Кӧин со сикт вылӧ локтӧма вӧрсянь,
Абу нин гӧститны, повзьӧма, кашкӧ:
«Пищальӧн, понъясӧн вӧтчӧны бӧрсянь.
Верма пӧ кытчӧкӧ дзебсьыны, гашкӧ...»
Дерт, эськӧ пырас кӧть код ордӧ — шань,
Сӧмын тай быдлаын ӧдзӧсыс пӧдса.
Аддзӧ друг: пос вылын пукалӧ Кань, —
Кевмысьӧ сы водзын, быттьӧкӧ тӧдса:
— Кысыльӧй-каньыльӧй, Василей Другӧй,
Енмогысь дзеб менӧ, вои ӧд матӧ:
Омӧль йӧз понъясӧн босьтісны кругӧ,
Вӧтчӧны ме бӧрся, тонӧсь нин, матын.
Ӧдйӧджык, зарниӧй, инды бур мортӧс,
Сы ордӧ верма мед дзебсьыны наысь!..
— Степанлы шыасьлы, буракӧ, гортас,
Сыысь бур мужикыс оз нин сюр татысь...
— Сідз эськӧ, другӧй, да сыысь ме пола:
Колян во гожӧмнас межсӧ ме нуи...
— Но дивӧ аттӧ зон! Лёка тай олан! —
Кань сэтчӧ ньӧжйӧник Кӧинлы шуис. —
Мун инӧ вӧзйысьлы Демьян дядь ордӧ...
— Эн нин шу сы йылысь, мӧдӧс вай инды.
Сылысь ме балясӧ пышйӧдлі сёрдӧ,
Ӧні на лӧгалӧ: мед пӧ ме виньда!..
— Но, ерӧмаканьӧй! Трӧшӧ нӧ вӧзйысь...
— Мун, Васьӧ! Мый нӧ тэ? Кыдзи нӧ... Мый нӧ?..
Сыкӧд ме аддзысьны весиг эг кӧсйысь:
Ыжсӧ ме сёйлі да, кыйӧдчӧ лыйны...
— Но, трустӧ, робота! Мокасьтӧ олӧм!
Ещӧ вай шыасьлам Клим ордӧ, збыльысь!
— Ок-ок-ок, Кысыльӧй, сьӧлӧмӧй полӧ:
Арнас ме куканьсӧ джагӧдлі сылысь...
— Но-но-но!.. Тэ тай, зон, быд водзын мыжа,
Гӧгӧр тай вӧлӧмыд важӧн нин сирӧсь:
Ёна тай сёйлӧмыд межъяс да ыжъяс, —
Горшыд тай паськыд зэв, ныр-вомыд вирӧсь...
Кужан тай, мудер тай вӧлӧмыд ворсны, —
Сэтшӧм нин, тӧдӧмысь, Кӧин рӧд тіян...
Кыдзи нӧ лысьтан тась дорйысьӧс корсьны?
Йӧзыд ӧд абу жӧ йӧйӧсь дзик миян!
Мун, вешйы син водзысь... Абу нӧ-й яндзим?
Мый ачыд корсьысин — сійӧс и аддзин!
This is a translation and has a separate copyright status from the original text. The license for the translation applies to this edition only.
