Ва шыр

by Нёбдінса Виттор

Йӧз:

ОТЕЧ ТАРАС — поп, олӧма кодь нин, ӧчки новлӧ.

МАТУШКА — попаддя.

СЕНЯ — налӧн пи, ар 14–15.

КУЗЬМА — налӧн казак (работник), ар 25.

ГЕДЕОН — дяк, пӧрысь нин.

ЛАСЕЙ — вичко стӧрӧж, пӧрысь морт.

МИТРЕЙ} сиктса том йӧз (утка кыйысьяс).

ВАСЬКА

Тайӧ пьесасӧ ворсігӧн колӧны со мыйяс:

1 часі; 1 самӧвар; 1 ичӧтик си прать; 1 гымга; 3 ветель; 6 дзуг; 3 нальк; 2 пестер; 2 пӧдрасник (поплы да дяклы); 2 пищаль; 2 вугыр шатин; 1 тшайник; 1 пӧрт; 2 патронташ; 2 лаз (позьӧ ӧтиӧс — Митрейлы, Васькаыс вермас лоны прӧстӧй паськӧмӧн); 1 барабан либӧ пугач (лыйлӧм шы вӧчны); табак кӧшельяс да мукӧдтор (куритчан завод); пон (позьӧ и понтӧг); 2 газет; 1 ва шыр ку (либӧ крыса ку. Позьӧ мыйыськӧ и вӧчны); 1 трезуб; 1 ӧжын да нӧш; кымынкӧ «утка» (позьӧ «чучелаяс», либӧ вӧчны мыйыськӧ, позьӧ и натӧг).

МЕДВОДДЗА ВӦЧӦМ

Вӧчсьӧ поп ордын. Прӧстӧй керка пытшкӧс. Веськыдвылас ӧдзӧс — посводзӧ; таланьджык стенас ӧшалӧ пӧдрасник да кутшӧмсюрӧ кӧлуй; мӧдарланяс (пельӧсланяс) пач, паччӧр вывсӧ занавесалӧма, пач саяс гӧбӧчӧ пыранін. Веськыда мӧд ӧдзӧс — горничаӧ; пачланьыс — ичӧтик шкап (камод), пызан дӧраӧн вевттьӧма; шкап вылас самӧвар да кутшӧмсюрӧ дозмук. Шуйгавылас кык ӧшинь, занавескааӧсь; пельӧсас пызан, вевттьӧма пызан дӧраӧн; пызан вылас: «Югыд туй» газет (1927 вося, апрель 10 лунся, № 42), кык шыр кыян нальк да кымынкӧ дзуг. Сійӧ пельӧсас жӧ ен джадж. Стенас ӧшалӧ часі (3 час да 45 минут), кузьчышъян, кымынкӧ картина (абу революциядырся сӧмын); джоджас кымынкӧ прӧстӧй улӧс; лабичьяс.

Тувсов лун.

1-ой петкӧдчӧм

Занавес восьтігӧн: поп — ӧтпӧлӧса, кузь ситеч дӧрӧма, вӧньтӧм, улӧс вылын трезубӧн пилитӧ пӧв (нальк вӧчӧ, помалӧ нин); Сеня — пызан сайын тувъясьӧ (дзуг вӧчӧ); матушка — пызан дорын си путшкӧ; Кузьма джоджас пукалӧ, ветель дӧмлӧ (дзоньталӧ), — джоджас нӧшта тыдалӧ кык ветель да ӧти гымга.

ПОП (зіля уджалӧ, корсюрӧ пӧсьсӧ чышкалӧ, сьылӧ небыдика). «Небеса убо достойно да веселятся, земля же да радуется, да празднует же мир видимый же весь и невидимый, Христос бо воста, весилие вечное». (Видлалӧ пӧвсӧ, пуктылӧ налькъяс, мерайтӧ.) Лӧсьыд тай лоӧма... (Бара сьылӧ.) «Христос воскресе из мертвых. Очистим чувствия и узрим»... Сеня! Кымын дзуг нин лӧсьӧдін?

СЕНЯ (лыддьӧ). Ӧти, кык, куим, нёль... витӧдӧс нин, папа, вӧча...

ПОП. Но, ещӧ кыкӧс ли куимӧс вӧч дай тырмас... Зільджыка тэрмась. (Видзӧдлӧ часі вылӧ.) Со ӧд регыд нин нёль час лоӧ... Рытнас мунны колӧ... Ме тайӧ нальксӧ эштӧдышта да, тырмас жӧ сэсся... (Локтӧ пызан дорӧ, перйӧ пызан йӧрсьыс табак доз да заводитӧ куритчыны.) Фу, пӧсявтӧдз лои уджавны, мудзтӧдз...

МАТУШКА. Весиг со оз гартчы сиыс, ме ог тӧд, мый лоӧма?

ПОП. Тэ, мати, чунь помъястӧ пӧимав, сэки зэв бура гартчыны кутас. (Матушка ветлӧ пач дорӧ да кисӧ сюйлӧ пачас.)

КУЗЬМА. Гашкӧ, ветымын розь дӧми жӧ нин ме тайӧ ветельсьыс, код син он босьт — сійӧ и косяссьӧма... Ог тӧд, татчӧ ӧдвакӧ нин чериыд крукасяс, гашкӧ нӧ, кутшӧмкӧ йӧй чери веськалас-а...

ПОП (босьтӧ газет). Тэ, Кузьма, пыдӧссӧ бурджыка дзоньтав ветельыдлысь да кывъяссӧ прамӧйджыка крепитав, бордъясыс не сэтшӧмджыкӧсь на-а... Тайӧ ӧд абу черилы, огӧ ваӧ вӧйтӧ ветельяссӧ...

КУЗЬМА. Кытчӧ нӧ эськӧ, батюшко? Коссьыд ӧд чериыд оз шед, этша сэтысь кыян...

ПОП. Вот, мунам да аддзылан тэ, мый ми кутам кыйны ветельяснад и, гымгаяснад и, налькъяснад и, дзугъяснад и, не на бара чериыд! Донаджыктор на шедас!..

КУЗЬМА. Но-о, мый нӧ сэтшӧмыс, батюшко? Ме тай нӧ вӧлі чайта, мися, гымгаӧн да ветельӧн чери кыйлывлӧны-а, налькнад — шыръясӧс, дзугнад — кальсыясӧс, ачым на коркӧ белӧг вылысь кальсытӧ ёна кыйлывлі-и... Мый нӧ сэсся кыян, батюшко?

ПОП. Божья твар, Кузьма, божья твар...

КУЗЬМА. О, твар кӧ, сійӧ абу нин буртор... Менӧ матушкаыд унаысь «тварнад» видлывлӧ да сы серти нин позьӧ тӧдны.

МАТУШКА. Сыысь, Кузьма, нинӧм тэныд элясьны, — дӧзман да ӧд мыйӧн оз шусьы мукӧд дырйиыс, быд прӧсти господинас шусьылас да...

ПОП. Ставыс ӧд, Кузьма, му вылад твар божья, божье творенье, ставыс — ен сетӧмтор: йӧзыд и, скӧтыд и, зверъясыд и, гагъясыд и, чериыд и, шыръясыд и, — быдтор.

КУЗЬМА. Сідзкӧ и тэ, батюшко, тшӧтш жӧ твар?

ПОП. Ме и, тэ и, мати и, Сеня и, дяк Гедеон и, ставным ми божья тваръяс...

КУЗЬМА. Со, сё дивӧыд!.. А ме ӧнӧдз на вӧлі пола тэнӧ тварнад шуны... Водзӧ кежлӧ сэсся ме сідзи и кута тэныд шыасьны, батюшко твар...

ПОП. Сідзи оз ков менӧ шуны, Кузьма. Эн шу менӧ тварӧн... Мортӧс абу лӧсьыд тварнад нимтыны...

КУЗЬМА. Менӧ тай нӧ эськӧ сідзнас видлывлӧ матушкаыд?

ПОП. Но, вай зільджыка ветельтӧ эштӧд, ылалін... Нинӧм сэсся ас йывсьыд тэныд больгыныыс. Шуліс кӧ ӧд гоз-мӧдысьтӧ, сы понда эн на урсась... Сэсся и кыв оз позь тэныд шуны... Веляммыны нин и тэ тшӧтш кутӧмыд...

КУЗЬМА. Аттӧ, кутшӧм тэ тешкодь, батюшко твар... Ме ӧд, буракӧ...

ПОП (торкӧ). Эн лысьт, мися, менӧ некор тварӧн шуны!..

КУЗЬМА. Ті менӧ энӧ жӧ сэсся, сідзкӧ, шуӧй сійӧн... Ме тӧндзи вӧлі собранньӧ вылын да кывлі: слуга-казакӧс пӧ Сӧветскӧй власть дырйи увтыртны оз позь...

ПОП (чуймӧ). Но, тэ нӧ тшӧтш собранньӧяс вылӧ ветлывлан?.. Бур делӧ, Кузьма, бур делӧ... Ми тэнӧ огӧ кыдзсюрӧ лёк ногӧн видзӧ, норасьны миян вылӧ, благодаренньӧ богу, тэныд нинӧмысь... Толькӧ, ме ногӧн, бурджык эськӧ вӧлі аслыд, он кӧ сэтшӧм собранньӧяс вылас ветлы; кытчӧкӧ бӧръясны ещӧ тэнӧ да ыджыд грек вӧчан господь водзын.

СЕНЯ. Ме тай нӧ, папа, комсомолечӧ жӧ вӧлі кӧсъя гижсьыны эськӧ?

ПОП

МАТУШКА} (тшӧтш). Мед господь видзас!

КУЗЬМА. Дай господьыс пӧ абу, батюшко...

ПОП. Ланьт, Кузьма, эн богохульствуйт!.. Господь бог, вседержитель наш, вездесущий, эм!.. О, господи, прости наши прогрешения, вольныя и невольныя!.. Ылалім тай ставным!.. Рытланьыс мунны нин колі-а... Вайӧ, тэрмасьыштӧй!.. (Чеччӧ да бара уджавны босьтчӧ, сьылігтырйи.) «Согрешахом, беззаконновахом, неправдовахом пред тобою»... Мед эськӧ некод жӧ миянысь войдӧр эз удит мунны! Тӧдласны кӧ унджыкӧн, торксьыны вермам...

СЕНЯ. Ме, папа, тшӧтш жӧ муна?

ПОП. Не куш тэ, пиукӧй! Ставным мунам: тэ и, мати и, Кузьма и, — быдӧнлы уджыс юр вывтыр лоӧ!..

МАТУШКА. Меысь ӧд нинӧм кӧ сэні, отеч-а?..

ПОП. Эн шу, мати, удж лоӧ, мися. Ми Кузьмакӧд кутам кыйны, Сеня пондас кульны, тэ пусьыны кутан...

КУЗЬМА. Сідзкӧ тай, збыль, бур прӧмыс вылӧ мӧдан, батюшко? Дивъя нин мунныыд: кыйны кутам, дай сэні жӧ и сёям, — кыдз шуласны, мый гудйыштам, сійӧ и кокыштам... Майбырӧй, не бара гортад тшыг нисьӧ пӧт виньгыртӧмыд!.. Тулыс, гажа, ном ни геб абу!.. Ылӧдз-ӧ нӧ мунам, батюшко?

ПОП. Бура ылӧдз ковмас кывтны — Кыртас улӧ, асланым видз вылӧдз... Вай тэ, мати, лӧсьӧд пестеръястӧ. Няньтӧ унджык пукты, кос чери босьт недель кежлӧ кымын, сов эн вунӧд...

МАТУШКА (чеччӧ). Дыр кежлӧ ӧмӧй, отеч, мӧдан?

ПОП. Буретш недель кежлӧ — локтан вӧскресенньӧӧдз...

МАТУШКА. Ставным нӧ мунам да гортнымӧс код вылӧ колям? Сідз эновтам?

ПОП. Вичко стӧрӧж, Ласей, видзӧдыштлас корсюрӧ. Мун, лӧсьӧдчы!..

МАТУШКА. Ті эськӧ мед куимӧн ветлінныд, а ме горт овны кольччи...

ПОП. Гортыд ӧд, мати, некытчӧ на оз пышйы, а прӧмыстӧ вермам прӧзевайтны... Сійӧс миянлы быттьӧ ачыс нин всемилостивый господь бог ыстӧ да оз нин ков петитчыны, мати...

МАТУШКА. Ме ог нинӧм шу, мед отсалас тшӧтш и пречистая богородича миянлы!.. (Петӧ посводзӧ.)

2-ӧд петкӧдчӧм

ПОП (сьылӧ). «Божественное сие и всечестное совершающе празднество»... Но, Кузьма, Сеня, ӧдйӧджык помалӧй!.. Менам налькӧй эштыны нин кутіс-а...

КУЗЬМА. Менам эштӧ жӧ нин, кыклаті эськӧ ёна на косяссьӧма да олас — тварыд, гашкӧ, ӧшъяс. Пӧдлиннӧ, кутшӧм тваръясӧс нӧ, батюшко, кӧсъян кыйны?

СЕНЯ. Он ӧмӧй тӧд, Кузьма? Ва шыръясӧс!..

КУЗЬМА (шензьӧ). Мый? Ва шыръясӧс! Тьпу! (Сьӧлыштӧ.) Ва шыръясӧс?! Збыль?!

ПОП (повзьыштӧмӧн). Ланьтӧй, ньӧжйӧнджык сёрнитӧй, мед некод оз кывлы!.. (Мунӧ ӧдзӧс дорӧ да видзчысьӧмӧн посводзӧ шуӧ.) Мати, кильчӧ ӧдзӧстӧ игнышт, мед некод бокӧвӧй эз лок. Кылан? Кильчӧтӧ, мися, игнышт, мати!..

(Матушкалӧн гӧлӧс: «Игнала, игнала, отеч». Кылӧ каличасьӧм шы. Поп матыстчӧ пызан дорӧ да пуксьӧ.)

КУЗЬМА (чеччӧ). Мый нӧ, збыль, батюшко, ва шыр кыйны ми мунам?

ПОП. Збыль, Кузьма... (Босьтӧ газет.) Ва шыр кыйны ми талун и мунам...

3-ӧд петкӧдчӧм

Пырӧ матушка, пыртӧ кык пестер; пестеръяснас сэсся гӧбӧчӧ пырӧ.

КУЗЬМА (шензьӧ сералыштӧмӧн). Ветельӧн ва шыр кыйны?!. Первой на ме кыла татшӧм чудеса-дивӧтӧ, батюшко... Мый нӧ сыысь, ва шырсьыд? Сійӧс, пеж тварӧс, ӧд огӧ жӧ кутӧ пуны да сёйны! Тьпу!..

ПОП. Пуны ни сёйны нечистӧй гадӧс, дерт, огӧ кутӧ, сӧмын кучиксӧ пондам кульны да чӧжны, Кузьма... (Ветлӧ гӧбӧчлань да горӧдӧ.) Мати, шыдӧстортӧ ки тырмӧд пуктышт тшӧтш. Шыдӧстӧ ӧд радейтӧны шыръясыд. (Бӧр пуксьӧ.)

КУЗЬМА. Ме ог тӧд, батюшко, мый сэсся татчӧ и шуныыс весиг... Кодкӧ кӧ кывлас та йылысь, ёна и сералас тэнӧ наперво... Шуасны: выжывмӧма пӧ миян отеч Тарасным да ветельясӧн пӧ ва шыр нин кыйӧ... Ӧні нин вичкоад йӧзыд этша волывлӧ, а ва шыртӧ кутан кыйны, да дзик некод нин сэсся оз пырав вичкоад...

ПОП. Сійӧ ӧд и эм, Кузьма. Этша йӧзыд вичкоад кутіс волыны, да сійӧн и лоӧ корсьны кутшӧмкӧ нажӧтка... Прикод ӧні менам дзикӧдз кутіс косьмыны... Мый нӧ, со, вӧскресенньӧыд волас да, кадитны пӧшти некодӧс — ӧдва-ӧдва морт дас сулалӧ, пӧрысюлов... Ставсӧ лёк комсомолечьясыд торкисны... (Сенялы.) Дай тэ ещӧ сэтчӧ кӧсъян на дінӧ заблудитчыны... Эн лысьт, Симеон!.. Живи, как псалмопевеч сар Давид учит: «Блажен муж, иже не иде на совет нечестивых и на пути грешных не ста, и на седалище губителей не сяде»... Вот, асьтӧ пӧгубитан сэки дай миянӧс тшӧтш... Не забывай ты бога, блудный сын мой!..

СЕНЯ. А ме, папа, кывлі да, со кыдз ӧні сьылӧны (сьылӧ):

«Долой, долой монахов,

Долой, долой попов!

Мы на небо залезем,

Разгоним всех богов!..»

ПОП (сувтӧ да Сеняӧс юрас колскӧбтӧ). На тэныд, богохульник! Прохвост!.. Супостат! Трасича!.. (Кузьма сералӧ, Сеня бӧрддзӧ. Поп ӧдйӧ ветлӧдлӧ джоджӧдыс броткӧдчигтырйи.)

МАТУШКА (петӧ гӧбӧчысь тыра пестеръясӧн). Мый нин нӧ лои?.. Сеня, мыйысь нӧ бӧрдан? (Локтӧ пызан дорӧ.)

СЕНЯ. Папа юрӧ колскӧбтіс да... (Чышкалӧ синъяссӧ, вочасӧн бурасьӧ.)

МАТУШКА (поплы). Мыйысь нӧ, отеч, тэ нӧйтін бара Сенясӧ?

ПОП. Неразумнӧй сійӧ миян, богохульник!.. Тэ, мати, сійӧс вывті вельмӧдӧмыд... Сэтшӧм нин сійӧ непокорнӧй!.. О, господи, прости ему прегрешения!..

КУЗЬМА (матушкалы). Ставыс тайӧ лёк твар — ва шыр понда, матушка!.. Батюшкоыд, вӧлӧм, кӧсйӧ Кыртасад мунны ва шыр кыйны, матушка?..

МАТУШКА. Тӧда... Лунтыр нин ӧд сійӧн и налькъяссӧ вӧчис... Мед пречистая богородича отсалас!..

КУЗЬМА. Да ӧд ветельясӧн кӧсйӧ кыйны!

ПОП (сьӧлӧмысь). Не толькӧ ветельясӧн, — гымгаӧн и, налькъясӧн и, дзугъясӧн и, быд ногыс кутам прӧмышляйтны!.. Кытчӧкӧ ӧд шедас жӧ... (Пуксьӧ да паськӧдӧ газет.) Гортад пукалӧмӧн этша нин босьтан...

КУЗЬМА (лэптӧ ветельсӧ джоджысь да видзӧдӧ пытшкӧсас). Этатчӧ бара, ме чайта, ва шыр кӧть кос шыр оз нин ӧшйы, пырысь-пыр и кералас... (Пуктӧ мукӧд ветельяс вылӧ.)

ПОП. Керавныыс оз удит: мыйӧн пырас — паличӧн катшкыштан дай дук вон!..

КУЗЬМА. Сэсся ме нинӧм нин ог шу, ачыд тӧдан, батюшко... (Гымга видлалӧ.)

ПОП. Нинӧм оз и ков сэсся миянлы, медтыкӧ нажӧтка вӧлі-а... Вичко помысь тай, мися, этша нин кутіс воны-а. Овныыд ӧд мыйӧнкӧ колӧ... Ыджыдлун дырйи славитім да, ӧдвакӧ кык недель кежлӧ тырмас няньным... А выль няньтӧ дыр на ковмас виччысьны!.. Быть сэсся корсь кутшӧмкӧ нажӧтка!.. Пасибӧ нин колӧ шуны Госторглы, татшӧм бур прӧмыссӧ Коми муӧ лӧсьӧдӧма да... Мед толькӧ миянысь водзджык некод эз удит мунныыс-а.

КУЗЬМА. Сыысь эськӧ, ме чайта, нинӧмла повныыс, батюшко. Код нӧ крестьяна пӧвстысь гӧриг-кӧдзигӧн ва шыр кыйны мунас?.. Эз на ӧд йӧймыны!.. Батюшко, кыдзи нӧ гымгасьыд кутан перйыны ва шыртӧ, шедас кӧ?.. Пыдӧссӧ кӧ восьтан — пышъяс, паличӧн кучкӧм оз мӧрччы татчӧ, — кӧть и шедлас, ме чайта да, перйытӧм лоӧ...

ПОП. Перъям нин эськӧ шедӧдӧмтортӧ кыдзкӧ да... (Локтӧ да босьтӧ киас гымгасӧ). Тадзи кутам колӧдны да, небось, регыд жуялас, сэки восьтам таті, пыркнитам ортсӧ да сэсся паличӧн швачкам юрас дай дук вон!.. (Гымгасӧ пуктӧ, ачыс бӧр пуксьӧ. Матушкалы.) Мати, мун ещӧ порсь гостӧ вайышт, налькъястӧ самавны ковмас. (Матушка пыралӧ гӧбӧчӧ да мыйкӧ дыра мысти гос петкӧдӧ.)

КУЗЬМА. А ыджыд-ӧ нӧ, батюшко, докодыс воас ва шыртӧ прӧмышляйтӧмӧн? (Пуксьӧ гымга юр вылӧ да заводитчӧ куритчыны.)

ПОП (газетӧ видзӧдӧ). О, другӧ, ыджыд... Со, кывзы, мый гижӧ ва шыр йывсьыд Госторг. (Лыддьӧ.) «Водяная крыса. К вопросу о заготовке шкурок этого зверька в области Коми. В озерах и реках области Коми встречается в большом количестве зверек, принадлежащий к отряду грызунов. Этот зверек именуется по-русски водяная крыса, а на коми языке он называется ва шыр»... Гӧгӧрвоан? Рочӧн пӧ шусьӧ водяная крыса, комиӧн пӧ «ва шыр»... (Лыддьӧ.) «Население области... весенними тёплыми днями...» Часлы, часлы, кӧнкӧ вӧлі шуӧма... «Водяная крыса питается... Уши водяной крысы едва достигая!..» Со-со... часлы... «Оттенки шкурки бывают разнообразные, от серо-буроватого до черного и черно-серого. Брюшко более светлой окраски»... Час, со тай кӧні... «области Коми...» А-а, вот: «Главная пушно-сырьевая контора... дать населению лишний заработок, разрешила приемку шкурок водяной крысы. По словам знатоков»... (Гораджыка.) Кывзы! Кузьма!.. «ежегодная добыча крысы в области Коми легко достигнет одно»... Да... «одного миллиона шкурок»... Кылан? Миллион, дзонь миллион пӧ ва шыр кутӧ позьӧ чукӧртны Коми мусьыд!.. Со ӧд кӧні нажӧткаыс! (Лыддьӧ водзӧ.) «Стоимость одной шкурки 20 коп. эти... явятся большим приработком к общим доходам населения»... Гӧгӧрвоин ӧні? Быд ва шыр ку вылӧ сетӧны 20 кӧп., — кызь ур, вит кучик кӧ — быдса чӧлкӧвӧй!.. Прӧстӧ ӧд абу шуӧма: ыджыд докод пӧ йӧзлы сыысь воас...

КУЗЬМА. Збыль тай, вӧлӧм, позьӧ нажӧвитныыд, трустыд!.. Гм!.. Кызь ур сетӧны шыр ку вылӧ!.. Дивъя нин тайӧ!.. Колӧ видлыны, непременнӧ колӧ...

ПОП (нимкодя). Сійӧ ӧд и эм, Кузьма!.. Ӧні позьӧ ылӧссӧ артыштлыны, уна-ӧ ми вермам кыйны ва шыртӧ. Миян угоддьӧясӧн прамӧя позьӧ прӧмышляйтны, другӧ. (Лыддьӧ чуньяс вылас.) Куим ветель да куим нальк — сійӧ лоӧ квайт, гымга — сизимӧд, да кымын дзуг, Сеня, тэнад?

СЕНЯ. Квайт.

ПОП. Сизим да квайт — лоӧ дас куим угоддьӧ... Ӧти ва шырӧн кӧ быд угоддьӧ вылӧ луннас шедас, сэн нин, со, дас куимыс... Но сэсся ӧд беддьӧн на верман кымынӧскӧ шлочкыны... Лыддям кӧть ставсӧ дас витӧс... Сійӧ нин ӧд, Кузьма, лоӧ куим чӧлкӧвӧй!.. Гӧгӧрвоан? Куим шайт ӧти лунӧ!.. Сійӧ нӧ абу нажӧтка али мый? Недельнад нажӧвитан кызь ӧти шайт... Да ӧд сійӧ медэтша вылӧ нин! А кык шырӧн кӧ луннас шедас быд угоддьӧ вылӧ, — сэки ӧд нелямын шайт нин лоӧ... Ме чайта да, зэв бура кутас куимыс луннас шедны: асывводзын, лунын дай рытын. Куимысь дас вит — нелямын вит, но, шуам нин, ветымынсӧ... Ветымын ва шыр быд лун! Сійӧ — дас чӧлкӧвӧй лун! Кывзы, мати, дас чӧлкӧвӧй кутам быд лун нажӧвитны!

МАТУШКА. Кыла, отеч... Слава тебе, господи!.. Сэтшӧм меным ӧні нимкодь лои, отеч, ог тӧд весиг, кытчӧ сы мында деньгасӧ кутам видзны!.. (Синъяссӧ ен джаджлань лэптӧ да пернапас чӧвтӧ.)

СЕНЯ. Менӧ, папа, сэк школаад бара лэдзан?

ПОП. Лэдза, Сенюк, лэдза... Велӧда тэнӧ попӧдз!.. Слава тебе, боже, слава тебе, боже, слава тебе, боже... (Босьтӧ сьывны.) «Тебе бога хвалим, тебе господа исповедуем, тебе превечного отца вся земля величает, тебе вси ангели, тебе небеса и вся силы»...

МАТУШКА (торкӧ). Отеч, тэрмасьны колӧ... регыд ӧд и пемдыны кутас.

ПОП. Колӧ, мати... Вайӧ лӧсьӧдчамӧй зільджыка! (Чеччӧ, нальксӧ вайӧ пызан вылӧ.)

Ставныс ноксьыны кутӧны.

КУЗЬМА. Вот тэныд колӧкӧ и «твар»!.. Ва шырыд став олӧмтӧ на вермас бергӧдны... Озырман да, батюшко, тэ и вичкотӧ на, гашкӧ, эновтан да?

ПОП. А мый ӧд, вермас лоны, другӧ... Вичко помысь ӧні нинӧм нин буртӧ виччысьны... Вывті нин йӧзыд сюсьӧсь лоины... Мати, пӧрттӧ эн вунӧд босьтны да паньястӧ мед пуктін и.

МАТУШКА. Быдтор лои, отеч, тшайник и, пӧрт и, ставыс пестеръясад.

ПОП. Сеня, мун котӧртлы вичкоӧ да кор стӧрӧжсӧ, мед пырысь-пыр жӧ волас...

КУЗЬМА. Мыйла татшӧма тэрмасьныыс, батюшко? Колі ӧд унджык нальк эськӧ вӧчны... Вай, батюшко, талун вӧчам нальк кызь кымын да аски вӧлисти и мунам...

ПОП. Боже сохрани, Кузьма, аскиӧдз виччысьны!.. Прӧзевайтам ставсӧ!.. Гижӧма ӧд, весной пӧ, ытва дырйи, самӧй бур ва шыртӧ кыйны. (Босьтӧ газет да лыддьӧ.) Со, со... «в момент весеннего разлива»... Гӧгӧрвоан? «Момент» пӧ. Моментсӧ кӧ прӧзевайтан — вошӧ тавося прӧмышляйтӧмыд... Дай мукӧд удитасны водзджык миянысь... (Лыддьӧ.) «Наиболее лучшим сезоном охоты на водяную крысу считается весна, охота на крысу очень легка, доступна даже для ребят»... Со ӧд, весиг пӧ челядь вермасны кыйныыд. Сійӧн ӧд ме и Сеняӧс тшӧтш босьта... Мун, Сеня, петав нин ӧдйӧджык да корлы вичко стӧрӧжӧс, эновт дзугтӧ, тырмас нин сэсся, колӧ вӧрзьӧдчыны...

СЕНЯ (эновтӧ дзуг вӧчӧм). Час нӧ, петала. (Кылӧ гольӧдчӧм. Ставныс повзьӧны.)

ПОП (ньӧжйӧник). Часлӧ, кодкӧ, кылӧ, гольӧдчӧ али мый?.. (Кылӧ гольӧдчӧм шы.) Сідзи и эм!.. Вайӧ идралӧй угоддьӧяснымӧс!..

Идралӧны: налькъяс да дзугъяс пызан улӧ, ветельяс да гымга — горничаӧ.

МАТУШКА (пестеръяс гӧбӧчӧ пыртӧ). Мед эськӧ некод жӧ оз аддзыв.

Бара кылӧ гольӧдчӧм.

ПОП (ӧдйӧ пасьталӧ пӧдрасник). Кутшӧм супӧстатӧс нин коді вайӧ-а?.. О, господи, помилуй!.. Торкас кӧ?.. Мати, мун юав, коді локтӧ? (Кокнас вешталӧ джоджсьыс чаг ёгсӧ.)

МАТУШКА (ӧдзӧс восьтыштӧ да юалӧ). Код крещенӧй нӧ локтӧ?

Сайын Гедеонлӧн гӧлӧс: «Ме, матушка, ме локта».

МАТУШКА. Дяк тай локтӧ, отеч... Восьтны абу нӧ?

ПОП. Гедеонтӧг некор на эз кольлы нинӧм, быдлаӧ сійӧ слӧймас... Восьт, мати, мед пыралас. (Мукӧдыслы.) Ті нинӧм сылы энӧ висьталӧй! (Матушка петӧ. Сы бӧрся тшӧтш петӧ Сеня.)

4-ӧд петкӧдчӧм

КУЗЬМА. Сійӧс эськӧ, батюшко, тшӧтш колӧ босьтны, гажаджык лоӧ...

ПОП (пуксьӧ газет лыддьыны). Огӧ... Лишнӧй мортыдлы ӧд и лишнӧй шыр ковмас... Миянлы сэки этшаджык шедас... (Лыддьысьӧм улӧ лэдзчысьӧ.)

Сайын кылӧ гӧлӧс Гедеонлӧн: «Здравие и спасение, матушка!.. Отеч Тарас гортын?» Матушкалӧн гӧлӧс: «Гортын, гортын, отеч саломщик, лок, милости просим».

5-ӧд петкӧдчӧм

Пырӧны матушка да Гедеон.

ГЕДЕОН (пыригмозыс). Мир вам, отеч Тарас!..

ПОП. Лок, лок, Гедеон.

ГЕДЕОН (гӧгӧр видзӧдлӧ). Ме зэв ыджыдтор йылысь тэкӧд сёрнитны локті... (Видзчысьӧмӧн.) Некод бокӧвӧйыс абу?

ПОП. Абу... Кутшӧм сёрни нин?.. Пуксьы да висьтав нӧ вай.

ГЕДЕОН (зепсьыс кыскӧ газет «Югыд туй». Пуксьӧ да паськӧдӧ газетсӧ). Со мый, отеч Тарас... Ӧбед бӧрын газет вайисны меным, «Югыд туй», нумер сорок два, десятово апреля... Шойччыны нёровті да лыддьыны понді... Лыдди пленум обкома. (Петкӧдлӧ газет вывсьыс, кинас малыштӧмӧн.) Со тайӧс; сэсся этійӧ со, нападенньӧ вӧлӧма Пекинын сӧветскӧй посольство вылӧ, но сійӧ эськӧ мед, неважнӧ... Лыдди татысь то: Исакиевскӧй собор Питирысь тупкӧмаӧсь да музей сэтчӧ лӧсьӧдӧмаӧсь... Тайӧ на ещӧ не сэтшӧм важнӧй... (Бергӧдӧ лист боксӧ.) А то ӧд мый сэсся аддзи ме, отеч Тарас!.. Со — «Водяная крыса». (Поп чуймӧ.)

КУЗЬМА (аслыс). Дякыд нин твартӧ казялӧма и!..

ПОП (Гедеонлы). Но, но, мый нӧ сэсся?

ГЕДЕОН. Сійӧ «водяная крысаыс», тӧдан, мый лоӧ?

ПОП. Ва шыр, Гедеон, сійӧ лоӧ, ва шыр. (Петкӧдлӧ ассьыс газетсӧ.) Ме со самӧй жӧ сы йылысь ӧні лыдди...

ГЕДЕОН (видзӧдлӧ газет вылӧ). Но, сідзкӧ тай, тэныд оз нин ков висьтавны... Кыдз тэ, отеч Тарас, думайтан? Огӧ-ӧ ми тшӧтш кытчӧкӧ сійӧ ва шырсӧ прӧмышляйтны ветлӧ, а?

ПОП (рочӧн). Не подобает нам, священнослужителям, заниматься мерзостными промыслами, Гедеон; грешно и непристойно поганых гадов ловить!.. Мед нин прӧмышляйтасны мукӧдъяс, ми сэтчӧ огӧ лякӧсьтчӧ...

МАТУШКА. Он нин ӧмӧй мун, отеч? Лунтыр тай нӧ ачыд налькъяс лӧсьӧдін!..

ПОП (гусьӧник матушка вылӧ чукыртчылӧ да шуӧ). Мый тэ сэтчӧ шыасян?

ГЕДЕОН (поплы элясигмоз). Кывзы, отеч Тарас... Быд ва шыр ку вылӧ сетӧны 20 кӧпеек. Вит шырӧс кӧ кыян — дзонь шайт лоӧ! Думышт вай бурджыка, отеч Тарас, да ветлам. Ме чайта, ыджыдджык докод воас вичкоад служитӧм дорсьыд...

МАТУШКА. Ми арталім да быд лун дас шайтӧн воӧ, отеч саломщик!.. (Поплы.) Мый нӧ тэ, отеч, збыльысь ӧмӧй он мун?

ПОП (сьӧлыштӧ). Тьфу!.. Бестолковая попаддя!.. (Гедеонлы.) Ветлам инӧ, грек кӧть абу... Всемилостивый господь бог прӧститас, гашкӧ...

ГЕДЕОН (нимкодьпырысь). Но вот и бур!.. Дзик ӧд пикӧ нин кутім воны, регыд сёйны нинӧм лоас... Аски жӧ и мунам, отеч Тарас.

ПОП. Аскиӧдз огӧ жӧ виччысьӧ, Гедеон? Аски ӧд став йӧзыс мунас да матігӧгӧрысь став ва шырсӧ котшкӧдасны, миянлы курас-карассӧ весиг оз кольны!.. Ми талун мӧдам-а!..

ГЕДЕОН (чеччӧ). Талун? Сійӧ ещӧ бурджык, отеч Тарас!.. Збыльысь ӧд, прӧзевайтан кӧ, воду клебайтан, кыдз шуласны... Мунам талун.

МАТУШКА. Миян, отеч саломщик, ставыс нин гӧтов... Сеня воас дай мунам.

ГЕДЕОН. Тэ нӧ, матушка, тшӧтш мунан али мый?

МАТУШКА. Тшӧтш тай нуӧдӧ отеч да лоӧ ветлыны.

ПОП. Ми ставным мунам, став семьяӧн — унджык кыям! Тэнад нӧ, Гедеон, кутшӧм угоддьӧясыд лоӧны?.. Миян ӧд бура уна лӧсьӧдӧма-а... Кузьма, вай петкӧд татчӧ ставсӧ!

Кузьма ставсӧ петкӧдӧ джодж шӧрӧ.

ГЕДЕОН. Ме ог тӧд, мыйӧн медбур сійӧс кыйны?.. О, тіян ветельяс и, гымга и, быдтор лӧсьӧдӧма!?. Ветельтӧ нӧ ва шырыд оз керав?.. Ме чайта, пырысь-пыр жӧ розьӧдас...

ПОП. Оз удит: мыйӧн шедас — котшнитам шырыдлы юрас, дай дук вон...

ГЕДЕОН. Ме бара вугыръяс босьта, отеч Тарас!.. Яй торйӧн самала да надейнӧ кутчысяс...

ПОП. Толькӧ, Гедеон, татшӧм условиеӧн мунам: тэ мый кыян — аслыд, ми мый кыям — аслыным жӧ, огӧ кутӧ став прӧмыссӧ шӧри юкны. Гӧгӧрвоан?

ГЕДЕОН. Ладнӧ, сӧгласен!.. (Мӧдӧдчӧ мунны.) Но, энӧ жӧ менӧ кольӧ... Войколӧн жӧ ӧд мунам?

ПОП. Ӧти вой кежлад нинӧмла и мӧдӧдчыныыс, ми лӧсьӧдчим дзонь недель кежлӧ... Няньтӧ да вӧлӧгатӧ босьт унджык... Шедны кӧ кутас, гашкӧ, кык недель ветлам да...

ГЕДЕОН. Ладнӧ тай!.. Чукӧстӧй жӧ менӧ, али ме кильчӧ вылын кута виччысьны... (Мунӧ.)

6-ӧд петкӧдчӧм

Пырӧ Сеня, сы бӧрся Ласей.

ПОП (матушкалы). Ог вӧлі кӧсйы Гедеонсӧ босьтны, а тэ сэтчӧ шыасин, мати... Сытӧг эськӧ мый шедіс — ставыс аслыным лои-а, ӧні сійӧ сэсся тшӧтш сэтысь кутас кыйны, пайкны миянӧс...

МАТУШКА. Тырмас на, отеч, ва шырыд... Лыддин тай, миллион пӧ сюрас да...

ПОП. Ӧні сэсся, тырмас кӧть оз-а, нинӧм нин вӧчны... Дай вугырнад сійӧ зэв унаӧс оз кый!.. Вайӧ пасьтасьӧй да мунамӧй. Мый дыра манитіс Гедеоныд... Ласей! Ми чери кыйны ставным мӧдім да тэ корсюрӧ видзӧдлыштлы керка гӧгӧр... (Ставныс пасьтасьӧны. Матушка пестеръяс гӧбӧчысь петкӧдӧ.)

ЛАСЕЙ. Бур делӧ, батюшко. Мед ен сетас тіянлы тшассьӧ!.. Кытчӧкӧ ветелясьны, тыдалӧ, мунанныд?

ПОП. Уна пӧлӧс угоддьӧ босьтам... Вӧскресенньӧ кежлӧ кӧ огӧ воӧ — службатӧг олас, эн и звӧнит... (Кузьмалы.) Кузьма, тэ ветельяссӧ да гымгасӧ босьтан, ми матикӧд пестерасям... Сеня, дзугъястӧ эн вунӧд ассьыд!.. (Пестерасьӧны. Лӧсьӧдчӧны.)

ЛАСЕЙ. Дзугъяс босьтанныд мыйлакӧ и?

ПОП. Сеня тай кӧсйӧ истанъясӧс кыйны да... Мати, керка томантӧ босьт...

МАТУШКА (томан босьтӧ). Налькъястӧ, отеч, тэ ачыд лэччӧд, ме пелыс-ӧпаснӧй кильчӧ помысь босьта.

ЛАСЕЙ. Налькнас нӧ кодӧс, батюшко, кӧсъянныд кыйны?

ПОП. Тайӧ сідзи... мед припаснымӧс шыръяс эз сёйны, пукталам гӧгӧрыс... Но, ставыс, буракӧ, лои... Вайӧ, неуна пуксьыштламӧ. (Ставныс недыр кежлӧ пуксьыштлӧны да чӧв олӧны. Сэсся чеччӧны да юрбитӧны молитваяс вашкӧдӧмӧн.)

ПОП (юрбитігӧн вашкӧдӧ). «О, пресладкий и всещедрый Исусе, прими ныне малое моление наше, пошли нам счастливой и удачной охоты на твою тварь всегда, ныне и присно и во веки веков. Аминь». (Гораа.) Но, мӧдімӧ! Господи, благослови!..

Ставныс петӧны.

ЛАСЕЙ (бӧрсяньыс, петігӧн). Петыр-Павел, сет чери!

Занавес.

МӦД ВӦЧӦМ

Вӧчсьӧ видз вылын, ва дорын. Веськыда тыдалӧ вӧр (рас), ӧтар-мӧдар бокас кустъяс. Шуйгавылас муас тыдалӧ ветель — зэвтӧма, ылынджык — мӧд, кӧнсюрӧ налькъяс куйлӧны, пельӧсас тыдалыштӧ гымга. Шӧрас (неуна веськыдвывланьыс) йӧзлань паныдӧн сулалӧ чом, вӧчӧма лысъясысь да росъясысь, шуйга бокас ӧшинь пыдди розь, сэті чургӧдӧма 2 вугыр шатин; чом ӧдзӧс (вом) юр водзас ӧшалӧ 1 ва шыр кучик (кӧв йылын); чом водзын — бипур места, мӧтыр сутшкӧма, пӧрт ӧшалӧ (биыс абу). Чом вылас да бокас пестеръяс, тшайник. Тувсов рыт. Кылӧ кайяслӧн дзольгӧм-сьылӧм.

1-ой петкӧдчӧм

Занавес восьтігӧн чомйынӧсь: поп, матушка, Гедеон да Сеня. Гедеон сувтӧма ӧшинь розь дорӧ да кияснас кутӧ вугыр шатинъяс; корсюрӧ зэвкнитлӧ да бӧр «чӧвтӧ», Сеня пидзӧсчань вылас сулалӧ чом вом дорын да кыйӧдчӧмӧн видзӧдӧ шуйгавылӧ. Матушка пукалӧ юрсӧ гырддза вылас ӧшӧдӧмӧн.

ПОП (матушкакӧд орччӧн пукалӧ, киас шляпасӧ бергӧдлӧ, ньӧжйӧник сьылӧ, корсюрӧ сылы Гедеон отсыштӧ.) «Всякое ныне житейское отложим попечение, отложим попечение, отложим попечение». (Гедеонлы.) Тэ, Гедеон, эн вывті сэтшӧма горзы — повзьӧдан став шырсӧ...

ГЕДЕОН. Некутшӧм шыр нин миянлы, тыдалӧ, не аддзывны, отеч Тарас... Отложим попечение, буракӧ, и лоӧ вӧчны... Сойяс дзикӧдз нин дубалісны «вуграсьӧмысь», а пӧльза нинӧм эз ло...

ПОП. Да, Гедеон, эз тай часливит миянлы, эз кыв, тыдалӧ, миянлысь молитванымӧс всемилостивый и всещедрый наш господь... Со ӧд, квайтӧд лун нин тані ми олам, а толькӧ на ӧти ва шырӧс кыйим... Витӧн ӧтикӧс!.. Этша! Омӧлик прӧмышляйтӧм лои... (Беддьӧн вӧрӧдӧ ва шыр ку.) Мед жӧ эськӧ татшӧмыд сё кымын!.. А мый ӧтисьыд — толькӧ 20 кӧпеек!.. (Юрсӧ копыртӧ.)

ГЕДЕОН. Дай сійӧ абу тіян, менам!.. Ме кыйи.

ПОП (чуймӧ). Тэ кыйин? Мый нӧ кӧть? А Кузьма ӧд первойсӧ казяліс...

СЕНЯ. Ме, папа, тшӧтш аддзылі и. (Бергӧдчӧ чомлань да вежнясьӧмӧн висьталӧ.) Зонмӧ-пиӧ, тадзи гоньгӧдӧ эсті, гымга пӧлӧн...

ГЕДЕОН (крепитӧ шатин помъяссӧ да бергӧдчӧ). Куш аддзылӧмыд ӧд абу на кыйӧм... Ме ӧд уськӧдчи сы вылӧ первойсӧ, вильскӧбті да ещӧ ваӧдзыс тювмунлі, ачым дзик ва шыр кодь кӧтасьлі, муртса «жизнь свою не положил» сы понда, а тэ, отеч Тарас, ӧні покушайтчан менам прӧмыс вылӧ?.. Абу лӧсьыд!..

ПОП. Но тэ, Гедеон, эн укӧрайт менӧ! Ме ӧд сё-таки поп, а тэ — толькӧ на дяк!.. Менам чинӧй ыджыдджык!..

ГЕДЕОН (дӧзмӧ). Мед кӧть тэ и поп, отеч Тарас, а ме чайта, ва шыр вылын тэнад да менам чинным ӧткодь... Ме кыйи — менам и кучикыс тайӧ лоӧ... (Кӧсйӧ судзӧдны шыр ку.)

ПОП (ӧдйӧ сувтӧ да Гедеонлысь кисӧ вештӧ). Эн вӧрзьӧд, Гедеон!.. Мед сэні ӧшалас.

МАТУШКА. Мый нӧ ті лоинныд, отеч? Тышкӧ нин воны кӧсъяд ва шыр кучикыд понда... Зык пыр лэптанныд сы ыдждаӧс, да кысь сэсся шырыд локтас?.. Асьныд жӧ со повзьӧдланныд да...

ГЕДЕОН. Отеч Тарасыд тай со, матушка, венны менӧ кӧсйӧ...

ПОП. Боже сохрани!.. Тэ жӧ тай ачыд, Гедеон, горшасян-а...

ГЕДЕОН. Ньӧти ог. Ме толькӧ ассьым кыйӧмтор тэныд ог сет, отеч Тарас.

ПОП. Кыдз нӧ он сет? А кытысь тэ тайӧс кыйин? Менам видз вылысь ӧд шедіс, тайӧ ӧд менам виддзыс... Но, ладнӧ; вай огӧ кутӧ споруйтны, вӧчам по-божески — вузалам тайӧ кучиксӧ да деньгасӧ шӧри юкам...

МАТУШКА. Медбур сідзтӧ лоас, мый сэсся вензьыныд?..

ГЕДЕОН (чуньсӧ вайӧдӧ поплы ныр улас). А-а-а, а уговорыд миян кутшӧм вӧлі, отеч Тарас? Уговор пӧ дороже денег, шулӧны. Тэ ӧд ачыд шулін: кодлы мыйта шедас — сійӧ и лоӧ сылы...

ПОП. А, колӧкӧ, миянлы мыйта на шедас?

ГЕДЕОН. Мый шедас тіянлы — ставыс тіян и лоӧ, ме ог кут пай корны...

ПОП (пуксьӧ бӧр). Часлы нӧ, видзӧдлам. Колӧкӧ, ӧні Кузьма дасӧс ваяс...

Гедеон пуксьӧ да куритчыны вӧчӧ.

МАТУШКА. Вай, отеч, гортӧ мунамӧ. Мый нӧ сэсся тані вӧчан?

ПОП. Мый вӧчан? Ва шыр кыям, мати, прӧмышляйтам; гортад пукалӧмӧн нинӧм нин он босьт... Няньным тай быри да делӧджык-а...

МАТУШКА. Ставыс нин помасис, отеч: нянь и, чери и; тшыгйӧн ӧд сэсся тані огӧ жӧ кутӧ тойтны?..

ПОП. Дай табакыд тшӧтш быри... (Видзӧдлӧ Гедеон вылӧ.) Тэнад нӧ, Гедеон, эм на табакыд?.. Вай нӧ куритӧд менӧ.

ГЕДЕОН (пыркӧдӧ кӧшельсӧ). Со тай, буссӧ жӧ лоӧ пыркӧдны... Тӧрӧкан кок кыза кындзи оз нин ло чигаркаыс, мый нин сэсь куритан, отеч Тарас? (Вӧчӧ чигарка да ӧзтӧ.)

ПОП. Шӧриӧн сідзкӧ куритам... Мый нӧ, мати, пӧртсӧ он идрав кытчӧкӧ?.. Мыйла куш пӧртсӧ сэтчӧ син водзӧ тоньгӧдӧмыд? (Перйӧ мӧтырысь пӧртсӧ да чом пельӧсӧ шыбитӧ.) Ещӧ нин ёнджыка та понда кынӧмыд сюммӧ... (Сы кості Гедеонлӧн куритчыссьӧ — кыкысь-куимысь кыскыштӧ дай бырӧ, шыбитӧ чигарка помсӧ кок улас да талялӧ сьӧлыштігтырйи. Поп бергӧдчӧ Гедеонлань да корӧ.) Но, вай нин сэсся чигаркатӧ, ме кыскышта...

ГЕДЕОН. Важӧн нин быри, отеч Тарас. (Сувтӧ да вугыр шатин кутӧ.)

ПОП (лёкысь видзӧдлӧ Гедеон вылӧ). Ад горш, ставсӧ ӧтнас куритӧма... Коркӧ та пыдди водзӧстӧ босьта на ме...

СЕНЯ. Кынӧм сюмалӧ, мунамӧй гортӧ. Папа, ме ветла да босьтала дзугъясӧс?.. Некод жӧ ӧд оз пысав...

ПОП. Код тӧдас, пиӧ? Босьталан, а колӧкӧ самӧй шедан кадыс сэки воас?..

МАТУШКА. Ӧні нинӧм нин виччысьны... Шедны кӧ вӧлі, недельнад позис нин бура уна ва шыр кыйны... Мунам, отеч, гортӧ... Вӧльнӧй воздухнас тай пӧттӧдз нин лолалім — узьӧм ни олӧм прамӧй эз вӧв, дай тшыгъявны сэсся лоӧ.

ГЕДЕОН (пуксьӧ). А оз жӧ нин, буракӧ, шед, матушка... Меным ещӧ на кӧть ӧти шыр да шедіс, а ті ӧд весиг энӧ ӧти лов кыйӧй.

2-ӧд петкӧдчӧм

Чомйын водзӧ сёрнитігӧн веськыдвывсянь локтӧ Кузьма, киас бедь. Сувтӧ чом дорӧ ӧтик нальк дінӧ да кывзысьӧ.

ПОП (Гедеонлы). Мый тэ ошйысян? Аслад видз вылысь кӧ эськӧ кыйин, сэки позис тэныд шуны «менам» пӧ!..

КУЗЬМА. Бара нин, кылӧ, вензьӧны ва шыр кучикыд вӧсна!

ГЕДЕОН. Виддзыд абу тэнад ни абу менам, отеч Тарас, а ставыс енлӧн, божье творение!..

КУЗЬМА. «Божья тварь»... (Зурӧдӧ бедьнас да уськӧдӧ нальксӧ.) Кодкӧ татчӧ пырас?.. Час, мед чайтасны ва шыртӧ шедӧмӧн татчӧ... (Матыстчӧ чомлань.)

ПОП (сувтӧ). Сідзкӧ и тайӧ шыр кучикыс божье творенье!.. (Нетшыштӧ да косявлӧ.) Мед тэныд ни меным оз ло, вот, вот, со!.. (Ставныс чуймӧны.)

ГЕДЕОН (чеччӧ да кутчысьӧ поплы морӧсас). Вай!..

МАТУШКА (сувтӧ да дорйӧ). Отеч!..

СЕНЯ. Папа!..

ГЕДЕОН (поплы). Рӧзбойник тэ! Ныр-вомад вот резышта ме тэнӧ, трасичаӧс!.. Жаднӧй!

ПОП (шыбитӧ шыр кучиксӧ муӧ да водзсасьӧ Гедеонлы). Отойди от меня, окаянный!.. Нолтӧ, мати, Сеня, вайӧ ӧтвылысь шнёпкӧдыштамӧй дяксӧ!..

КУЗЬМА (чом водзӧ сувтӧ). Мый нӧ ті керсянныд?.. Мыйысь косясянныд? (Косясьысьяс эновтӧны ӧта-мӧднысӧ.)

МАТУШКА. Вай, Кузьма, дорйы кыкнаннысӧ... Ва шыр кучик понда косьӧ воисны отечьяс.

ПОП. Но, Кузьма тай локтӧма!.. Шедіс эз нӧ шырыд?

КУЗЬМА. Эз, батюшко... Код труст ногӧн сійӧ тварӧс и кыйныыс? Ветельӧ ни, гымгаӧ ни, дзугйӧ ни, некытчӧ оз шед... Гоз-мӧдӧс аддзылі, польӧдчӧны ваас, а оз шед мыйлакӧ... (Ылысь кылӧ пищальысь лыйӧм шы.)

ПОП. Кодкӧ, кылӧ, лыйис али мый?

КУЗЬМА. Утка кыйысьяс, кӧнкӧ, лыйсьӧны.

ПОП. Вот эськӧ пищальнад ва шыртӧ позис кокавны...

МАТУШКА. Ланьт, отеч, пищальнас и ставнас, асьтӧ кыдзкӧ ещӧ лыян...

ПОП. Тӧдан кӧ эськӧ нажӧтка лоӧ — пушкаӧн на лыйсян да...

КУЗЬМА. Ва шыр дорсьыд ӧд, батюшко, зарадыс донаджык сулалӧ...

ГЕДЕОН (пуксьӧ). Дай кучикыс тшыкӧ, зараднас жугалӧ...

ПОП. Мыйӧн нӧ эськӧ сэсся найӧс кыян?

КУЗЬМА. Капканӧн эськӧ колӧ видлыны, оз-ӧ сэтчӧ шед, кӧч моз.

СЕНЯ. Шырыд ӧд абу кӧч... Налькйӧ оз шед, а капканнад этша нин босьтан... Ме муна да дзугъясӧс босьтала... (Ньӧжйӧникӧн, кыйӧдчӧмӧн моз, чомйысь петӧ да гоннялӧмӧн надзӧник мунӧ: первой ветельясысь видзӧдӧ, сэсся гымгаысь.)

КУЗЬМА. Мунны эштӧма, батюшко... (Видзӧдӧ чом ӧдзӧс юр йылӧ.) Кӧн нӧ ва шыр кучикыд, отеч саломщик?

ГЕДЕОН. Отеч Тарасыд тай «юкис»...

КУЗЬМА. Кучикнас юксинныд? Шӧри косялінныд али мый?

ПОП. Ставсӧ косявлі, мед вывті эз ошйысь да эз дэльмӧд...

ГЕДЕОН. Дзонь недель чӧжся прӧмыс менсьым косявліс.

КУЗЬМА. Но, сы мында прӧмыссьыд нинӧм жӧ нин.

СЕНЯ (аддзӧ усьӧм нальк да котӧрӧн локтӧ чом водзӧ). Папа!.. Налькйыд усьӧма!.. Ва шырыд шедӧма! (Ставныс чепӧсйӧны. Кузьма бокӧ шпыньмунӧ.)

ПОП. Но, збыль?.. Слава тебе, боже, слава тебе, боже... Локтӧй жӧ ветламӧй; ӧдйӧджык!.. Сідзкӧ талун огӧ на гортӧ мунӧ... Вӧлисти тай шедан пӧраыс воис, слава богу!..

МАТУШКА. Слабог, кӧть ӧти шыр шедӧма жӧ.

ПОП (Гедеонлы). Лок, Гедеон, тшӧтш ветлам... Эн лӧгав... (Кыскӧ.)

ГЕДЕОН. Вот эськӧ ӧні, эн кӧ косяв, отеч Тарас, морт ӧтикӧн вӧлі-а... Ветлам нӧ... (Ставныс ньӧжйӧникӧн мунӧны.)

ПОП (сьылӧ, Гедеон отсалӧ). «Хвалите имя господне, хвалите, рабы, господа, аллилуйя, аллилуйя, аллилуйя»... (Воӧны нальк водзӧ.) Босьталӧй бедьяс да сувталӧй нальк гӧгӧрыс, мед оз пышйы... (Ачыс водзӧ сьылігтырйи пидзӧсчанясьӧ да юрсӧ му бердӧдзыс лэдзӧ — видзӧдӧ нальк костӧдыс.) А топыда налькйыс усьӧма, некутшӧм кост оз тӧдчы... (Бара видзӧдӧ; мукӧдыс неуна копыртчӧмӧн лӧсьӧдчӧмаӧсь бедьясӧн кучкыны.)

Кылӧ кӧнкӧ бара лыйӧм шы.

ПОП (дрӧгмунӧ). Матынӧсь нин кӧнкӧ?.. Мед эськӧ татчӧ эз жӧ локны... Нолтӧ, лӧсьӧдчӧй, ме кута нальк пӧвсӧ лэптыны да, мед бара сэки эз жӧ пышйы... Код тӧдас, гашкӧ, ловъя на да...

Лэптӧ. Мукӧдыс пыр вочасӧн увлань копыртчӧны. Кор дзикӧдз поп лэптас пӧвсӧ, ставныс шемӧс сулалӧны, ӧти здук видзӧдӧны мӧда-мӧд выланыс.

ГЕДЕОН. Куш?

ПОП. Куш! (Бӧр кисьыс пӧвсӧ лэдзӧ да ыджыда ышловзьӧ.)

КУЗЬМА. Куш тай!

ПОП (юрсӧ ӧшӧдӧ). Мыйла нӧ куш? Ок, ок, ок!.. Не сподобил господь!.. Да, Гедеон, омӧль прӧмышляйтӧм миян лои.

3-ӧд петкӧдчӧм

Сёрнитіганыс шуйгавывсянь петӧны Васька да Митрей. Кыкнанныслӧн пельпом выланыс пищаль; косканыс патронташъяс; боканыс гоз-мӧд утка ӧшалӧ. (Позьӧ дом йылысь ӧтикыслы понйӧс нуӧдны.) Найӧ сувтӧны бокӧ, мед эз друг казявны.

ВАСЬКА (кутӧ Митрейӧс). Мый нӧ тайӧ, Митрей? Поп-дякыс мый тані вӧчӧны?.. Со чом вӧчӧмаӧсь, вугыр шатинъяс чургӧдӧмаӧсь. Сё дивӧыд!..

МИТРЕЙ. Час, тӧдмалам, Васька, ставсӧ...

КУЗЬМА. Аттӧ, бара на эз шед ва шырыд!..

ВАСЬКА. Ва шыр тай кыйӧны, газетад тай вӧлі гижӧмаӧсь.

МИТРЕЙ. Сійӧ тай, тыдалӧ... Со ветель зэвтӧмаӧсь косас!.. Аттӧ дивӧ! (Кызӧктӧ гораа.) Но, кодъяскӧ тай тані кыйсьӧны жӧ?

Попъяс повзьӧны.

ВАСЬКА. Отеч Тарас тай вӧлӧма... Здорово!.. (Копрасьӧны.)

ПОП. Мир вам!.. Ми сідз волім, балуйтігмоз... (Аслыс.) О, господи, помилуй!.. (Налы.) Ті нӧ утка кыянныд?

ВАСЬКА. Сідзи довъялам... (Матыстчӧны попъяс дінӧ.)

МИТРЕЙ. Мый нӧ ті сэні вӧчанныд?.. Чомйыс тіян жӧ?

ПОП. Миян, Гедеонкӧд шӧриа...

Васька Митрейкӧд куритчыны заводитӧны.

ГЕДЕОН. Менам сэні толькӧ витӧд пайыс, сэсся отеч Тараслӧн...

ВАСЬКА (видзӧдлӧ гӧгӧр). Ветелясянныд, тыдалӧ?.. Мыйкӧ нӧ чериыс шедыштӧ оз?

ПОП. Омӧля; муртса, гашкӧ, юква вылӧ лоӧ... Мый кыям — сійӧ и сёям да...

МИТРЕЙ. Косінӧ тай нӧ ветельястӧ зэвтӧмныд!.. Кысь нӧ сэтчӧ чериыс пырас?..

ПОП. Дыр нин олім да, косьмӧмаӧсь тай со... Квайтӧд лун нин талун вӧйтасьӧмыслы да.

ВАСЬКА (сералӧ). Мыйла нӧ, отеч Тарас, пӧръясян?.. Ті ӧд онӧ чери кыйӧ... То, налькнас нӧ, чери жӧ кыйлӧны?..

ГЕДЕОН. Налькъяд, дерт, чериыд оз шед, он тай кывлывлы-а...

МИТРЕЙ. Ва шыр тай кыйӧны тайӧяс, Васька?

ПОП (вашъялӧ). Вернӧ, другъяс, ва шыр эськӧ кыям да висьтавныыс быттьӧ кыдзкӧ абу лӧсьыд!..

ВАСЬКА. Став семьянад дай казактӧ тшӧтш босьтӧмныд?

ПОП. Ставным эськӧ волім да омӧлик прӧмыс жӧ лои...

МИТРЕЙ. Мыйясӧн нӧ кыянныд? Ветельясӧн али мый?..

ВАСЬКА (сералӧ). Аддзӧмаӧсь тай прӧмыс!.. Самӧй буретш поп-дяклы и эм!.. (Сералӧны кыкнанныс.)

ПОП. Мый нӧ сераланныд? Зэв эськӧ бур прӧмыс да оз шед-а... Госторгыд тшӧктӧма ва шыртӧ кыйны, а абу индӧма, кыдзи да мыйӧн сійӧ тварӧс кыйныыс...

ВАСЬКА. Сэсся ті ветельясӧн кыянныд, — ха-ха-ха!..

ПОП. Гымга, тонӧ сулалӧ и...

ГЕДЕОН. Вугыръясӧн тшӧтш...

МАТУШКА. Налькъясӧн и.

СЕНЯ. Дзугъяс на пукталӧма тшӧтш и... (Мунӧ шуйгавылӧ.)

КУЗЬМА. Некытчӧ оз шед-а... (Пырӧ чомйӧ да куритчӧ, шпыннялӧ.)

ПОП. Оз, оз шед... Гортӧ сэсся талун мунам...

ВАСЬКА. Кыснанӧн ӧд ещӧ колі видлыны!.. (Юрнас боквыв легнитӧ.) Таті кӧ берег пӧлӧныс кыснаннад гоз-мӧдысь мунан, надейнӧ дас шыр крукасяс... Кыснаныд югмунас, да пырысь-пыр эськӧ ва шырыд и кутчысяс...

ПОП. Вермас, другӧ... А кыснаныд меным и дум вылӧ эз усьлы... Аттӧ дивӧ!..

МИТРЕЙ. Угоддьӧяснытӧ сэсся, кӧнкӧ, энӧ жӧ и вежӧдӧ да. Колі ӧд бура кадитны да вежа ваӧн резны... Сэки эськӧ ва шырыд и валитіс!..

ПОП (Митрейлысь корӧ). Вай, другӧ, чигарка помтӧ кӧть кыскышта... Табакъясысь дзикӧдз нин орим.

МИТРЕЙ (сетӧ кӧшӧльсӧ). На, выльысь гартышт... Аттӧ, ті — прӧмышляйтысьяс!.. Да ӧд ас сертиныд и прӧмысыс сюрӧма... Мыйкӧ нӧ шеді эз?

ПОП (чигарка вӧчӧ да ӧзтӧ). Эз шед... Весиг ӧд ӧти ва шыр некытчӧ эз крукась, ӧкаяннӧйыд!..

ГЕДЕОН. Меным эськӧ и шедліс да отеч Тарас косявліс кучиксӧ...

ВАСЬКА. Мыйла?

ПОП. Мый нин сэсь, ӧтиксьыд...

ВАСЬКА. Сідзкӧ, урсасьӧмаӧсь тіян угоддьӧясныд, да сійӧн эз и шед нинӧм.

ПОП. Господьыс тӧдас... Мыйӧн и кыйны найӧс колӧ?

МИТРЕЙ. Медбур на эськӧ, ме чайта, вӧлі, престол вывсьыд кӧ кресттӧ татчӧ вайин да сійӧн котшкӧдін шыръястӧ... (Сералӧ.)

ПОП (дӧзмӧ). Эн кощунствуйт, богохульник!..

ВАСЬКА. Збыль ӧд, Митрей, крестсӧ и колі босьтны. Сэки эськӧ вот и лои «шыр молитва рака крестыд!» (Сералӧ.) Мунам!

МИТРЕЙ. Тіянлы, поп-дяклы, сӧмын шыр кыян удж и кольны кутіс. Регыд нин ковмас аслыныд, шыръяс моз, розьӧ пырны. Прӧмышленникъяс петӧмаӧсь!.. (Мунӧны, бердӧм мысти сьывны босьтӧны):

«Гажа тулыс воис,

Гӧгӧр жургӧ шор,

Шонді лымсӧ сёйис,

Ловзьӧ пулӧн кор».

Мукӧдыс ӧти здук шемӧс сулалӧны копырӧн.

Занавес.