стака ломти, конань марта лазондозь угольхнень, и ювачнесь Дмитруть шамас.
— Азк цьоратненди, штоба ворьгедкшнельхт тяста! Запаснай кенькшка...
Кочегархне гурьбаса комотьсть запасной кенькшти. Андрейсь йордась кенькшть лангс кшнинь кячкаст, тонгозе эсь ломонц кенькш кундаматнень пачк и танга кярьмедсь шярямти. Танга кожфть шерьфтезь пешкодсь гудоксь — несчастьянь прерывистайста, страшнайста азондысь.
Сон кармафтозень ошса сембень ульцяв лисема. Сон стяфтозень Баранкевичть шура шяярензон. Тюрьмаса кулцондкшнесть тя прерывиста увфти. Немецкяй эшелонста комотнесть солдатт и ванондсть кругом. А гудоксь коль унась...
Котельнайть кенкшенц эса синнесть охранникне. Но кшниса кунцеф, пяк оцю кенькшсь цють аньцек шерькондсь синь прикладса эрьтнемаснон эзда.
— Кандода куцема! Марш вальмятненди! Ляценьдеда лангозонза, матьтувоц! — ювачнесь капралсь охранати.
Андрейсь содась тя опасность колга аньцек эста, мзярда вальмяти зярьнефтсь выстрел и пулясь вяшкозевсь сонь прянц маласа. Андрейсь невольна нолдазе шярямть. Гудокть унамац лоткась. Арелякшнемок эсь прянц од выстрелть эзда, Андрейсь комотсь угольнай ямати. Карабин марта кядензон ингеле венептезь, вальмава эцьсекшнесь легионер. Птахась ласькендсь кафта пяли угольнай ямаса кода кундаф шеер. Сон марязе, што сашенды пе сонь затеянсты, и сонь фатязе отчаяниясь.
Вальмясь ульсь тяйняня и легионерсь вийхца эцьсесь тоза фкя лафтувонц марта. Фталда сонь тултмиезь.
Эста Андрейсь фатясь антрацит пакш и, рисковандамок эряфонц марта, лифтезе прянц ямать эзда и вишкста йордазе кевть вальмяти. Угольсь повсь легионерть шамас. Ся пешкодсь оцю сярядьфть эзда. Шамац сонь сияк валовсь верса. Сон прафтозе карабинонц и прась алуда сонь эсонза кирьни охранникнень кядьснон лангс. Карабинць цятадсь котельнайть цементонь тияксонц лангс. Танга трахадьсь выстрел.
Андрейсь арась шальнойкс кенярьдемать эзда. Сон сидеста кармась йоряма вальмять лангс уголь покольхть. Вальмять ала марявсьть дикай сюцемат. Ломаньтне куцемать лангста эряскадозь валгсть модать лангс. Андрееньди аф лад арась. Сон юксозе эсь карксонц и сотозе сонь мартонза шярямть давлениянь регуляторти. Гудоксь танга кармась пешкодома. Тяни ни аф лотксезь, сяс мес Птахась кеместа сотозе шнать. Тя шамнезень сонь кядензон. Пелемок лангозонза нападандамда сон йорясь вальмяти угольса. Вишке тюремать шовор Птахась юкстазе, што котельнайса улихть танга кафта вальмат. Аньцек эста, мзярда кафцке сьолгф вальмятьнень эзда лийсть клянцне и стенатнень эзда кармась пяярема штукатуркась, Андрейсь лажназь витькстась, што колма вальмятне теенза аф сяскевихть. Пулятне танга панезь сонь угольнай ямати. Фкя вальмять эса эвондась карабинонь дула. Андрейсь кяжиста йордась тоза кевса. Но омбоце вальмаста выстрелсь кармафтозе сонь меки потама.
