— 61 —
DLENAKENIL.
Mot e cil äsibinoms vöno. Mot älöfof ladliküno cili lebalik ofa, e no äkanof lifön nen cil.
Ab God gudik äsedom cilamalädi gletik. Möd binelas yunik ideilom ya, e cil et i ävedom malädik funliko. Mot ägalof, ädlenof e äplekof du dels e neits kil nilü bed cila ofa löfik, ab at ädeilom.
Dol mekadik, tuvemik ädagleipom moti, kel äbinof nu soalik in godavol lölik. Ni äfidof ni ädlinof, ab ädlenof nezediko du dels e neits kil, sevoköl devölo: «ag cil oba pöfik, kiöp binol?»
Ven äsiedof also leglumiko e feniko jü deil, sukü dlens mödik e dol, gletik, du neit kilid, in plad kiöp cil ofik ideilom, yan pämanifom loviko, e mot päjekof vemo, ibo cil ofa nelifik ästanom bifü of.
At ivedom lanelil beatik e äsmülom svidiko äs nesinöf e jöniko äs in glolam sülik. Ab älabom in nams omik kenili, kel äbinom fulik löliko. E cil äpükom: «O motil löfik, no dlenolöd plu demü ob! Eko, in kenil at diens olik binoms, kelis espilol demü ob; lanel lüga elkonletom omis in gefat. If spilol te nog dleni bal demü ob, kenil oloveflumom, e olabob täno ni takedi in sep ni beati in sül. Sikodo, o motil löfik, no dlenolöd plu demü cil olik, ibo cil ola binom pelesävöl gudiko, binom läbik, e lanels binoms pledasogels omik»
Pos vöds at cil nelifik ädepubom, e mot no ädlenof plu fovo, al no tupön sepatakedi e sülapüdi cila.
— Pflaumer (Halle).
FASEDEL SU VÄTAB.
Nu no nolob, va li-jedon moni ona ini ud ina.
MIKAPÄLÜB KOFLIK.
Vomül: «Li-löfol, o Alfred, lifön su laned. — Alfred: Zelado, löfön su laned, o vomül, lejuit binom.
— Wettstein.
