Тогѡ́же ст҃а́гѡ ѻ҆ц҃а̀ на́шегѡ є҆фре́ма,
поꙋ́ченїе и҆ наказа́нїе поле́зно.
слоⷡ҇
а҃
А҆́зъ, є҆фре́мъ, грѣ́шный и҆ неразꙋ́мный, присносла́бый и҆ ѹ҆ны́лый на подвиза́нїе дх҃о́вное, глаго́лю ва́мъ: подвиза́йтесѧ хрⷭ҇толю́бнаѧ бра́тїѧ. и҆́мже побѣжде́нъ быва́хъ по всѧ̀ часы̀: сла́бостьствомъ своегѡ̀ по́мысла. хощꙋ̀ и҆ ва́мъ сказа́ти, воⷥлю́бленїи, стра́хъ вели́къ и҆ тре́петъ дш҃ѝ моеѧ̀, є҆́же бы́сть ми въ де́нь є҆ди́нъ нечести́вомꙋ, несмире́нномꙋ, и҆ неприлѣ́жномꙋ.
Сѣдѧ́хъ є҆ди́нъ на мѣ́стѣ, и҆ ти́сѣ, и҆ высо́цѣ, и҆ помышлѧ́хъ въ себѣ̀ ѡ҆ житїѝ сꙋ́етныѧ печа́ли молвꙋ̀ и҆ смꙋще́нїе и҆ сле́зы, и҆ поꙋча́хсѧ въ себѣ̀, ка́кѡ житїѐ сїѐ, ꙗ҆́кѡ сѣ́нь прехо́дитъ; и҆
і҆ѡⷡ҇ ѳ҃,
сⷯ к҃є ꙗ҆́кѡ ко́нь ско́ръ ми́мѡ тече́тъ: и҆ ꙗ҆́кѡ цвѣ́тъ въ те́рнїи ᲂу҆вѧда́етъ. и҆ глаго́лахъ печа́лꙋѧ и҆ рыда́ѧ: ка́кѡ тече́тъ вѣ́къ се́й; не вѣ́мы: поне́же є҆смы̀ привѧ́зани сла́бостїю, вещьмѝ, и҆ по́мыслы неподо́бными.
Сїѧ̀ всѧ̀ помышлѧ́ющꙋ ми въ себѣ̀, внеза́пꙋ воⷥдви́гъ ꙭ҆́чи на нб҃о, и҆ бы́хъ а҆́бїе ꙗ҆́кѡ во ѹ҆́жасѣ, и҆ ви́дѣхъ ꙭ҆чи́ма се́рдца моегѡ̀ бг҃а со сла́вою сѣдѧ́ща, и҆ гл҃го́люща къ дꙋшѝ мое́й та́кѡ: почто̀, дꙋшѐ, презрѣ́ла є҆сѝ сла́вꙋ мою̀; почто̀, дꙋшѐ, менѐ, небе́снаго и҆спо́лнена свѣ́та и҆ живота̀, воⷥненави́дѣла є҆сѝ, жениха̀ беⷥсме́ртнаго и҆ чи́стаго; почто̀, дꙋшѐ, воⷥненави́дѣла є҆сѝ бл҃га̑ѧ, ꙗ҆̀же а҆́зъ ᲂу҆гото́вахъ ти; почто̀, дꙋшѐ, была̀ є҆сѝ менѐ чꙋжда̀, по́мыслы и҆ дѣлесы̀ неподо́бными; почто̀, дꙋшѐ, не потщи́шисѧ ѡ҆брѣсти́сѧ ра́дꙋющисѧ, въ прише́ствїе моѐ; почто̀, дꙋшѐ, не и҆́маши свѣщѝ въ во́пль хотѧ́щїй бы́ти:
маⷴ҇ к҃є,
сⷯ ѕ҃ сѐ прїи́де жени́хъ, и҆з̾иди́те въ срѣ́тенїе є҆мꙋ̀ съ ра́достїю; почто̀, дꙋшѐ, не восхотѣ́ла є҆сѝ ѹ҆гото́вати ѡ҆дѣѧ́нїѧ досто́йна на бра́ки; почто̀, дꙋшѐ, не вни́деши въ черто́гъ нбⷭ҇сный ст҃ы́й; почто̀, дꙋшѐ, воⷥненави́дѣла мѧ є҆сѝ бл҃га́го, и҆зба́влшаго живо́тъ тво́й ѿ сме́рти; а҆́зъ, дꙋшѐ, сме́рти вкꙋси́хъ тебѐ ра́ди, да невѣ́стꙋ тѧ нарекꙋ̀ себѣ̀. а҆́зъ, дꙋшѐ, и҆ црⷭ҇тво нбⷭ҇ное незави́димое да́хъ ти. а҆́зъ, дꙋшѐ, себѣ̀ невѣ́стꙋ содѣ́лахъ тѧ ꙗ҆́кѡ цр҃ь. а҆́зъ, дꙋшѐ, тебѐ ра́ди человѣ́къ бы́хъ, хотѧ̀ и҆зба́вити тѧ ѿ тлѝ. а҆́зъ, дꙋшѐ, па́че всѣ́хъ дѣ́лъ мои́хъ почто́хъ живо́тъ тво́й, и҆ воⷥнесо́хъ тѧ. а҆́зъ черто́гъ нбⷭ҇ный ѹ҆гото́вахъ ти, и҆ а҆гг҃лы слꙋжи́ти пред̾ тобо́ю въ черто́зѣ. сїѧ̀ а҆́зъ ѹ҆гото́вахъ, на вше́ствїе твоѐ съ ра́достїю. ты́ же, дꙋшѐ, воⷥненави́дѣла є҆сѝ жениха̀ соше́дшаго во а҆́дъ тебѐ ра́ди: воⷥненави́дѣла є҆сѝ жениха̀ нбⷭ҇наго, и҆ бл҃га̑ѧ є҆гѡ̀ неиⷥрече́ннаѧ. и҆ кто̀ ᲂу҆́бѡ любѧ́й па́че менѐ, даю́щагѡ живо́тъ всѣ́мъ милосе́рдїемъ; и҆лѝ кто̀ є҆́сть ᲂу҆́бѡ ми́лостивъ па́че менѐ, спаса́ющагѡ всю̀ тва́рь щедро́тами; кото́рый ѻ҆ц҃ъ лю́битъ сн҃а па́че менѐ; кото́рый ѻ҆ц҃ъ дае́тъ живо́тъ ꙗ҆́коже а҆́зъ; ꙗ҆́кѡ ѡ҆ста́вила мѧ є҆сѝ, дꙋшѐ тща̀, и҆ воⷥлю́била є҆сѝ чю́ждаѧ и҆ мє́рзкаѧ.
И҆ ѹ҆боѧ́хсѧ, бра́тїе, боѧ́знїю вели́кою, поразꙋмѣ́въ ꙭ҆чи́ма, гдⷭ҇ни гл҃ы стра́шныѧ, и҆ дꙋше́вною не́мощїю велмѝ ѹ҆боѧ́хсѧ и҆ ѹ҆жасо́хсѧ, и҆ и҆счезо́хъ ѿ стра́ха и҆ ѿ стꙋда̀ вели́кагѡ, помышлѧ́ѧ стꙋ́дъ поноше́нїѧ, глаго́лахъ: прїиди́те го́ры покры́йте мѧ ѻ҆каѧ́ннаго, и҆ грѣ́шнаго и҆ нечести́ваго. И҆ воⷥнесо́хъ гла́съ мо́й и҆ пла́кахсѧ, и҆ прекло́нь главꙋ̀ до́лꙋ стыдѧ́хсѧ. и҆ пла́кавсѧ, са́мъ себѣ̀, рѣ́хъ та́кѡ: почто̀ а҆́зъ и҆з̾ чре́ва ма́тере моеѧ̀ роди́хсѧ, да раⷥгнѣ́ваю гдⷭ҇а, ст҃а́го бл҃га́го и҆ млⷭ҇рдаго; и҆зве́рженъ бы́хъ и҆з̾ чре́ва зача́тїемъ, и҆ внѣ̀ воспита́нїе тѣле́сное сотвори́хъ, и҆ ѿве́рженъ бы́хъ небе́сныѧ блгⷣти.
Ѻ҆ба́че пла́часѧ припадо́хъ, и҆ моли́хсѧ съ рыда́нїемъ и҆ не́мощїю се́рдца. возопи́хъ съ пла́чемъ, глаго́лѧ та́кѡ: ѹ҆слы́ши влⷣко пла́чъ мо́й, и҆ прїимѝ глаго́лы молє́бныѧ, ꙗ҆̀же приношꙋ̀, грѣ́шный, стыдѧ́сѧ, долготерпѣли́ве млⷭ҇тиве и҆ ще́дре, не сотворѝ по всѣ́мъ дѣлѡ́мъ мои́мъ, ни помѧнѝ прогнѣ́ванїѧ моегѡ̀, є҆́же нече́стсвовавъ прогнѣ́вахъ рꙋ́кꙋ твою̀, но а҆́бїе да́рꙋй ми вре́мѧ ма́ло, да ѡ҆брѧ́щꙋ покаѧ́нїе влⷣко. стерпѣ́ла є҆́сть блгⷣть твоѧ̀ мно́жицею ю҆́ности мое́й, мнѡ́гаѧ беⷥзакѡ́нїѧ моѧ̑, и҆ на ста́рость да стерпи́тъ нн҃ѣ млⷭ҇рдїе твоѐ, ѿмета́нїе, прогнѣ́ванїе, без̾ꙭ́чьствїе. а҆́зъ са́мъ вѣ́мъ, долготерпѣли́ве, клѧ́твꙋ твою̀, є҆́юже клѧ́лсѧ є҆сѝ гл҃го́лѧ: жи́въ а҆́зъ, ꙗ҆́кѡ не хощꙋ̀ сме́рти грѣ́шникꙋ и҆ нечести́вомꙋ,
і҆еⷥ л҃г,
сⷯ а҃і но па́че спасти́сѧ ѿ всѧ́кихъ грѣхѡ́въ, ꙗ҆̀же содѣ́лалъ є҆́сть. ѽ пречⷭ҇те, клѧ́лсѧ є҆сѝ щедро́тами, не хотѧ́й сме́рти грѣ́шномꙋ, ᲂу҆ще́дри мѧ грѣ́шника. молю́ тѧ, ѽ влⷣко, клѧ́лсѧ є҆сѝ щедро́тами, поми́лꙋй, ѡ҆чи́сти, и҆ ᲂу҆ще́дри, и҆ простѝ. не помѧнѝ де́рзости клѧ́твы моеѧ̀: вѣ́дый сердца̀ человѣ́ческаѧ, ты̀ са́мъ вѣ́си ѿ кото́рыѧ болѣ́зни дꙋшѝ дерзнꙋ́хъ пред̾ тобо́ю сїѧ̑ рещѝ. ви́ждь, хрⷭ҇тѐ, и҆сто́чники слє́зъ, и҆ сокрꙋше́нїе се́рдца и҆ рыда́нїе, да не прїи́детъ ны́нѣ повелѣ́нїе твоѐ стра́шное, и҆ во́зметъ мѧ не гото́ва сꙋ́ща и҆ стыдѧ́щасѧ. но па́че блгⷣть твоѧ̀ многомлⷭ҇стиве, презрѣ́ти грѣ́шника пла́чꙋщасѧ, всѧ́кой дꙋшѝ приходѧ́щей въ покаѧ́нїе, ѿ всѧ́кагѡ беⷥзако́нїѧ є҆́же содѣ́ѧ. ѹ҆слы́ши бл҃гі́й ст҃ы́й, гла́съ и҆ во́пль и҆ рыда́нїе се́рдца моегѡ̀, и҆ сѐ ны́нѣ долготерпѝ ꙗ҆́кѡ бла́гъ, да сотворю̀ пло́дъ до́бръ покаѧ́нїемъ, по́мнѧ всегда̀ ꙗ҆́кѡ влече́тъ мѧ на жи́знь, да спас́енъ бꙋ́дꙋ.
Е҆гда́ же помѧнꙋ̀ де́нь то́й внеза́пꙋ, бою́сѧ и҆ пла́чꙋсѧ съ воⷥдыха́нїемъ. и҆ по ма́лѣ па́ки забꙋ́дꙋ всѧ̑ вкꙋ́пѣ, моле́нїе, и҆ сле́зы, и҆ стра́хъ, и҆ вре́мѧ да́нное ми щедро́тами. чесѡ̀ ра́ди ѹ҆́бѡ прихо́дѧтъ ми сїѧ̑, тѧ́гость, и҆ небреже́нїе, и҆ забꙋ́дꙋ, и҆ бꙋ́дꙋ внеза́пꙋ беⷥдѣ́ленъ, и҆ беⷥстра́шенъ, и҆ не смире́нъ, и҆ гнѣвли́въ; не и҆мѣ́ѧ пред̾ ꙭ҆чи́ма стра́ха, ни сꙋда̀ хотѧ́щагѡ бы́ти. є҆да̀ непра́веденъ гдⷭ҇ь; да не бꙋ́детъ, а҆́ще хо́щетъ ѿда́ти ми по дѣлѡ́мъ мои̑мъ.
Всѧ̑ вы молю̀, бг҃олю́бцы, моли́тесѧ за мѧ̀ ко гдⷭ҇ꙋ бг҃ꙋ. Сегѡ̀ ра́ди повѣ́дахъ бы́вшаѧ ми, ꙗ҆́кѡ да воⷥмогꙋ̀ полꙋчи́ти млⷭ҇ть бж҃їю. вѣ́мъ, а҆́ще хо́щете, мо́жете помощѝ грѣ́шномꙋ моли́твами. вѣ́дѣхъ а҆́зъ мно́жицею, ꙗ҆́кѡ моли́тва мощна̀,
дѣѧⷩ҇
заⷱ҇ к҃ѳ и҆зба́ви а҆пⷭ҇лы ѿ темни́цы и҆ ю҆́зъ. а҆пⷭ҇лскаѧ бо моли́тва мнѡ́ги ѡ҆чи́сти, и҆ болѣ̑зни и҆сцѣлѝ, и҆ бѣ́сы и҆згна̀, то̀ колмѝ па́че, грѣ́шника и҆ нечести́ва, мо́жетъ и҆зба́вити ѿ см҃рти. сни́дитесѧ, боѧ́щїисѧ гдⷭ҇а, и҆ проле́йте моли́твы ва́шѧ за мѧ̀. да бꙋ́дꙋ моли́твами ва́шими внꙋ́трь. и҆ да воⷥсїѧ́етъ блгⷣть хрⷭ҇то́ва въ дꙋшѝ мое́й, и҆ да просвѣти́тъ ми ѡ҆мраче́нꙋю мы́сль, и҆ бꙋ́дꙋ ꙗ҆́кѡ прилѣ́женъ и҆ досто́инъ покаѧнїѧ, моли́твамъ ва́шымъ помога́ющымъ ми.
И҆́бо моѧ̑ всѧ̑ гѡ́рькаѧ ѡ҆сладѧ́тсѧ, блгⷣтїю бы́вшею ѡ҆ нечести́вѣмъ. блгⷣти бо прише́ствїе таково̀ є҆́сть, сла́дость, ти́хость, покаѧ́нїе, и҆́мже воⷥмо́жетъ срⷣце сла́достїю и҆ ти́хостїю, и҆ ра́достїю просвѣще́нїѧ, и҆ забꙋ́дꙋ внеза́пꙋ дꙋше́ю зємна́ѧ, и҆ стра́сти плотскі̑ѧ и҆ сквє́рныѧ. и҆ блгⷣть всели́тъ по́мыслъ въ дꙋшѝ, раѧ̀ црⷭ҇кагѡ и҆спо́лнь сꙋ́ща, сады̀ доброплѡ́дныѧ и҆мꙋ́ща, вкꙋ́съ є҆гѡ̀ разли́чный, вонѧ̀ сла́дки и҆мѣ́ѧ, кра́сны ꙭ҆чи́ма, и҆ ѹ҆стѡ́мъ и҆ ноздрє́мъ. таковы̀ сꙋ́ть вѡ́лны бл҃гостныѧ, просвѣща́ютъ и҆ сладѧ́тъ и҆ веселѧ́тъ. бл҃же́нна дꙋша̀, и҆мѣ́ющи въ себѣ̀ вѡ́лны блгⷣтныѧ, просвѣща́етсѧ, слади́тсѧ, весели́тсѧ видѣ́нїемъ бл҃гоꙋха́ннымъ. па́ки рекꙋ̀: бл҃жена дꙋша̀, и҆мѣ́ющи сїѧ̑ всѧ̑ дарова̑нїѧ. и҆́бо ничто́же ви́дитъ, ни бреже́тъ на землѝ, но є҆́сть плѣ́нница къ бг҃ꙋ. не ѡ҆ста́витъ бо є҆ѧ̀ свѣ́тъ сла́достный, и҆на́мѡ гдѣ̀ зрѣ́ти. раѧ̀ пло́дъ бл҃голѣ́пенъ є҆́сть, дꙋшѝ просвѣще́нѣй бл҃года́тїю.
Сѐ па́ки ѡ҆блачꙋ́сѧ въ беⷥстꙋ́дїе, и҆ припа́даю къ две́ремъ влⷣки моегѡ̀, ми́лсѧ дѣ́ю. припа́даѧ и҆ молѧ́сѧ, глаго́лю при́снѡ: ѿпꙋстѝ, долготерпѣли́ве согрѣшє́нїѧ моѧ̑. лꙋ́чше бо є҆́сть рабꙋ̀ не ѿстꙋпи́ти своегѡ̀ влⷣки. є҆гда́ же пред̾ ни́мъ согрѣши́тъ, тогда̀ наипа́че и҆́мать пребыва́ти ѹ҆ негѡ̀, и҆ моли́тисѧ со всѣ́мъ смире́нїемъ се́рдца. а҆́ще ѹ҆́бѡ ѡ҆быко́ша и҆ человѣ́цы, та́кѡ просѧ́щымъ ѿпꙋща́ти человѣ́кѡмъ согрѣше́нїѧ, то кольмѝ па́че бг҃ъ содѣ́тель всѣ́хъ, многомлⷭ҇тивъ и҆ долготерпѣли́въ и҆ ще́дръ, чл҃колю́бецъ и҆ милосе́рдъ и҆ бл҃гъ, ѿпꙋсти́ти беⷥзакѡ́нїѧ, и҆ всѧ̑ согрѣшє́нїѧ къ немꙋ̀ прибѣга́ющымъ. и҆́бо то́й са́мъ сокро́вище ми́лости, гото́въ на́шемꙋ ма́ломꙋ житїю̀, и҆звѣ́тъ да́рствовати, и҆ ѡ҆брати́ти и҆́щꙋщихъ покаѧ́нїѧ, съ сокрꙋше́нїемъ се́рдца.
Тѣ́мже, влⷣко ст҃ы́й, мо́лимсѧ беⷥчи́сленномꙋ твоемꙋ̀ человѣколю́бїю всѝ человѣ́цы: пода́ждь на́мъ покаѧ́нїю вре́мѧ, и҆ ѿпꙋще́нїе грѣхѡ́въ. ꙗ҆́кѡ да порабо́таемъ ти всѧ̑ днѝ живота̀ на́шегѡ, чи́стымъ се́рдцемъ, да сподо́бимсѧ ѹ҆годи́вше тебѣ̀ дѣ́лы бл҃ги́ми, дости́гнꙋти въ вѣ́чный поко́й. и҆дѣ́же ᲂу҆гото́валъ є҆сѝ ст҃ы̑мъ, во всѧ̑ ро́ды бл҃гоꙋгоди́вшымъ тебѣ̀, мл҃твами влⷣчцы на́шеѧ бцⷣы и҆ приснод҃вы мр҃і́и, и҆ всѣ́хъ ст҃ы́хъ твои́хъ. ꙗ҆́кѡ подоба́етъ тебѣ̀ всѧ́каѧ сла́ва, че́сть и҆ поклоне́нїе, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́мъ. а҆ми́нь.
This is a translation and has a separate copyright status from the original text. The license for the translation applies to this edition only.
