Гут да бобув
Керкаысь ӧшиньӧд вӧтлісны гутӧс. Лэбаліс, лэбаліс гут, пуксис турун виж кор вылӧ. Кор кузьта люзьгӧ гӧна гаг.
— Мый нӧ тэнад нимыд? — юалӧ сылысь гут.
— Капуста гаг, — шуис мӧдыс.
— Мый нӧ сэтчӧ ланьтӧмыд, жуйвидзан, он лэбав ме моз?
— Лэбалан кадыс эз на во. Бобулӧ пӧртча дай лэбавны кута. Дульва петтӧдз виччыся сійӧ кадсӧ.
— Йӧй! Ньӧти жӧ тэнад вежӧрыд абу, — горӧдіс гут: — этатшӧм мисьтӧм гаг лӧсьӧдчӧ мича бобулӧ пӧртчыны.
Гут пукыштіс чӧла, кокъяснас весыштіс юрсӧ, сэсся шуис: «Коньӧрӧй, мыйла нӧ тэ он вермы лэбавны ме моз?»
— Энлы, ёртӧ! — воча шуис сылы гагыс: — регыд менам тэлӧн моз жӧ бордъяс лоӧны, нӧшта бурджыкӧсь. Сэки лэбалам.
— Дугды ошйысьӧмсьыд, — лӧгасис гут: — тэд нӧшта меысь мича бордъяс дай! Ланьт! Меысь мича бордйыс некодлӧн абу. Тӧдан кӧ ӧд, ме керка пытшъясас лэбала, олысьясыскӧд тӧдса. Тэ мый? Колӧкӧ эн на аддзывлы некутшӧм мортӧс.
— Эг, — шуис гаг: — тэ кӧ нӧ тӧдса, мыйла накӧд ӧтув он ов?
Гут нинӧм эз шу сылы воча, лэбзис водзӧ. Лун нёль мысти гутӧс бара вӧтлісны вежӧсысь. Лэбзис сійӧ тӧдса гаг дінӧ сёрнитыштны. Уна пӧлӧс сёрни панліс, — немтор эз артмы: оз вочасӧ шыась гагйыд. Гартчӧма кутшӧмкӧ кыш пиӧ да тоньвидзӧ — ӧшалӧ джагалӧм морт моз. Гут ньӧжйӧникӧн кокнас лег-лег вӧчис: «Йӧй, менам бордъяслы вежалін; ачыд гагысь омӧль лоӧмыд». Зэв нимкодьпырысь гут лэбзис водзӧ.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). The author died in 1925, so this work is also in the public domain in other countries and areas where the copyright term is the author's life plus 98 years or less (if applicable), or the copyright term is 97 years or less since publication for posthumous works (if applicable). |
|