Күпме һәйкәлдәр бар батырҙарға!
Орден-миҙалдары хисапһыҙ.
Ил яҙмышы һынау үткән мәлдә
Нишләр инек икән ир-атһыҙ?
Мин батырҙар менән ғорурланам,
Улар ирлегенә һоҡланам.
Улар лайыҡ хөрмәт-иғтибарға.
…Әйтер һүҙем бүтән турала.
Ғүмер буйы данлы булыр өсөн
Ҡайһы берҙә етә минуттар,
Ә бит ғүмер буйы батыр йәшәп,
Дан күрмәгән аҫыл заттар бар.
Ҡатын-ҡыҙҙар…
Ялҡау ирен һөйрәп,
Тәрбиәләй бала-сағаһын,
Туйҙырырға бөтә ғаиләһен
Ҡайҙан таба икән сараһын?!
Араҡыға донъя алмаштырған
Аҙмы беҙҙә кәкүк-атайҙар?
Барлы-юҡлы тинлектәрен тотоп
Кибет тупһаларын тапайҙар…
Ҡатындары, йөк аттары кеүек,
Донъя йөгөн төптән тарталар,
Бала өсөн янған әсәләргә
Юҡ бер ниндәй ҡаршы-кәртәләр.
Сиге-ҡырыйы юҡ сабырлыҡтың!
Өҫтәүенә тағы батырҙар:
Ирҙәр- өйҙә.
Гастарбайтер булып
Өфөләргә китә ҡатындар.
Өфө генә тиһең!
Себерҙәргә
Китә хәҙер ҡатын баштары
Кейендерер өсөн балаларын,
Булһын өсөн икмәк-аштары.
Италия , Испанияларҙа
Ялланышып байға эшләйҙәр.
Ә ирҙәре…
Аҡса ала-ала
Һөйәркәләр менән йәшәйҙәр.
Бала өсөн утҡа-һыуға ингән,
Йәнен аямайса тырышҡан
Ир йөрәкле батыр ҡатындарға
Һәйкәл ҡуйыр инем ҡоростан!
Юҡ, алтындан түгел: матурлыҡ һәм
Байлыҡ мөһим түгел уларға.
Ҡорос һаулыҡ һәм сабырлыҡ кәрәк
Тормош һынауына сыҙарға.
Иҫ китерлек ҡатын-ҡыҙҙың көсө!
Ирҙәренә генә төртөлә:
Ғорурланырғамы улар менән,
Хурланырға микән – кем белә?
Ир-баш, ҡатын-муйын тигән һүҙҙән
Күптән булғандыр баш тартырлыҡ.
Күп ирҙәрҙең төштәренә инмәй
Ҡатын-ҡыҙҙарға хас батырлыҡ!
