Кни́га житі́й ст҃ы́хъ/Ное́мврїй/а҃

by Dimitry of Rostov

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←Ѻ҆ктѡ́врїа л҃а

Житїѧ̑ ст҃ы́хъ  (въ лѣта̀ по ржⷭ҇твѣ̀ хрⷭ҇то́вѣ ҂ахч҃є по ҂аѱ҃є)  Творе́нїе ст҃а́гѡ дими́трїа росто́вскагѡ Мцⷭ҇а ное́мврїа въ а҃ де́нь

Ное́мврїа в҃→

Мцⷭ҇а ное́мврїа въ а҃ де́нь,
житїѐ и҆ чꙋдеса̀ ст҃ы́хъ безсре́брєникъ
и҆ чꙋдотво́рцєвъ космы̀ и҆ дамїа́на.

Сі́и ст҃і́и косма̀ и҆ дамїа́нъ бра́тїѧ бѧ́хꙋ по пло́ти, ро́домъ ѿ а҆сі́и, ѻ҆ц҃а̀ и҆мꙋ́ще є҆́ллина, ма́терь же хрⷭ҇тїа́ныню, и҆́менемъ ѳеодо́тїю. ꙗ҆́же по сме́рти мꙋ́жа своегѡ̀ вдо́вствꙋющи, свобо́дное же и҆ бл҃гополꙋ́чное вре́мѧ къ прилѣ́жнѣйшей хрⷭ҇то́вѣй слꙋ́жбѣ и҆мꙋ́щи, всѐ своѐ житїѐ на то̀ ѡ҆братѝ, да бл҃гоꙋгоди́тъ бг҃ꙋ: и҆ бы́сть ꙗ҆́кѡ та̀ вдови́ца, ю҆́же похвалѧ́етъ а҆пⷭ҇лъ: и҆́стиннаѧ вдови́ца и҆ ѹ҆едине́на, ѹ҆пова́етъ на бг҃а, и҆ пребыва́етъ въ мл҃твахъ и҆ моле́нїихъ де́нь и҆ но́щь. а҆ ꙗ҆́коже сама̀ бг҃оꙋго́днѡ живѧ́ше, та́кѡ наꙋчѝ и҆ возлю́бленнаѧ своѧ̀ ча̑да космꙋ̀ и҆ дамїа́на: воспита́ бо и҆̀хъ въ до́бромъ наказа́нїи, въ вѣ́рѣ хрⷭ҇тїа́нстѣй, и҆ въ поꙋче́нїи бжⷭ҇твенныхъ писа́нїй, и҆ наста́ви и҆̀хъ на всѧ́кꙋ добродѣ́тель. Ѻ҆ні́и же въ во́зрастъ соверше́нный прише́дше, и҆ непоро́чномꙋ въ зако́нѣ гдⷭ҇ни житїю̀ навы́кше, бы́ша ꙗ҆́кѡ два̀ свѣти́лника на землѝ до́брыми дѣ́лы сїѧ́ющѧ. Прїѧ́ша же ѿ бг҃а да́ръ и҆сцѣле́нїй, и҆ подава́хꙋ здра́вїе дꙋша́мъ же и҆ тѣлесє́мъ, врачꙋ́юще всѧ́кїѧ бѡлѣ́зни, и҆ и҆сцѣлѧ́юще всѧ́къ недꙋ́гъ и҆ всѧ́кꙋ ꙗ҆́зю въ лю́дехъ, и҆ лꙋка́выѧ дꙋ́хи прогонѧ́юще. Не то́чїю же человѣ́кѡмъ помога́хꙋ, но и҆ скотѡ́мъ, и҆ ни ѿ когѡ́же что̀ за сїѐ прїима́хꙋ, творѧ́хꙋ бо сїѧ̑ всѧ̑ не и҆мѣ́нїй ра́ди, дабы̀ зла́томъ и҆ сребро́мъ ѡ҆богати́лисѧ, но бг҃а ра́ди, дабы̀ ꙗ҆ви́ли свою̀ къ немꙋ̀ любо́вь, любо́вїю къ бли́жнемꙋ: нижѐ сла́вы своеѧ̀ тѣ́мъ врачевство́мъ, но сла́вы бж҃їѧ ѿ чл҃вѣ́къ и҆ска́хꙋ, и҆ цѣлѧ́хꙋ недꙋ̑ги сла́вы ра́ди и҆́мене гдⷭ҇а своегѡ̀, дарова́вшагѡ и҆̀мъ таковꙋ́ю врачева́нїѧ си́лꙋ. Не та́кѡ же бы́лїемъ, ꙗ҆́коже и҆́менемъ гдⷭ҇нимъ ѡ болѣ́зней и҆збавлѧ́хꙋ, без̾ мзды̀, и҆ воздаѧ́нїѧ, тꙋ́не, и҆сполнѧ́юще за́повѣдь ре́кшагѡ: Тꙋ́не прїѧ́сте, тꙋ́не дади́те. Тогѡ̀ ра́ди и҆ безме́зднїи вра́чеве и҆ безсре́бреницы ѿ вѣ́рныхъ нарече́ни бы́ша: и҆ та́кѡ до́брѣ житїѐ своѐ проше́дше, бл҃гоче́стнѡ въ ми́рѣ сконча́шасѧ. Не то́чїю же въ животѣ̀ свое́мъ, но и҆ по преставле́нїи просла́вишасѧ чꙋдесы̀ мно́гими: чесѡ̀ ра́ди лѣ́тнею па́мѧтїю ѿ цр҃кве почита́ютсѧ, ꙗ҆́кѡ те́плїи предста́тели, и҆ до́брїи болѣ́зней на́шыхъ дꙋше́вныхъ же и҆ тѣле́сныхъ вра́чеве. Ѡ҆ нестѧжа́телномъ же и҆́хъ житїѝ, и҆ безме́здномъ врачева́нїи, є҆́сть по́вѣсть сицева́ѧ:

Жена̀ нѣ́каѧ, и҆́менемъ палла́дїа, на ѻ҆дрѣ̀ болѣ́зни ѿ мно́гихъ лѣ̑тъ лежа́щи, и҆ нико́еѧже по́мощи ѿ разли́чныхъ врачє́въ и҆мꙋ́щи, слы́ша ѡ҆ си́хъ ст҃ы́хъ, ꙗ҆́кѡ всѧ́кїѧ болѣ̑зни и҆сцѣлѧ́ютъ, и҆ посла̀ къ ни́мъ съ моле́нїемъ, дабы̀ посѣти́ли ю҆̀ близ̾ сме́рти ѹ҆жѐ сꙋ́щꙋю. Ст҃і́и же послꙋ́шавше моле́нїѧ є҆ѧ̀, и҆до́ша въ до́мъ є҆ѧ̀, и҆ а҆́бїе та̀ жена̀ по вѣ́рѣ свое́й, прише́ствїемъ къ не́й ст҃ы́хъ врачє́въ, полꙋчѝ и҆сцѣле́нїе, и҆ воста̀ здра́ва, сла́вѧщи бг҃а, дарова́вшаго рабѡ́мъ свои́мъ таковꙋ́ю бл҃года́ть и҆сцѣле́нїй. Бл҃года́рна же сꙋ́щи за тꙋ́ю врачє́мъ свои́мъ ми́лость, хотѧ́ше и҆̀мъ дарова́нїе возда́ти: но сі́и никогда́же ни ѿ когѡ́же что̀ взѧ́ша, не продава́хꙋ бо бл҃года́ти, ю҆́же и҆мѣ́ѧхꙋ ѿ бг҃а. ѹ҆мы́сли ѹ҆̀бо жена̀ понѐ є҆ди́нагѡ ѿ ни́хъ ѹ҆бѣди́ти моле́нїемъ, да прїи́метъ ѿ неѧ̀ ма́лый ѕѣлѡ̀ да́ръ, и҆ взе́мши трѝ ꙗ҆ица̀, прїи́де ѻ҆́тай къ ст҃о́мꙋ дамїа́нꙋ, и҆ заклина́ше є҆го̀ бг҃омъ, да трѝ тѣ̀ ꙗ҆ица̀ во и҆́мѧ ст҃ы́ѧ трⷪ҇цы ѿ неѧ̀ во́зметъ. Дамїа́нъ же слы́шавъ и҆́мѧ бг҃а въ трⷪ҇цѣ є҆ди́нагѡ, взѧ̀ ѿ жены̀ ма́лый то́й да́ръ вели́кїѧ ра́ди тоѧ̀ клѧ́твы, є҆́юже заклѧ̀ є҆го̀: по се́мъ ѹ҆вѣ́давъ косма̀ ст҃ы́й, печа́ленъ бы́сть ѡ҆ то́мъ ѕѣлѡ̀. Приспѣ́вшꙋ же преставле́нїю космѣ̀ ст҃о́мꙋ, завѣща̀ при и҆схо́дѣ свое́мъ ѿ тѣ́ла, да не положе́нъ бꙋ́детъ близ̾ є҆гѡ̀ дамїа́нъ, є҆гда̀ сконча́етсѧ, ꙗ҆́кѡ разори́вый за́повѣдь гдⷭ҇ню, и҆ прїе́мый мздꙋ̀ ѿ жены̀ за и҆сцѣле́нїе. Почи́вшꙋ же ѡ҆ гдⷭ҇ѣ космѣ̀ ст҃о́мꙋ, по вре́мени прїи́де ча́съ сконча́нїѧ и҆ дамїа́нꙋ, и҆ преста́висѧ ѿ вре́менныѧ къ вѣ́чнѣй жи́зни. Лю́дїе же мы́слѧхꙋ, гдѣ̀ погребꙋ́тъ є҆го̀: вѣ́дѧхꙋ бо за́повѣдь космы̀ ст҃а́гѡ, и҆ не смѣ́ѧхꙋ положи́ти при не́мъ бра́та є҆гѡ̀ ст҃а́го дамїа́на: и҆ та́кѡ и҆̀мъ въ недоꙋмѣ́нїи сꙋ́щымъ, притечѐ внеза́пꙋ велблю́дъ, и҆́же пре́жде бѣ́сенъ бѣ̀, и҆ ѿ ст҃ы́хъ ѹ҆врачева́нъ, то́й проглаго́ла человѣ́ческимъ гла́сомъ, дабы̀ без̾ сомнѣ́нїѧ близ̾ космы̀ положи́ли дамїа́на, поне́же не мзды̀ ра́ди взѧ̀ ѿ жены̀ трѝ ꙗ҆ица̀, но и҆́мене ра́ди бж҃їѧ: и҆ та́кѡ вкꙋ́пѣ положе́ны бы́ша честны́ѧ и҆́хъ мо́щы на мѣ́стѣ глаго́лемомъ ферама́нъ.

И҆ногда̀ мꙋ́жъ нѣ́кїй ѿ тѣ́хъ мѣ́стъ во вре́мѧ жа́твы и҆зы́де жа́ти ни́вꙋ свою̀: ѿ сл҃нечнагѡ же зно́ѧ и҆знемо́гши, и҆́де под̾ дꙋ́бъ, почи́ти хотѧ̀, и҆ лѧ́же, и҆ ѹ҆́спе крѣ́пкѡ. ѿве́рзеннымъ же сꙋ́щымъ ѹ҆стѡ́мъ є҆гѡ̀, припо́лзши ѕмі́й, вни́де во ѹ҆ста̀, и҆ всели́сѧ въ чре́во є҆гѡ̀. ѻ҆́нъ же воспрѧнꙋ́въ, не разꙋмѣ̀ бы́вшагѡ, и҆ ше́дъ к̾ ни́вѣ, жнѧ́ше до ве́чера: ве́черꙋ же бы́вшꙋ, прїи́де въ до́мъ, и҆ по ве́чери возлежѐ на ѻ҆дрѣ̀. Почива́ющꙋ же є҆мꙋ̀, нача̀ ѕмі́й терза́ти є҆го̀ внꙋ́трь, ѻ҆́нъ же крича́ше ѿ болѣ́зни: возбꙋди́шасѧ же всѝ, и҆ прите́кше къ немꙋ̀, ѡ҆сѧза́хꙋ и҆ не познава́хꙋ, что̀ бы́сть болѣ́знь сїѧ̀. ѻ҆́нъ же вели́кимъ гла́сомъ возопѝ глаго́лѧ: ст҃і́и вра́чеве космо̀ и҆ дамїа́не помози́те мѝ. и҆ а҆́бїе приспѣ́ша ст҃і́и съ по́мощїю свое́ю, и҆ ѹ҆спи́ша є҆го̀ ѕѣлѡ̀, да тѣ́мже пꙋте́мъ и҆зы́детъ ѕмі́й, и҆́мже вни́де. и҆ спа́ше человѣ́къ и҆мы́й ѿве́рстаѧ ѹ҆ста̀, бж҃їѧ же си́ла моли́твами ст҃ы́хъ космы̀ и҆ дамїа́на и҆згонѧ́ше ѕмі́ѧ ѿ чл҃вѣ́ка. и҆ и҆зы́де ѕмі́й ѿ ѹ҆́сть є҆гѡ̀, зрѧ́щымъ всѣ́мъ та́мѡ приключи́вшымсѧ, и҆ ѹ҆жаса́ющымсѧ ѡ҆ стра́шномъ то́мъ чꙋдесѝ: и҆зше́дшꙋ же ѕмі́ю, а҆́бїе воспрѧнꙋ̀ мꙋ́жъ то́й, и҆ здра́въ бы́сть соверше́ннѡ по́мощїю ст҃ы́хъ безсре́брєникъ.

Бы́сть и҆ны́й мꙋ́жъ на мѣ́стѣ то́мъ, и҆́менемъ ма́лхъ, живы́й близ̾ цр҃кве ст҃ы́хъ врачє́въ космы̀ и҆ дамїа́на во ферема́нѣ: се́й хотѧ̀ ѿитѝ нѣ́камѡ в̾ дале́кїй пꙋ́ть, ведѐ женꙋ̀ свою̀ къ цр҃кви, и҆ речѐ є҆́й: сѐ а҆́зъ ѿхождꙋ̀ въ пꙋ́ть дале́кїй, тебе́ же врꙋча́ю ст҃ы́мъ космѣ̀ и҆ дамїа́нꙋ въ защище́нїе, сѣдѝ ѹ҆̀бо въ домꙋ̀, до́ндеже пришлю̀ тебѣ̀ зна́менїе ѿ себѐ, є҆́же позна́еши бы́ти моѐ: и҆ є҆гда̀ восхо́щетъ бг҃ъ, пришлю́ ти зна́менїе то̀, и҆ поймꙋ̀ тѧ̀ къ себѣ̀: та́кѡ врꙋчи́вши ст҃ы̑мъ женꙋ̀ свою̀ ма́лхъ, ѿи́де въ пꙋ́ть. Минꙋ́вшымъ же нѣ́кїимъ дне́мъ, дїа́волъ преѡбрази́сѧ въ зна́емаго нѣ́коего человѣ́ка, и҆ прише́дъ къ женѣ̀ ма́лховой, показа̀ є҆́й зна́менїе таково̀, є҆́же мꙋ́жъ є҆́й зна́менова, глаго́лѧ: пришлю́ ти зна́менїе, и҆ поймꙋ̀ тѧ̀ къ себѣ̀: то̀ ѹ҆́бѡ показꙋ́ющи дїа́волъ велѧ́ше є҆́й, да и҆́детъ по не́мъ къ мꙋ́жꙋ своемꙋ̀, менѐ, речѐ, присла̀ мꙋ́жъ тво́й по тебѐ, да ведꙋ́ тѧ къ немꙋ̀. жена́ же речѐ: зна́менїе сїѐ зна́ю, но и҆тѝ не хощꙋ̀, врꙋчена̀ бо є҆́смь ст҃ы́мъ безсре́бреникѡмъ космѣ̀ и҆ дамїа́нꙋ, и҆ а҆́ще хо́щеши, да и҆дꙋ̀ съ тобо́ю къ мꙋ́жꙋ: то̀ грѧдѝ со мно́ю къ цр҃кви ст҃ы́хъ, и҆ и҆ми́сѧ за кра́й ѻ҆лтарѧ̀, и҆ клени́сѧ мѝ, ꙗ҆́кѡ не сотвори́ши мѝ нико́егѡже на пꙋтѝ ѕла̀. дїа́волъ же ѡ҆бѣща́сѧ та́кѡ, и҆ ше́дъ съ не́ю къ цр҃кви, ꙗ҆́тсѧ за кра́й ѻ҆лтарѧ̀, и҆ клѧ́сѧ гл҃ѧ: та́кѡ мѝ си́лы космы̀ и҆ дамїа́на, не и҆́мамъ ѕла̀ на пꙋтѝ сотвори́ти тебѣ̀, но ведꙋ́ тѧ къ мꙋ́жꙋ твоемꙋ̀. слы́шавши же клѧ́твꙋ жена̀, ꙗ҆́тъ вѣ́рꙋ лжи́вомꙋ бѣ́сꙋ, во ѻ҆́бразѣ зна́емагѡ человѣ́ка сꙋ́щемꙋ, и҆ и҆́де по не́мъ въ пꙋ́ть. Преле́стникъ же пое́мши ю҆̀, заведѐ въ мѣ́сто пꙋ́сто и҆ непроходи́мо, и҆ хотѧ́ше та́мѡ ѡ҆ѕло́бити и҆ ѹ҆би́ти ю҆̀: ѻ҆на́ же ви́дѧ себѐ въ послѣ́дней бѣдѣ̀ сꙋ́щꙋю, возведѐ ѻ҆́чи на нб҃о, и҆ возопѝ ѿ срⷣца къ бг҃ꙋ, глаго́лѧ: Бж҃е мл҃твами ст҃ы́хъ космы̀ и҆ дамїа́на помози́ ми, и҆ потщи́сѧ и҆зба́вити мѧ̀ ѿ рꙋ́къ сегѡ̀ ѹ҆бі́йцы. И҆ а҆́бїе ꙗ҆ви́шасѧ ско́рїи помо́щницы ст҃і́и безсре́бреницы косма̀ и҆ дамїа́нъ, вопїю́щи на дїа́вола: ѻ҆́нъ же ви́дѣвъ и҆̀хъ, ѡ҆ста́ви женꙋ̀, и҆ бѣжа́ше, те́къ же на высо́кїй бре́гъ, паде́сѧ въ про́пасть и҆ и҆счезѐ: а҆ ст҃і́и пое́мше женꙋ̀, ведо́ша ю҆̀ въ до́мъ є҆ѧ̀. и҆ глаго́лаше жена̀ кла́нѧющисѧ и҆̀мъ: бл҃годарю̀ ва́съ госпо́дїе моѝ, ꙗ҆́кѡ и҆зба́висте мѧ̀ ѿ го́ркїѧ па́гꙋбы: молю̀ ѹ҆̀бо ва́съ, рцы́те мѝ, кто̀ є҆стѐ; да вѣ́мъ, комꙋ̀ бꙋ́дꙋ до кончи́ны живота̀ моегѡ̀ бл҃годаре́нїе воздава́ти. Ѻ҆ни́ же реко́ша є҆́й: мы̀ є҆смы̀ рабѝ хрⷭ҇то́вы косма̀ и҆ дамїа́нъ, и҆̀мже тѧ̀ врꙋчѝ мꙋ́жъ тво́й ѿходѧ̀ въ пꙋ́ть, и҆ тогѡ̀ ра́ди потща́хомсѧ ѹ҆скори́ти на по́мощь тебѣ̀, и҆ ѿ дїа́вола и҆зба́вихомъ тѧ̀ бл҃года́тїю бж҃їею. жена́ же слы́шащи то̀, падѐ на зе́млю ѿ стра́ха и҆ ра́дости: ѻ҆ни́ же неви́дими бы́ша. и҆ вопїѧ́ше жена̀, хвалѧ̀ и҆ бл҃годарѧ̀ бг҃а, и҆ ст҃ы́хъ рабѡ́въ є҆гѡ̀ космꙋ̀ и҆ дамїа́на: те́кши же въ цр҃ковь, припа́даше со слеза́ми ко і҆кѡ́нѣ ст҃ы́хъ, и҆ всѣ́мъ повѣ́да бы́вшее, ꙗ҆́кѡ сотворѝ гдⷭ҇ь съ не́ю ми́лость моли́твами ѹ҆го́дникѡвъ свои́хъ. Глаго́лаше же въ моли́твѣ словеса̀ сїѧ̀: Бж҃е ѻ҆ц҃ъ на́шихъ а҆враа́мовъ и҆ і҆саа́ковъ и҆ і҆а́кѡвль и҆ сѣ́мене и҆́хъ пра́веднагѡ, ѹ҆гаси́вый пе́щь ѻ҆́гненꙋю трїе́мъ ѻ҆трокѡ́мъ, и҆ помогі́й рабѣ̀ твое́й ѳе́клѣ на позо́рищи, бл҃годарю́ тѧ, ꙗ҆́кѡ и҆ менѐ грѣ́шнꙋю ѿ дїа́волскїѧ сѣ́ти и҆зба́вилъ є҆сѝ, ѹ҆годи́вшими тебѣ̀ космо́ю и҆ дамїа́номъ, покланѧ́юсѧ тѝ творѧ́щемꙋ ди́внаѧ и҆ пресла̑внаѧ чꙋдеса̀, и҆ сла́влю тѧ̀ ѻ҆ц҃а̀ и҆ сн҃а и҆ ст҃а́го дх҃а во вѣ́ки, а҆ми́нь.

І҆кѡ́на ст҃ы́хъ космы̀ и дамїа́на.

Тропа́рь, гла́съ и҃:

Ст҃і́и безсре́брєницы и҆ чꙋдотво́рцы, космо̀ и҆ дамїа́не, посѣти́те не́мѡщи на́шѧ: тꙋ́не прїѧ́сте, тꙋ́не дади́те на́мъ.

Конда́къ, гла́съ в҃:

Бл҃года́ть прїи́мше и҆сцѣле́нїй, простира́ете здра́вїе сꙋ́щымъ въ нꙋ́ждахъ, вра́чеве, чꙋдотво́рцы пресла́внїи: но ва́шимъ посѣще́нїемъ ра́тникѡвъ де́рзѡсти низложи́те, мі́ръ и҆сцѣлѧ́юще чꙋдесы̀.

Въ то́йже день,
страда́нїе ст҃а́гѡ мч҃нка
є҆рминїгге́лда царе́вича го́тѳскагѡ.

Є҆рминїгге́лдъ сы́нъ царѧ̀ го́тѳскагѡ лꙋвїггі́лда, ѿ а҆рїа́нскїѧ є҆́реси къ правосла́вной вѣ́рѣ ѡ҆браще́нъ бы́сть леа́ндромъ є҆пⷭ҇кпомъ і҆спалита́нскимъ. Печа́ленъ же бы́сть лꙋвїггі́лдъ а҆рїа́нинъ сы́й, ꙗ҆́кѡ сы́нъ є҆гѡ̀ ѡ҆ста́ви ѕловѣ́рїе а҆рїа́нское, и҆ тща́шесѧ ѿврати́ти є҆го̀ ѿ правосла́вїѧ, къ свое́й же є҆́реси па́ки возврати́ти. ласка́ше ѹ҆́бѡ є҆го̀ любе́зными словесы̀ ꙗ҆́кѡ ѻ҆те́цъ, молѧ̀ и҆ ѹ҆вѣщава́ѧ, да ѡ҆ста́витъ каѳолі́ческꙋю вѣ́рꙋ, и҆ съ ни́ми є҆диномꙋ́дрствꙋетъ ꙗ҆́коже и҆ пре́жде. И҆ є҆гда̀ ви́дѣ є҆го̀ непрекло́нна, преще́нми ѹ҆страша́ше є҆го̀, мꙋ́ками и҆ ра́нами грозѧ̀. то́йже ꙗ҆́кѡ сто́лпъ въ вѣ́рѣ непоколеби́мь пребыва́ѧ, ласка̑нїѧ и҆ прещє́нїѧ ѻ҆ч҃ескаѧ вмѣнѧ́ше нивочто́же. Раз̾ѧри́всѧ же ѻ҆те́цъ є҆гѡ̀ ѕѣлѡ̀, пе́рвѣе ѿ ца́рскагѡ престо́ла и҆ соца́рствованїѧ ѿста́ви сы́на своего̀, наслѣ́дїѧ же и҆ всѣ́хъ и҆мѣ́нїй лишѝ є҆го̀: та́же ви́дѧ є҆го̀ непремѣ́нна ѹ҆мо́мъ, вы́ю, и҆ рꙋ́цѣ, и҆ но́зѣ є҆мꙋ̀ желѣ́зными ѹ҆́зами ѡ҆кова́въ, въ тѣ́снꙋю и҆ мра́чнꙋю вве́рже темни́цꙋ. Є҆рминїгге́лдъ же бл҃же́нный, а҆́ще и҆ ю҆́нъ бѣ̀ лѣ́ты, ѻ҆ба́че ста́ръ сы́й ра́зꙋмомъ, земна́гѡ возгнꙋша́всѧ ца́рства, нбⷭ҇нагѡ всѣ́мъ жела́нїемъ и҆ска́ше. и҆ свѧ́занъ въ темни́цѣ лежѧ̀, молѧ́шесѧ ко всеси́лномꙋ бг҃ꙋ, да ѹ҆крѣпи́тъ є҆го̀ въ то́мъ страда́нїи. Наста́вшꙋ же вели́комꙋ пра́здникꙋ ст҃ы́ѧ па́схи, лꙋвїггі́лдъ ца́рь призва́въ нѣ́коего є҆пⷭ҇кпа ѿ своегѡ̀ ѕловѣ́рїѧ, посла̀ є҆го̀ но́щїю къ сы́нꙋ своемꙋ̀ въ темни́цꙋ, ꙗ҆́кѡ да ѿ рꙋ́къ є҆пⷭ҇кпа тогѡ̀ є҆рминїгге́лдъ прїи́метъ а҆рїа́нское и҆́хъ є҆реті́ческое прича́стїе: и҆ а҆́ще сегѡ̀ причасти́тсѧ, па́ки въ пре́жнюю ѻ҆ч҃ескꙋю любо́въ, и҆ въ пе́рвꙋю че́сть возвраще́нъ бꙋ́детъ. ст҃ы́й же стрⷭ҇тоте́рпецъ а҆рїа́нскагѡ є҆пⷭ҇кпа всѧ́чески возгнꙋша́сѧ, и҆ ѕловѣ́рїе є҆гѡ̀ до́брѣ ѡ҆бличи́въ, ѿгна̀ є҆го̀ ѿ себѐ, не прїе́мъ є҆реті́ческагѡ и҆́хъ причаще́нїѧ. Причаще́нъ же бы́сть пречⷭ҇тыхъ и҆ животворѧ́щихъ та́инъ тѣ́ла и҆ кро́ве хрⷭ҇товы нѣ́кїимъ правосла́внымъ пресвѵ́теромъ, ѿ ст҃а́гѡ леа́ндра є҆пⷭ҇кпа та́йнѡ къ немꙋ̀ при́сланнымъ. а҆рїа́нскїй же є҆пⷭ҇кпъ посра́мленъ къ царю̀ возврати́всѧ, сказа̀ є҆мꙋ̀ всѧ̀, ꙗ҆̀же ѿ сы́на є҆гѡ̀ слы́ша. Тогда̀ ца́рь и҆спо́лнивсѧ неизрече́нныѧ ꙗ҆́рости, и҆ зꙋбы̀ поскрежета́въ, а҆́бїе наро́читыѧ ѿ болѧ́ръ свои́хъ мꙋ́жы посла̀, повелѣва́ѧ и҆̀мъ є҆рминїгге́лда сы́на своего̀ ѹ҆би́ти въ темни́цѣ. ті́и же ше́дше, сѣки́рою ѿсѣко́ша є҆мꙋ̀ честнꙋ́ю главꙋ̀. И҆ слы́шани бы́ша над̾ ст҃ы́мъ тѣ́ломъ є҆гѡ̀ пресла́дкїи ст҃ы́хъ а҆́гг҃лѡвъ пою́щихъ гла́си, и҆ свѣщы̑ горѧ́щыѧ въ нощѝ зрѧ́хꙋсѧ. Є҆́же ви́дѧще вѣ́рнїи, ра́довахꙋсѧ и҆ бл҃годарѧ́хꙋ бг҃а, прославлѧ́ющаго таковы́ми чꙋдесы̀ ст҃а́го правовѣ́рнаго раба̀ своего̀ по страда́лческой кончи́нѣ є҆гѡ̀: ѕловѣ́рнїи же стыдѧ́хꙋсѧ и҆ ѹ҆жаса́хꙋсѧ. Чадоꙋбі́йца же ѻ҆те́цъ раска́ѧвсѧ ѡ҆ непови́ннѡ сотворе́нномъ ѹ҆бі́йствѣ, впадѐ въ болѣ́знь ѿ печа́ли, и҆ хотѧ́ше ѿврещи́сѧ а҆рїа́нства, воспрїѧ́ти же бл҃гоче́стїе: но боѧ́шесѧ ѕловѣ́рнагѡ ро́да своегѡ̀, и҆ не сподо́бисѧ съ правовѣ́рными вчине́нъ бы́ти. Кончи́нѣ же є҆гѡ̀ прибли́жившейсѧ, бл҃же́ннаго леа́ндра є҆пⷭ҇кпа, є҆го́же пе́рвѣе ѕѣлѡ̀ не любѧ́ше и҆ гонѧ́ше, въ то̀ вре́мѧ къ себѣ̀ че́стнѡ призва̀, и҆ молѝ є҆го̀, да реха́дера ю҆нѣ́йшаго сы́на, є҆го́же наслѣ́дникомъ ца́рства своегѡ̀ сотворѝ, бг҃одꙋхнове́ннымъ свои́мъ ѹ҆че́нїемъ къ правосла́вїю наста́витъ ꙗ҆́коже и҆ є҆рминїгге́лда. И҆ ѹ҆́мре лꙋвїггі́лдъ, а҆ реха́деръ воцари́всѧ, а҆́бїе прїѧ̀ правосла́внꙋю вѣ́рꙋ наставле́нїемъ ст҃а́гѡ леа́ндра є҆пⷭ҇кпа, и҆ всю̀ зе́млю го́тѳскꙋю, ꙗ҆́же бѣ̀ а҆́рїевою є҆́ресїю врежде́нна, къ бл҃гоче́стїю приведѐ, и҆ тѣ́ло ст҃а́гѡ є҆рминїгге́лда, старѣ́йшагѡ бра́та свегѡ̀, подоба́ющею почтѐ че́стїю ꙗ҆́кѡ мꙋ́ченика хрⷭ҇това, на не́мже сбы́стсѧ є҆ѵⷢ҇лское сло́во: А҆́ще зе́рно пшени́чно па́дъ на землѝ не ѹ҆́мретъ, то̀ є҆ди́но пребыва́етъ: а҆́ще ли ѹ҆́мретъ, мно́гъ пло́дъ сотвори́тъ. и҆́бо стрⷭ҇тоте́рпецъ хрⷭ҇то́въ ꙗ҆́кѡ зе́рно пшени́чно є҆ди́нъ въ го́тѳѣ́хъ за хрⷭ҇та̀ ѹ҆́мре, и҆ плодосотворѝ правовѣ́рїѧ живо́тъ всемꙋ̀ наро́дꙋ землѝ тоѧ̀. Вси́ бо нача́ша правосла́внѡ вѣ́ровати во хрⷭ҇та̀ бг҃а, ѻ҆ц҃ꙋ̀ и҆ ст҃о́мꙋ дх҃ꙋ є҆диносꙋ́щна и҆ равноче́стна, є҆мꙋ́же сла́ва во вѣ́ки, а҆ми́нь.

---

Въ то́йже де́нь, ст҃ы́хъ двꙋ́хъ же́нъ мч҃нцъ: кѷрїе́ны и҆ і҆ꙋлїані́и. Кѷрїе́на бѣ̀ ѿ та́рса гра́да, кѷлїкі́йскїѧ є҆па́рхїи: і҆ꙋлїані́а же ѿ гра́да рѡссо́на. и҆̀хже въ маѯїмїа́ново ца́рство и҆ге́мѡнъ є҆́мши, принꙋжда́ше ѿврещи́сѧ хрⷭ҇та̀, и҆ не покори́шасѧ. повелѣ̀ ѹ҆̀бо кѷрїе́нѣ ѡ҆стри́гши главꙋ̀ съ вѣ́ждами, на́гꙋ води́ти ю҆̀ по всемꙋ̀ тарсі́йскомꙋ гра́дꙋ въ смѣ́хъ и҆ порꙋга́нїе, та́же со і҆ꙋлїані́ею въ гра́дъ рѡссо́нъ ве́дши, ѻ҆гню̀ и҆̀хъ предадѐ: и҆ та́кѡ сконча́шасѧ.

И҆ ст҃ы́хъ мч҃нкъ: кеса́рїа, да́сїа, и҆ про́чїихъ пѧтѝ, въ дама́сцѣ по разли́чныхъ мꙋ́кахъ мече́мъ за хрⷭ҇та̀ посѣ́ченыхъ.

И҆ ст҃ы́хъ сщ҃енномч҃нкъ: і҆ѡа́нна є҆пⷭ҇кпа, и҆ і҆а́кѡва пресвѵ́тера, глаго́лемагѡ ревни́телѧ, въ землѝ персі́дстѣй, ѿ савѡ́рїа царѧ̀ пострада́вшихъ.