Того́же ст҃а́гѡ и҆ прпⷣбнагѡ ѻ҆ц҃а̀ на́шегѡ є҆фре́ма,
поꙋче́нїе къ бл҃гоче́стїю.
слоⷡ҇
г҃
Возлю́бленне, хрⷭ҇тїа́нинъ ли є҆сѝ бж҃їею блгⷣтїю; то̀ соблюдѝ за́пѡвѣди гдⷭ҇а на́шегѡ і҆и҃са хрⷭ҇та̀, и҆ спасе́нъ бꙋ́деши. пи́шетъ бо,
дѣѧⷩ҇
заⷱ҇ к҃ѕ ꙗ҆́кѡ пои́стинѣ разꙋмѣва́ю, ꙗ҆́кѡ нѣ́сть лицемѣ́ръ бг҃ъ; но во всѣ́хъ ꙗ҆зы́цѣхъ боѧ́лисѧ бг҃а, и҆ дѣ́лаѧй пра́вдꙋ прїѧ́тенъ є҆мꙋ̀ є҆́сть. а҆́ще ли хо́щеши на и҆спы́тное мни́шеское прїитѝ житїѐ, ꙗ҆́кѡ да и҆ лꙋ́чшее полꙋчи́ши, а҆́ще не положи́ши на ᲂу҆мѣ̀ свое́мъ, ꙗ҆́кѡ ᲂу҆́же преста́вилсѧ є҆сѝ ѿ жи́зни сеѧ̀, и҆ не ѡ҆ста́виши мі́ра сегѡ̀, ни сла́вы є҆гѡ̀, ꙗ҆́кѡ сѣ́ни разорѧ́емы, не мо́жеши побѣди́ти страсте́й земны́хъ, ни мі́ра сегѡ̀ жела́нїй, ꙗ҆́же погрꙋжа́ютъ чл҃ки пло́тїю во ѿпаде́нїе и҆ поги́бель. не лжи́въ бо є҆́сть рекі́й:
маⷴ҇
заⷱ҇ ѯ҃ѳ и҆́же хо́щетъ въ слѣ́дъ менѐ да и҆́детъ. хотѧ́й бо дꙋ́шꙋ свою̀ спастѝ, погꙋби́тъ ю҆̀. а҆ погꙋби́вый дꙋ́шꙋ свою̀ менє̀ ра́ди, ѡ҆брѧ́щетъ ю҆̀. что̀ ᲂу҆́бѡ ᲂу҆спѣ́етъ чл҃къ, а҆́ще ве́сь ве́сь мі́ръ приѡбрѧ́щетъ, дꙋ́шꙋ же свою̀ ѿщети́тъ; и҆лѝ что̀ да́стъ чл҃къ и҆змѣ́нꙋ за дꙋ́шꙋ свою̀; не ᲂу҆́бѡ є҆́сть нача́ло трꙋдꙋ̀, є҆́же положи́ти ѡ҆снова́нїе. є҆ли́кѡ бо воⷥно́ситсѧ зда́нїе, толи́коже и҆ трꙋда̀ зи́ждꙋщемꙋ, до сконча́нїѧ дѣ́лꙋ. послꙋ́шаемъ спасе́нагѡ гла́са гл҃ющагѡ:
лꙋⷦ҇
заⷱ҇ ѻ҃з кто́ бо ѿ ва́съ хотѧ́й созда́ти сто́лпъ, то̀ не пе́рвѣе сѣ́дъ сочте́тъ и҆мѣнїе, а҆́ще и҆́мать до сконча́нїѧ, да не когда̀ положи́вшꙋ є҆мꙋ̀ ѡ҆снова́нїе, всѝ ви́дѧщїи на́чнꙋтъ є҆мꙋ̀ рꙋга́тисѧ глаго́люще, ꙗ҆́кѡ се́й человѣ́къ нача́тъ зда́нїе, и҆ не воⷥмо́же є҆го̀ соверши́ти; бра́нь бо во́инꙋ ма́ла є҆́сть, а҆ мни́хꙋ до ѿше́ствїѧ своегѡ̀ є҆́же къ бг҃ꙋ. сегѡ̀ ра́ди подоба́етъ нача́ти дѣлеса̀, со всѧ́цѣмъ тща́нїемъ, и҆ бдѣ́нїемъ, и҆ терпѣ́нїемъ. а҆́ще ᲂу҆́бѡ, воⷥлю́бленне, на́чнеши закла́ти льва̀, крѣ́пкѡ прїимѝ є҆го̀, да не ка́кѡ сокрꙋши́тъ кѡ́сти твоѧ̑, ꙗ҆́кѡ сосꙋ́дъ зда́нъ. а҆́ще ли же вве́ржешисѧ въ мо́ре, не крꙋподꙋ́шенъ бꙋ́ди, до́ндеже и҆з̾и́деши на сꙋ́хо, да не сни́деши во глꙋбинꙋ̀, ꙗ҆́кѡ и҆ ка́мень. бра́те, а҆́ще вни́деши подвиза́тисѧ, трезви́тель бꙋ́ди, да не ка́кѡ сопроти́вный побѣди́въ тѧ порꙋга́еттисѧ, и҆ въ вѣнца̀ мѣ́стѡ прїе́млеши сопроти̑внаѧ: всѧ́къ ᲂу҆́бѡ хотѧ́й бы́ти мни́хъ, сѐ да и҆́мать гото́во, є҆́же терпѣ́ти до́брѣ, є҆да̀ когда̀ вше́дшꙋ є҆мꙋ̀ рече́тъ: не вѣ́дахъ, ꙗ҆́кѡ сицева́ми хотѧ́тъ бы́ти. и҆ сѐ провоⷥвѣсти́лотисѧ є҆́сть, бра́те, да и҆ ты̀ по́мыслъ сво́й ᲂу҆тверди́ши, вѣ́дый ꙗ҆́кѡ ѿ сегѡ́ ти сѧ ꙗ҆ви́тъ и҆скꙋшенїе. разꙋмѣ́ ли гл҃емое, воⷥлю́бленне, да не дне́сь пред̾ две́рми сы́й вопраша́емъ, рече́ши ᲂу҆́тро всѧ̑ терплю̀, и҆ ᲂу҆́трѣ ѿве́ржешисѧ дѣлесы̀. а҆́гг҃ли бж҃їи преⷣстоѧ́тъ, и҆ слы́шатъ всѧ̑ и҆сходи̑маѧ ᲂу҆стна́ма твои́ма. блюди́сѧ, воⷥлю́бленне, ты̀ са́мъ прихо́диши къ бг҃ꙋ жи́вꙋ и҆́стиннꙋ, и҆ ѡ҆бѣщава́ешисѧ. блюди́сѧ, да не со́лжеши,
ѱаⷧ҇ є҃ ꙗ҆́кѡ погꙋби́тъ гдⷭ҇ь всѧ̑ глаго́лющыѧ лжꙋ̀. сїѧ̑ ᲂу҆́бѡ быва́ютъ приходѧ́щемꙋ къ бг҃ꙋ: пе́рвое ᲂу҆́бѡ и҆скꙋше́нїе, по се́мъ же ско́рбь. что́ же ᲂу҆́бѡ по то́мъ; трꙋ́дъ ᲂу҆ны́нїе, нагота̀, стра́сть, печа́ль, ᲂу҆ничиже́нїе. си́ми бо сѧ ꙗ҆ви́тъ терпѣ́нїе и҆ и҆скꙋше́нїе вѣ́рныхъ, и҆ си́ми всѣ́ми побѣди́тъ да́вый себє̀ всѣ́мъ срⷣцемъ бж҃їю наставле́нїю и҆ стерпѣ́вый во́лю є҆гѡ̀. поне́же бо соверше́нагѡ преⷣложе́нїѧ ѿ на́съ и҆́щетъ бг҃ъ, и҆ са́мъ на́мъ подае́тъ крѣ́пость, и҆ побѣ́дꙋ да́рꙋетъ. ꙗ҆́коже пи́шетъ:
ѱаⷧ҇ з҃і и҆ защити́тель є҆́сть всѣ̑мъ ᲂу҆пова́ющымъ на́нь. и҆ па́ки глаго́летъ:
ѱаⷧ҇ рм҃д близъ гдⷭ҇ь всѣ̑мъ призыва́ющымъ и҆̀ вои́стинꙋ. во́лю боѧ́щихсѧ є҆гѡ̀ сотвори́тъ, и҆ моли́твꙋ и҆́хъ ᲂу҆слы́шитъ, и҆ спасе́тъ ѧ҆̀. моли́тежесѧ за мѧ̀, молю̀ вы̀ да не лѣни́мсѧ. да́стъ же вамъ гдⷭ҇ь непоро́чнѡ сохрани́ти сїѧ̑. небо̀ ᲂу҆́бѡ ꙗ҆́коже дости́гше въ сїѧ̑ чи́сла, совѣ́тꙋю ва́мъ, но гдⷭ҇а і҆и҃са хрⷭ҇та̀ призва́вше, да́вца и҆ вмѣсти́телѧ словесѝ, начина́емъ ᲂу҆́бѡ ѡ҆бнажа́ти словеса̀, да по́льзꙋ ва́мъ по́льзꙋюще. поне́же и҆ глаго́лемїи пим꙼ента́р꙼їи
зел꙼е́йщи꙼ки
вра꙼чевс꙼кі̑ѧ , прилѣ́жнѡ и҆спыта́ша корє́нїѧ, и҆ ѻ҆́бразъ бы́лїємъ, и҆ въ писа̑нїѧ преда́ша. и҆ сѐ смотре́нїе бж҃їе не пщꙋ́ю, на ᲂу҆тѣше́нїе болѧ́щихъ по плотѝ, то̀ кольмѝ па́че поле́знѡ є҆́сть на́мъ ѿкрыва́ти сокро́вище благода́тное, по дарꙋ̀ є҆гѡ̀. небо̀ ᲂу҆бѣжа̀ мꙋ́ки ра́бъ проны́рствомъ, скры́въ тала́нтъ гдⷭ҇а своегѡ̀. кто́ же ли не воⷥдо́хнетъ, то̀ по́мнѧ, и҆́же всꙋ́е и҆мы́й и҆́мѧ и҆́ноческое, кто́ ли не воспла́четсѧ менѐ погꙋ́бльшаго, говѣ́нїе и҆ терпѣ́нїе; и҆ что̀ сотворю̀, є҆гда̀ посѣти́тъ менѐ влⷣка хрⷭ҇то́съ; тѣ́мже молю́ вы, воⷥлю́бленнїи: моли́те за мѧ̀ недосто́йнаго раба̀, ꙗ҆́кѡ да и҆зба́влюсѧ ѿ настоѧ́щагѡ вѣ́чнагѡ ѻ҆гнѧ̀, и҆ блгⷣть да ѿве́рзетъ ми ᲂу҆стнѣ̀, на славосло́вїе ст҃ы́ѧ є҆диносꙋ́щныѧ трⷪ҇цы, ѻ҆ц҃а̀ и҆ сн҃а и҆ ст҃а́гѡ дх҃а, ꙗ҆́кѡ въ рꙋкꙋ̀ є҆гѡ̀ мы̀ и҆ словеса̀ на́шѧ. то́й бо є҆́сть ᲂу҆ча́й чл҃ка ра́зꙋмꙋ. томꙋ̀ сла́ва во вѣ́ки вѣкѡ́мъ. а҆ми́нь.
This is a translation and has a separate copyright status from the original text. The license for the translation applies to this edition only.
