Коми школаясӧ

by Попов Фёдор Васильевич

Велӧдысьяс унаысь на юавлӧны, мый нӧ пӧ велӧдам коминас нигатӧгыс. Нигаяс виччысьны арӧдз оз на ковмы.

Велӧдчыныд век колӧ-а.

Велӧдчанторйыд бара эм. Зэв на этша тор ми тӧдам, челядьыд сыысь этша дай.

Велӧдӧй челядьсӧ сюся, бура сёрнитны. Асьныс мед челядьыс висьтавласны ас сёрнитанногнаныс мый тӧдӧны.

Велӧдысьяслы сэк позяс тӧдмавны налысь сёрнитанногсӧ, налысь мӧвпалӧмсӧ (думайтӧмсӧ), овмӧссӧ да.

Сэсся мед ас гӧгӧрысь аддзывланторъяссӧ тӧдӧны, вежӧртӧны. Торъяс йылысь висьтавлыны лӧсьыда, сёрнитанторсӧ ныр уланыс вайны. Мед найӧ видзӧдасны, кинаныс видласны, исыштласны.

Видз-му уджалӧм йылысь кӧ сёрни, мед гӧрсӧ да агассӧ (пинясӧ) видласны, гӧрӧмсӧ видзӧдласны, гӧр юрас кутчысьласны, ытшкыштасны, куртыштасны. Пыжӧн ветлӧм йылысь кӧ, мед пыжсӧ видласны, пелысъяссӧ, асьныс сыныштасны. Сідз быдтор йылысь.

Мед ассьыныс тӧданторсӧ быдсяматор йылысь кужӧны гижны. Медся лӧсьыд лунысь-лун кӧ кутасны аддзывлӧмторъяссӧ гижавны. Уна грамматика налы оз ий ков. Челядьыдлы сійӧ зэв гажтӧм.

Сэсся мед эськӧ кужисны велӧдчӧм костас ӧтчукӧрын гажӧдчыны, ворсны. Асьнысӧ ставнысӧ колӧ тшӧктыны ворсны. Найӧ уна ног кужӧны. Мыйсюрӧсӧ позьӧ велӧдысьлы висьтавлыны.

Коді кужӧ ачыс, мед велӧдас сьывны.

Школа дорын уджалӧм йылысь кыв-мӧд. Муясыс кӧ школа дорын вынтӧмӧсь, колӧ мыйӧнкӧ вынсьӧдны. Вынсьӧдныыс кӧ нинӧмӧн, лучшӧ удж пондаыс не манитчыны, нинӧм жӧ оз артмы-а.

Сӧмын колӧ мӧд во кежас паритны, да оз-ӧ позь кыськӧ трунда ли мый ли лӧсьӧдны, вынсьӧдантор водзӧ вылӧ.

Кыдзи лӧсьыдджык вӧчныыс, велӧдысьяс сэсся асьныд сёрнитыштӧй.

Мед тіян уджныд водзӧ мунас!

В. Педӧр