Того́же ст҃а́гѡ є҆фре́ма наказа́нїе.
слоⷡ҇
ѳ҃
Возлю́бленне, не ᲂу҆клонѧ́йсѧ ѿ лица̀ находѧ́щихъ помыслѡ́въ, нача́ло бо подвиза́нїю є҆́сть. ᲂу҆вѣ́ждь же кꙋ́пнѡ ѿ дожде́внагѡ ро́ва, ꙗ҆́кѡ є҆гда̀ до́ждь бꙋ́детъ, и҆ собере́тсѧ наводне́нїе дожде́вное въ ро́въ, въ нача́лѣ смꙋщена̀ є҆́сть вода̀, и҆ є҆ли́ко пребыва́етъ, чистѣ́йши быва́етъ. тѣ́мже, воⷥлю́бленне, сто́й и҆ не ᲂу҆клонѧ́йсѧ. пи́шетъ бо:
ѱаⷧ҇ з҃і и҆ пото́цы беⷥзако́нїѧ смꙋти́ша мѧ. и҆ па́ки:
ѱаⷧ҇ п҃з ꙗ҆́кѡ и҆спо́лнисѧ ѕѡ́лъ дꙋша̀ моѧ̀, и҆ живо́тъ мо́й а҆́дꙋ прибли́жисѧ. тѣ́мже гл҃етъ:
ѱаⷧ҇ к҃ѕ гдⷭ҇ь мнѣ̀ помо́щникъ, и҆ не ᲂу҆бою́сѧ что̀ сотвори́тъ мнѣ̀ чл҃къ. є҆гда̀ ᲂу҆́бѡ прїи́детъ по́мыслъ лꙋка́въ во ᲂу҆́мъ тво́й, возопѝ ко гдⷭ҇ꙋ со слєза́ми гл҃ѧ: гдⷭ҇и, ѡ҆чи́сти мѧ грѣ́шнаго, и҆ прости́ мѧ, чл҃колю́бче, ѿженѝ лꙋка́вагѡ ѿ менѐ. срⷣцевѣ́децъ бо є҆́сть бг҃ъ, и҆ ѕлоѡбы̑чныѧ мы́сли, и҆ раⷥжига́ємыѧ совѣ́ты, и҆́же ѿ лю́тагѡ бѣ́са на́мъ приноси̑мыѧ всѧ̑ свѣ́сть. Се́же ᲂу҆́бѡ вѣ́ждь, ꙗ҆́кѡ є҆ли́кѡ терпи́ши и҆ подвиза́ешисѧ къ бг҃ꙋ рабо́таѧ, толи́коже ѡ҆чища́еттисѧ ᲂу҆́мъ и҆ по́мыслъ. рече́ бо гдⷭ҇ь:
і҆ѡаⷩ҇
заⷱ҇ и҃ всѧ́кꙋ ло́зꙋ приносѧ́щꙋю пло́дъ, ѡ҆треби́тъ ю҆̀, да мно́жайшыѧ плоды̀ принесе́тъ, то́кмѡ восхощѝ спасти́сѧ, ꙗ҆́кѡ лю́битъ гдⷭ҇ь, и҆ помога́етъ ведꙋ́щымсѧ на спⷭ҇нїе. послꙋ́шай же при́тчи ѕло́мꙋ по́мыслꙋ: гро́здїє, є҆гда̀ ѡ҆б̾е́млетсѧ ѿ виногра́да и҆ всы́пано бꙋ́детъ въ точи́ло и҆ и҆спра́но, и҆сточи́тъ вино̀ своѐ и҆ влїѧ́но бꙋ́детъ въ сосꙋ́ды. та́ко возоври́тъ вино̀, ꙗ҆́коже мно́жицею не могꙋ́ще сосꙋ́ди терпѣ́ти нꙋ́жды, раⷥсѣда́ютсѧ ѿ кипѣ́нїѧ, та́кѡ и҆ по́мыслы чл҃честїи. є҆гда́ бо прїи́детъ кто̀ ѿ сꙋ́етнагѡ житїѧ̀, и҆ печа́ль є҆гѡ̀ къ нбⷭ҇номꙋ смы́слꙋ, не терпѧ́ще бѣ́си за́вистїю, раⷥли́чнѡ воⷥмꙋтѧ́тъ ᲂу҆́мъ чл҃кꙋ, хотѧ́ще и҆змѣне́нїе мꙋ́тное раⷥчерпа́ти є҆мꙋ̀, да ѡ҆брѧ́щꙋтъ є҆го̀ сосꙋ́дъ пови́ненъ, и҆ прелстѧ́тъ є҆го̀, є҆́же є҆́сть дꙋ́шꙋ невѣ́рнꙋ и҆ дре́мающꙋ. прїи́дꙋтъ бо бѣ́си ꙗ҆́кѡ во́лцы и҆ хи́щници, ѡ҆бходѧ́ще кѣ́лїи мни́хѡмъ, и҆́щꙋще две́рци ѿве́рсты себѣ̀, ꙗ҆́кѡ да вскочи́вше растлѧ́тъ въ не́й, є҆́же є҆́сть дꙋшѧ̀ повинꙋ́ющасѧ и҆́мъ. а҆́ще ли же ѡ҆брѧ́щꙋтъ две́рь затворе́нꙋ пред̾ лице́мъ и҆́хъ, стꙋжи́вше сю̀ ѿи́дꙋтъ, гл҃ю же дꙋ́шꙋ ѡ҆снова́нꙋ вѣ́рою. не ᲂу҆жаса́йсѧ ᲂу҆́бѡ, ни ᲂу҆бо́йсѧ ѿ ѕлокова́рствїѧ и҆́хъ, вреди́ти бо тебѐ не мо́гꙋтъ. хрⷭ҇та̀ и҆ и҆мѣ́й помо́щника себѣ̀. гл҃етъ бо а҆пⷭ҇лъ: небо̀ да́стъ и҆̀мъ дꙋ́хъ пристра́шїѧ, но си́лы и҆ любвѐ и҆ цѣломꙋ́дрїѧ. и҆ па́ки гдⷭ҇ꙋ ре́кшꙋ:
лꙋⷦ҇
заⷱ҇ и҃в ви́дѣхъ сатанꙋ̀, ꙗ҆́кѡ мо́лнїю съ нб҃сѐ спа́дша. сѐ да́хъ ва́мъ вла́сть настꙋпа́ти на ѕмїю̀, и҆ на скорпі́ю, и҆ на всю̀ си́лꙋ вра́жїю, и҆ ничто́же ва́съ вреди́тъ. тѣ́мже, воⷥлю́бленне, мꙋжа́йсѧ, и҆ воⷥмога́й ѡ҆ гдⷭ҇ѣ бз҃ѣ твое́мъ, ꙗ҆́кѡ во вѣ́ки млⷭ҇ть є҆гѡ̀. а҆́ще ли же и҆ па́мѧть на́мъ наво́дѧтъ роди́телей на́шихъ, рце́мъ къ ни́мъ: мы̀ бг҃а на́шего ѻ҆ц҃а̀ нераⷥлꙋчи́ма и҆́мамы съ собо́ю. а҆́ще ли и҆ па́мѧть земны́хъ веще́й наведꙋ́тъ на ны̀, рце́мъ къ ни́мъ: пи́шетъ:
ѱаⷧ҇ л҃и собира́етъ и҆ не вѣ́сть комꙋ̀ собира́етъ ѧ҆̀. и҆ па́ки:
ѱаⷧ҇ м҃и вкꙋ́пѣ безꙋ́менъ и҆ несмы́сленъ поги́бнета, и҆ во́змꙋтъ чꙋжді́и бога́тство и҆́хъ. да мнѣ́ ли ᲂу҆́бѡ бꙋ́дꙋтъ грѣсѝ, а҆ и҆нѣ́мъ и҆мѣ́нїе; то̀ не вѣда́ли сѐ є҆́сть мнѣ̀, є҆́сть бо и҆ ѕло́ба вели́ка. тѣ́мже не ᲂу҆чи́мсѧ скрыва́ти на землѝ,
маⷴ҇
заⷱ҇ з҃і и҆дѣ́же тлѧ̀ тли́тъ, и҆ че́рвь погꙋблѧ́етъ. и҆дѣ́же бо є҆́сть сокро́вище твоѐ, тꙋ̀ и҆ срⷣце ва́ше. блгⷭ҇ве́нъ є҆сѝ, бж҃е, да́вый на́мъ крѣ́пость ненави́димаго врага̀. ꙗ҆́кѡ тебѣ̀ подоба́етъ сла́ва во вѣ́ки вѣкѡ́мъ, а҆ми́нь.
This is a translation and has a separate copyright status from the original text. The license for the translation applies to this edition only.
