Того́ же ст҃а́гѡ и҆ прпⷣбнагѡ є҆фре́ма, наказа́нїе.
слоⷡ҇
є҃
Возлю́бленне, сѐ преⷣлага́ю ти дрꙋго́е преⷣложе́нїе ѡ҆ гдⷭ҇ѣ, а҆́ще сохрани́ши є҆̀, по́слѣжде да́сттисѧ весе́лїе. а҆́ще ѿве́рглсѧ є҆сѝ сꙋ́етнагѡ житїѧ̀, и҆ вни́деши во ѻ҆́бщее житїѐ и҆ мно́жайшꙋю бра́тїю, да тебѐ не прельсти́тъ вра́гъ и҆зы́ти ѿ ѻ҆́бщагѡ житїѧ̀, пре́жде взѧ́тїѧ ѻ҆де́жды мни́шескагѡ ѡ҆́браза, ни соверше́на же, ѕѣлѡ́ бо раска́ешисѧ. но положѝ нача́ла бл҃га, и҆ терпѝ со всѧ́кою смире́нною мꙋ́дростїю, находѧ́щихъ же и҆скꙋше́нїй вра́жїихъ не ᲂу҆страша́йсѧ, но терпѝ да полꙋчи́ши бл҃же́нство. пи́шетъ бо:
і҆а́кѡⷡ҇
заⷱ҇ и҃ бл҃же́нъ мꙋ́жъ и҆́же претерпи́тъ и҆скꙋшє́нїѧ. ꙗ҆́кѡ и҆скꙋше́нъ бы́въ, прїи́метъ вѣне́цъ живо́тный, и҆́же ѡ҆бѣща̀ гдⷭ҇ь лю́бѧщымъ є҆го̀. хо́щеши ли да не бꙋ́деши побѣжде́нъ и҆скꙋ́сомъ; всю̀ во́лю твою̀ ѿрешѝ, и҆ и҆́маши поко́й. а҆́ще ли мни́тсѧ добра̀ сꙋ́щи ве́щь настоѧ́щаѧ тебѣ̀, гдⷭ҇емъ сꙋ́дитсѧ, не сꙋ́щи добра̀. покори́сѧ є҆мꙋ̀ ᲂу҆се́рднѡ. є҆́же бо прѣти́сѧ и҆ своемꙋ̀ по́мыслꙋ послѣ́дствовати, зна́менїе є҆́сть на воⷥвраще́нїе. новонача́льный бо непоко́рно и҆́мѧ и҆мѣ́ѧ, нивочто́же твори́тъ себѐ. пи́шетъ бо во ѱалмѣ̀:
ѱаⷧ҇ в҃ рабо́тайте гдⷭ҇еви со стра́хомъ, и҆ ра́дꙋйтесѧ є҆мꙋ̀ съ тре́петомъ. прїими́те наказа́нїе, да не когда̀ прогнѣ́ваетсѧ гдⷭ҇ь, и҆ поги́бнете ѿ пꙋтѝ пра́веднагѡ. любѧ́й бо наказа́нїе не поги́бнетъ, ненави́дѧй же наказа́нїѧ ѿщети́тсѧ са́мъ. ꙗ҆́коже бо въ мѣ́хъ пивны́й вли́тꙋ бы́ти винꙋ̀ и҆ ѻ҆цтꙋ̀ невоⷥмо́жнѡ є҆́сть, та́кожде и҆ ненаказа́нїе не мо́жетъ всели́ти дѣ́тели мни́шескагѡ житїѧ̀. и҆ препри́тъ мѧ а҆пⷭ҇лъ гл҃ѧ:
коⷬ҇ в҃
заⷱ҇ рп҃в ко́е бо є҆́сть согла́сїе хрⷭ҇тꙋ̀ къ лестцꙋ̀; и҆лѝ ко́е ѻ҆бще́нїе свѣ́тꙋ со тмо́ю. люби́ же цѣломꙋ́дрїе до конца̀, да всели́тсѧ въ тѧ̀ дх҃ъ бж҃їй. є҆гда́ же досто́инъ бꙋ́деши ѻ҆де́жды мни́шескагѡ житїѧ̀, ни та́кожде ᲂу҆́бѡ полага́й по́мыслы, а҆́ще и҆ хотѧ́тъ раⷥлꙋчи́ти тѧ бра́тїи, да некогда̀ ѿ ю҆́ности твоеѧ̀ навы́кнеши скита́тисѧ, а҆ не въ є҆ди́номъ мѣ́стѣ сѣдѣ́ти. блюди́жесѧ да не мозѝ погꙋби́ти говѣ́нїѧ, вне́же вни́де, но и҆мѣ́й є҆го̀ до конца̀. ѕлосло́вїе же и҆ клѧ́тва, да не и҆менꙋ́етсѧ во ᲂу҆стнꙋ̀ твое́ю, ꙗ҆́коже подоба́етъ ст҃ы̑мъ, но чистотꙋ̀ и҆ смире́нїе и҆мѣ́й во всѣ́хъ свои́хъ ѿвѣ́тѣхъ. є҆́же рещѝ: ѿпꙋстѝ грѣхѝ моѧ̑, ꙗ҆́кѡ да ѿи́дꙋтъ ѿ тебѐ небла́зїи ѻ҆бы́чаи мирсті́и. и҆ пожи́вшꙋ ти добродѣ́телнѣ, и҆́маши ѿ бг҃а похвалꙋ̀. грѧдꙋ́щꙋ же тѝ во мни́шескїй чи́нъ, да не тре́бꙋеши зла́та ни сребра̀, но всѧ̑ предѝ послѝ на нб҃са̀, по за́повѣди сп҃совѣ. сїѧ̑ стѧжѝ себѣ̀: вѣ́рꙋ, воⷥдержа́нїе, терпѣ́нїе, смире́нїе, и҆ прѡ́чаѧ бг҃ъ ѿ бл҃гости своеѧ̀ пода́стъ тѝ. а҆́ще же кто̀ ѿ вели́ка ѡ҆ста́нка сꙋ́етнагѡ житїѧ̀, прїи́детъ во мни́шество, да соблюде́тсѧ са́мъ ѿ дѣ́монскагѡ велича́вагѡ смы́сла, да не впаде́тъ въ дꙋ́хъ горды́нный и҆ непокори́вый, и҆ ѿщети́тсѧ са́мъ. воⷥлю́бленне, нѣ́сть сѐ тебѣ̀ на стꙋ́дъ, а҆́ще є҆сѝ въ покоре́нїи ѡ҆ гдⷭ҇ѣ, ни є҆́же а҆́ще дѣ́лати свои́ма рꙋка́ма бл҃го́е. сїѧ́ бо ма́лаѧ печа́ль и҆ ско́рбь, ю҆́же терпи́ши гдⷭ҇а ра́ди, хода́тай ти бꙋ́детъ вѣ́чнѣй жи́зни. и҆ что̀ гл҃ю; всѧ̀ печа́ль мни́шескагѡ житїѧ̀, ꙗ҆́кѡ и҆змѣнꙋ́ѧ рꙋкоѧ́ть, на тмѣ̀ тала́нтъ ѕла́та. та́кѡ хотѧ́щаѧ бы́ти ско́рбь, срѧ́щетъ творѧ̑щаѧ ѕла̑ѧ. ма̑ла ᲂу҆́бѡ подае́ши, и҆ вели̑каѧ воспрїи́меши. трезви́сѧ, воⷥлю́бленне, ꙗ҆́кѡ до́брый во́инъ, и҆ не лѣни́сѧ ѡ҆ свое́й бл҃года́ти, да некогда̀ кꙋ́пнѡ прїи́детъ на тѧ̀ ѻ҆боѐ: ꙗ҆́кѡ и҆ чл҃ки ѡ҆скорби́ши, ꙗ҆́же сꙋ́ть по пло́ти роди́тели твоѝ, и҆ бг҃ꙋ не ᲂу҆годи́ши. но подвиза́йсѧ, ꙗ҆́кѡ да и҆ срѣ́тшїи тебѐ, просла́вѧтъ бг҃а, ѡ҆ бла́зѣмъ твое́мъ житїѝ. пи́шетъ бо:
ѱаⷧ҇ ри҃і боѧ́щїисѧ тебѐ ᲂу҆́зрѧтъ мѧ̀ и҆ воⷥвеселѧ́тсѧ, ꙗ҆́кѡ на словеса̀ твоѧ̑ ᲂу҆пова́хъ. и҆ па́ки, ми́ръ мно́гъ лю́бѧщымъ зако́нъ тво́й, и҆ нѣ́сть и҆́мъ собла́зны. тѣ́мже храни́сѧ ѿ высокомꙋ́дрїѧ, и҆ гдⷭ҇ь да́стъ ти ча́сть со всѣ́ми ст҃ы́ми. томꙋ̀ сла́ва во вѣ́ки, а҆ми́нь.
Того́ же є҆фре́ма наказа́нїе.
слоⷡ҇
є҃
Возлю́бленне, а҆́ще сотвори́ши нача́ло добро̀, подвиза́йсѧ, ꙗ҆́кѡ да соверши́ши и҆ ста́рость свою̀ дѣ́телми до́брыми. и҆ бꙋ́деши ꙗ҆́кѡ свѣти́лникъ, просщ҃а́ѧ мно́ги на пꙋ́ть гдⷭ҇нь. а҆́ще ли и҆з̾ чре́ва стропти́въ и҆зы́деши, въ беⷥче́стїе є҆́сть ста́рость твоѧ̀. положѝ ᲂу҆́бѡ ѡ҆снова́нїе крѣ́пкѡ, да взы́детъ тѣ́ло твоѐ на высотꙋ̀. пе́рвое же, бра́те, бг҃а бо́йсѧ, и҆ того̀ сла́ви всѣ́мъ срⷣцемъ твои́мъ, ꙗ҆́кѡ да и҆ са́мъ тѧ просла́витъ со ст҃ы́ми свои́ми. ѿ ю҆́ности воспрїимѝ кро́тостнꙋю премꙋ́дрость, не ѡ҆ставлѧ́й є҆ѧ̀ и҆ до послѣ́днѧгѡ и҆здыха́нїѧ, та́ бо тѧ наста́витъ на стези̑ пра́вєдныѧ. и҆ бы́въ сосꙋ́дъ и҆збра́нъ, и҆́маши похвалꙋ̀ ѿ бг҃а, и҆ человѣ́цы воⷥвели́чатъ тѧ. а҆́ще же пре́данъ бꙋ́деши въ рꙋ́цѣ бра́тꙋ преⷣстоѧ́щимъ, на послꙋже́нїе бра́тїи, да ти́ сѧ не прилꙋчи́тъ глаго́лати въ по́мыслѣ твое́мъ, ꙗ҆́кѡ: а҆́зъ вели́къ є҆́смь, и҆ свѣ́тлыхъ роди́телей сы́нъ, се́й же не дости́женъ, и҆ проси́телей сы́нъ нари́четсѧ. а҆́ще ли же и҆ ѿ рабо́ты є҆́сть, и҆ ка́кѡ а҆́зъ могꙋ̀ покори́тисѧ є҆мꙋ̀; ᲂу҆ко́съ бо мѝ є҆́сть, а҆́ще сїѐ сотворю̀. не помышлѧ́й си́хъ, бра́те, не бо̀ мꙋ́дростїю помышлѧ́еши сегѡ̀, совле́ксѧ ве́тхагѡ человѣ́ка тли́магѡ, по́мыслъ се́й, попре́лестнѣй по́хоти твори́тъ сѐ. мы́ же, воⷥлю́бленне, ꙗ҆́кѡ ѿ бг҃а пре́дани дх҃о́внѣй бра́тїи на рабо́тꙋ, да терпи́мъ рабо́тающе, да сѧ сподо́бимъ свобо́дѣ пра́ведныхъ, по́мнѧше всѣ́хъ влⷣкꙋ, и҆́же ѡ҆ꙋбо́жа на́съ ра́ди, бога́тъ сы́й, да мы̀ тогѡ̀ ᲂу҆бо́жествомъ ѡ҆богати́мсѧ. є҆мꙋ́же сла́ва во вѣ́ки вѣкѡ́мъ, а҆ми́нь.
This is a translation and has a separate copyright status from the original text. The license for the translation applies to this edition only.
