Но курок ётась
Весяла сёксесь,
Эрязда ласькозь
Сась кяжи тялось.
Вельхтязе паксять
Ляпе ловняса,
Ляйхнень седязень
Эчке эйняса.
Кармасть увнама
Кяжи варматне,
Урокодсть вирьгя
Эи тарадтне.
Эень кудряса
Ацавсть вальмятне,
Морасть вармати
Соду трубатне.
Вай, юкставсть кизонь
Лямбе шинятне,
Юкставсть паксяста
Стака тевнятне.
Юксневсть стирьхненди
Сёксень ульцятне;
Аф эрявихть ни
Ульцянь моротне.
Эряви кундамс
Тялонь тефненди,
Кайгиста морай
Келунь кштирьхненди.
Вов тя тялоня
Яксесь Алдути,
Семкань Ванянясь,
Кудряв шяярнясь.
Кона шабакска
Алдуть кельгозе,
Седи кучкаса
Лемонц кирьдезе.
А тя тялоть ни
Мяленц азозе,
Лямбе трваса
Алдуть палазе.
„Алду, кельговат.
Лия аф кельган,
Вай, куломозон
Эздот аф яван“.
Мзярда пейдезевсь
Лямбе тунданясь,
Сиведьсь постуфокс
Семкань Ванянясь.
Гайнязевсь локшец
Паксять келева,
Вяшкозьне увнась
Пиже лаймова.
Сон эсь воляса
Сиведсь ванома,
Вай, траксонь стада
Мельга якама.
Ванозьне ёрай
Ярмак добувамс,
Штоба улеза
Мезьса урьвяямс.
„Етай тунданясь,
Етай кизонясь,
Кизонять мельгя
Ласьки сёксенясь.
Сёксенда ёрдса
Кядьстон локшезень,
Эряфс ётафтса
Арьсеф мялезень:
Мазы Алдунять
Рьвакс васькафтса,
Крёсналянц кядьста
Рамазь-рамаса,“ —
Думсекшнесь Ванясь
Кели паксяса,
Обедонди кантф
Кшида ярхцамста.
