| 52 | Николай Островский |
неме угольхнень, таргсемок шири стака пакшт. Фкясь синь эздост кеверьсь меки и сярядиста эрьтезе сонь кяпе пильгензон ланга. Василексь прась и ламос аварькшнесь. Но мзярда топодьси аварьдемда, танга ушедсь работама, Сон ни шувсь аф оцю лотконя. Но угольхнень шири пуропнемасна коль сяда сталгочнесь. Угольхне сашендовсть лифнемс вяри и йорямс сяда ичкизиня, штоба афольхть кеверь меки сонь прянц лангс. Уголень пульсь паннезень сонь сельмензон и шалконц. Сон кшнесесь и сельгендсь,
Но угольхненди пе эзь няеньдев. Василексь арьсесь, што сон аф тоса шуви. Теенза арась обидна и пелькс. Сон танга аварьгадсь.
— Андрей, Андрю-ю-юшка!.. — пешкодсь сон мезь ули вийхть. Андрейсь комотьсь, кода бта сонь пупазь,
— Тьфу, чорт!
Теенза марявсь, што коса бди фталонза аварьди Василексь. Птахась ащесь угольнай ямаса, кирьдезе кядьсенза карабинтть и сельмень апак чипоряк вансь вальмятьнень лангс. Брандсбойтсь ащесь тозк сонь вакссонза. Шиньфсь, кона цють ашезе ляпияфта сонь, саворне лисендсь вальмятнень эзга. Котельнайса ульсь мрачна и душна.
— Андрюшка! — Коса бди йофси маласа ювачнесь Василексь. Андрейть лангс вярьде кеверьсь кев. Сон сярядиста эрьтезе сонь лафту ланга.
Тяда меле кенярьдезь ювадема:
— Тя мон, Васькась — кирьдезе Птахать ляцемода.
Видексонь живой Василексь валгондсь теенза. Андреень сидеста кармасть кальциема пеенза мзярда сон арьсесь, што сон чють ашезе ляце сонь сичас.
— Андрюшка, тя мон.., Андрюшка! Тоза — синь эздост пуромсь танга лама... Пяшксе пирьф алаша лангсот. Синь инь главнайсновок... Ворьгедьть тяста! Тяса варя... Мон тияня яла сувсень теть, аньцек тяни угольда маразь сонь пяшксеста, тейне ашель кода сувамс, — ювачнесь Василексь Андрейть пилес, соньць ашкорясь братонц кргас.
Седиец Андреень кармась шавома.
— Коста тон сувать тяза?
— Угольнай пирьфста.
— Сияня аш ки...
— А мон турбать пачк. Сон кели! Тонга тяльгат. Адя, Андрюшка, адя.
— Эцек, а мон тонь мельгат!
Василексь угольхненди фатнезь куцсь вяри. Птахась нинге весть ванозе котельнайть и мадонды топкатнень и кармась куцема вяри. Василексь ни сонь учсезе тоса. Андрейсь саворне путозе предохранительть и максозе карабинть Василекти. Лафтувонзон норгсезь. Андрейсь эцесь варяти и, фатнемок кядензон марта кядь алдонза пяяри угольхненди, кой-как лисевсь вяри.
Василексь коль эряскафтсь сонь эсонза. Яндрейсь фатязь кафта кядьса стака кевень глыбать и сяварьдезе сонь варяти. Цьоранясь кармась лездома теенза, пильгензон и кядензон мартонга тулкии варяти антрацит пакшт. Минутада меле варясь ульсь пандф.
Василексь вятезе Андреень эсь кинзон эзга, Птахась пелезь арьсесь, мезе ули, кда сон аф тяльги вентиляциянь турбати. Тьождяста таргазе сон вайменц мзярда сияк Василекть меле тонгозе прянц и лафтувонзон и кармась савор куцема вяри.
Мзярда синь лиссть вяри, мольсь мелкай пиземня.
Уголень пирьфсь ащесь заводть аф основной территориясонза, конань эзда сон явфтфоль кирпицень сери стенаса.
Тяза мольсть под‘ездной машина китне. Василексь тусь разведкас. Курокста сон сась меки и азозе, што машина китнень лангса кивек аш.
| Печатламс аноклакшневи „Рожденные бурей“ романть эзда. |
