Поладкстомо (2016)/Колмонень морот
[247]
| КОЛМОНЕНЬ МОРОТ |
Пиретнень юткова кияванть, кона кавто ёндо копачазель зярс лопав чувттнэнь тарадсо, минь Вияна марто пачкодинек виренть потс. Тесэ, якстерьстэ артозь лато ало кудыненть икеле, тевень аразде нувсесь пине. Верьгизэнь пона. Конаськак эйсэнзэ верьгизэнь, келей. «Превей, маряви...» — арсезевинь эйстэнзэ. Варштась лангозонок коня алга. «Тынк косто эвсесь кандыдизь?» — кевкстнесь те вановтось. Ялгам мик потазевсь.
— Ужо, Вияна, иля тарно, — тешкстынь оянень ды эскельдинь кудонь ванстыцянть ёнов. Венстия ёнонзо кедем:
— Тон вадринят... Сак монень, сак монень.
Чевтине кольняй вайгелем, икелев венстезь кедем, ванан, солавтызь пиненть акемемань ёжонзо. Састо эскельдясь каршом. Тей-тов якавтызе пулонзо. Таргинь кептернестэм кшипечть ды ёжомарязь ёртыя судонзо икелев. Покшкавтнеме эзь карма. Гилк нилизе. Венстизе судонзо: «Максат омбоксть, арась?»
Пилыть чавинек пельчи.
Куш чинензэ кисэ муевлинек мезеяк пангине ёнов молиця! Ды кодат пангт истямо коське шкава? Сыргсемскак аволь эряво. Косто саизе шабрам: «Нерь вирьстэ [248] кептерень-кептерь кандыть», — а содан. Шканок ялатеке стяко эзь юта. Куш вирьга-укшторга яксинек. Ошонь мелявксонок ёмавтнинек.
Мекев самстонок, дачатнес-пиретнес аламнеде апак пачкоде, эртевинек овтумарень курос. Пинге эрян, истят эрьгана покш овтумарть эзинь некшне. Сэрей рацяня куракштнэнь, мерят, Вирява эрьва вене пургсесь якстере тюс ведьсэ. Кенерстсь эйсэст.
— Мезе, Вияна, зярс лангонок удыть-корныть, куш овтумарть кочкатано, — ёвтыя мелем ды беньк-беньк каинь кептерезэнь пелькашкань покшолмасо зярыя. Мельгаст таго сезнинь коморошка ды истя верендинь, шкантькак стувтыя. Монь лангс ванозь, тевентень педясь Виянаяк.
Кочкатано чатьмонезь. Сезнинь-сезнинь — налкставинь. Кода мелентень а молемс? Те теть аволь чевгелень эли пизёлонь кувтат сезнемс. Аволь пешттькак. Салмуксонзо «овтаень» оно кодат! Вейкеяк тарад арась сынтемест. Кеденек верьс разедевсть-пупсевсть.
Вияна тень мери:
— Марюш, серьгедть кодамояк моро. Тошнакадынь мекс-бути...
— Морамось, кода содат, — монь вечкема тевем. Мекс, алкукскак, а серьгедемс? Ну, кодамо моро?
— Мезеяк сёксте... Ванат, кода сон чары перьканок, — ёвтызе мелензэ Вияна ды, мекс-бути Вайкстазь, таргизе оймензэ. Кияк лия мезеяк аволь редя, мон чарькодия сеске. Вияна марто минь — шабрат, кенкшенек ваныть карадо-каршо. Содаса сонзэ эрямонзо: аволь шождыне, ризкстэ пешксе уцяска. Псискак понгонесь, эй кельментькак варчнизе! Сёксень моро, кадык сёксень... Виде теяк: мон тунда морсян тундонь морот, тельня — телень. Ней сёксь... Те коенть кирдян малавиксэнь туртов морамстояк, сцена лангсояк.
Ды бути потмом панжомс педе-пев, тевесь аволь ансяк «койсэнть». Видькстан, истямо ожо вирьсэ вастовкшнынек ды, зярыя тундодо мейле, явовинек вейке ломань марто. Инешкипаз-Верепаз, паряк, ансяк Тон содат, зяро [249] кеняркст казнесть тенек сеть иетне! Бути Тон неят, кода тикше касы, некшнить кецнемасо минек экшелямонокак. Мон Видяйнень ожо шкатнева сеедьстэ морсия «Сёксь» моронть. Вечкилизе сонзэ. Натой снартнесь мартом, кадык виздезь-пелезь, таргсемс вайгелензэ. Сон пелиль «рудаз» валдонть. Зярдо терявтнесь мартом ветямо морамонь лувонть, ноцковтния яла: «Иля рудазыявто!» Ней янксян, мекс ёвтнинь тензэ истят кардамот. Чуман! Нолдык, оям, чумом! Вечкилик тон «Сёксь» моронть. Ды, паряк, истя, кода мон тонь. Ах, ютазь шка, цёковокс гайгиця иеть! Видяень калмонзо ваксс озавтокшнынь, энялдоманзо коряс, укшторнэ. Вечкевикс чувтонзо. Ней тензэ уш ветеде ламо иеть. Сон келей, панжадо коморо ёнов молиця ожо лопасонзо вельтизе се лугав нарнэнть, конась шкадонзо икеле теевсь оянень меельце кудокс.
— Тон мекс каштмолят? — сезизь ледстнемань оном Виянань валонзо. Мон видемтия рунгом, домкасто лекстинь ды ушодынь морамо:
Сёксень лопатне каштордыть-урнить велькссэнь, Сёксень яннэва эскелян мартост вейсэ мон...
Моронь лувось, валтнэ — гайгсть ванькс экше коштсонть, ливтнесть перьканок чаразь. Сынь теке пеняцясть иень пултыця читнень лангс.
Кочкан овтумарть. Моран. Тарган вайгелем ды, маряви, прок Видяй удалом, ды кирди лавтовом лангсо кедензэ. «Мекс тон туить шкадо икеле, мекс кадымик?» — арсян эськан морамсто.
Кашторкс... Омбоце.
Варштынь удалов ды абунгадынь.
Пинесь, конань марто теевинек содавиксэкс тей самстонок, аштесь пулонзо лангсо озадо ды вансь лангозонок. Ваны — а кончтыяк. Кунсолы ды кунсолы. Чиремт-ни прянзо. Шны. «Парсте, парсте морат, ава», — марявсь, тень кортась вановтозо. Яксевти то вить, то керш пилензэ. Бажи а менстямс ве пельнотынеяк. «Те мезень [250] тамаша, мезень гайтть? — бульчом, яжась превть пинесь. — Мезде, киде истя мелявты те авась сиякс гайгиця човине вайгельсэнзэ?»
Иетне кадсамизь.
Вечкемась ютксонок эри...
Мон моран, пинесь лыкавты пилензэ, кепси судонзо ды, лангозом ванозь, мором кунсолозь снартни та-кодамо кижныця вайгельсэ лездамс тень. И-и-и... — лиси панжадо кургстонзо.
Тамашань тевть.
Косо ды кинь икеле тень эзь савкшно лиснемс морамо, истят мельспаросо, ёжомарязь кунсолыцят эзинь некшне. Мон стувтыя тевемгак, превстэньгак прась мекс тесан. Кирдинь-ветинь моронь лувонть, бажинь пачтямс эрьва нотанть, эрьва валонть. Теке марто, сельмем эзинь сайне кунсолыцям эйстэ. Истя эзинь морсе, прынь мельс, тыц пешксе кодамояк залсо. Натой псис каявинь.
Чанстев ансяк се, кинь седей токны, |
Лиссть ды ливтязь тусть кельбрястом меельце валтнэ. Тарказост сась каштмолема. Цийнезевсть эйстэдензэ пилем. Прок сцена лангсо, чатьмонезь сюконинь «публикантень».
Вияна чатьмонсь. Сон чарькодизе, кинень алтазель те концертэсь.
Конякш, кода мон лемдия эсь пачкам моронь вечкицянть верьгизэнь конянзо кис, верьга вайгельть, прянь кепедезь кармась онгомо. «Мекс прядык, мекс лоткить?!» — марявсь, пеняцясь тень. «Кода чарькодемс тонь келеть, Конякш? Паряк, тон истя снартнят мором пандомс моросо? Цяпат? Эли энялдат ушодомс омбоце? Мезе, кунсолыцям, бути тонь пилеть истя пштистэ марить музыка, бути моронь истямо вечкицят, казян теть омбоцеяк», — тошказь ёвтыя мелем пинентень ды кочкинь тензэ лия моро.
| [251] | Вирев молян, вирев молян, |
Прядыя моронь васень кувтанть. Кудыненть ёндо, конань ванстась, ды кадызе ней Конякш, каятотсь виев вешкема. Тердсь, чарькодинь, азорозо. Кискась кепедизе прянзо тона пелев, варштась та-кода чумонь марязь монь лангс ды каямокс ношкстась куракштнэнь юткова вешкстамонть ёнов.
Иетне эскелить, вечкемань толось эри, Косо явовинек, тосо вастовинек одс. Иетне ливтить, вановтот цитни, Лопатне велькссэнек жойнить...