Ванине (2011)/3
[54]
| III |
Ютась иеде ламо.
Телесь, кода тундоськак кизэнть марто, ковкерькстнэнь-цифратнень кармавтыця виекс а ловить. Сынь олячинь вечкицят. Азорт. Зярдо сама-туема, зярдо невтема обуцяст, сынсь кочкить. Вана нейгак: «графикень» коряс талай уш ушодовомаль эрямо-пиштямо, чикордомо-вешкеме телентень. Эряволь ды... сёксесь конёвсо тешкстнэнь лангс вановтонзояк эзизе кайсе. Кор кирди. Эри эсензэ эрямосо. Чувтотне умок кайсизь кизэнь оршамопелест, чополгадсть. Лиясто кельмевтни. Те — телекс. Ушось вана ялатеке сёксень. Шканзо коряс сэтьме, лембе, прок таштамковонь ушодомга. Секскак ламот якить шождасто оршнезь. Пертьпельксэнь истямо шкантень мерить телень сёксь.
Кулянь течи оймсемачизэ, сон кудосо. Валскень перть, эзь ойсеяк, котьмась каштомикеле, эли, кода умоктояк умок мерильть, моргасо. Сайсь мель панемс модамарень панжакайть. Аватнестэ, паряк, ансяк цёлаконь прявтось а соды, мезе те — панемс прякат. Пильгеть ушодыть ноцкаеме мартост «налксемадонть»! Чапакс путома, валскестэнть ичема, уштома, сывть теема... Окойники весе неть мелявкстнэ кадовсть удалов. Пекшень, сталмозояк а маряви, кши коймесэ таргсинзе панжакайтнень каштомсто, путнинзе вешкеземс ды вельтинзе ванькс, эль-эль начтозь [55] нардамосо. Зярдо саизе нардамонть, эйстэст цивтордыця сувось чаразь-поназь, мельде-валдо кепететсь потолокс. Куля сайсь пеель ды, вешкезем икеле стядо аштезь, ве пряканть керизе нилев. Сайсь палнэ, пувсизе — седе кельмезэ—ды сусксь эйстэнзэ. Солазь солась кургс саезесь. Тантей... Шождасто лекстясь мельспародонть: «А стяко валскень перть мунинь-колдовинь велькссэст, а стяко стоминь!» Лангост ожола-тюжат, алксост, чапакс юрось, чевте, теке поспангот. Кода а «соламс», эйсэст — велькссэнть ды чапакссонть — ой, велькс, топо, алт... А каямс тень эли тонань? Мезень кис эно кирдеви кардазсот, лекси-пувси кардосонзо латошка сюракшось?
Чикуншкадо мейле азоравась ожос шлизе-нардызе пичень келей лазонь, апак арто кияксонть, вальматнес понгавтсь ламоксть муськенезь, ялатеке прок одт, лов ашо шаршавт. Ацамковонь киртяня чинть лангс апак вано, кудопотмось аволь ансяк покшолгадсь, валдомгадськак. «Истят тевть топавтнинь ансяк Инечинь каршо...» — ледсь мелезэнзэ ды марямга шнызе эсь прянзо. Кудось ванькс, валдо, качады каштом ямонь судоварянь кутстиця чине. Паро! Эно мезе теть эряви, ава? Мезе теть а сатны?
Ужосонть мокни-моторды радиось. Мезде? Кевкстик азё...
Куля учи инже.
Варштась стенас понгавтозь ципакань вайгельсэ тикаиця частнэнь лангс. «Самаль уш...» — тешкстызе эськанзо ды вановтонзо каизе ульцяв ваныця вальмантень. Ювк ютась фуфайкасо, нумолонь кедень шапкасо цёраломань. «У-у-йк! — ноцковтсь седеезэ, ютась Кулянь сэрьга тантей соркс: «Окойники!». Калдоргадсь кузтемпень кенкшень циндересь, ды куроксто кудонь тарчксонть трокс эскельдясь, мельганзо чикорк пекстызе кенкшенть, Иван Васильевич Каргин. Се, кинь истя учось азоравась.
— Шумбрат, азорава! — арсесь ушосто совицясь. — Ы-ы-ы, вана сынь, кода мартот кортазель. Алкукс...
— Сыть — те паро! — мизолдозь мерсь ды эскельдясь инженть каршо Куля.—Кайсек ды ютак икелев. Фуфайкат вана тезэнь. Виде, виде — тезэнь, тулонтень. Шапкат — каштланго чирентень. Во-во.
— Сюкпря, Куля, — валтнэнь башка-башка ёвтазь, мерсь Иван. Юксинзе фуфайкань повонзо ды понгавтызе оршамопелензэ тулос.
— Вай, мекс талакадыть? Адя икелев. Ютак, ютак. Вана тонь таркат, — вастыцясь эрязасто ютась икелев ды невтсь ушов ваныця вальманть каршо стуворонть экшсэ озамо тарканть лангс.
Ансяк озамс эзь оза. Совась моргас, таргизе каштомсто валске путозь, зярс пси, сывельямонть, каясь ваканс ды кандызе инженть икелев. Мельга лазнэ лангсо ливтсь нилев керязь тюжа кувосывть панжакай ды вакашкесэ чапамо ловсо. Пенчпаргосто таргась пенчть. Шлыгорк лиссь кудыкелев ды совавтсь тол-ведь бутылка.
— Монь весе. Ну, кода кортазь, свадьба? — пейдезь-кецнезь кевкстизе Иванонь Куля, каршонзо лоцьк озамсто. Чамаумарьсэнзэ налксезевсть яндавинетне. Сельмензэ цитнезевсть.
— Кортазь, ы-ы-ы, тык кортазь! Тон — чиявтозь тейтерь, мон — мирдеть, — текекс пеедькшнезь, валтнэнь чуросто, теке чурькат озавтнемстэ, таркаваст путнезь, мерсь Иван Васильевич.
— Панжик, кайсек, «од цёра»! — кончтась, невтсь Куля сурсонзо икелест лавкань пачк невтиця «суликанть» лангс.
— Ы-ы-ы, стувтык, мезде кортакшнынек? Стувтык, тейтерь, стувтык. Алкукс... «Авань превть...» — а весть марсинь. Ы-ы-ы, «ашо» эли кодамояк «раужо»... Истят кедьгеть стуворонок лангс иляст валгоне. Ы-ы-ы, истя кортазель? Истя. Секскак...
— Ну тонекс улезэ, Ваня, — валтнэнь ёвтазь, икелензэ аштицясь, мизолдозь саизе кежень савтницянть киргадо ды цяр путызе аксялов, маласояк илязо уле. — Ярстано эрь. Аволь ансяк тонь, моньгак пекем вачсь... Кирдевить вельть. Шказо уш оно зяро!
— У-гу, — марявсь каршо.
Ярсасть чатьмонезь. Марявсть ансяк пенчтнень клянськаемаст ды стенасо шкань онкстницятнень тикаемаст. Аламос аштезь сынст юткс совавтызе вайгелензэ, яволявтсь эсь таркадонзо, марявлизь веленек, Кулянь якстере атякшозо: кардазса-а-ан!
— Ы-ы-ы, тантей ямось! — сезизе нурька шкань чатьмонеманть «чиявтыцясь» ваканстонть ямонь амольдямсто. — Алкукс...
— Ну, а монсь? — пейдезевсь, кивчкадсть чамасонзо яндавинетне, Куля. Беиьк путызе пенчензэ. Аравтызе чаманзо Иванонь каршо.
— Тонсь? Ы-ы-ы, — мизолдозь варштась Иван Кулянь сельмс, лоткась каволямодояк, седе тов, кевкстемадонть башка, мезеяк эзь мере.
— Варчитяя панжакаень, келеть нильсак. Арсян, нить истят тантейть эзь пансе. Ну, варчить, варчить, мейле мерят.
Иван чапамо ловсо марто сэвизе ве печтькенть, омбоценть, нардынзе кедькоморсонзо турванзо, кепедизе вановтонзо [57] «одирьванть» лангс ды путсь питне:
— Виде, истят тантейть эзинь варчне! Ы-ы-ы, шнатан. Алкукс.
— Марян, Ваня! Сюконян паро валот кис.
Меельцекс симсть поркснезь сахар марто чайде. Симсть апак капша, пувсезь-копорязь, седеень витезь. Псилгадсть. Кулянень эзь учово симеманть пезэ. Дарманозо эзь сато. Сон путызе стопканзо икелензэ, веркасто стясь таркастонзо, эскельдясь однасумонзо ваксс, ды пеедькшнезь, теке цельця тейтерь, серьгедсь: «Сэ-э-пей!» Васня кутмордызе, мейле, виздеманзо стувтозь, педязь педявтынзе турванзо Иванонь турвас. Тона, озадо аштезь, кавто кедьсэ кундызе Кулянь пацявтомо прянзо ды, весемеде стувтовозь, верендемсь палсемензэ — чамаумарьс, сельмес, кирьгас...
— Вай, кодамо виеват, вай, зяро тол эйсэть! Кадомак, кадомак... — ансяк валонь кис кардась Куля цёранть, сонсь новольсь кумажанзо лангс, лекшкадсь эйзэнзэ... — зяро, кода мон учинь те пси коволонть...
Стямсто, рунгонзо витемстэ, авась ёвтынзе валонзо тошказь, яла тензэ эзь кемеве — весе те аволь он. Сон стясь стенас понгавтозь чавачамонть каршо ды варштась эсензэ лангс. «Ну, ава, псить зярс эзь энгамо!» — мерсь эськанзо. Витинзе-пурнынзе Ивандо мейле тапавозь черензэ.
— Лисни, тон — ы-ы-ы, одирьва, мон ней мирдеть, алкукс, — мизолдозь мерсь Иван ды стясь Кулянь ваксс.
— Кода кортазель...
— Ней мезе, ы-ы-ы, тесэ карми монь кудом?
— Кода кортазель, Иван дугай, — нурьк-нурьк тейсь прясонзо.
Иван арась аванть каршо, каинзе кедензэ сонзэ лавтов ланга ды кувать вансь сельмезэнзэ.
— Ну, мезе неить? — кевкстизе Куля.
— Кавто сэнь, прок маней менелесь, балягинеть, алкукс... — Иванонь сельмсэ кувтолдсть вечкемань толнэть.
Истя ушодовсь Дораень Кулянь омбоце цёраломань марто эрямозо. Кодамо сон карми — теде эзь сода. А соды теде кияк. Те чокшнеденть икеле фермасо-косо, вейсэнь тевень теемстэ вастневсть сынь сеедьстэ ды эрьва кода, эрьва ёндо онкстнекшнизь вейсэндявомань тевенть, никс-полакс улемаст. Те кемсисемге-кемгавксово иесэ венчнить-урьвакстнить чамадо-чамас варштамодо мейле. Одсто а зярдо арсемс! «Вай, кодат мазыйть турват, [58] вай, зяро домкачи сельмесэть! Вай, кода гайги, кода вечкевивайгелеть!» — вайкснить-тсить ды седе курок загсов. Ниленьгемень песэсь а капши чопавтемс эрькень а содавикс таркас, арсесынзе тевтнень челькинень пес: кис-мезс машты тееме, кинь-кодат обуцянь ёнксонзо, кие-мезе вечки, кинь кодат эрьмечннзэ... Ансяк а манявомс, ансяк илязо пештеве кенярксонь паргось нусманячисэ ды ризкссэ, ансяк иляст верьгеле стенатнень ютксо сёвномат.
Содазь, лият сыречисэяк вейсэндявкшныть прянь апак яжа. Вечкемась аволь пек вечксынзе арспцятнень. Эйсэнзэ сеедьстэ варма юхаи. Кой-кить эрямост перть нилексть-ветексть урьвакстнить! Течи — киштемат-морамот, ванды — эрьвась эсензэ пелев. Вечкема, вечкема... Аволь, аволь ансяк медень тансть эйсэть, сэпедентькак саты, лиясто натой чадозь чады. Ды весе тень кирдема-тардема, изняма. Карминдерят ансяк ламбамонь кочксеме, тееват нимилявокс, чахрасто чахрас ливтницякс.
Ломанесь — тень умоктояк умок редякшнызь инетне — те Галлакгика. Эйсэнзэ, рунгосонзо ды оймесэнзэ зняро эрьва мезе, зяро а арсевияк. Тень ютксо превень-ёжомарямонь мастороськак. Ды эрьвань сон — эсензэ. Ойменть а кармавтсак эрямо тень эли тонань коряс.
Куля ды Иван Васильевич, Каргонь Ваня, кемсть, кода малав эрьвась: эрямост туи эрьва ёндо арсезь-онкстнезь, вейсэнь мельсэ валакавтнезь киява, чопода пельть велькскаст зярдояк а сравтовить.
— Ы-ы-ы, мезе, одирьва, — прясонзо чиремтнезь невтсь Иван ацазь коникенть ёнов, — зяро шказо? О-о, шказо байтяк... Эли одирьванть псизэ маштсь?
Куля тень каршо мезеяк эзь мере. Шлинзе-нардынзе ярсамодо мейле пенчтнень-вакантнэнь, путнинзе таркаваст, коське нулынесэ нардызе стуворонть, варштась тикаицятнень лангс ды чатьмонезь ютась коникенть ваксс; штавтызе эрьва кодамо тюсонь панкскестэ стазь тавадксонть, кавшакавтынзе тодовтнень. Тень теезь, апак учо куродызе нувара ёжо. Ледсь мелезэнзэ икелень мирдезэ, Миколь, певтеме кеняркстнэ ды, ловт, зняронь туро майсевематне, валозь сельведтне те свал чевтестэ ацазь тарканть лангсо. Кода илязо уле, те весе ульнесь сонзэ, сынст, те ульнесь эрямо, од шкань панжовкс.
Ледстязденть мейле Куля та-кода мельтеме, апак капша каизе ашо, пиже лопинесэ пургсезь-мазылгавтозь ковтанзо, юкстизе юбка карксонзо, ды оршамось нолажтсь кияксос. Кепедизе ды [59] сравтызе стул ланга. Кадовсь ашо коцтонь чова алгапанарсо. Сувнекс сыця нусманя ёжотнень, кавтолдоматнень полавтызь лиятат. «А!» — мерсь эськанзо ды эрязкалезь чопавтсь велькс потмонь лембентень.
Иван аштесь «урьвакстомань» стуворонть песэ ды сельмень тетькезь вансь кайсицянть лангс. «Мазый авась, — чарасть удемсэнзэ арсематне, — мазый аволь ансяк чамас, рунгоскак... Авань мазычитне весе мартонзо...»
— Ну, тон мезе? Арсят венть ютавтомс стуворонть песэ? Эли тандадыть? — кулдордыця вайгельсэ, паро ёжосо, пеедькшнезь пшкадсь Куля «чиявтыцянстэнь» лангозонзо ванозь.
Иваннэнь омбоцеде меремс эзь эряво. Ютась коникенть ваксс, курокке кайсесь, мадстизе толонть ды эцесь, чикордозевсть пружинатне, лембе, ламонь алтниця велькссэнть алов, Кулянь ёжос.
... Валскень кото частнэ талай сёксня эли телень куншкава — те, ловт, дюм ве. А ванстындеряй менелень сэтьменть пешксе ковось — чопода-чопода! Лов, варма, давол, тарькс якшамо... Кодат «кулят» илязо сравтне пертьпельксэсь, тевесь — тев, улезат таркасот ды кундазат топавтомонзо.
Течи, кода мерезель, фермань малав весе важодицятне пурнавсть Якстере ужинезэст. Кить аштесть удало стенанть ёжова стядо, кить — озадо. Васень, сехте од, сехте покш кулясь
— Иванонь содамокс совамозо, исень «свадьбаст». Инжеть эзть тердтне, ялатеке весе содасть — Ваня Васильевич ютась эрямо Дораень Кулянень, теевсь Кузвелень содамокс. Мелень ванозь, кой-кува пеедькшнезь арсесть «одтнэнень» шумбрачи, лембе кудо, вейсэнь тевть. Кие-бути ледстизе содавикс валмеревксэнть: кадык вейкесь ули салмуксокс, омбоцесь — сурекс. Паро валт ёвтась колхозонь «генералоськак», Григорий Павлович, кона те шкастонть понгсь фермав. Эзь кемевеяк, сон лиясто-зярдо машты цёковокс морсеме.
Кулянь мельс весемеде пек тусть ялганзо, Шорянь Агаень, валонзо.
— Мон теть, Куля, вейке арсян: чачтома иетнеде кадовсть теть аволь ламо, седе курок чачтак цёра! — неть валтнэнь ёвтамодо мейле сон стакасто лекстясь ды стамбарнэ, пельсмарямга, прядынзе валонзо: — Илязо лисе, кода Миколь марто эрямсто.
— Сюк, Агай оинем, паро валот кис, — мерсь кеняркстонть талнозь Куля.
[60] Каргин, Кузвелень содамось, эземпесэ озадо аштезь, чатьмонсь; вадяшась кумажанзо лангс путозь лангакс марто варьганзо. Кунсолось кортыцятнень. Вансь лангозост. Мельспародонть салава, турвань апак яво, мизолдсь сельмсэ.
Агай эзь ойма. Эскельдясь весемень икелев, стясь Иванонь каршо ды поладынзе валонзо:
— А тон, Каргин ялгась, карвот иля кундсе! Седеяк веть. Марят? То-то... — аволь пшкадсь — серьгедсь, сурсонзо шикаезь, чанстьте пешксе Иван Васильевич пелев.
Кой-кить раказевсть, ламот эзть кирдеве, цяпазевсть. Теке марто стякшность таркастост ды, пеедькшнезь-шалнозь, дубор-дубор лиссть, вейсэ лембень сувонть марто, ушов тевест, кинь-кодамо, топавтомо.
Талай сёксень ванькс, шумбрачинь казий экше коштось, чоподасэнь валскесь нолдынзе ломантнень эсь элезэнзэ.
* * *
— Ули мелеть, Ваня, течи аванень молемс? — пшкадсь Куля мирдензэ вакссто стямсто чокшне чевтестэ ацазь, ней пуворязь-мерьказь лембе таркастонть. — Течи оймсема чинек. Ну кода, ютатано? — Микольде меште Кулянень зярс од лемесь эзь тонадово, марявсь тензэ седейс а педицякс, кодамо-бути пеедькшнемакс — Ванька-Танька, ванька-станька. Иетнеяк ютксост малавгак а вейкеть. Кеменьшка иеде сон од Ивандо. Секскак зяро-бути шкань перть валгонесь превзэнзэ, теке озязнэ тарад пес, мель — меремс тензэ Ваня леляй. Каня пшкадят ней истя тензэ? Визькс. «Иван Васильевич? Паряк, истя, кода прявттнэнень? — сакшнось зярыяксть мельс Куля. — Фу! Монськак а содан мезть лапаксан. Ваня! А мезть кавтолдомс».
— Мекс а молемс. Ы-ы-ы, умок уш теевемаль содавиксэкс низавань марто, алкукс... — сеске стямдо мейле, оршнемстэ ёвтызе мелензэ Иван.
— Кортазь? — каятотсь моргасто Кулянь жойниця вайгелезэ.
— Кортазь! — каятотсь цёрань каршо.
— Сыргатано чикуншкадо мейле. Ары? Вана панян потмо прякат. Топонь. Вечкат истят? — каштомикельде нармуннекс сралесть кудонь келес валтнэ.
— А тон? — кевкстизе кевкстницянть Иван. Сонсь эскельдясь каштланго чирес, венстизе кедензэ ды саинзе коське лембе кемензэ. Тонгинзе пильгезэнзэ.
— Мон седеяк пек! Алкукс... — мерсь, прок чапизе Ваня-Иван; стенас понгавтозь шлямкаентень покш кечесэ амольдясь томбалангсо чугунстонть лембе ведь, ушодсь чаманзо шлямо.
— Ну, шказо таргави талайс. Содат, прякатнень марто эвтема аволь аламо. Те тынь, цёратне, мезекскак тень а ловтадо, мезекскак а путтадо авань тевтнень. Варчавлинкак, лиятат моронк улевельть, — чапаксонь ичемстэ Куля ёртсь кевне цёратнень пирес.
— Ы-ы-ы... Аволь весе, — эзь пра ве мельс нинзэ марто, мерсь седе лембестэ оршнемстэ Иван. — Мон кардазов.
— Ну, мон мейле лисяв. Васня каштомонь тевень прядсынь. Содан, Ашай учи, потявтома, — гайгезевсь аванть вайгелезэ кудосто лисицянть мельга.
... Чикуншкадо мейле, кода кортазель, нить-полат Кулянь чачома кудонзо, Валдаень, икелельть. Кулянь тетязо чавовсь войнань васенце читнестэ «За Родину, За Сталина». Теде кулянть само чизэ ванстовсь пелькскень пес. Кадовсть превс путыцявтомо ды трицявтомо. Од кудо аванстэнь эзь кепедеве. Ды косто?.. Вете тейтерть. Ниле чиявтомат, мирденень ниле максомат; Ансяк эль-эль соват вийс, кенерят пильге лангс стямо, ванат, таго кудат-кудават, уредевть-мезть чарыть. Таго свадьба анокстак. Кодат кудот? Секс Валдаень эрямо пизэст явови лиятнеде. Сон матрась, эчке пичень чочконзо, лазонь коняксозо чополгадсть; паро, латозо полавтовсь, шиферэнь, пиземеде а мезть пелемс, аволь кода икеле, пачк кольгиця олгонь «паця» ало. Полавтовольгак алксозо, юрозо, иензэ поладовлинзе. Кода тень топавтомс?
Аламодо апак пачкоде эскельксэст киртявсть.
— Да-а-а-... — ускозь ускизе рузонь нурькине валонть Иван, Валдаень весемеде покш-сыре содамост, нусманя, сормсевезь чама кудонть лангс ванозь.
— Мезе «да-а»? — редизе Куля мелявтозь ёвтазенть.
— Витнема веши авать кудозо. Ы-ы-ы, вана мезе. Алкукс... Чочконзо, ванан, пичень, эчкть, макшояк, маряви, эзинзе тока. Ы-ы-ы, те паро. Алксонзо полавтомс — кавто пингеть карми аштеме.
— Пароль, ды... — сускизе келензэ Куля.
— Мезе «ды»? Ы-ы-ы, авать содамонзо, зяро? Вейсэнь вийсэ [62] аволь истят тевть тейневить. Истя? Истя. Аламонь-аламонь, ванат — ламо. Ы-ы-ы, петя теемаяк. Анокстама, чарькодеви, ламо-мезе рамама, ускома... Теде ковгак а туят, алкукс...
— Валсо—стакачить а эрсить. Весе тееви эрязасто, курок, мазыйстэ, кундат тееме — чарькодьсак.., — каясь трокс вал Куля.
— Шумбрачи Пазось максозо... — аламос чатьмонемадо мейле цяк а эськанзо мерсь Иван.
...Клавдя неинзе сыцятнень вальмава. Мекс эрявсь варштамс ушов, сонськак а соды. Лиссь истя — варштась шкастонзо. Сеедьстэ токнозевсь седеезэ. Капшазь, нулынеяк эзь кая ланганзо, лиссь кузтемпес вастомост. «Экше ушосонть, — бизнэзевсь превсэнзэ, — мекс, сыре карго, кепе-штапо лисить, каня а содавтнить текекс лия тейтертне?»
Кувака кудыкельксканть дубор-дубор ютазь, совасть кудос азоравась ды апак учонь инжетне. Те ансяк кортыть истя. Учось ды кода! Кулянь одс мирденень «лисемадонть» мейле эзь тукшно прястонзо кевкстемась: «Зярдо сыть? Зярдо тееван содавиксэкс од содамом марто?» Вана учовсть. Пачкодсть окойники.
— Шумбрат, авай! — ансяк пекставсь мельгаст кенкшесь, пештизе кудонть Кулянь ванькс, аламодо жойниця вайгелезэ.
— Шумбрачи, — а пек марямга, вайгелень лепштязь мерсь мельганзо совицясь, Клавдянень асодавикс цёрась. Талай уш эзть марсе те кудонть стенанзо цёрань вайгель. Сакшныть, мерема, сакшныть содамотне! А мезть пеняцямс. Ялатеке те вайгелесь ледстявтызе цёрань арасьчинть.
— Ютадо, ютадо! — нарвицькакс чаразевсь Клавдя. Саизе Кулянь кедьстэ годманть ды путызе стуворонть вакссо стулонть лангс.
Сыцятне кайсесть. Оршамопелест понгавтызь кенкш вакссо чавозь, тулонь таркас, эсктнес ды ютасть апак арто, ваньксстэ шлязь кияксканть икелев.
— Авай, прякат панинь. — Куля таргизе юдмастонзо пряканть, путызе стуворонть куншкас.
— Сюкпря, тейтерем. Ней эно содавтомак эриялгат марто, — мерсь Иванонь низавазо ды кедькоморсонзо нардызе войнадо икеле рамазь стулонть, кирьксала, теке покш пачалго, лангонзо, тердизе Иванонь озамо. Вайгелезэ аванть мештестэ лисиця, эчке ды ванькс.
— Те цёрась, авай, мирдем, — апаквизде, аванзо сельмс ванозь, мерсь Куля. — Мон тонеть сондензэ ёвтнинь.
Кудонь прявтонть весемеде покш тейтерезэ панжизе стувор-[63]потмонть, сайсь пеель ды керсизе пряканть палонь-пал.
— Иван, а манявкшнан? — пшкадсь азоравась цёрантень лембе голландканть ёжос арамсто. — Вастневиця лемесь, Пазонь.
— Нолдык чумонок, авай, седе икеле эзинек саво, — Куля вансь аванзо чачос ды арсесь: «Кода сыредсь тиринем! Сормсевкстнэ истяяк-истяяк чаманзо «сокизь», ванькс-валаня тарка эзть кадо...».
— Эзиде саво, кажось а покш, ней вана сыде! — пор ведьсэ артозь голландканть вакссо стядо аштезь, мельспаронзо апак кекше, мерсь Клавдя.
— Авай, тон иля ризнэ, иля мелявто! Минек весе карми кода эряви. Содат, тейтереть прясо вармат зярдояк эзть веля, — оймавтызе аванзо Куля. Сонсь котьмась-анокстась стувор.
— Эно лездазо тенк Верепазось. Васенценть, Миколь, марто... — эзизе прядо мелензэ, эзизе ёвта мезе ёвтыксэль Клавдя. — Озномо кисэнк карман. Тон, Иван, аволь минек велень. Костонь?
— Ы-ы-ы, мон шабра велень. Важодян фермасо. Куля марто. Куля потявты, мон стада ванан, тельня — ы-ы-ы, андан... — колмо-ниле валт ёвтась эседензэ Валдайтнень од содамост низаванзо кевкстеманть каршо.
— Авай, мон уш ёвтнинь теть... — ледстизе, кепедизе прянзо аванзо ёнов Куля.
— Каня те шкас, Иван, эзить урьвакстне? Иетне, ванан, тонь аволь аламо.., — кевкстизе, прок эзизе маряяк тейтерензэ Клавдя икелензэ озадо аштицянть, сонсь каршо валонь апак учо совась каштомикелев, ливтсь эсензэ паневть розень кши копша ды пельлитра ашо вина.
— Ы-ы-ы, ульнинь. Авай теть мереме а карман. Седе ён — Клавдя патяй, — мейле поладсь: — Ули тейтерем. Авадонзо... ы-ы-ы, кувать ёвтнемс. Алкукс... Трия-кастыя тейтеренек ськамон. Ней сон уш мирдень экшсэ. Мон Кулянень ёвтния, кода мереви, биографиям. «Мезе, зярс тень майсевемс чаво кудосонть?» — аволь весть сакшнось превзэнь урьвакстомадо мелесь. Ды вана сынек Куля марто ве мельс. Кеман, Клавдя патяй, тевенек-ладонок, ы-ы-ы, берянь янга а туить.
— Паро, паро, лездазо Пазось... — каятотсь Клавдянь эчке ванькс вайгелезэ моргав одс совамсто. Таргась каштомсто сывельям марто чугуннэ, каясь ваканс ды кандызе инжетнень икелев. Мейле ливтсь пенчть, кедьгинеть. Эзь аште тевтеме Куляяк. Кирвазстизе керогазонть, путсь чаекс лакамо ведь. Мейле лиссь мацтов, совавтсь [64] салтозь капстапря. Ашо-ашо! Керсизе палонь-пал ды валызе кансёройсэ. Авазо капстанть ваксс путсь вишка чакшкесэ ловсос пидезь керсезь модамарть. Лангаст пенксесь тюжа. Лангозонзо ванозь сельгеть чудезь туить. Тарка муевсь чапамо ловсонтеньгак. «Вантака, кода шкастонзо ловсонть кандызь шабратне!» — ледсь Клавдянь мельс. Каштомось уштовсь парсте, теке сонгак марясь — сыть инжеть: ямоськак, модамартнеяк «лексесть» псисэ.
— Саты эно, эйкакшт, озатано, варчасынек, мезе макссь Верепазось, — кармавтсь кудазоравась ды вановтсонзо невтсь, кинень козонь «новолемс». Ават-тейтерть каштор-каштор ютасть вальманть каршо таркантень. Каршост, менчевксэв «кутьмере» марто ташто стулонть лангс озась Иван.
— Лисни, те ней свадьба? — мизолдозь мерсь Клавдя ды педявтызе вановтонзо каршонзо аштиця цёранть чамас. Саизе кувака кирга чопода-пиже суликанть ды венстизе стуворонть трокс Иваннэнь. — На, панжт, тон цёрат!
— Клавдя патяй, иля мелявто. Минь Куля марто...
— Я, те кода истя? Каня эрсить истят свадьбат? Цёраломань, ды а сими? — сертизе, эзь максо азоравась ёвтамс мелензэ цёрантень.
— Тонсь неят. Эрси истяяк, — эзь пота инжекс васенцеде сыцясь.
— Паро, паро, куш цисланзо кис, петнявкске...
— Саты, авай, а мезть нернемс, — каясь вал мирдензэ кис Куля.
— Арась, Клавдя патяй, — Иван саизе низаванзо кедьстэ венстезь суликанть ды колдорк путызе вакссонзо кувака эзементь алов.
Теевсь каштмолема.
— Пеедькшнезь-аволь — ялатеке мирденень лисема, — сезизе чатьмонеманть, поладынзе Кулянь валонзо авась. — Истямо «коське» кургодо эзинь марсеяк.
— Свадьба... Ульнесь Кулянь, — валтнэнь путнезь путнесь Иван, — ы-ы-ы, моньгак ульнесь. Ы-ы-ы, тонтькак, Клавдя патяй, зярдо-бути тонтькак чиявтокшныдизь. Авам, мельсэнь, монь свадьбас, ы-ы-ы, пельвеле серьгелесь. Ламот таргонь перть велеванть тар-тур, чиремкшнезь, теке морязь таракант, якасть. Мезе лиссь? Седе паро а ледстнемскак! Улевельгак тевесь, ы-ы-ы, тень эйсэ...
— Видестэ кортат, Иван,—ледсь Клавдянь мельс умонь-умонь [65] мирденень лисема покшчизэ, оймась ды мерсь: — Улезэ эно тынсекс, цяркавтомо ды церьковавтомо. Ялатеке арсян тенк ве лувонь эрямо, вейке-вейкень мелень ванома. Максозо Инешкипазось тенк шумбрачи. Ули сон — весеметь ули. Теня, лездазо Кулянень ... пакшинеяк муемс. А?
— Ну, сюк, авай! — эзь кирдеве Кулянь кенярксозо марязденть; пачканзо ютась лембине, ды капшазь токнозевсь седеезэ.
Теевсь општ. Колмонест сайсть пенчть ды вередемсть, зярс допрок эзь кельме, пси ямонтень, мейле пачкодсть чапамо ловсо марто модамарьтнес. Иванонь мельс пек тусь кансеройсэ таньшкавтозь салтозь капстась. Кельме, калгодо, эль ламбшть мери. Пал, мельганзо омбоце... Сётор-сётор сёторды пееть ало сусковксось. Ярсат ярсавлить!
Лепштизе-лоткавтызе пенчень «киштеманть» Кулянь вайгелезэ. Сась превзэнзэ мель содамс очконь нардавкс сазордонзо.
— Ну а Любань пельде кулят арасельть? Сёрмине эзь пачколе?
— Арась. Ней уш кодат кулят. Самонзо учан. Кадык якшамковонтеньгак байтяк. Учан. Меельце ие уш, тунда прядови тонавтнемазо. Каня муеви тензэ таркине тесэнь школасо, каня арась...
— Эряви пшкадемс школань прявтонтень, — ваканстонть капста палнэнь саемстэ превть макссь аванстэнь Куля.
— Арсян неть читнестэ молемс, кевкстьса... — эль а тошказь мерсь Клавдя.
— Паро. Ну а венчамодо? Эзь ледстне?
— Арась, мезеяк а маряви.
... Любасто ават-тейтерть шаштсть — кода, косо, мезе? — Верас, Верасто Таняс, кевкстнемаст-ёвтнемаст прядызь Натасо... Кассть ды срадсть, эзь марявгак, масторонть келес. Вейкесь эйстэст пачкодсь мик Сахалинэв. Омбоцесь, Таня, «озась» немецень икелень ошс — Калининградс. Пурныть азё, стявтт кудо! Велень эрицякс кадовсь ансяк покш патяст, Куля. Любаяк, секень вант, седеяк а муевиндеряй теске тарка, келемтьсынзе сёлмонзо, либорк туи ковгак васов. Цёрантень вандынь чись седе неяви, тейтерентень сонзэ неемс стака. Сеедьстэ эрси истя: ков мирдесь, тов нись. Эрси, а мезть пелькстакшномс-кавтолдомс, мекевлангкак, ансяк чуросто. Седе сеедьстэ вана... Те умоктояк умок, ламо иеде икеле, ламот чачома таркастост ковгак эзть тукшно. Чачсь, мертяно, тейтересь те велесэнть, теске чиявтсызь мирденень, [66] теске печтясы пингензэяк. Паро, эрямонзо перть савиндеряй тензэ улемс шабра кой-кона велетнесэ.
Мезе ульнесь — ульнесь. Течинь тевтне, течинь эрямось, илатне, кирдатне, койтне лият. Сынст а путсыть натой ютазь пингенть ваксс.
Иван, каванямонть кисэ сюкпрянь ёвтазь, стясь стуворонть экшстэ ды озась стенанть кувалт таргавозь келей-кувака эзементень. Нежедизе кутьмерензэ чапонь чочкотненень ды кунсолось аватнень кулдордомаст. Шкань-шкань, сонськак а соды мекс, шожда нимилявнекс совсесь превзэнзэ авадонзо ледстнемась. Эрьвань эсензэ эрямозо, эсензэ ялганзо-раськензэ, орманзо, ледстнемань паргинезэ... Налкставомань, безарькс ёжоткак содавтнизь: мезекс сонензэ асодавикс ломантнеде кортамотне? Ансяк ковгак а молят, мель эряви ваномс, учома. Вановтонзо икелев понгонесь вечкевикс салтонь капста марто кедьгесь. Мик янксезевсь, мекс озась лия таркас. «Берянь аволь уле, палнэшка пейтнень алов путомс! Истят тантей, истят седеень витиця капстат зярдояк эзинь варчне», — типельк-типельк ютась пряванзо мельнесь.
Сундерьгадома малава инжетне сыргасть кудов.
Самодо мейле Куля уштызе голландканть ды плита лангсо эждсь ведь. Сайсь мель муськемс-лопавтнемс чова оршамопельть, човсемс нардамот. Иван оршась одс ды лиссь кардазов ракшатнень андомо-симдеме, алксост урядамо, мейле совавтсь валскенень пенгть, кандтнесь ведь... Лездась Куляненьгак — ушосо палманьстэ-палманьс таргазь карькс ланга понгавтнинзе муськематнень.
— Пекеть эзь нурьгамо? — пшкадсь Куля ушосто вейсэ экше коштонть марто совиця поланстэнь.
— Ы-ы-ы, салтозь капстапрядонть мейле? — пеедькшнезь, гайги вайгельсэ ёвтызе мелензэ Иван кайсемстэ. — Истят тантей капстат зярдояк эзинь варчне. Алкукс.
— Сестэ эно чайде симтяно, ды паро. Ну кода? Туи? — пшкадсь чаень вечкицясь ведрасто чайникс ведень каямсто.
— Туи-туи, — паро ёжодонть, бешоконь, пейдезевсь Иван, кудованть мекев-васов яказь. «Ы-ы-ы, а вайгелезэ Кулянь, прок аванзо, мештьстэ лисиця, жой эчке» — мерсь эськанзо кияксканть эскелицясь.
Куроксто мельцек-мельцек пачкодсть коникс. Дораень Кулянь ды Каргонь Иванонь эрямонь книгастост таго ловновсь ды велявтовсь ёнкске.
[67]
* * *
Валскень потявтомадонть, андомань-урядамонь тевтнеде мейле важодицятне, кода мерезель, пурнавсть Якстере ужинес. Каргоць оршамопельсэст ойсесть эземга-кува, кортнесть вайгелень апак нолдтне эсь ютковаст ды учость колхозонь ветиенть. Кувать учомс эзь саво. Келейстэ панжовсь кенкшесь, ды экшень ашназа сувонть марто вейсэ совась учовиксэсь — Григорий Павлович Паксеваткин.
— Здравствуйте, товарищти! — пшкадсь, кода свал рузокс, куш вейкеяк руз кудынесэнть арасель, мейсэяк апак аца берякшке стуворнэнть ваксс ютамсто. Озась экшезэнзэ. Сеске предэнть ваксс стясь, прок палмань, Пошань Оло, прянь-одаронь покшось, «начальникень» кортавкссо — Владимир Петрович. Ламот аватнестэ сельме удалга мернесть тензэ «колхозонь бука». Ды, марямга-неемга, а стяко. Оло саизе пондакш прястонзо вирезкень кедень шапканзо ды путызе ваксозонзо эземс.
— Озак, — редизе прявтось, невтсь вить кедьсэнзэ, — кавто пильге лангсояк сизят, тонь, э-э-э... Сталмоткак аволь баранонь.
«Палманесь», мандонензэ лангс нежедезь, новольсь удалонзо эзементень.
— Весе, э-э-э, пурнавсть? — пшкадсь раужо сельме, чентязь тюс чама вейсхозонь прявтось, ды вановтсонзо ютась икелензэ озадо ащтицятнень ланга.
— Весе тесэть, — музгордезь кемекстынзе кевкстницянть валонзо фермань «ушмодеесь».
— Сестэ, товарищти, э-э-э, ушодтано. Монень маряви, чарькодиде кодамо тувталонь кувалма пурнавинек. Содатадо, тевенек аволь верев, мекевланг, аловпандт кеверить. Э-э-э, икелень коряс, товарищти, седе аламо потявтови ловсо, а вана тикше, лия андомапельть ютавтовить, э-э-э, седе ламо. Тень кода чарькодемс? Кие ёвтасы? Содан, товарищти, ловсонь, тикшень-мезень, э-э-э, салсемкатнедеяк. Те кода истя? Ков истя маштови?
— Те мекс истя? — эзь кирдеве, венстизе пшти келензэ, каясь трокс вал Шорянь Агай.
— Мекс истя?.. — сэтьместэ, вайгелень апак кепеде омбокстызе кевкстеманть Григорий Павлович ды невтсь сурсонзо вакссонзо аштицянть лангс, — вана мекс, товарищти, вана сонзэ, э-э-э, кевкстинк — мекс? Мекс эйстэнзэ, э-э-э, нейгак теке пурень лагунсто качады? Мекс? Мезть кевкстнемс, э-э-э, симицянь пельде? [68] Допрок, седей кельмевкс, тевензэ стувтынзе, мезе мельгаяк а ваны! Мезеяк перьканзо а неи. Зяроксть мартонзо эзинь корта, э-э-э, зяроксть эзия кройсе — стяко. Э-э-э, ёвтык, Владимир Петрович, зяро исяк потявтозель, зяро течи? Зяро — ламо-аламо — мелень коряс?
Фермань азорось пря эзь максо.
— Эрьва кружкась монень а ловови! — панжизе кургонзо, серьгедсь сон. Чамазо якстерьгадсь. Сельмензэ покшолгадсть.
— Аволитькак кайсе, э-э-э, киргапарьгат те кружкасонть, эрьва пенчкенть лововлик. Ней вана... — «озавтыксэлизе» вейсхозонь азорось Паксеваткин.
— Мезе «вана», мезе? — эцесь, эзь арсеяк потамо, иярдалесь «скалонь боярось». — Неть андомкатнеде ведень планонтькак а топавтсак!
— Саты теть ремедемс! — эзь кирдеве, кирвазсь прявтось, раужо сельмензэ цитнезевсть, лыказевсть муюконь нерьпензэ. — Э-э-э, каня мелят те шкане седе парсте андынек? Визькс, понимаш, ломантнень икеле. Надоенек «валгсь», фронтовик ялгай, винантень вана... э-э-э, допрок максык прят.
— Мон эсень симан, тонь зепс а эцнян! — чатьмонемань таркас кепедизе вайгелензэ, кирвазсь кежтнеде Оло. Лия, седе превей валт тензэ эзть муеве.
— Саты теть, тагояк мерян! — эзь кирдеве Григорий Павловичкак. Кизырьгадсь, стясь, цярадсь мокшнасонзо стуворонть ланга. Эшкемадонть тёкадсь лангсонзо карандашось, сорнозевсь конёв лопась.
Апак учо видемтизе рунгонзо лагоря сэрь Укштор Таня. А стяко кой-зярдо ды седеяк однэтне, сельме удалга мерить тензэ «сырькай». Аванть ашо пацянзо алдо, конянзо велькссэ, неявить седеяк ашо черензэ. Кода сась од тейтернекс тей, рузокс лемдезь МТФ-тень, ноцковтнесь ды ноцковтни скалонь поттнень, важодсь ды важоди шержейгадозьгак. Зяро ловсо потявтсь неть иетнень перть, а ловови. Меельце шкасто пеняцякшны кедензэ лангс: келя, педясь эйзэст потявтыцянь орма — чулксетить чинек-венек, ды суртнэяк какарьгадомо кармасть. Кода а какарьгадомс! Суронзо юткова, ловт, лотксемань апак сода чуди ловсонь лейне.
Стясь Таня, кавто сурсо лепштинзе-нардынзе, урядонь-мазычинь кис, кургонь чирензэ-ужонзо ды апак пееде пшкадсь промксонь ветицянтень:
— Э-э-э, кодамо таго? — Григорий Павловичень псизэ аламнеде матрась, седе парсте тарказост путынзе икелензэ аштиця конёвтнень, карандашонть ды варштась стядо аштиця кевкстницянть лангс.
— Дык а содан кода ёвтамскак, — кавтолгадсь авась, чамазо якстерьгадсь ёвтазь валтнэде. — Визькс. Оно, Валянь эль эзизе нарьга. Аватне тензэ аламо, тейтерненть лангс каявкшнось. Аволь ломань — туво.
Тень марязь, кенкш вакссо аштиця чоподасэнь халаткесэ чова чама-рунго од тейтересь тоцк стясь, панжизе келес кенкшенть ды визькстэнть выр-выр ношкстась ушов.
— Минь Агай марто идинек. Алтакшнынек чатьмонемс, лангс апаронть а таргамс. Дык, кода а ёвтамс! Те аволь ломань — алкуксонь бука.
— М-хы! Ды те жо, товарищти, э-э-э... — мезе-бути мериксэль, эзинзе прядо валонзо Григорий Павлович.
— Кенгелемат те весе! Кенгелемат! — пижакадсь, прок кияк нерьгстась ве тарказонзо уро, «букась». Чамазо кирвазсь чилисемань толсо. — Илядо кеме, илядо кунсоло...
— Те жо, товарищти, э-э-э, коень-закононь колсема, лиякс тенень мерить уголовщина! — промкскень ветицясь велявтсь вакссонзо аштицянть ёнов. — Содат, зяро, э-э-э, макснить истят тевтнень кис? Чатьмонят? Паряк, э-э-э, милицияв кучомат, кевкстьсак?! Сюконяк, э-э-э, Татьяна Антоновнанень ды Агайнень, эзть пачтя ков эряви. Фрон-то-вик... — Григорий Павлович, валонзо прядозь, озась. Кха-кха козкстась коморозонзо ды поладызе кортамонзо: — Вана истя, товарищти. Э-э-э, ютазь чокшне ветицянь куросо сынек истямо мельс: МТФ-нь прявтонть, э-э-э, каямс. Эряви тенек, товарищти, ломань. Ды седе кемевикс. Исяк тень кувалма кувать арсинек: э-э-э, кинь? Ногодонок, кода кортыть, прасть, э-э-э, Дораень Куля... Вачаева Акулина Семёновна лангс. Авась дошуз, тевензэ аволь ансяк содасы, э-э-э, мон меревлинь, вечксыяк. Пелькстамотнесэяк — кие-зяро потявты — иестэ-иес васенце таркатнесэ. Монь койсэ, товарищти, э-э-э, тевенек туить... Кода тынь вантадо тень лангс?
Куля аштесь стядо удало стенанть ёжосо, кунсолось. Марязденть тарск тейсь, пачканзо ютась пси ковол. «Вай, авакай! [70] Те ансяк эзь сатно, — марямга эль эзь серьгеде. — Кодамо монь эйстэ прявт? Эсень лангсояк аволь азоран. Курок эйдем карми. Иля арсеяк, Григорий Павлович...»
Талакадомань шкась лип ютась. Сась ёжос, мерсь:
— Григорий Павлович, тынь тосо, эсь куросонк, аволь педе-пес арсинк: васняяк монсь кевкстемалинь. Мелем ёвтавлия. Нейгак ёвтаса: а карман прявтокс! — каятотсь аванть талномадонть седеяк жойниця, мештестэ лисиця вайгелезэ.
— Мекс?
— А ёвтаса!
— Те кода истя?
— Мон тонеть мейле ёвтаса.
— Лиси, кемемс лангозот а мезть?
— А мезть, Григорий Павлович.
— Вана истят, товарищти, тевенек, — келемтинзе кедензэ мештензэ икеле Паксеваткин, — э-э-э, эно кинь, тынк коряс, путомс?
Прявтось нусмакадсь, неявсь, ёжозо кольсь.
Оло аштесь удалонзо стенантень нежедезь, прянь нолдазь. Икелензэ аштицятнень лангс эзь вано. Кежтне потсонзо лаказь лакасть. Кинь лангс — сонськак эзь сода. Сеедьстэ истя эрси: весе чумот, ансяк аволь мон...
Теевсь општ. Сонзэ сезизе чова мазый турва, «понгавтозь» кель, сэрейне, ёлганя рунго Шорянь Агай:
— Тесэ кескав превть а эрявить. Томбальга-кува а мезть лытамс. Каргиндэ вадря прявт а мутано. Сонсь Верепазось тенек кучизе. Тевень теиця, валонь кирдиця, а симиця. Нузякстнэнь нувсемасткак панси — а пели. Кеман, сонзэ марто тевенек ардозь туить.
Чачсь чатьмонема. Мерят, кияк серьгедсь «цю!» эли апак учо панжовсь икелест домка-келей кельме латко. Каштмолеманть колызе сонсь промксонь ветицясь:
— Мезе, товарищти, мелесь, койсэнь, э-э-э, а берянь. Минь Каргин марто ве велень. Содаса тынденк парсте. Содасынь, э-э-э, асатыксэнзэяк. Ды бути тусь тынк мельс, те, э-э-э, пек паро, понимаш! Кода тонсь арсят, Иван Васильевич?
— Ы-ы-ы, пелян аволь монь лавтовон коряс те канстось...
— Виде, сон, э-э-э, аволь шождынетнеде. Скалонть ков паньсак, тов моли. Ломаненть вана... — меельце валонть лангс прявтось башка нежедсь, варштась весень лангс, мейле поладынзе валонзо: — Аватнеде кортамс а савкшны, те лия статья. Ну, кода, кода тонсь арсят?
— Вандыс, э-э-э, улезэ вандыс, кортынек, — мерсь Паксеваткин стуворонть экшстэ стямсто-лисемстэ ды, пильгензэ аламодо ускозь — войнасо томбавомадонть, — ютась кенкшенть ёнов. Мельганзо увол-авол лиссть Якстере ужинестэнть лиятнеяк.
...Покш хозяйствань течинь тевтне кадовсть удалов, пест муевсь кудоютконьсетненьгак. Саразонь пизэшка сон, эсеть кудось, ялатеке нерьгат-нерьгат — пе а муеви мелявкстнэнень. Тень эйс кундат, тонань. А зяро ванома кудонь-кардазонь латотнень мельга?! Весемесь чувтонь. Ие-кавто ютыть — ванат, те наксадсь, тона чиремсь, тезэнь эске чавома, тозонь. Витнек, полавтнек, чавнок, вельтяк... Те ансяк васолдо ванозь велесэ эрямось неяви ёвксонь кондямо мазыйкс ды мельстуицякс. Мазыйстэ, ламо тюссо рисовазь-артозь велень кудыненть лангс ванозь сявадыть сельмест сетнень, кить чияк эзть эря велесэ, кить а содасызь сонзэ салов ливезензэ, эзть марсеяк коймень, сянгонь, пелюмань, ангорькаень, узерень, инксэнь недтнеде верьс почколиця пуворькстнэде. Карминдерят, теде башка, ёвтнеме авань кедьсэ топавтовикс тевтнеде — пидемань-панемань, штердемань-кодамонь, викшнемань-кемельдямонь... — пикссэяк киньгак а ускат эрьва кода шназь те кудынентень.
— Шкаяк арасель кортнемс, чинь-чоп ботынек. Прядома, марявсь, а ули тевтненень, — кортазевсь Иван панар сивень повонзо апак капша юкстнемстэ, мадеме анокстамсто.
— Виде, Ваня, — мерсь Куля, моргасто лисемстэ тевензэ прядомадо мейле. Сон ютась икелев, озась вить стенанть ёжос аравтозь стуворонть пес, шождасто таргизе оймензэ.
— Ванды валске ёвтама мелем Палычнэнь, — Иван ушодсь кортамо седе, мезесь эйсэнзэ чинь-чоп эзь кадно.
— Содазь ёвтама, — мерсь азоравась. — «Ну мезе, тевтне мадстевсть, шказо эстеньгак чувто лангс» — юв-яв ютась, теке басом, пряванзо мелесь».
— Арсян, эряви арамс. Истямо мельс прынь, эль марямга, мокнозь мерсь цёрась, — аволь весть ногодон кайсинь.
— Вай, мекс-бути пелян. — Куля стясь таркастонзо, ютась, каинзе кемензэ ды кузсь эземс — ветямс налост стенас понгавтозь частнэнь.
— Оно тон кодамат! — цильнезь мерсь авась эземстэ кельме кияксос эрязасто валгомсто.
— Теня, тон истя, ы-ы-ы, иля кузне, илязат ва пра, алкукс... — ледстизе Иван. — Монень меревлить.
— Иля пеле, а пран! Ну мон таго текеде. «Локшонь» тарканть саиндерясызь, сестэ ков молят? — Куляяк ушодсь мадеме анокстамо: юкстизе човоньс сюлмазь ашо пацянзо, каизе ковтанзо.
— Э-э-э, балягинем-дугинем, мельганзо пек уш ламо пансицят арасть. Ы-ы-ы, аволь пряник. Иля пеле, пилыть тензэ а теевить... Истя? Ы-ы-ы, улезэ, кода кортыть, кирьга — сивексэсь муеви, — вадяшизе валсонзо Кулянь, стясь ды кепе ютась, сонськак эзь сода мезекс, чоподасо копачазь вальмантень. Мезе алтни валскентень менелесь? Вансь, прок мезеяк редясь сод чоподастонть.
— Ну мезе, варчик! Ох и ацирьгалемс теть сави аватнень марто... Минь, аватне-сеятне, у-у-у!.. А савтови тенек... Те а истя, тона... Вейкесь сюронзо невтьсынзе, омбоцесь... — сень неезь, кода Иван ваны вальмаванть вень чоподантень, поладынзе валонзо: — Мезе тосто, вечкевиксэм, неят, ушостонть? Мадстик толонть ды мадть! — Куля юкстизе-нолдызе рунгонзо кувалт кияксс юбканзо, путынзе оршамканзо эземнес, увк штавтызе велькссэнть ды празь прась коникентень.
Ютась тей Ивангак.
Кашт. Сонзэ колсить стенас понгавтозь, гиря марто «якинь-кайтне» — частнэ. Тик-мик, тик-мик... — онкстнить шканть, кона теке чувар певери чуро сувтемень пачк. Лезды тенст, телесэ тандавтниця сёксенть лангс апак вано, цирькунось. Ци-и-рь, ци-и-рь кайсети каштом алдо кайгинесэнзэ седямозо. Цирть-цирть марявить таргсевиця ванькс гайтензэ.
Иван састыне чиремсь нинзэ ваксс. Венемсь. Мадсь кунст. Сельмень конязь кунсолось чопода каштмолеманть оймавтыця, салава-салава моравиця моронзо, «якинькайтнень» ды цирькунонть кайгань концертэст. Кармакшнось уш сутямомо.
— Эзить матедеве? — штатызе удомань самонзо пилезэнзэ лексиця Кулянь вайгелезэ.
— Арась, — тарск мерсь матедевицясь.
— Эрь кедеть, — мерсь авась, саизе мирдензэ керш кеденть, кепедизе алга панаронзо ды путызе кедь коморонзо тороземезь штапо пекензэ лангс. — Ужо-ужо, иля капша, општ мерть. Марясак?!
— Вансынек... — потсонзо ойминенть пстыляманзо кунсолозь, мерсь Куля. Мельспародонть турванзо явовсть мизолксос.
— Ы-ы-ы, а мезть «ваномс», алкукс... — кемезь ёвтызе мелензэ Иван ды саизе кедензэ.
Куля оймень эждиця, кенярксов ёжотнеде эзь сода мезе меремскак. Кода а кецнемс! Ней сон, кадык зярс эзь чачтояк, — ава. Од, зярс лавшине, омбоце седей чави седеензэ ало! Кемень иеть якась лангс ванозь, шумбра мазый авакс, кемень иеть авакс арасель, прянзо истямокс эзь маря!
— Эрьга, цёрам, кедеть лепштяса, — пеедькшнезь тошкстась Иван Кулянь пилес, прок пельсь эйдесь тандады вайгельдензэ, ды таго венстизе, путызе кедензэ нинзэ почовидьга пекензэ лангс. Таго теке: тук... тук... Ве таркасто тысмади, омбоцестэ. — Покш цёра, оляс лисевель, чопода тосо тензэ... Иванокс лемдясынек.
— Хи-хи-хи,.. Иванокс! Эно учок аламос, — чоподасонть пейдезевсь, эсь прянзо менельга ливтницякс марязь, мерсь Куля. — Ну каня кияк чачомадо икеле, ёвтык, лемдекшни эйкакш?
— Мон, Куля, мон! Ы-ы-ы, алкукс... — пештизе кудонть Иванонь эчке вайгелезэ, тандавтызе вень каштмолеманть.
— Ну, пандя! Теня, ванды поладсынек кортамонок. Ней... Шказо вейсэндямс сельмекеренек, — лип шкань ютазь пшкадсь Куля. — ...Эйдентеньгак эряви оймсемс.
— Ней мон а матедевангак. Ули тейтерем, ней карми цёрам. Эно снартса ялатеке матедевемс! Алкукс... — путсь пе кецнемасо экшелицясь пеедькшнезь кортамонтень, велявтсь вить бока лангс ды керш кедензэ путызе нинзэ штапо лавтов лангс.
Кудонть потс совась ансяк лексемасо колсевиця вень општ. Курок сиземадонть лушсо удыцятнень чамас, теке виздезь, ожо вановтсонзо варштась пешксе ковось, сорныця, мезде-бути пелиця, сэнежа валдосо валдомтызе кудопотмонть. Келя, зыянс понгат, палындерятанзат вень азорось удомсто. Ансяк карминдерят кунсоломо весе келятнень-кулятнень, вейкень пес лавгицятнень, кадови венемемс эземпряс ды учомс сельмень конявтыцянть. Ваня ды Куля кодаткак палсемат, кодаткак келят эзть маря, удость домка, шумбрачинь казиця удомасо.