Коді?..

by Колегов Егор Васильевич

І.

Небыдик сьӧлӧм, сьылысь,
Омӧля ланьтлӧ — пальӧдӧ шог:
Бриньӧдчӧ, коми йӧз йылысь
Долыда сьылӧ быдсяма ног...
Иванлы сьӧлӧмӧ пырӧ,
Нӧдӧ и мойдӧ комиӧн теш,
Сцена водз серамӧн тырӧ...
Аттӧ жӧ, сылӧн уджалӧ плеш...

Ветліс-муніс уна вожӧн
Ичӧтысянь тӧв и гожӧм —
Татчӧ вайис гаж.
Тані лэдзӧ сьыланкывъяс...
Ошкам сійӧс, зонъяс, нывъяс,
Рытын вӧчас гаж.

ІІ.

Мелі сьылӧм медся бур —
Вермӧ быдся шогсӧ...
Ичмонь дырйи — шыльыд юр,
Энька лоан — ноксьы...
«Шыр да катша» сьылӧ пӧч,
Мӧдтор эз и кужлы;
Кулан лунсӧ тӧдӧ стӧч,
Райӧ кӧсйӧ вуджны...
Аттӧ, миян коми кыв
Вӧлӧм кутшӧм лӧсьыд,
Ляксяс мелі сьыланкыв —
Вунӧ шог и кӧдзыд...
Эжва дорын миян вок,
Коми гижысь, олӧ,
Бура тӧдӧ гӧльлысь шог:
Пальӧдны пӧ колӧ...
Эз на дугдыв весиг сутш,
Войтыр понда бӧрдӧ:
Делӧ олӧм, сьӧкыд удж,
Сьылӧмкывйӧ пӧртӧ.
Оз ков вунны: сійӧ морт,
Первой, коми кывйӧ
Вӧчис паськыд зарни борд, —
Он судз ӧні сывйӧн...

ІІІ.

Пыр жӧ нин сьылӧны, абу тай шог,
Олӧны-вылӧны, тӧдӧны мог:
Перйӧны войтырлысь «натур налог»...
Йӧй йӧзлысь мынтӧны «таладор мыж»,
Ассьыныс видзӧны небыдик мыш,
Садь юрӧн корӧны медыджыд ыж.
Дявӧлӧс резӧны — «колӧкӧ кеж!»,
Аслыныс пӧръясьныс абу и пеж...
Куканьтӧ нуӧны, гургӧны меж...
Яндзимныс бырӧма — йирӧны сӧз...
Аддзӧны: ёна на пемыдӧсь йӧз, —
Сӧтӧны дядьӧлысь медбӧръя мӧс...