— 27 —
Kiöp löparedakel binom?
Penel de Pebaltats äjafom nulo gasedi in zif veütik. In nüm balid, älegleipom mekado pledadomi klänöfik kel päkosadom badiküno. Del suköl, pened nen disapenäd äbüdom ome finön legleipamis omik, if no ävilom getön flapis anik spatina su bäk. Ägesagom foviko e älenunom legleipami nulik plo del suköl; äbefulom kuladiko pömeti omik.
Pos publügam laltüga omik, gasedel äsiedom stiliko in bür oma ven sibinel stenudik, balibik e kipöl spatini in nam detik, äningolom lespido in bür.
— «Kiöp löparedakel binom, söl? man äsagom.»
— «Äsegolom, gasedel ägesagom, kel ärätom das man at äbinom lautel peneda nen disapenäd. If vilol valadön timili liladöl gasedis, odeblinob lenu omi.»
Man äsiadom oki stiliko su stul e äbeginom liladön.
Du tim at, gasedel ämogolom; ab, len yan süta, äkolkömon sibineli votik kipöl glespatini in nam bal. Legleipam igivom, äso logon osi, sekis jönik.
— «Kiöp löparedakel binom? sibinel nulik äsagom ome ko ton tädik» — «Binom in bür redakama, binom pejäfik liladön gasedis».
Man kipöl glespatini ägolom löpo e älefälom oki vütiko su man kipöl spatini. Sibinels tel ägivoms balvoto spatinaflapis jekik, äfaloms in slebi e ävunoms omis fefiko. Äbinoms in stad so misalöfik das polenels no älaboms töbi mödik al dedukön omis al fanüb.
Guigues. (Flent).
