Кык вежон чӧжся отсалӧм школалы

←

Кык вежон чӧжся отсалӧм школалы (1922)
by Шахов Николай Александрович

→

Гижан кад: 1922, Йӧзӧдан во: 1922-11-16. Ӧшмӧс: Сандрик Микол (Н. А. Шахов). Коми ёртъяс дінӧ. Мӧскуа, 1992. Лб. 74-76.

336240Кык вежон чӧжся отсалӧм школалы1922Шахов Николай Александрович

Омӧля ӧні миян мунӧ велӧдчӧм. Школаяс кӧдзыдӧсь, патераысь вӧтлӧны, стӧрӧжъяс абу, велӧдысьяслӧн жалӧванньӧ ичӧт. Тадзитӧ, дерт, бура велӧдӧм оз вермы лоны. Бура кӧ велӧдны, колӧ эськӧ, мед велӧдысьыс вӧлі пӧт, школа мед шоныд, мед вӧліны лыддьысян, гижанторъяс (нига, бумага, перӧ, карандаш, чернила). Правительство ӧні сӧмын велӧдысьлы жалӧванньӧ мынтӧ да нигаяс, гижанторъяс лӧсьӧдӧ. Патера, пес, стӧрӧжӧс лӧсьӧдӧны крестьяна асьныс.

Школатӧ ломтыны дзонь вӧлӧсьтнад абу зэв сьӧкыд, быд керкаысь кӧ моздор пес ваян — школалы тырмас тӧвбыд кежлӧ. Асланыд челядьлы тӧвбыд лоӧ шоныд. Гӧгӧрвоысь крестьяна сідзи и вӧчӧны. Сӧмын мукӧдлаас кывзӧны Сӧвет власьтлы паныд мунысьяслысь, оз кӧсйыны отсавны школалы. Сэтшӧм йӧзыд асланыс пемыдлун вӧсна кӧсйӧны тупкыны югыдсӧ челядьыслы.

Некод оз лысьт шуны — велӧдчӧм пӧ оз ков. Бур нига, газет лыддьыны, письмӧ гижны, — быдлаӧ колӧ велӧдчӧм морт. Велӧдчӧм крестьянин кужӧ этшаджык уджӧн унджык вӧчны, ассьыс видз-мусӧ бурджыка вынсьӧдны, скӧтсӧ бурджыка видзны. Велӧдчӧм мортлӧн быдтор вылӧ синмыс восьса. Велӧдчытӧм морт видз-мутӧ уджалӧ пӧльясыс моз, выльтор некутшӧмӧс оз тӧд, некытчӧ оз письты. Рочьяс шуӧны: «Велӧдчӧм — югыд, велӧдчытӧм — пемыд».

Тайӧ кык вежоныс лоӧ школалы отсалан кад. Быд сиктын, быд грездын колӧ кык вежон чӧжыс лӧсьӧдны школаяслы патераяс, стӧрӧжъясӧс, лӧсьӧдны тӧвбыд кежлӧ пес, быд ногӧн отсавны школаяслы, мед тӧвнас позис бура велӧдны ассьыныд челядьтӧ. Оз ков ыръянитны; ыръянитӧмӧн аслыныд жӧ лёксӧ вӧчанныд.

Энӧ вунӧдӧй: кымын уна миян лоӧ школа, кымын ёна велӧдчасны миян челядь, сымын сюсьӧсь, вежӧраӧсь лоӧны том йӧз, сымын ӧдйӧ, бура босьтчас, овмӧдчас Коми му.

Энӧ вунӧдӧй, бура овмӧдчыны вермам сӧмын велӧдчӧмӧн. Бура велӧдчӧм лоӧ, кор ми ставным пондам быд ногӧн отсавны школалы.

This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:

its creator fought or worked for Soviet Union victory during the Great Patriotic War — so the 74-year protection term is applied;
and the creator died before January 1, 1950 (more than 74 years ago), and has been not posthumously rehabilitated since that date;
and this work was first published before January 1, 1950 (more than 74 years ago).

This work is in the public domain in the United States because it was published before January 1, 1929 (more than 95 years ago).

The author died in 1942, so this work is also in the public domain in other countries and areas where the copyright term is the author's life plus 81 years or less (if applicable), or the copyright term is 101 years or less since publication (if applicable).