Зыранизация

by Нёбдінса Виттор

Ласей Вась Арсень
Сыктывдін карсянь
Гӧститны воӧма —
Окота лоӧма.

Сӧветскӧй служак —
Сёрнитны кужӧ;
Быд ногӧн баситчӧ,
Зэв ёна тшапитчӧ.

Кырссьӧ пыр рочӧн:
Вой шуӧ «ноч»-ӧн,
Зонъясӧс — «ребята»,
Нывъясӧс — «девчата».

Рытнас туй кузя
«Роч» мунӧ сюся,
Вочасис том йӧзкӧд,
Нывъяскӧд, зонъяскӧд.

Гогнитіс юрсӧ
(Тшаплун оз урсав):
— Здорово, ребята!
Здравствуйте, девчата!..

— Коді нӧ тайӧ?
— Рочасьӧ тай-а...
— Сё морӧ, олӧмӧ,
Арсень тай вӧлӧма!..

— Едина сила! —
Шыасис Пиля, —
Вай, зонмӧ, варовит,
Мый вӧчсьӧ караныд?

— Новостей нету,
Только вот это.
Там идёт, братсыяс,
Зыранизация...

Чуймисны ныв-зон:
Кыдз сэтшӧм кывсӧ
Арсеньыс мӧвпыштіс,
Сбока друг пӧвсыштіс?..

— Аттӧ да дивӧ! —
Сӧймуніс Ивӧ. —
Садь быртӧдз повзьӧдін...
Мый нӧ нин ковзьӧма?

— Мый сійӧ збыльысь?
Висьтав вай выльысь.
Сувтісны юрсияс, —
Омӧль-ӧ бур сійӧ?..

— Чорт ево знает,
Што будет тайӧ!
Сам я не знаю, —
Слово, збыль, честная!..

— Кыдз он тӧд, Арсень,
Локтін ӧд карсянь?
Миянысь юраджык,
Висьтав вай бураджык!..

— Дело-то плохо,
Шуму-то много.
Все учреждения
Зэв возбуждения.

Какой-то Шаков,
Без всяких всяков,
Делает, братсія,
Зыранизация...

Тайӧс кыдз шуис, —
Арсень сэсь муніс.
Ныв-зонъяс колины
Ас костын больгыны.

— Но, морӧ, олӧм!
Мый бара колӧ?
Оз лэдзны шойччыштны,
Бурджыка лолыштны...

— Ме ногӧн, карад
Кыпӧдчӧ бара
Выль капискатсія —
Зыранизация.

— Оз-ӧ ло война?..
Кӧсйӧ пӧ воны
Англия миянӧ,
Ме чайта, сійӧн-а...

— Абу, зон, сідзи.
Шаковыс кыдзи
Лысьтӧма босьтчыны
Лёк уджнас ноксьыны?

Ме чайта, сійӧ
Крестьянаӧс кыйӧ,
Ставнымӧс вузалӧ, —
Француз дор сулалӧ.

Уджйӧз пӧ уна, —
Сы вӧсна мунӧ
Зыранизация:
Тшӧктӧма Франция.

Кутасны дзуртны,
Зыранизируйтны:
Эмбуртӧ чинтыны —
Французлы мынтыны...

Больгисны сёрӧдз,
Эз воны помӧдз.
Важӧн нин узьӧны
Ставыс сикт кузяла.

Пиля кор пырис,
Шуис лёкпырысь:
— Батьӧ, вай чеччыв жӧ,
Пӧлатьсьыд лэччыв жӧ...

— Мый нӧ тэ лоин,
Чуксалан войын, —
Узьӧмысь падмӧдан,
Вой шӧрын садьмӧдан?

— Прӧста ог садьмӧд...
Выль додьтӧ саймовт,
Медым эз кутны
Зыранизуйтны...

— Мый нин кӧн лои?
Коді нин воӧ?
Кытысь нӧ кывлін тэ
Этатшӧм кывъяссӧ?

— Воӧма карсянь
Ласей Вась Арсень.
Карыд пӧ шызьӧма,
Сы вӧсна гызьӧма.

Кутшӧмкӧ Шаков
Ставсӧ пӧ лякӧ.
Лӧсьӧдны рад сійӧ
Зыранизация.

Француз дор мунӧ:
Уджйӧз пӧ уна,
Колӧ пӧ мынтыны —
Кось вермас кыптыны...

— Но, трустӧ, олӧм!
Тэрмасьны колӧ.
Ӧдйӧ вай котӧртлы,
Скод татчӧ чукӧртлы!..

Сикт гӧгӧр зіля
Кытшовтіс Пиля.
Таркӧдіс-котраліс —
Скод вылӧ кораліс.

 * * *

Лӧз муртса тӧдчӧ —
Грездысь йӧз лэччӧ.
Пӧшти став войтырыс, —
Повзьӧмӧн, котӧрӧн.

Кодсюрӧ вӧньтӧг,
Мукӧдыс кӧмтӧг,
Шапкатӧг, кышантӧг,
Бабаяс чышъянтӧг.

Пилялӧн батьыс
Юралӧ ачыс.
Медвойдӧр шуисны
Пилялысь юасьны.

Пиля сэн сувтіс,
Висьтавны кутіс:
— Со мыйла миянӧ
Чукӧртім тіянӧс:

Ласей Вась Арсень
Воӧма карсянь.
Карыд пӧ гызьӧма,
Став йӧзыс шызьӧма.

Кутшӧмкӧ Шаков
Лӧсьӧдӧ закон —
Зыранизация,
Тшӧктӧ пӧ Франция.

Ме чайта, вокъяс,
Уна на лёкъяс
Важ моз ми тӧдламӧй,
Кабырӧ шедламӧй.

Война, дерт, чорыд
Лыбас, сё морыд!
Сэк — кампискация,
Мобилизация.

Босьтасны йӧзтӧ,
Нуасны мӧстӧ,
Овмӧстӧ куштасны —
Зыранизуйтасны...

Курас да карас
Сюрас на бара:
Медбӧръя лазъястӧ
Вылыссьыд чашъясны...

Сьӧкыд кад воӧ,
Повнытӧ лоӧ.
Мый вӧчны — артыштӧй,
Усканыд гартыштӧй!

Олам ми бокын
Сідзи нин лёка.
Другӧн кӧ суасны —
Ставсӧ сэк нуасны.

Со мыйысь полӧй!
Регыдджык колӧ
Бур кӧлуй гуавны,
Пыдӧджык сюявны!

Йӧз сэні шемӧс:
Вӧт али вемӧс?
Збыль ӧмӧй кӧсйӧны
Миянӧс лӧсйыны?..

Медвойдӧр Кӧсьта
Шыасис прӧста:
— Выль налог сюясны,
Нинӧм и шуасьны...

— Кыдзи нӧ нинӧм? —
Горӧдіс Пимен. —
Бӧрвылас аковтан,
Тӧдан кӧ Шаковтӧ...

Ласей Вась Арсень
Воӧма карсянь, —
Мортыс ӧд велӧдчӧм, —
Абу сэн ылӧдчӧм.

Ме думысь, Польша
Эралӧ горша.
Рушкусӧ сӧвтыштны,
Варшава ӧвтыштны.

Созон Миш Вара
Волӧма карад:
Ставыс пӧ котралӧ,
Сьӧм ӧктӧ МОПРА-лы.

Сылы пӧ лоӧ
Польшаын, Львовын
Тюрьмаын пукавны,
Стенъяссӧ люкавны.

Тшыгла пӧ кулӧ,
Отсавны колӧ:
Тюрьмасьыс мездыны —
Деньгаӧн вештыны.

Сэтчӧ, ме чайта,
Ковмасны шайтъяс.
Со мыйла жмитӧны,
Зыранижитӧны!

— Сӧран тэ прӧста! —
Шуӧ сэн Ӧстап. —
Некутшӧм мыжъясысь
Польшалы гыжъясьныс.

Ме чайта, вот мый:
Воздушнӧй флотлы
Ероплант дорӧны,
Сьӧмтӧ и корӧны...

Война пӧ мӧдысь
Воздухын мӧдас:
Мед вермам вермасьны,
Колӧ пӧ тэрмасьны.

Дерт, абу чача,
Властьыдлы лача:
Мый кутас сюрыштны —
Миянлысь курыштны.

Шуӧ тай Ӧпим:
Лэблі пӧ вӧтӧн,
Быттьӧ пӧ шердынын
Кыптылі бердмымӧн...

— Шердын кӧть пестер! —
Горӧдіс Нестер. —
Весьшӧрӧ ызганныд,
Асланьныд кысканныд.

Он ӧмӧй тӧдӧ:
Китай пӧ мӧдӧ
Сахалин весавны —
Миянкӧд лӧсявны.

Сідзи оз петны —
Сьӧм лоӧ сетны, —
Со мыйла жмитасны,
Зыранижитасны!

Вензьӧм сэк кыптіс,
Ыджыд зык лыбис,
Ӧтпырйӧ горзӧны,
Сьӧлӧмъяс чорзьӧны.

Мужикъяс венӧ
Сюйсьӧны сэні
Ӧтвылысь бабаяс.
Бӧрддзисны кагаяс.

Вензьӧмӧ муніс
Весьшӧрӧ луныс:
Песла ни турунла
Эз мунны «дурӧмла».

Пажын кад гӧгӧр
Равӧстіс Педӧр:
— Косттор вай вӧчламӧй,
Сёйыштны ветламӧй!

 * * *

Пажнайтӧм бӧрын
Бӧр лыбис сӧрӧм:
Сёйӧмнад лӧсьыдджык —
Гӧлӧсъяс лэчыдджык.

Медвойдӧр Кӧсьта
Шыасис нӧшта:
— Пажнайтны пуксигӧн
Дум вылӧ уси мем:

Оз-ӧ нин бара
Кӧсйыны карад
Ӧнія вот дінӧ
Продналог содтыны?..

— Дугды, зон, сӧрныыд,
Прӧста эн скӧрмӧд!
(Горӧдіс Яков сэн.)
Вунӧдін Шаковсӧ!

Сійӧ, сё морыд,
Тыдалӧ, чорыд...
Прӧста дзик йӧйталам —
Кузь лунтыр мӧвпалам.

Колӧ тан шуны:
Талун жӧ нуны
Бур кӧлуй ылӧджык,
Саймовтны пыдӧджык.

Ӧтвылысь вайӧ
Дзебласьны каям
«Гартан» нюр керӧсӧ,
Лука му керасӧ.

Кос места, вылын,
Корсьысьны ылын,
Оз кайны шобсьыны, —
Нинӧм и шогсьыны...

— Тӧлк тадзи абу! —
Торкис сэн Габӧ. —
Кокньыд ӧд шунытӧ,
Талун жӧ нунытӧ.

Ӧні нӧ, тӧвнад,
Катӧдан вӧвнад, —
Лӧсьыда гургасны,
Кынмисны нюръясыд.

Мӧдысь мый лоас?
Тулыс ӧд воас:
Нюръясыд вазясны,
Бӧрсӧ кыдз ваясны?

Сэсся ме шуа:
Ставсӧ он нуав.
Керканад, картанад
Он пышйы Гартанад...

Бурджык ӧд лоас,
Татчӧ кӧ волас
Ачыс Вась Арсеньыс, —
Мый вайис карсяньыс?..

— Едина сила! —
Ызӧбтіс Пиля. —
Мый трустла корнысӧ,
Падмӧдны сёрнисӧ?

Ӧти-кӧ, сылӧн
Вежӧрыс вылын:
Коми кыв бырӧма,
Дзик рочӧ пӧрӧма...

Йӧзлӧн тай сэки
Саксьӧмыд петіс.
Пиляӧс торкисны,
Ёна и боргисны.

— Кыдз позьӧ шуны:
Коми кыв вуні?
Во на ӧд кыскасьӧ...
— Прӧста сідз ышнясьӧ...

— Сэсся со, кывсьӧ:
Миянлысь кывсӧ
Прамӧйӧн лыддьӧны,
Пуктӧны пыдди нин.

— Дерт, аслад кывйӧн
Сюсьджык йӧз выйӧ
Регыдджык воамӧй,
Тӧдысьӧсь лоамӧй!..

— Кытчӧ ті тіляд? —
Горӧдіс Пиля. —
Бокӧ тай кежинныд:
Сёрнисӧ вежинныд.

Лӧсьыд, дерт, ас кыв —
Быдӧнлы ляскӧ!
Кытчӧ кӧть шыасян —
Быдлаӧ инасян.

Сы йылысь тані
Нинӧм зык панны...
Миян ӧд мат сійӧ —
Зыранизация!

Пемыдӧдз муніс
Скод вылын шумыс:
Ёна и тільсисны, —
Ньылӧмъяс киссисны...

Биасьӧм бӧрын,
Ыджыд зык шӧрын,
Ӧдзӧс друг шатовтіс —
Бырс пырис... Шаков сэк...