Гудыръян дыръя (Миронов)
| Гудыръян дыръя Автор: Александр Сергеевич Миронов 1927 ар |
Ульчаын пуныос ӵаш уто. Пуны утэмлы ёрмыса, калык солань-талань ветлэ.
— Ма, мар озьы лекос пуныос уто? — быгылес, пурысь тушо Кузьма лапег гинэ маке горд тушо Сергейлэсь юа.
— Нош ик салдатъёс нянь октыны лыктӥзы, дыр. Коньдон-мар ке сётысалзы, соку, оло, нянез сётӥсь но луысал. Табере ужа-ужа но олокин понна огшоры сёт ини. Ма, кин озьы огшоры ужалоз? Эк, таӵе но дуннеын улод! Кошкизы умой улонъёсыд, кошкизы!
Салдатъёс потӥзы. Висказы гурт тӧро мынэ.
— Кытчы сое озьы нуо? Шат мар ке янгышез вань? Номыре но таӵе улонлэсь уд вала, — ӟезьы азьын кык кузя кышноос куспазы кенешыса сыло.
Салдатъёс пырак гурт пуме мынӥзы, нюк сьӧры выжизы. Ӧжыт улыса, соос сьӧры кунулаз бадӟым книгаен, кусказ револьверен, егит гинэ, шинелен, лапег салдат выжиз на.
— Озьы ик, луоз. Мар, со сяна, луоз, нош нянь кулэ луиз, вылды?
— Быриськиз ук табере, быриськиз! Вань няньдэ нош ик ӵужыса кошкозы ини.
— Пиналъёс, мынэ али, мынэ, тодэ, мар меда соос ветло. Оло, кӧня ке нянез палдуртыны вуод на? — шуыса, пересьёс пиналъёсты нюк сьӧры ыстӥзы.
Куинь кузя ог 7-8 аресъем пиналъёс, шудыса кадь ик, нюк сьӧры тачыр гинэ кошкизы.
— Сопал пумын улӥсьёслы та дыръя умой ини. Соос, майбыръёс, няньзэс но, мар но палэнтыны вуозы ини. Котьмае но бен татысен утчаськыны, чортаськыны кутско. Коть одӥг пол сопал пумысеныз мед кутскозы вал. Талэсь валлян но татысен ик нянез утчаса кошкизы. Сопалъёс няньзэс ватыны ваньзы вуиллям, — Кушъя ӟаректыса вера.
— Корт уробоосты гожъяса ветло, — нюк сьӧрысь Дурга ивор вуттӥз.
Кинлэн ке корт уробоез ӧвӧл, соослэн сюлэмзы небӟиз.
— Сергей, ойдо кытчы ке корт уробомес палэнтомы. Кужмысь-кужмысь басьтыны туртскиськиз но, табере огшоры-а сётыса лэзёд ини, — Ӟумъя, туж куалектыса, Сергеезлы вераса, липет улын пукись муртэз суйтӥз кыска.
— Кытчы ватод на? Тани вуозы ини ук!
— Тыныд ялан озьы луоз. Сенике нуыса, вылаз куро куяно, шара кыллемлэсь ватэм луоз, оло, сокем уз бугыръяське.
— Котьмар мед луоз! Ватыса-мараса уд туртскы ини. Ватод ке но, бускельёс ик вералозы: уката урод луоз. Уробоед понна йырыд быроз. Ачид ке луид, корт уробоез гинэ нош шедьтод.
— Тон соослы маин ке тырмытод, дыр? Аслэсьтыд салдатысь ваем шинельдэ но кузьмад уга! Сётоно шуыса ивор гинэ вуиз, тон соку ик нуыса вуттӥд. Калык ӧз нуы но, номыре но ӧз луы. Табере соос шуба кыскет карыса нулло ини. Тон номыртэк кылид.
— Оло, утчаса но уг ветло, оло, гожъяло гинэ. Гожъяло гинэ ке, ум вералэ; утчало ке, ватэмзэ но шедьтозы.
Со куспын салдатъёс гурт тӧроен корка вуизы.
— Митрей, корт урободэ возьматы, тани гожъяса ветло, — гурт тӧро Ондрей шуэ.
— Мынам уробое вуж ини, куашкамын, марлы со яралоз на?
Солэн уробоез урод ке но вал, «яралоз» шуыса гожтыса кошкизы. Собере, шып гинэ кенер вамен тэтчаса, Сергейлэн азбараз, Сергей доры вуизы.
— Сергей, возьматы али урободэ, со тынад кытын понэмын? — Ондрей юа.
— М-м-ма, кыӵе мын-на-ам уробое, мынам нокыӵе уробое но ӧвӧл. Ми Митреен кемалась ик али ӧм люкиське, милям соин уробомы ӵош вал, — Сергей ӟаректыса, бакчыса вераны туртске.
— Что? Нет, что ли? — огез салдат дыртыса юаз.
Дӥсьтыса-дӥсьтытэк Ондрей «н-н-не-э-эт» шуиз.
Ватэмзэ ке тодӥзы, веть сое зол пыжозы. Сое озьы но одӥг пол пӧсе вуттылӥзы ини. Таосыз но салдатъёс гуртысьтыз потыкузы ик кышкатӥзы.
— Пӧяд-марад ке, арестовать карыса сьӧрамы нуом, — шуизы.
— Кышкатытэк уг луы ук! Соослэсь но юало, мар карод?!
Салдатъёс умоесь шедизы. Ондрейлэсь могаса верамзэ шӧдӥзы ке но, ас сюлмазы гинэ кельтӥзы.
— Ну, нет, так идём дальше, некогда тут стоять, — шуыса, могась Ондреез азьлань чортыса нуизы.
— Тодӥзы-маразы ке, Сергей, ачид янгыш луод, — шуыса, Ондрей, берзэ учкыса, салдатъёс сьӧры мукет азбаре выжиз. Отысь уробо бер шедьтӥзы. Гожтыса азьлань вамыштӥзы.
***
— Инмаред нуиз. Ойдо, Сергей, табере уробоез ватоно ини. Кулэ ке, нош ик берлань лыктозы, шайяськозы.
— Ӧйтӧд, ватыса туртскод оло мар?
— Лыктӥзы ке, липет улын, ныр улазы ик. Табере котькызьы но ватӥд шуозы ини.
— Пыдло ватэмлы уката йырзы кур луоз! Э-э-кек-эк, улод-вылод, аслад ваньбуредлэсь кышкалод, аслад ваньбуреныд ватсконо луиськиз ук!
— Я, эн ни мога, лыктэмзылэсь азьвыл ватоно.
— Кошкы ай, та уробоед понна йырдэ быдтод. Мыныса ачим вералом шат? Мед гожтозы, малпаськонэз ичигес луоз.
— Кытчы мынод на?
— Буба, эн ни мын, оло, уз но лыктэ ини, — 15 аресъем нылыз бубазэ буйгатыны тырше.
Сергейлэн сюлмаз мертчиз. Нылпиосыз тодаз лыктӥзы. Кенос азе выж вылэ пуксьыса, йырзэ ошиз.
«Мыноно-а, ӧвӧл-а?» — шуыса, зол малпаське.
Ньыль-вить аресъем пиез потыса, дыбыр гинэ бызьыса, азяз пыриз.
— Буба, буба, уробоез ватоно шуэ нэнэе…
Нылпиосызлы маке со ваньбур кельтонэз тодаз лыктэ. Солы аслыз мумизлэсь-айизлэсь номыре ваньбур ӧз шедьы. Ваньбур шедьтыны туж секыт вал.
— Эк, пие, пие, тынад номыре малпаськонэд ӧвӧл ук!.. — пизэ азьысьтыз палэнтыса, интыысьтыз султӥз.
— Мыныса ватом ке ватом. Нош кытчы бен ватод?
— Сенике? Отын умой уз луы, обине куро люке ватомы.
***
Сергейлэн сюлэм чет-чет-чет выре. Туж кышка. Корказ пырыса, йырзэ ошыса, ӟус вылэ пуксиз.
— Буба, буба, маке нош ик ульчаетӥ салдат лыктэ, пельпумаз оломаиз вань, — пичи пиез шуэ.
— Йыр быриз! Йыбыръяськизы, луоз, шайтанъёс.
— Ма, кин? Со Гонӟо ик вераз, дыр? Учкыса кошкиз, пельтэм чёрт! Сое салдатысь кельтыны тынад пиед ик туртскиз, табере со озьы тау каре ини. Ачиз кошкиз, иворез но ӧвӧл, — Ӟумъя вера.
— Мон мыныса ватско. Пыриз ке, пуӵ кораны кошкиз шуэ.
— Тӥ, пиналъёс, юнме эн вераське. Юазы ке, ум тодӥське шуэ, — мумызы пиналъёссэ валэктэ.
***
Ульчаетӥ зэм ик салдатъёс лыкто вылэм. Ӟумъя Сергейлэсь но зол кышказ. Тодӥзы ке, ыбозы ук! Ваньбурдэ нуозы, кызьы та пиналъёсыныд улод, пиналъёс уно…
Сергей доры салдат ӧз пыры, ульча пуме, нюк сьӧры кошкиз.
Вань гожъям уробоосты огазе люкало. Медаз воштылэ шуыса, ачиз лыктэм.
Ӝыт ини. Ульча шорын ог 15 уробо люкамын. Калык уно. Ас ваньбурзэс жаляло.
Вал шедьтыса, уробоосты нуизы. Одӥгез салдат келяса мынӥз. Отӥез кытчы кариськизы, нокин уг тоды.
Сергей «гуаз» туж куалекъяса пуке. Салдатъёс кошкемын оло ӧвӧл, семьяез номыре уг тоды.
Ватскем адямимы отын ик уйзэ ортчытӥз. Семьяез ӵукна оть-тать эскериськиз: номыре уг ни кылӥськы. Сергейлы шӧ сётыса, Сергей гуысьтыз потӥз.
— Сергей, бен уробомес ватӥськом шуимы но, карнанъёсыз отчы ик шарае кылиллям ук! Ватыны вунэтӥськеммы. Уробо азьмес питранъёсыныз палэнтӥськеммы ик.
— Мон но со сярысь берло малпаськи на но, потэм ӧз луы ини, ӧй дӥсьты.
— Сое кутскыса тӥялтоно. Сое выльысь лэсьтыны секыт уз луы.
Со куспын мукет гуртысь 18 арес пиез бертӥз. Соин уртче уробо карнанэз, руз-лазь гинэ тӥялтыса, отчы ик куштӥзы.
— Мед кыллёз. Утчаны ке кутскизы, питранъёссэ нуизы шуом.
***
Собере уробо утчась ӧй ни вал. Гурт калык гинэ, «йыбыръяськомы» шуыса, ялан кышкатылӥз. Тулыс пал, вуоно аре, ожмаськон вуиз. Гордъёс интыяськизы. Улытозязы кресьянлэсь уно ваньбурзэ сурт-сарт каризы. Толалтэ номыре жугиськон, ыбылӥськон-мар ӧз ик потылы. Тӧдьыос пырак лыктыны ӧз быгатэ.
Тулыс вуэм бере, тӧдьыос матын, жугиськон но потоз, дыр, шуыса, туж ӵем иворъёс вуылыны кутскизы. Татысен ог 5 иськем эсэп пичи селое но котыр гуртъёсы эскерисьёссэс ӵем-ӵем ыстылӥллям. Сое гордъёс но тодылӥллям. Соосты пумитаны дасяськыны кутскизы. Возьмаськисьёссэс юнматӥзы. Ожлы дасясько.
Тулыс ю кизён кызьы но озьы ортчиз. Кресьян маке со кизьыны туртскиз.
Тӧдьыос матэ кариськыса фронт юнманы кутскем бере пиосъёсты армие басьтӥзы. Куанеръёс вуж юон сямез пумаз вуттыны ӧз ни быгатэ. Юон сям карытэк-маратэк кошкизы. Кумышка пӧзьтыны эрик ӧз ни луы.
Пиосъёсты салдатэ басьтэм бере 2-3 арня улыса, гордъёс уката зол юнманы кутскизы.
Выль салдатъёс вуизы… Одӥг-одӥг винтовкаен ыбылӥськем куараос но кылӥсько ини.
Куазь шулдыр. Валэс ю но потэмын. Ӟег уд чебер будэ. Окопъёс копано шуыса ивор вуиз. Ваньзэ ужаны быгатӥсьёсты гуртысь окоп копаны поттӥзы. Нокинлэн пумит кариськемез уг луы. Кресьян аслэсьтыз ваньбурзэ ачиз изъянтэ, аслэсьтыз кизем юзэ ачиз ик бугыртэ. Гурт котыртӥ, кыйдоос вылтӥ, окоп копало. Синву потымон жаль!
— Улон быриз. Ас юдэ аслыд быдтыны усе, — шуыса, кресьянъёс куспазы кенешыса копало.
Пумит карыны уг луы. Ыбонэн кышкато. Мыноно, копано луэ.
Ог 2-3 нуналскын гурт котыртӥ уно окопъёс луизы. Вож ӟег уд пӧлын окоп копам сюй горд-горд адске.
Куазьлэн шулдырезлы шумпотыса, луд вылын тюрагай шулдыртэ. Гурт шорын, ульчаын, пиналъёс сюй пӧлын. Гуртлэн сьӧраз калык окоп копаны выре.
Ожмаськонлэн туннэ-ӵуказе улӟонэз тодмо ини. Толон гинэ чугун сюрес вылысь тӧдьыослэсь эскериськыса ветлӥсьёссэс адӟиллямзы. Гурт дорысен отчы ог 2-3 иськем сяна ӧвӧл. Чугун сюрес выж куашкатэмын. Выж котыртӥ котырак нюлэс. Берло нуналъёсы татчы тӧдьыос ӵем-ӵем ветлыны кутскизы. Толон одӥгез, юри кыльыса, гордъёс пала кариськем.
— Тӥ вылэ лыктыны тӧдьыос зол дасясько, юн эскериськыса ветло, — шуыса, гордъёслы со вера.
Окопъёсы пулемёт пуктылӥзы. Гурт пуме корка йылэ нимысьтыз возьмаськись понӥзы. Окоп копасьёсты дыртыто.
Нуназе котыр корка йылын возьмаськись чугун сюрес вылысь тӧдьыосты адӟем. Сое ивортыса но ӧз вутты, тӧдьыос паласен одӥг пол ыбем куара кылӥськиз. Корка йылысь адямиез васькытӥзы.
Гордъёс винтовкаосын, тачырак шуыса, ваньзы ӵош ыбизы. Собере пулемётъёсын тр-тр-тр! шуыса ыбылыны кутскизы. Гурт соку гинэ умой-умой ыбылӥськемез кылӥз. Окоп копасьёсты окопъёсы выдтылӥзы: пегӟыны медӥсьёслы пегӟыны эрик ӧз луы. Тӧдьыос но пулемётэн, винтовкаен ыбыло. Кытын-мар луэмзэ но куалектэм гурт умой-умой уг вала ини. Кудӥз ватскыны тырше, кудӥз бӧрдэ, вӧсяське: чир-жаг вазе. Дуннеын шакайёс вань шуо, зэм вылэм.
Вася, ог 50 арес маке, гид йылаз тубем, отын учкыса сылэ.
— Вася, Вася, мар отын кариськод, веть тонэ отын виёзы! — шуыса, солы кин ке зол черектӥз. Вася, сое шӧдыса, ӵыштырак гинэ гид йылысь васькиз.
Гурт сьӧрын окопъёсын «взво-од… пли-и…» шуыса кесяськем кылӥське. Винтовкаосын тачырак-тачырак ыбыло, пулемётъёс но тачыртэмысь уг дугдо.
***
Ӵукна. Шунды вылэ ӝутскымтэ на. Ӵукналэсь шулдырзэ векчи тылобурдоос мадеменызы уката шулдыр каро. Гуртын гинэ тылобурдоослэн шулдыртэмзыя шулдыр ӧвӧл. Салдатъёс толон вием эшсэс жаляло. Со яратоно эшсы вал. Гурт калык, вием муртэз адӟыса, тодмооссэс тодазы ваё.
Ульча шорын вань салдатъёс пӧлысь ог ӝыны эсэпез люкаськемын. Гурт калык но отын ик. Ӝоге-мальке лэсьтэм коросын толон вием эшсы кылле.
— Мумиз-айиз, вылды, гуртаз вите вал? Татын йырыз быриз, — гурт калык куспаз кенешыса сылэ.
Ӧжыт улыса, салдатъёс вырӟизы, эшсэс нуизы. Гурт сьӧры, «Вы жертвою пали в борьбе роковой, в любви беззаветной к народу…» шуыса, кырӟаса пото.
Гурт сьӧрысь луд вылын гу гудэмын. Вием эшсэс отчы гу доры ик понӥзы. Салдатъёс котырак радэн султӥзы. Командирзы гуысь ӝутэм сюй вылэ султыса вера:
— Эшъёсы, туннэ асьмеос дуно эшмес ватӥськом. Толон ужась но кресьян калыкез зӥбыны турттӥсьёс асьмелэсь та дуно эшмес виизы. Революци понна, эрикен улон понна жугиськыса кулӥз, быриз. Асьмеос туннэ улэп, ӵуказе нош, эшмы сямен ик, оло, быромы. Ӵок! Асьмеос уно, ваньмес уз быдтэ. Эшмы быриз ке но, солэсь кылем винтовказэ киямы зол кырмыса, вир юисьёслы ум сётске!..
— Эшъёс! Та дуно эшмы революци понна зол сылӥз, улонзэ сётӥз. Эксэй дыръя ик со ужась калыкез мозмытон понна зол ужаз. Горд Армие пырыса но, со лапак тыл пӧлын жугиськыса улӥз. Со интые ми, егитъёс, дасэн-дасэн султомы, солэсь винтовказэ киямы зол кырмомы! — солэн висъянтэм эшез, ог 20 арес маке, вера.
Салдатъёс винтовкаен куинь пол гурак-гурак вылэ ыбизы, короссэ гуэ лэзизы.
***
Ог 3-4 нунал ортчиз. Гурт дорысен ог 3 иськемын пукись гуртэ 4-5 пол пушкаен ыбизы. Кӧня ке юртэз но сутӥзы. Та гурт тӧдьыос но гордъёс вискын, шур дурын сылэ. Отысь юртэз сутэм бере калык ваньбурзэ тылпулэсь палэнтыны малпаське. Салдатъёс ик визь сётӥзы. Окоп лэсьтыса, ваньбурез отчы тырыны косӥзы. Обиньёсы, шур дуръёсы, нюк бамъёсы — юртлэсь палэн азьёсын огъя гуос копамын.
Юрт доры матэ гу копаса, юрт сутскыны кутскемен ваньбур но быроз ук!
Луд вылысен учкыса, гуртысь окопъёс огъя горд-горд адско. Гурт ваньбур отчы ватэмын. Маке тыч-тач ке вазьыны кутске, калык окопе ватске: йыр дуно, нокинлэн но кулэмез уг поты.
Кык-куинь нунал улыса, нош ик нуназе котыр, «гур-р гу-укӵ» шуыса, тӧдьыос пушкаен ыбылыны кутскизы. Та гуртэз сутыны малпало вылэм. Гурт бадӟым. Снарядзы гуртэ ог ӝыны иськем ӧз вуы, луд вылэ усиз. Нош та гурт дорысен 3 иськемысь гуртлэн пумаз вуиз. Кӧня ке пол ыбем бере бугыр-бугыр ӵын потыны кутскиз. Тылпу потэм бере уката зол ыбылӥзы. Быдэс гуртысь юртъеръёс сутскыса быризы. Номыре кыльымтэлэсь, быдэс гуртэ одӥг мунчо гинэ кылиз на. Азьлон шулдыр гурт интые, ӝужытэсь, шулдыресь коркаос интые сьӧд-сьӧд эгыр из пыры кылиз. Отын но татын чал-чал гур муръёос сыло. Гуртлэн тусыз быриз. Сутскем интыетӥ калык куректыса, бӧрдыса ветлэ. Пиналъёс чир-жаг кесясько, пырон инты утчало.
***
Ӵукна отын но татын нош ик ыбылӥськем куара кылӥськыны кутскиз. Винтовкаен тачырак-тачырак ыбыло, пулемётъёс «тр-тр-тр» шуыса вазё. Гурт калык но, салдатъёс сямен ик, окопъёсы пыремын. Кресьянлэн окопез салдатъёслэн кадь ӧвӧл. Вылыз сюен липемын. Пырыны гинэ мед луоз шуыса, огпалтӥз ӧс нерге пась кельтэмын.
Нуназе дырозь чик дугдылытэк жугиськыса, гуртэ оген-оген сӧсыртэмъёсты но пумен вуттылыны кутскизы. Окопъёс вамен, чиу-чау! карыса, пуляос кошко, чузъясько.
Нуназе. Лек дыр вуиз. Сергейлэн окоп бераз, бу-у-у! шуыса, пушкаысь ыбем снаряд усиз. Снаряд шур дуре усем. Вуэз, нӧдэз мае ке сямен, вылэ пазьге. Номыре адӟылымтэ удмурт кышноос кышкаса, шыр кадь, сэрегъёсы шымырскемын. Коркан нокин ӧвӧл ини. Окопын кышкаса пукись кышноос, снаряд усемлы быдэ «остэ, инмаре, куазе, кылдысинэ?..» шуыса, кирос поно, пиналъёссэс буйгатыны туртско. Пиосъёс но зол кышкамын.
Тӧдьыос ог 3 час котыр дугдылытэк пушкаен туж зол ыбылӥзы. 4-5 снаряд тыметэ усиз. Юрт шоры одӥгез но усьыны ӧз шедьы, тылпу ӧз поты. Пушкаен ыбылэмысь дугдӥзы. Винтовкаен но пулемётэн ыбылӥськем куара гинэ кылӥське на.
Шунды пуксемлэсь азьвыл ыбылӥськемысь дугдӥзы. Ог ӝыны час улыса, гурт чус луиз, номыре тыч-тач вазем куара уг кылӥськы ини. Гурт калык дӥсьтыса-дӥсьтытэк гуосысьтыз йыръёссэс поттыло. Куд сюлмоосыз пумен ульчае но вуо.
— Стой, стрелять буду! — ульча сэргысь зол кеськем куара кылӥськиз.
Ульчае Кузьма потэм вылэм.
— Я, я… товариш-иш…
— Какой тебе тут товарищ! Эх ты, сукин сын!.. — таӵ! гинэ винтовка прикладэн тыбыраз йӧттӥз.
Ульча шортӥ ик валлэн вань кужмыныз адями кияз шашкаен лыктэ. Пельпумаз погонъёсыз кисьтасько.
— Бей его!
Гордъёс пӧлысь салдат тузкыса гуртэ кылем. Тӧдьыос, сое шедьтыса, ульчае поттӥзы. Олокытысь отчы, кырныж сямен, вал вылын офицер вуиз.
— Эх ты, собачья морда, большевик, сволочь!
Тыч-тач гинэ винтовка прикладэн, урысэн тышканы, лапкатыны кутскизы. Вал вылысен офицер ымныраз урысэн шуккыса, вир пазьгиськиз. Адями музэ усиз. Музэ вуэм бераз но тышкамысь ӧз дугдэ. Адями номыре валантэм луиз.
***
Ыбылӥськем куара уг кылӥськы ини. Гурт калыклэн азьло кышкамез ӧжыт ортчиз. Сергейлэн коркаяз нылкышноос олоку самовар пуктыса вуиллям. Ӝӧк сьӧрын пуко: нӧкыен-маин чай юо.
— Веть войналэсь татчы вуэмзэ кин чаклалоз вал, тӥни кыӵе война луоз вылэм!
— Мар, война-а ма та? Та шудон чача гинэ. Германь ож ке татчы вуысал, номырид но ӧй кыльысал ини, вань гуртъёсты сутыса быдтысал.
— Б-у-у-ух! — шуыса, нюке снаряд усиз.
Укно пиялаос жингыртыса сэзъялскизы, кудӥз соку ик тӥяськиз.
— Остэ, остэ!.. Быриськиз ук татчы!
Ӝӧк сьӧрын чай юыса пукисьёс ваньзы пазьгиськизы.
— Пожа-а-а-ар!
— Выж сутске-э-э-о!
Ог 14 арес Иван, туж шӧртчи маке, олокытысь ульчае вуиз. Капка сьӧры потыса, нюке васькыны малпаське. Ульчаетӥ, бадӟым кызьпу ултӥ, Роман Вася кузь шӧйыныз иськавынэз дорысь, кузь-кузь вамышъяса, гуртаз бертэ, нюк сьӧры мынэ. Со сяна но кӧня ке мурт ульчае потэмын, тылпу кысыны дасясько. Визьмоосыз эскеръяськыса мыно. Маин тодод, оло, нош ик отчы ыбозы но, йырыд быроз!
— Бу-у-у-х! — нош отчы снаряд вуыса, сюй пырыез туж вылэ ӝутӥз. Ульчаын лошъяськись калык вылэ, липетъёс вылэ сапыр гинэ ваське. Матысь укно пиялаос нош жингырто. Калык кытчы быгатӥз, отчы шымырскиз. Роман Вася кызьпу улэ кузь шӧйыныз вез-вез выдэм. Кыллись муртлы номыре уз йӧты шуыса малпаз, вылды.
Иванлы но пӧсь йӧтӥз. Олокытӥ азбаре вуыса, липет улэ ӟиптэм.
— Кытӥ тон ветлӥськод, пуля ке йӧтысал, кин тонэ отчы пырыны косӥз ини? — мумиз ӵаш гинэ Иванэз пуре.
Ульчаысь лошъяськись калык ваньмыз быриз, ватскиз.
Нюкын номыре тылпу но чик вылымтэ. Снаряд ог сажень котыр выжлэсь палэнэ усем, ӵапак нӧдэ шедем. Отчы гордъёс «шестидюймовкаен» лэзиллям. Кык пол сяна ӧз ыбе. Тӧдьы салдатъёслэсь гурт сьӧры радэн-радэн выдэмзэс шӧдӥллям вылэм.
Куазь пеймыт луиз. Ыбылӥськонэн уг ни туртско. Тӧдьыос гурт сьӧрысь ӝоге-мальке копам окопъёсы пыремын. Уйзэс но отын ортчытӥзы. Ӵукна вуыса, нош ыбылӥськон потӥз. Кема ӧс ыбылӥське, ыбылӥськем куара каллен-каллен чусомыны ӧдъяз. Тӧдьыос азьлань кариськизы.
Гуртлэн мылкыд мукет луиз. Офицеръёс гуртэтӥ чилясь погонэн ветло.
— Пожалуста, пожалуста, што вам угодно! — шуыса, гурт узыръёс офицеръёс котыртӥ ветло. Штабазы телефон но золтыны юрттӥллям.
— Слушаю… наступать… вперёд! — офицер телефонэн вера.
Кудӥз шоро-куспо улӥсез но офицеръёслы матэ кариськизы. Кинлэн пиез Горд Армие кошкемын, кин нянь поттон котырын ужаз, ӵуказеяз ваньзэ тӧдьыос тодӥзы. Ваньмон дыр ке луысал, соослэсь семьяоссэс зол пыжысалзы, вылды. Ваньмон дыр ӧвӧл, салдатъёс ожмаськыса азьлань кошко. Озьы ке но подводэ кутэмлэсь ӧз мозме. Кӧня ке огшоры муртъёсыз но ас бордазы лякизы.
— Ма, таосыз но сыӵе ик-а ма? Подводэ нуо ук! — шуыса, гуртын вераськон поттӥзы.
Кык нуналскын тӧдьыос ог 18 иськем котыр азьлань мынӥзы.
***
Нырысь гуртэз басьтэм дырысен ог 2 арня ортчиз ини. Подводэн мынэм муртъёс кудӥз бертэмын ини, кудӥз али но бертымтэ на. Салдатъёсты уно ик адӟылыны уг луы ини. Гурт бадӟым сюреслэсь палэнын.
Туннэ ӵукна дырысен салдатъёс гуртын уно ветло. Мар луэмын, нокин уг тоды на. Соос гуртэтӥ мар ке ваньбур, уробоос-маръёс утчало. Сергей, сое шӧдыса, нош ик пӧсе вуиз. Нуназе котыр нош фронт вуэм шуыса олокин кыл поттэм. Со ивор соку ик быдэс гуртэ вӧлмиз. Ватэм ваньбур окопъёсысь поттымтэ на вал. Поттэмъёссэ нош ик окопъёсы пыртылыны кутскизы.
— Валъёсты басьто! — шуыса гуртэ ивор вуиз. Куд быгатӥсез валъёссэс тэле нуыса кошкизы.
Ӧжыт улыса, гуртэтӥ вал вылын но пыдын, кин кызьы быгатэм озьы, тӧдьы салдатъёс кошко, тӧдьыос берлань чигнало.
Гуртысь мар яраноез шеде, ваньзэ нуо. Кудӥзлэсь сиес, кӧня ке вал но шедьтӥзы.
— Эй, ты, у тебя тарантас есть, давай вытаскивай, куда зарыл, а то сейчас!.. — лыктэм салдат кияз револьверен Сергей шоры возьматэ.
Сергей номыре но шуыны ӧз тоды ини, тӧдьы ӟаректӥз. Кин чагиськем, Сергей соку ик тодӥз.
Поттытэк амал ӧз луы, быдэс ар ватыса кыллем уробозэ ачиз ик куро люкысьтыз поттӥз. Тӥям карнанъёссэ но ассэ ик тупатытӥзы. Иськавынэзлэсь валзэ нуизы.
— Нуэмзэс ке тодысал, азьвыл ик сётоно вылэм. Ужез бырысал. Кӧня вир быдтӥськиз… — шуыса, йырзэ ошыса Сергей пуке.
Гурт сьӧрысь гурезь бамтӥ уно салдатъёс кошко. Гурт шорын пичи гинэ шур кошке. Ваменак уродос гинэ выж вань.
Тӧл вуко кадь вукоез. Тулыс но сӥзьыл зоро дыръя гинэ изэ.
Гордъёс шуак лыктыны медаз быгатэ шуыса, тӧдьыос кошкыкузы выж улэ тыл понӥллям. Выж сутскыны кутскемлэсь азьвыл вуко ӝуаны ӧдъяз. Ма, мае уз ӝуа, солэн липетэз но куро. Сыӵе дыръя ӵапак тӧл но потыны шеде. Тӧл потыса, тылкизили гурт вылэ лобӟе. Гурт калыклэн кысэмез чик ӧз луы. Кык кузя салдатъёс адӟыса гурезь йылысен кык пол ыбизы. Калык пазьгиськиз. Вуко но, выж но сутскыса быризы.
***
Ог час котыр улыса, вал вылын сурон дӥсен гуртэ гордъёс вуизы.
Пинал калык олокытчы но вуэ. Шур дурын 3 кузя пиналъёс визнаса пуко. Соос доры ог 23 аресъем Ёгор вуиз. Визнаны «юрттэ».
Отӥ 3 кузя вал вылын салдатъёс мыно.
— Вы тут солдат не видали? — огез вал вылысь салдат визнасьёс доры мыныса юа.
— Н-не-э-эт… — куалектэменыз мырдэм шокчылыса Ёгор вазе.
— А вы тут што делаете?
— Я, я… так…
Ёгор ӟаректӥз. Салдат, сое шӧдыса, киыныз шонтыса, эшъёссэ ӧтиз. Кема вераськытэк, Ёгорез висказы нуыса кошкизы. Визнась пиналъёс отчы ик кылизы.
Ёгор азьвыл гордъёс палан тӧдьыослы пумит ожмаськиз. Нош тӧдьыос гуртсэ басьтэм бере соос пала кариськыса кылем но ватскыса улэм. Али кызьы ке но кутозы ини шуыса, ачиз юри кыре потэм.
Гордъёс, валъёссэс ӧжыт сюдыса, азьлань кошкизы. Тӧдьыос но пегӟемын ини.
— Давайте, давайте, кройте дальше! — подводэ басьтыса, кресьянъёсты лапег гинэ салдат, кутэн, вылаз кесяськем дӥсен, сюрес кузя азьлань ыстэ.
Азьпалан чик дугдылытэк ыбылӥськем куара кылӥське.
— Э, остэ, быри, гуртэ йыр ӧз быры но, татчы-а быроз ини? — шуыса, подводэ мынӥсьёс куспазы верасько. — Кытчы та ӧвӧлтэм нуэ. Жугиськон доразы ӝыны иськем гинэ вуымтэ на шуо. Йырез быдтыны юри пыртэ шат?
Берлань берытсконо шуыса, олокытысь куара кылӥськиз. Уробоосын векчи тэлез руз-лазь гинэ тӥяса, валъёссэс ваньзы берыктӥзы.
— Табере пырак гуртэ кошкомы ини!.. — куалектэм калык шуэ.
Озьы ӧйлась. Берлань чигнасьёсты дугдытӥзы.
Нуназе котыр азьлолэсь но юн ыбылӥськон потӥз. Сӧсырмем калыкез поттылыны кык подводэн жугиськон доры матэ пыризы. Котырак нюлэс. Сое чугун сюрес гинэ висъяса кошке, пуляос жугисько. Сӧсырмем калыкез поттыло.
Кык сӧсырмем муртъёсты нуо. Одӥгез вал вылысь салдат, кияз пуля йӧтэм.
— О-о-о-ох, дайте пить… воды… — шуыса чӧлляське. Суйыз огъя вирен нӧдэмын.
Мукетызлэн тыбыртӥз пуля потэмын. Кӧкыё уробоын мынэ. Быдэсак виресь. Умой-умой уг вала ини.
— Дайте винтовку, где она? Товарищи, застрелите меня… Дайте пить…
Уробо сэзъямъя сӧсыр мурт уката ӝуштыны кутске. Ог 50 сажень нуыса, сӧсыр мурт кулӥз.
Ыбылӥськем куара уг быры. Винтовкаен, пулемётэн, пушкаен ыбылэм куараос кылӥсько. Озьы ыбылыса, бугыр-бугыр ӵын потыны кутскиз. Ӝомыт луыса, котыр нюлэс чусомиз. Подводэ мынэм калык люкен-люкен кариськылэмын. Отын но татын одӥг-одӥг салдатъёс ветло. Кыз улъёсын тылскылӥзы.
— Большие огни не разводите, заметят… — салдатъёс одӥг огзэс юнмато.
Чугун сюреслэн мукет палаз, нюлэскытӥ, 2 кузя салдатъёс вал вылын лушкем ветлыны тыршо. Подводэ мынэм огназ ветлӥсь пичи муртэз шӧдӥзы. Огез салдат, вал вылысьтыз васькыса, матэ кариськиз.
— Мальчик, мальчик, иди сюда! — матэ лыктыны косэ.
— Наши, наш полк! — шуыса пичи пиен вераськем бере эшезлы вераз. Чугун сюресэз берлань выжизы.
— Товарищ, вставай, что ты, разве можно спать? — изись муртлы урысэн шуккыса, салдат сайкатӥз.
Султӥз. Подводэ мынэм Толокон Иван вылэм. Мугор солэн бадӟым. Шача кадь кузь.
— Я думал, что красноармеец уснул. Ложись, спи!..
Азьлань мыныны ӵукна ик приказ вуиз. Уйин тӧдьыос кошкиллям.
Подводэ мынӥсьёслы но ӵош ик мыноно.
— Ойдолэ уробо кӧкыосмес нюлэсэ куяса кельтомы. Сотэк, толло сямен, сӧсырмемъёсты поттылыны матэ пыртозы…
Ӧжыт гинэ салдатъёслэсь висъяськыса, кӧкыоссэс дыбыр-шатыр куяса кельтылӥзы.
Подводэ мынӥсьёсты 2-3 иськем сяна азьлань ӧз нуэ ини. Чупчи сьӧры ӧз выжытэ. Тӧдьыос кыдёке чигналлям.
***
Ожмаськон аръёс ортчизы. Окопъёс, снарядэн бугыртэм интыос али ӵошатэмын ини. Куддыръя гырыку музъемысь пуляос, патронъёс шедьыло на ик. Со пумын пиналъёс пӧлын тэргаськон но потылэ. Гуртысь сутскем выль выж лэсьтэмын. Отчы вуко гинэ пуктымтэ на. Шурез куасьме ини. Вуко бере тымет но быриз. Со понна бадӟымгес шур вылын выль бадӟым вуко лэсьтэмын. Таиз уно изэ. Гужем но тэк уг пукы. Сергей нылпиоссэ дышетыны кутскиз. Выль уробо тӥяны юрттӥсь пиез, армие ветлыса сӧсырмиз ке но, али гурто калык пӧлын ужа, уно бусыен ужан сярысь но малпаське ини.