Кни́га житі́й ст҃ы́хъ/Ма́їй/к҃в

by Dimitry of Rostov

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←Ма́їа к҃а

Житїѧ̑ ст҃ы́хъ  (въ лѣта̀ по ржⷭ҇твѣ̀ хрⷭ҇то́вѣ ҂ахч҃є по ҂аѱ҃є)  Творе́нїе ст҃а́гѡ дими́трїа росто́вскагѡ Мцⷭ҇а ма́їа въ к҃в де́нь

Ма́їа к҃г→

Мцⷭ҇а ма́їа въ к҃в де́нь,
страда́нїе ст҃а́гѡ мч҃нка васїлі́ска,
племѧ́нника ст҃а́гѡ ѳео́дѡра тѵ́рѡна,
спи́санное ст҃ы́мъ мч҃нкомъ є҆ѵсѷгні́емъ.

[…] […] […]

Въ то́йже де́нь,
житїѐ и҆ страда́нїе ст҃а́гѡ
великомч҃ника і҆ѡа́нна влади́мїра,
кра́лѧ се́рбскагѡ, чꙋдотво́рца.

Се́й ст҃ы́й сла́вный кра́ль и҆ до́блественный мꙋ́ченикъ і҆ѡа́ннъ влади́мїръ, возрастѐ ѿ бл҃гочⷭ҇ти́вагѡ и҆ владѣ́тельнагѡ ко́рене: во гра́дѣ а҆лбы̀ прїѧ́вшагѡ владѣ́нїе, и҆ всѣ́мъ і҆ллѷрі́комъ и҆ далма́тїею влады́чествовавша. Хвали́мїръ ѹ҆̀бо дѣ́дъ є҆мꙋ̀ бы́сть, и҆́же родѝ трѝ сы́на: петрисла́ва, драги́мїра и миросла́ва. Петрисла́въ полꙋчѝ во владѣ́нїе зе́тꙋ, драги́мїръ же треби́ню и҆ хле́внꙋ а҆ миросла́въ подго́рїе. Ѹ҆́ме́ршꙋ же хвали́мїрꙋ и҆ миросла́вꙋ сꙋ́щꙋ безча́днꙋ, тогѡ̀ ра́ди и҆ сегѡ̀ держа́ва впадѐ во владѣ́нїе петрисла́вꙋ, кото́рый же и҆мѣ̀ сы́на себѣ̀ наслѣ́дника сего̀ бл҃же́ннаго влади́мїра.

Се́й ѿ ю҆́ности бѣ̀ и҆спо́лнь дарова́нїй дꙋхо́вныхъ, кро́токъ, смире́нъ, молчали́въ, бл҃гоговѣ́инъ, и҆ чи́стагѡ житїѧ̀, до́лꙋ влекꙋ̑щаѧ презира́ѧ ѡ҆ го́рнихъ печа́шесѧ, всѧ̑ же мꙋ́дрѣ разсꙋжда́ѧ и҆ мꙋ́дрѣ владѣ́ѧ по́дданными свои́ми, чегѡ̀ ра́ди всѣ́ми люби́мь бѣ̀. въ то̀ вре́мѧ ѡ҆полчи́сѧ ра́тїю самꙋи́лъ ца́рь болга́рскїй со мно́гимъ во́инствомъ на держа́вꙋ сегѡ̀ бл҃же́ннагѡ, ѻ҆́нъ же щадѧ̀ кро́вь чл҃вѣ́ческꙋю ѹ҆клони́сѧ съ свои́ми въ го́ры, и҆ тꙋ̀ держи́мь самꙋи́ломъ въ ѡ҆са́дѣ не ма́лое вре́мѧ на мѣ́стѣ зово́момъ косого́рь, та́мѡ сꙋ́щымъ ѕмїє́мъ ꙗ҆дови̑тымъ, и҆̀же не ма́лый вре́дъ дѣ́лахꙋ во́инствꙋ. ст҃ы́й же помоли́сѧ бг҃ꙋ и҆ преста́ша ѕмі́и ктомꙋ̀ вреди́ти, ѿто́лѣ же и҆ досе́лѣ никого̀ не вредѧ́тъ. самꙋи́лъ же не могі́й си́лою поима́ти влади́мїра, ѹ҆мы́сли ле́стїю сїѐ сотвори́ти и҆ призва̀ є҆го̀ на вѣ́рꙋ, ѻ҆́нъ же неѕло́бивъ сы́й, ꙗ҆́тъ вѣ́рꙋ вѣроло́мномꙋ, и҆ вдаде́сѧ є҆мꙋ̀ въ рꙋ́ки, а҆ се́й клѧтвопрестꙋ́пный посла̀ влади́мїра въ сво́й престо́льный гра́дъ въ заточе́нїе: плѣни́въ же сожжѐ всѧ̑ страны̑ і҆ллѷрі́чєскїѧ: рагꙋ́зꙋ, кота́ръ, бо́снїю и҆ ра́ссїю, и҆ возврати́сѧ съ коры́стьми во своѧ̑ сѝ.

Самꙋи́лъ и҆мѣ̀ дще́рь и҆́менемъ ко́сарꙋ, ꙗ҆́же и҆мѣ̀ ве́лїю любо́вь къ ни́щымъ и҆ ѹ҆́зникѡмъ, ча́стѡ ѹ҆зи̑лища ѡ҆бходѧ́щи и҆ ми́лꙋющи ѹ҆́зники. є҆гда́ же ви́дѣ влади́мїра ю҆́на сꙋ́ща и҆ бл҃гоѻбра́зна и҆ бл҃горазꙋ́мна, возлюбѝ є҆го̀ срⷣцемъ, ѻ҆́нъ же пребыва́ше въ постѣ̀ и҆ мл҃твахъ. во є҆ди́нꙋ ѹ҆̀бо но́щь ꙗ҆ви́сѧ є҆мꙋ̀ а҆́гг҃лъ гдⷭ҇ень, сказꙋ́ѧ є҆мꙋ̀ ско́рое свобожде́нїе ѿ плѣ́на, не по мно́зѣ же и҆ мч҃ническꙋю сме́рть. ко́сара же просѝ ѹ҆ ѻ҆тца̀ своегѡ̀ ѿда́ти є҆́й сего̀ ю҆́зника въ мꙋ́жа, ѻ҆те́цъ же не могі́й ѿрещѝ дще́ри свое́й и҆зведѐ влади́мїра и҆зъ темни́цы, и҆ дадѐ є҆мꙋ̀ ко́сарꙋ въ женꙋ̀, всю̀ є҆гѡ̀ держа́вꙋ, и҆ ѿпꙋстѝ є҆го̀ съ че́стїю и҆ со мно́гими да̑ры. влади́мїръ же прише́дъ во своѧ̑ съ сꙋпрꙋ́гою свое́ю, прїѧ́тъ бы́сть ѿ свои́хъ съ ра́достїю. ѹ҆совѣ́това же женꙋ̀ свою̀ да хранѧ́тъ дв҃ство, поне́же дв҃ствєнницы гл҃го́лѧ сꙋ́ть подѡ́бны а҆́гг҃лѡмъ. ѻ҆на́ же повинꙋ́сѧ, и҆ живѧ́хꙋ въ цѣломꙋ́дрїи и҆ во всѧ́кой добродѣ́тели.

Въ то̀ вре́мѧ самоде́ржецъ гре́ческїй васі́лїй багрѧноро́дный, и҆зы́де со мно́гимъ во́инствомъ, на самꙋи́ла царѧ̀ болга́рскаго, и҆ порази́въ васі́лїй во́инство болга́рское, прїи́де же да́же до ѻ҆́хрїда: самꙋи́лъ же въ печа́ли сы́й ѹ҆́мре. по не́мже прїѧ̀ правле́нїе сы́нъ є҆гѡ̀ радоми́ръ, ѻ҆ба́че и҆ се́й по є҆ди́номъ лѣ́тѣ владѣ́нїѧ ѹ҆бїе́нъ бы́сть, владисла́вомъ двою́роднымъ бра́томъ свои́мъ по ма́тери, наꙋще́нїемъ царѧ̀ васі́лїа. и҆ та́кѡ ца́рь васі́лїй покори́въ себѣ̀ болга́рїю, по́йде съ во́инствомъ на держа̑вы сє́рбскїѧ, ст҃ы́й же влади́мїръ собра̀ своѐ во́инство и҆ ѡ҆прѣ́сѧ крѣ́пкѡ борѧ́сѧ: чесѡ̀ ра́ди і҆мпера́торъ принꙋжде́нъ бы́въ возврати́сѧ во своѧ̑ то́щь.

Е҆ди́ною и҆зше́дшꙋ ст҃о́мꙋ влади́мїрꙋ въ бли́зъ гра́да сꙋ́щїй лѣ́съ съ тремѝ свои́ми болѧ́ры, ви́дѣ ѻ҆рла̀ парѧ́ща во внꙋ́треннее лѣ́са, и҆ на плеща́хъ и҆мѣ́юща крⷭ҇тъ блиста́ющь, є҆го́же положи́въ на землѝ неви́димь бы́сть. ѻ҆ни́ же слѣ́зше съ коне́й поклони́шаса хрⷭ҇тꙋ̀ на крⷭ҇тѣ̀ распѧ́томꙋ, и҆ повелѣ̀ ст҃ы́й це́рковь на то́мъ мѣ́стѣ созда́ти со мно́гимъ и҆ждиве́нїемъ, и҆ положѝ въ не́й ѻ҆́ный чⷭ҇тны́й крⷭ҇тъ, дне́мъ и҆ но́щїю приходѧ̀ здѣ̀ на мл҃твꙋ и҆ всенѡ́щнаѧ бдѣ̑нїѧ. та́же разꙋмѣ̀ ꙗ҆́кѡ прибли́жисѧ вре́мѧ ко прїѧ́тїю вѣнца̀ мч҃ническагѡ, є҆го́же и҆ са́мъ жела́ше. владисла́въ же братоꙋбі́йца, ѻ҆́во ꙗ҆́кѡ подозрѣ́нїе и҆мѣ́ѧ на ст҃а́го, ѻ҆́во же наꙋща́емь і҆мпера́торомъ да ле́стїю ѹ҆бїе́тъ є҆го̀: чесѡ̀ ра́ди владисла́въ прїи́де къ столи́чномꙋ гра́дꙋ влади́мїровꙋ, и҆ здѣ̀ внѣ̀ гра́да распростре́въ шатры̑ своѧ̑, призва́ же къ себѣ̀ влади́мїра, а҆́ки бы бесѣ́довати ѡ҆ наро́дныхъ дѣ́лѣхъ. влади́мїръ же ѹ҆сꙋмнѣ́сѧ та́мѡ и҆тѝ, но лсте́цъ посла̀ є҆мꙋ̀ два̀ є҆пі́скѡпа и҆ заклѧ́сѧ ст҃ы́мъ є҆ѵⷢ҇лїемъ и҆ чⷭ҇тны́мъ крⷭ҇то́мъ. ко́сара не хотѣ̀ пꙋсти́ти мꙋ́жа своего̀, но сама̀ ѿи́де пре́жде и҆ бесѣ́дова съ бра́томъ свои́мъ, кото́рый ꙗ҆́кѡ вторы́й і҆ꙋ́да лобза́нїемъ и҆ сла́дкими бесѣ́дами ѡ҆больстѝ ю҆̀, и҆ ѻ҆́на ꙗ҆́вши вѣ́рꙋ ѹ҆бі́йцѣ, возврати́сѧ во гра́дъ и҆ посла̀ мꙋ́жа своего̀ ко ѹ҆бі́йцѣ, не могꙋ́щи позна́ти меча̀ ме́домъ пома́заннаго.

Е҆гда́ же владисла́въ ѹ҆зрѣ̀ влади́мїра и҆дꙋ́ща къ немꙋ̀ а҆́бїе ѹ҆стреми́сѧ на него̀ и҆ ѹ҆да́ри є҆го̀ мече́мъ, ѻ҆ба́че не можа́ше вреди́ти є҆го̀, и҆́же не ѹ҆страши́сѧ, но речѐ: ѹ҆би́ти мѧ̀ хо́щеши бра́те, но не мо́жеши, и҆ и҆сто́ргъ сво́й ме́чь подадѐ є҆мꙋ̀ гл҃го́лѧ: прїимѝ и҆ ѹ҆бі́й мѧ̀, гото́въ є҆́смь на ѹ҆бїе́нїе ꙗ҆́кѡ і҆саа́къ и҆ а҆ве́ль. ѹ҆бі́йца ѕлокова́рный помраче́нъ сы́й ѹ҆мо́мъ прїѧ̀ ме́чь и҆ ѡ҆безгла́ви є҆го̀, ст҃ы́й же прїѧ́въ главꙋ̀ свою̀ рꙋка́ма свои́ма сѣдѧ̀ на мсцѣ̀, течѐ ко предпомѧ́нꙋтой це́ркви, и҆дѣ́же ви́дѣ ѻ҆рла̀ со крⷭ҇то́мъ, и҆ воспѣ̀: возвесели́хсѧ ѡ҆ ре́кшихъ мнѣ̀ въ до́мъ гдⷭ҇ень по́йдемъ. прише́дшꙋ же мскꙋ̀ къ це́ркви ста̀, ст҃ы́й же слѣ́зъ до́лꙋ, речѐ: въ рꙋ́цѣ твоѝ гдⷭ҇и, предаю̀ дꙋ́хъ мо́й! ѹ҆бі́йца же посра́мленъ си́мъ и҆ ѹ҆боѧ́всѧ ѿ пресла́внагѡ такова̀ чꙋдесѐ, бѣжа̀ со свои́ми. и҆ та́кѡ бл҃же́нный влади́мїръ прїѧ́въ вѣне́цъ мꙋче́нїѧ, премѣнѝ црⷭ҇тво земно́е на нбⷭ҇ное, лѣ́та на́шегѡ сп҃сенїѧ ты́сѧща пѧтьна́десѧтагѡ мцⷭ҇а ма́їа к҃в-гѡ днѐ. ко́сара же є҆гѡ̀ сꙋпрꙋ́га погребѐ тѣ́ло бл҃же́ннагѡ въ преждерече́нной це́ркви, со а҆рхїерє́и и҆ всѣ́мъ кли́ромъ и҆ сѷгкли́томъ со всѧ́кимъ бл҃голѣ́пїемъ, и҆ за и҆́скреннюю любо́вь, ю҆́же и҆мѣ́ѧше къ ст҃о́мꙋ сꙋпрꙋ́гꙋ своемꙋ̀, затвори́сѧ въ то́й це́ркви, и҆ живѧ́ше неисхо́дна во всѧ̑ дни̑ жи́зни своеѧ̀ бг҃оꙋго́днѡ подвиза́ющисѧ въ постѣ̀ и҆ мл҃твахъ.

Владисла́въ же ѹ҆бі́йца, надѣ́ѧсѧ въ ми́рѣ и҆ поко́и ѡ҆держа́ти црⷭ҇тво болга́рское, къ немꙋ́же и҆ се́рбское совокꙋпи́ти намѣрѧ́ѧсѧ, прїи́де съ во́инствомъ подъ дѷрра́хїю и҆ въ тве́рдой наде́ждѣ ѡ҆бсѣ́де ѻ҆́ный гра́дъ, и҆ когда̀ са́мъ въ свое́мъ шатрѣ̀ вечерѧ́ше, тогда̀ неча́ѧннѡ ѹ҆зрѣ̀ влади́мїра, хотѧ́ща главꙋ̀ є҆мꙋ̀ ѿсѣщѝ. ѹ҆страше́нъ си́мъ, возⷥва̀ въ по́мощь себѣ̀ стра́жꙋ, въ присꙋ́тствїи ко́ей неви́димою рꙋко́ю пораже́нъ, и҆зве́рже ѡ҆каѧ́ннꙋю свою̀ дꙋ́шꙋ подо́бнѡ и҆́рѡдꙋ а҆грі́ппы, ҂аз҃і-гѡ лѣ́та. во́инство є҆гѡ̀ ѹ҆страше́нно си́мъ наказа́нїемъ своегѡ̀ вождѧ̀ бѣжа̀ во своѧ̑ сѝ. та́кѡ похища́ѧй чꙋ́ждее, лиши́сѧ и҆ своегѡ̀, ктомꙋ́же и҆ живота̀ вре́меннагѡ и҆ вѣ́чнагѡ.

Ст҃ы́й же влади́мїръ и҆сточѝ тогда̀ мѵ́ро ѿ моще́й свои́хъ, и҆ мнѡ́га и҆сцѣлє́нїѧ подадѐ разли́чными недꙋ̑ги стра́ждꙋщымъ, є҆́же и҆ до ны́нѣ твори́тъ неизче́тнѡ, и҆ свирѣ́пое а҆га́рѧнъ неи́стовство ѹ҆кроща́етъ: є҆гѡ́же мл҃твами, пребл҃гі́й бг҃ъ да при́зритъ на лю́ди своѧ̑ и҆ на достоѧ́нїе своѐ, и҆ ѹ҆чини́тъ коне́цъ мꙋче́нїємъ, и҆ и҆зба́витъ на́съ ѿ настоѧ́щагѡ и҆́га лю́тыхъ и҆ ѕвѣронра́вныхъ а҆га́рѧнъ: да сла́витсѧ бг҃ъ въ трⷪ҇цѣ, ѻ҆ц҃ъ, сн҃ъ и҆ ст҃ы́й дх҃ъ, трⷪ҇ца є҆диносꙋ́щнаѧ и҆ нераздѣ́льнаѧ въ безконє́чныѧ вѣ́ки, а҆ми́нь.

І҆кѡ́на ст҃а́гѡ і҆ѡа́нна влади́мїра въ а҆лба́нстѣй странѣ̀, въ є҆льбаса́нѣ гра́дѣ.

Тропа́рь, гла́съ д҃:

Крⷭ҇тъ, ꙗ҆́вльшїйсѧ тебѣ̀ съ нб҃съ въ блиста́нїи, всѣ̑мъ проповѣ́далъ є҆сѝ, і҆ѡа́нне влади́мїре сла́вный: ѡ҆багре́нъ и҆ ѡ҆чище́нъ кровьмѝ свои́ми, мзды̀ нетлѣ́ныѧ сподо́билсѧ є҆сѝ и҆ трⷪ҇цѣ ст҃ѣ́й предстои́ши. тѣ́мъ, молѝ дерзнове́ннѡ хрⷭ҇та̀ бг҃а во є҆́же сп҃сти́сѧ на́мъ.

Конда́къ, гла́съ и҃:

Посѣ́ченъ ꙗ҆́кѡ крⷭ҇ти́тель ѡ҆ бж҃їей пра́вдѣ, ꙗ҆́кѡ крⷭ҇ти́тель и҆ и҆зображе́нъ є҆сѝ, главꙋ̀ свою̀ въ рꙋ́цѣ держѧ̀. тѣ́мъ, молѝ хрⷭ҇та̀, главꙋ̀ цр҃кве, і҆ѡа́нне влади́мїре, ѡ҆ сп҃се́нїи дꙋ́шъ на́шихъ.