Правосла́вный мл҃твосло́въ/А҆ка́ѳїстъ прест҃ѣ́й бцⷣѣ
| ←А҆ка́ѳїстъ і҆и҃сꙋ сладча́йшемꙋ | Правосла́вный мл҃твосло́въ А҆ка́ѳїстъ прест҃ѣ́й бцⷣѣ |
Послѣ́дованїе ко ст҃о́мꙋ причаще́нїю→ |
| This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts. |
Тропа́рь, гла́съ и҃:
Повелѣ́нное та́йнѡ прїе́мъ въ ра́зꙋмѣ, въ кро́вѣ і҆ѡ́сифовѣ тща́нїемъ предста̀ безпло́тный, глаго́лѧ неискꙋсобра́чнѣй: приклони́вый схожде́нїемъ нб҃са̀, вмѣща́етсѧ неизмѣ́ннѡ ве́сь въ тѧ̀. є҆го́же и҆ ви́дѧ въ ложесна́хъ твои́хъ прїе́мша ра́бїй зра́къ, ᲂу҆жаса́юсѧ зва́ти тебѣ̀:
Ра́дꙋйсѧ невѣ́сто неневѣ́стнаѧ.
Гла́съ и҃. Конда́къ а҃.
Взбра́нной воево́дѣ побѣди́тєльнаѧ, ꙗ҆́кѡ и҆зба́вльшесѧ ѿ ѕлы́хъ, бл҃года́рствєннаѧ восписꙋ́емъ тѝ рабѝ твоѝ, бцⷣе: но ꙗ҆́кѡ и҆мꙋ́щаѧ держа́вꙋ непобѣди́мꙋю, ѿ всѧ́кихъ на́съ бѣ́дъ свободѝ, да зове́мъ тѝ:
Ра́дꙋйсѧ, невѣ́сто неневѣ́стнаѧ.
І҆́косъ а҃.
А҆́гг҃лъ предста́тель съ нб҃сѐ по́сланъ бы́сть, рещѝ бцⷣѣ: ра́дꙋйсѧ! и҆ со безпло́тнымъ гла́сомъ воплоща́ема тѧ̀ зрѧ̀ гдⷭ҇и, ᲂу҆жаса́шесѧ и҆ стоѧ́ше, зовы́й къ не́й такѡва́ѧ:
Ра́дꙋйсѧ, є҆́юже ра́дость возсїѧ́етъ: Ра́дꙋйсѧ, є҆́юже клѧ́тва и҆сче́знетъ. Ра́дꙋйсѧ, па́дшагѡ а҆да́ма воззва́нїе: Ра́дꙋйсѧ, сле́зъ є҆́ѵиныхъ и҆збавле́нїе. Ра́дꙋйсѧ, высото̀ неꙋдобовосходи́маѧ человѣ́ческими по́мыслы: Ра́дꙋйсѧ, глꙋбино̀ неꙋдобозри́маѧ и҆ а҆́гг҃льскима ѻ҆чи́ма. Ра́дꙋйсѧ, ꙗ҆́кѡ є҆сѝ цр҃е́во сѣда́лище: Ра́дꙋйсѧ, ꙗ҆́кѡ но́сиши носѧ́щаго всѧ̑. Ра́дꙋйсѧ, ѕвѣздо̀ ꙗ҆влѧ́ющаѧ сл҃нце: Ра́дꙋйсѧ, ᲂу҆тро́бо бжⷭ҇твеннагѡ воплоще́нїѧ. Ра́дꙋйсѧ, є҆́юже ѡ҆бновлѧ́етсѧ тва́рь: Ра́дꙋйсѧ, є҆́юже покланѧ́емсѧ творцꙋ̀.
Ра́дꙋйсѧ, невѣ́сто неневѣ́стнаѧ.
Конда́къ в҃.
Ви́дѧщи ст҃а́ѧ себѐ въ чⷭ҇тотѣ̀, глаго́летъ гаврїи́лꙋ де́рзостнѡ: пресла́вное твоегѡ̀ гла́са неꙋдобопрїѧ́тельно дꙋшѝ мое́й ꙗ҆влѧ́етсѧ: безсѣ́меннагѡ бо зача́тїѧ ржⷭ҇тво̀ ка́кѡ глаго́леши, зовы́й: А҆ллилꙋ́їа.
І҆́косъ в҃.
Ра́зꙋмъ недоразꙋмѣва́емый разꙋмѣ́ти дв҃а и҆́щꙋщи, возопѝ къ слꙋжа́щемꙋ: и҆з̾ бокꙋ̀ чи̑стꙋ, сн҃ꙋ ка́кѡ є҆́сть роди́тисѧ мо́щно, рцы́ ми; къ не́йже ѻ҆́нъ речѐ со стра́хомъ, ѻ҆ба́че зовы́й си́це:
Ра́дꙋйсѧ, совѣ́та неизрече́ннагѡ таи́ннице: Ра́дꙋйсѧ, молча́нїѧ просѧ́щихъ вѣ́ро. Ра́дꙋйсѧ, чꙋде́съ хрⷭ҇то́выхъ нача́ло: Ра́дꙋйсѧ, велѣ́нїй є҆гѡ̀ глави́зно. Ра́дꙋйсѧ, лѣ́ствице нбⷭ҇наѧ, є҆́юже сни́де бг҃ъ: Ра́дꙋйсѧ, мо́сте, преводѧ́й сꙋ́щихъ ѿ землѝ на нб҃о. Ра́дꙋйсѧ, а҆́гг҃лѡвъ многословꙋ́щее чꙋ́до: Ра́дꙋйсѧ, бѣсѡ́въ многоплаче́вный стрꙋ́пе. Ра́дꙋйсѧ, свѣ́тъ неизрече́ннѡ роди́вшаѧ: Ра́дꙋйсѧ, є҆́же ка́кѡ, ни є҆ди́нагѡ же наꙋчи́вшаѧ. Ра́дꙋйсѧ, премꙋ́дрыхъ превосходѧ́щаѧ ра́зꙋмъ: Ра́дꙋйсѧ, вѣ́рныхъ ѡ҆зарѧ́ющаѧ смы́слы.
Ра́дꙋйсѧ, невѣ́сто неневѣ́стнаѧ.
Конда́къ г҃.
Си́ла вы́шнѧгѡ ѡ҆сѣнѝ тогда̀ къ зача́тїю браконеискꙋ́снꙋю, и҆ бл҃гоплѡ́днаѧ тоѧ̀ ложесна̀, ꙗ҆́кѡ село̀ показа̀ сла́дкое, всѣ̑мъ хотѧ́щымъ жа́ти сп҃се́нїе, внегда̀ пѣ́ти си́це: А҆ллилꙋ́їа.
І҆́косъ г҃.
И҆мꙋ́щи бг҃опрїѧ́тнꙋю дв҃а ᲂу҆тро́бꙋ, востечѐ ко є҆лїсаве́ти: младе́нецъ же ѻ҆́ноѧ а҆́бїе позна́въ сеѧ̀ цѣлова́нїе, ра́довашесѧ, и҆ и҆гра́ньми ꙗ҆́кѡ пѣ́сньми вопїѧ́ше къ бцⷣѣ:
Ра́дꙋйсѧ, ѻ҆́трасли неꙋвѧда́емыѧ розго̀: Ра́дꙋйсѧ, плода̀ безсме́ртнагѡ стѧжа́нїе. Ра́дꙋйсѧ, дѣ́лателѧ дѣ́лающаѧ чл҃вѣколю́бца: Ра́дꙋйсѧ, сади́телѧ жи́зни на́шеѧ ро́ждшаѧ. Ра́дꙋйсѧ, ни́во, растѧ́щаѧ гобзова́нїе щедро́тъ: Ра́дꙋйсѧ, трапе́зо, носѧ́щаѧ ѻ҆би́лїе ѡ҆чище́нїй. Ра́дꙋйсѧ, ꙗ҆́кѡ ра́й пи́щный процвѣта́еши: Ра́дꙋйсѧ, ꙗ҆́кѡ приста́нище дꙋша́мъ гото́виши. Ра́дꙋйсѧ, прїѧ́тное мл҃твы кади́ло: Ра́дꙋйсѧ, всегѡ̀ мі́ра ѡ҆чище́нїе. Ра́дꙋйсѧ, бж҃їе къ смє́ртнымъ бл҃говоле́нїе: Ра́дꙋйсѧ, сме́ртныхъ къ бг҃ꙋ дерзнове́нїе.
Ра́дꙋйсѧ, невѣ́сто неневѣ́стнаѧ.
Конда́къ д҃.
Бꙋ́рю внꙋ́трь и҆мѣ́ѧ помышле́нїй сꙋмни́тельныхъ, цѣломꙋ́дренный і҆ѡ́сифъ смѧте́сѧ, къ тебѣ̀ зрѧ̀ небра́чнѣй, и҆ бракоѡкра́дованнꙋю помышлѧ́ѧ, непоро́чнаѧ: ᲂу҆вѣ́дѣвъ же твоѐ зача́тїе ѿ дх҃а ст҃а, речѐ: А҆ллилꙋ́їа.
І҆́косъ д҃.
Слы́шаша па́стырїе а҆́гг҃лѡвъ пою́щихъ плотско́е хрⷭ҇то́во прише́ствїе, и҆ те́кше ꙗ҆́кѡ къ па́стырю, ви́дѧтъ сего̀ ꙗ҆́кѡ а҆́гнца непоро́чна, во чре́вѣ мр҃і́инѣ ᲂу҆па́сшасѧ, ю҆́же пою́ще рѣ́ша:
Ра́дꙋйсѧ, а҆́гнца и҆ па́стырѧ мт҃и: Ра́дꙋйсѧ, дво́ре слове́сныхъ ѻ҆ве́цъ. Ра́дꙋйсѧ, неви́димыхъ врагѡ́въ мꙋче́нїе: Ра́дꙋйсѧ, ра́йскихъ две́рей ѿверзе́нїе. Ра́дꙋйсѧ, ꙗ҆́кѡ нбⷭ҇наѧ сра́дꙋютсѧ земны̑мъ: Ра́дꙋйсѧ, ꙗ҆́кѡ зємна́ѧ сликовствꙋ́ютъ нбⷭ҇нымъ. Ра́дꙋйсѧ, а҆пⷭ҇лѡвъ немѡ́лчнаѧ ᲂу҆ста̀: Ра́дꙋйсѧ, страстоте́рпцєвъ непобѣди́маѧ де́рзосте. Ра́дꙋйсѧ, тве́рдое вѣ́ры ᲂу҆твержде́нїе: Ра́дꙋйсѧ, свѣ́тлое бл҃года́ти позна́нїе. Ра́дꙋйсѧ, є҆́юже ѡ҆бнажи́сѧ а҆́дъ: Ра́дꙋйсѧ, є҆́юже ѡ҆блеко́хомсѧ сла́вою.
Ра́дꙋйсѧ, невѣ́сто неневѣ́стнаѧ.
Конда́къ є҃.
Бг҃оте́чнꙋю ѕвѣздꙋ̀ ᲂу҆зрѣ́вше волсвѝ, тоѧ̀ послѣ́доваша зарѝ: и҆ ꙗ҆́кѡ свѣти́льникъ держа́ще ю҆̀, то́ю и҆спыта́хꙋ крѣ́пкаго царѧ̀, и҆ дости́гше непостижи́магѡ, возра́довашасѧ є҆мꙋ̀, вопїю́ще: А҆ллилꙋ́їа.
І҆́косъ є҃.
Ви́дѣша ѻ҆́троцы халде́йстїи, на рꙋкꙋ̀ дв҃и́чꙋ созда́вшаго рꙋка́ма человѣ́ки, и҆ влⷣкꙋ разꙋмѣва́юще є҆го̀, а҆́ще и҆ ра́бїй прїѧ́тъ зра́къ, потща́шасѧ дармѝ послꙋжи́ти є҆мꙋ̀, и҆ возопи́ти бл҃гослове́ннѣй:
Ра́дꙋйсѧ, ѕвѣзды̀ незаходи́мыѧ мт҃и: Ра́дꙋйсѧ, зарѐ та́инственнагѡ днѐ. Ра́дꙋйсѧ, пре́лести пе́щь ᲂу҆гаси́вшаѧ: Ра́дꙋйсѧ, трⷪ҇цы таи́нники просвѣща́ющаѧ. Ра́дꙋйсѧ, мꙋчи́телѧ безчеловѣ́чнаго и҆змета́ющаѧ ѿ нача́льства: Ра́дꙋйсѧ, гдⷭ҇а чл҃вѣколю́бца показа́вшаѧ хрⷭ҇та̀. Ра́дꙋйсѧ, ва́рварскагѡ и҆збавлѧ́ющаѧ слꙋже́нїѧ: Ра́дꙋйсѧ, тимѣ́нїѧ и҆з̾има́ющаѧ дѣ́лъ. Ра́дꙋйсѧ, ѻ҆гнѧ̀ поклоне́нїе ᲂу҆гаси́вшаѧ: Ра́дꙋйсѧ, пла́мене страсте́й и҆змѣнѧ́ющаѧ. Ра́дꙋйсѧ, вѣ́рныхъ наста́внице цѣломꙋ́дрїѧ: Ра́дꙋйсѧ, всѣ́хъ родѡ́въ весе́лїе.
Ра́дꙋйсѧ, невѣ́сто неневѣ́стнаѧ.
Конда́къ ѕ҃.
Проповѣ̑дницы бг҃оно́снїи бы́вше волсвѝ, возврати́шасѧ въ вавѷлѡ́нъ, сконча́вше твоѐ прⷪ҇ро́чество: и҆ проповѣ́давше тѧ̀ хрⷭ҇та̀ всѣ̑мъ, ѡ҆ста́виша и҆́рѡда ꙗ҆́кѡ бꙋесло́вѧща, не вѣ́дꙋща пѣ́ти: А҆ллилꙋ́їа.
І҆́косъ ѕ҃.
Возсїѧ́вый во є҆гѵ́птѣ просвѣще́нїе и҆́стины, ѿгна́лъ є҆сѝ лжѝ тьмꙋ̀: і҆́дѡли бо є҆гѡ̀, сп҃се, не терпѧ́ще твоеѧ̀ крѣ́пости, падо́ша. Си́хъ же и҆зба́вльшїисѧ вопїѧ́хꙋ къ бцⷣѣ:
Ра́дꙋйсѧ, и҆справле́нїе человѣ́кѡвъ: Ра́дꙋйсѧ, низпаде́нїе бѣсѡ́въ. Ра́дꙋйсѧ, пре́лести держа́вꙋ попра́вшаѧ: Ра́дꙋйсѧ, і҆́дѡльскꙋю ле́сть ѡ҆бличи́вшаѧ. Ра́дꙋйсѧ, мо́ре, потопи́вшее фараѡ́на мы́сленнаго: Ра́дꙋйсѧ, ка́меню, напои́вшїй жа́ждꙋщыѧ жи́зни. Ра́дꙋйсѧ, ѻ҆́гненный сто́лпе, наставлѧ́ѧй сꙋ́щыѧ во тьмѣ̀: Ра́дꙋйсѧ, покро́ве мі́рꙋ, ши́ршїй ѻ҆́блака. Ра́дꙋйсѧ, пи́ще, ма́нны прїе́мнице: Ра́дꙋйсѧ, сла́дости ст҃ы́ѧ слꙋжи́тельнице. Ра́дꙋйсѧ, землѐ ѡ҆бѣтова́нїѧ: Ра́дꙋйсѧ, и҆з̾ неѧ́же тече́тъ ме́дъ и҆ млеко̀.
Ра́дꙋйсѧ, невѣ́сто неневѣ́стнаѧ.
Конда́къ з҃.
Хотѧ́щꙋ сѷмеѡ́нꙋ ѿ ны́нѣшнѧгѡ вѣ́ка преста́витисѧ преле́стнагѡ, вда́лсѧ є҆сѝ ꙗ҆́кѡ млⷣнцъ томꙋ̀, но позна́лсѧ є҆сѝ є҆мꙋ̀ и҆ бг҃ъ соверше́нный: тѣ́мже ᲂу҆диви́сѧ твое́й неизрече́ннѣй премꙋ́дрости, зовы́й: А҆ллилꙋ́їа.
І҆́косъ з҃.
Но́вꙋю показа̀ тва́рь, ꙗ҆́вльсѧ зижди́тель на́мъ ѿ негѡ̀ бы́вшымъ, и҆з̾ безсѣ́менныѧ прозѧ́бъ ᲂу҆тро́бы, и҆ сохрани́въ ю҆̀, ꙗ҆́коже бѣ̀, нетлѣ́ннꙋ, да чꙋ́до ви́дѧще воспои́мъ ю҆̀, вопїю́ще:
Ра́дꙋйсѧ, цвѣ́те нетлѣ́нїѧ: Ра́дꙋйсѧ, вѣ́нче воздержа́нїѧ. Ра́дꙋйсѧ, воскрⷭ҇нїѧ ѡ҆́бразъ ѡ҆блиста́ющаѧ: Ра́дꙋйсѧ, а҆́гг҃льское житїѐ ꙗ҆влѧ́ющаѧ. Ра́дꙋйсѧ, дре́во свѣтлоплодови́тое, ѿ негѡ́же пита́ютсѧ вѣ́рнїи: Ра́дꙋйсѧ, дре́во бл҃госѣнноли́ственное, и҆́мже покрыва́ютсѧ мно́зи. Ра́дꙋйсѧ, во чре́вѣ носѧ́щаѧ и҆зба́вителѧ плѣнє́ннымъ: Ра́дꙋйсѧ, ро́ждшаѧ наста́вника заблꙋ́ждшымъ. Ра́дꙋйсѧ, сꙋдїѝ првⷣнагѡ ᲂу҆моле́нїе: Ра́дꙋйсѧ, мно́гихъ согрѣше́нїй проще́нїе. Ра́дꙋйсѧ, ѻ҆де́ждо наги́хъ дерзнове́нїѧ: Ра́дꙋйсѧ, любы̀, всѧ́кое жела́нїе побѣжда́ющаѧ.
Ра́дꙋйсѧ, невѣ́сто неневѣ́стнаѧ.
Конда́къ и҃.
Стра́нное ржⷭ҇тво̀ ви́дѣвше, ᲂу҆страни́мсѧ мі́ра, ᲂу҆́мъ на нб҃са̀ прело́жше: сегѡ́ бо ра́ди высо́кїй бг҃ъ, на землѝ ꙗ҆ви́сѧ смире́нный чл҃вѣ́къ, хотѧ́й привлещѝ къ высотѣ̀ томꙋ̀ вопїю́щыѧ: А҆ллилꙋ́їа.
І҆́косъ и҃.
Ве́сь бѣ̀ въ ни́жнихъ, и҆ вы́шнихъ ника́коже ѿстꙋпѝ неѡпи́санное сло́во: снизхожде́нїе бо бжⷭ҇твенное, не прехожде́нїе же мѣ́стное бы́сть, и҆ ржⷭ҇тво̀ ѿ дв҃ы бг҃опрїѧ́тныѧ, слы́шащїѧ сїѧ̑:
Ра́дꙋйсѧ, бг҃а невмѣсти́магѡ вмѣсти́лище: Ра́дꙋйсѧ, чⷭ҇тна́гѡ та́инства двє́ри. Ра́дꙋйсѧ, невѣ́рныхъ сꙋмни́тельное слы́шанїе: Ра́дꙋйсѧ, вѣ́рныхъ и҆звѣ́стнаѧ похвало̀. Ра́дꙋйсѧ, колесни́це прест҃а́ѧ сꙋ́щагѡ на херꙋві́мѣхъ: Ра́дꙋйсѧ, селе́нїе пресла́вное сꙋ́щагѡ на серафі́мѣхъ. Ра́дꙋйсѧ, проти̑внаѧ въ то́жде собра́вшаѧ: Ра́дꙋйсѧ, двⷭ҇тво и҆ ржⷭ҇тво̀ сочета́вшаѧ. Ра́дꙋйсѧ, є҆́юже разрѣши́сѧ престꙋпле́нїе: Ра́дꙋйсѧ, є҆́юже ѿве́рзесѧ ра́й. Ра́дꙋйсѧ, ключꙋ̀ црⷭ҇твїѧ хрⷭ҇то́ва: Ра́дꙋйсѧ, наде́ждо бла̑гъ вѣ́чныхъ.
Ра́дꙋйсѧ, невѣ́сто неневѣ́стнаѧ.
Конда́къ ѳ҃.
Всѧ́кое є҆стество̀ а҆́гг҃льское ᲂу҆диви́сѧ вели́комꙋ твоегѡ̀ вочл҃вѣ́ченїѧ дѣ́лꙋ: непристꙋ́пнаго бо ꙗ҆́кѡ бг҃а, зрѧ́ше всѣ̑мъ пристꙋ́пнаго чл҃вѣ́ка, на́мъ ᲂу҆́бѡ спребыва́юща, слы́шаща же ѿ всѣ́хъ: А҆ллилꙋ́їа.
І҆́косъ ѳ҃.
Вѣті̑ѧ многовѣща̑нныѧ, ꙗ҆́кѡ ры̑бы безгла̑сныѧ ви́димъ ѡ҆ тебѣ̀ бцⷣе: недоꙋмѣва́ютъ бо глаго́лати, є҆́же ка́кѡ и҆ дв҃а пребыва́еши, и҆ роди́ти возмогла̀ є҆сѝ; Мы́ же та́инствꙋ дивѧ́щесѧ, вѣ́рнѡ вопїе́мъ:
Ра́дꙋйсѧ, премⷣрости бж҃їѧ прїѧ́телище: Ра́дꙋйсѧ, промышле́нїѧ є҆гѡ̀ сокро́вище. Ра́дꙋйсѧ, любомꙋ̑дрыѧ немꙋ̑дрыѧ ꙗ҆влѧ́ющаѧ: Ра́дꙋйсѧ, хитрословє́сныѧ безсловє́сныѧ ѡ҆блича́ющаѧ. Ра́дꙋйсѧ, ꙗ҆́кѡ ѡ҆бꙋѧ́ша лю́тїи взыска́телє: Ра́дꙋйсѧ, ꙗ҆́кѡ ᲂу҆вѧдо́ша баснотво́рцы. Ра́дꙋйсѧ, а҆ѳїнє́йскаѧ плетє́нїѧ растерза́ющаѧ: Ра́дꙋйсѧ, ры̑барскїѧ мрє́жи и҆сполнѧ́ющаѧ. Ра́дꙋйсѧ, и҆з̾ глꙋбины̀ невѣ́дѣнїѧ и҆звлача́ющаѧ: Ра́дꙋйсѧ, мнѡ́ги въ ра́зꙋмѣ просвѣща́ющаѧ. Ра́дꙋйсѧ, кораблю̀ хотѧ́щихъ сп҃сти́сѧ: Ра́дꙋйсѧ, приста́нище жите́йскихъ пла́ванїй.
Ра́дꙋйсѧ, невѣ́сто неневѣ́стнаѧ.
Конда́къ і҃.
Сп҃стѝ хотѧ̀ мі́ръ, и҆́же всѣ́хъ ᲂу҆краси́тель, къ семꙋ̀ самоѡбѣтова́нъ прїи́де, и҆ па́стырь сы́й ꙗ҆́кѡ бг҃ъ, на́съ ра́ди ꙗ҆ви́сѧ по на́мъ чл҃вѣ́къ: подо́бнымъ бо подо́бное призва́въ, ꙗ҆́кѡ бг҃ъ слы́шитъ: А҆ллилꙋ́їа.
І҆́косъ і҃.
Стѣна̀ є҆сѝ дѣ́вамъ бцⷣе дв҃о, и҆ всѣ̑мъ къ тебѣ̀ прибѣга́ющымъ: и҆́бо нб҃сѐ и҆ землѝ творе́цъ ᲂу҆стро́и тѧ̀ пречⷭ҇таѧ, все́льсѧ во ᲂу҆тро́бѣ твое́й, и҆ всѧ̑ приглаша́ти тебѣ̀ наꙋчи́въ:
Ра́дꙋйсѧ, сто́лпе двⷭ҇тва: Ра́дꙋйсѧ, две́рь сп҃се́нїѧ. Ра́дꙋйсѧ, нача́льнице мы́сленнагѡ назда́нїѧ: Ра́дꙋйсѧ, пода́тельнице бжⷭ҇твенныѧ бл҃гости. Ра́дꙋйсѧ, ты́ бо ѡ҆бнови́ла є҆сѝ зача̑тыѧ стꙋ́днѡ: Ра́дꙋйсѧ, ты́ бо наказа́ла є҆сѝ ѡ҆кра́дєнныѧ ᲂу҆мо́мъ. Ра́дꙋйсѧ, тли́телѧ смы́слѡвъ ᲂу҆пражднѧ́ющаѧ: Ра́дꙋйсѧ, сѣ́ѧтелѧ чⷭ҇тоты̀ ро́ждшаѧ. Ра́дꙋйсѧ, черто́же безсѣ́меннагѡ ᲂу҆невѣ́щенїѧ: Ра́дꙋйсѧ, вѣ́рныхъ гдⷭ҇еви сочета́вшаѧ. Ра́дꙋйсѧ, до́браѧ младопита́тельнице дѣ́вамъ: Ра́дꙋйсѧ, невѣстокраси́тельнице дꙋ́шъ ст҃ы́хъ.
Ра́дꙋйсѧ, невѣ́сто неневѣ́стнаѧ.
Конда́къ а҃і.
Пѣ́нїе всѧ́кое побѣжда́етсѧ, спростре́тисѧ тща́щеесѧ ко мно́жествꙋ мно́гихъ щедро́тъ твои́хъ: равночи́слєнныѧ бо песка̀ пѣ̑сни а҆́ще прино́симъ тѝ цр҃ю̀ ст҃ы́й, ничто́же соверша́емъ досто́йно, ꙗ҆̀же да́лъ є҆сѝ на́мъ тебѣ̀ вопїю́щымъ: А҆ллилꙋ́їа.
І҆́косъ а҃і.
Свѣтопрїе́мнꙋю свѣщꙋ̀, сꙋ́щымъ во тьмѣ̀ ꙗ҆́вльшꙋюсѧ, зри́мъ ст҃ꙋ́ю дв҃ꙋ: невеще́ственный бо вжига́ющи ѻ҆́гнь, наставлѧ́етъ къ ра́зꙋмꙋ бжⷭ҇твенномꙋ всѧ̑, заре́ю ᲂу҆́мъ просвѣща́ющаѧ, зва́нїемъ же почита́емаѧ, си́ми:
Ра́дꙋйсѧ, лꙋчѐ ᲂу҆́мнагѡ сл҃нца: Ра́дꙋйсѧ, свѣти́ло незаходи́магѡ свѣ́та. Ра́дꙋйсѧ, мо́лнїе, дꙋ́шы просвѣща́ющаѧ: Ра́дꙋйсѧ, ꙗ҆́кѡ гро́мъ врагѝ ᲂу҆страша́ющаѧ. Ра́дꙋйсѧ, ꙗ҆́кѡ многосвѣ́тлое возсїѧва́еши просвѣще́нїе: Ра́дꙋйсѧ, ꙗ҆́кѡ многотекꙋ́щꙋю и҆сточа́еши рѣкꙋ̀. Ра́дꙋйсѧ, кꙋпѣ́ли живописꙋ́ющаѧ ѡ҆́бразъ: Ра́дꙋйсѧ, грѣхо́внꙋю ѿе́млющаѧ скве́рнꙋ. Ра́дꙋйсѧ, ба́не, ѡ҆мыва́ющаѧ со́вѣсть: Ра́дꙋйсѧ, ча́ше, че́рплющаѧ ра́дость. Ра́дꙋйсѧ, ѡ҆бонѧ́нїе хрⷭ҇то́ва бл҃гоꙋха́нїѧ: Ра́дꙋйсѧ, животѐ та́йнагѡ весе́лїѧ.
Ра́дꙋйсѧ, невѣ́сто неневѣ́стнаѧ.
Конда́къ в҃і.
Бл҃года́ть да́ти восхотѣ́въ долгѡ́въ дре́внихъ, всѣ́хъ долгѡ́въ рѣши́тель человѣ́кѡмъ, прїи́де собо́ю ко ѿше́дшымъ тогѡ̀ бл҃года́ти, и҆ раздра́въ рꙋкописа́нїе, слы́шитъ ѿ всѣ́хъ си́це: А҆ллилꙋ́їа.
І҆́косъ в҃і.
Пою́ще твоѐ ржⷭ҇тво̀, хва́лимъ тѧ̀ всѝ, ꙗ҆́кѡ ѡ҆дꙋшевле́нный хра́мъ бцⷣе: во твое́й бо всели́всѧ ᲂу҆тро́бѣ, содержа́й всѧ̑ рꙋко́ю гдⷭ҇ь, ѡ҆ст҃ѝ, просла́ви, и҆ наꙋчѝ вопи́ти тебѣ̀ всѣ́хъ:
Ра́дꙋйсѧ, селе́нїе бг҃а и҆ сло́ва: Ра́дꙋйсѧ, ст҃а́ѧ ст҃ы́хъ бо́льшаѧ. Ра́дꙋйсѧ, ковче́же позлаще́нный дх҃омъ: Ра́дꙋйсѧ, сокро́вище живота̀ неистощи́мое. Ра́дꙋйсѧ, чⷭ҇тны́й вѣ́нче царе́й бл҃гочести́выхъ: Ра́дꙋйсѧ, чⷭ҇тна́ѧ похвало̀ і҆ере́євъ бл҃гоговѣ́йныхъ. Ра́дꙋйсѧ, цр҃кве непоколеби́мый сто́лпе: Ра́дꙋйсѧ, ца́рствїѧ нерꙋши́маѧ стѣно̀. Ра́дꙋйсѧ, є҆́юже воздви́жꙋтсѧ побѣ̑ды: Ра́дꙋйсѧ, є҆́юже низпа́даютъ вразѝ. Ра́дꙋйсѧ, тѣ́ла моегѡ̀ врачева́нїе: Ра́дꙋйсѧ, дꙋшѝ моеѧ̀ сп҃се́нїе.
Ра́дꙋйсѧ, невѣ́сто неневѣ́стнаѧ.
Конда́къ г҃і.
Ѽ всепѣ́таѧ мт҃и, ро́ждшаѧ всѣ́хъ ст҃ы́хъ ст҃ѣ́йшее сло́во, ны́нѣшнее прїе́мши приноше́нїе, ѿ всѧ́кїѧ и҆зба́ви напа́сти всѣ́хъ, и҆ бꙋ́дꙋщїѧ и҆змѝ мꙋ́ки, ѡ҆ тебѣ̀ вопїю́щихъ: А҆ллилꙋ́їа, а҆ллилꙋ́їа, а҆ллилꙋ́їа.
Се́й конда́къ глаго́ли три́жды. И҆ па́ки чте́тсѧ а҃-й і҆́косъ: А҆́гг҃лъ предста́тель: и҆ па́ки а҃-й конда́къ: Взбра́нной воево́дѣ:
Мл҃тва ко прест҃ѣ́й бцⷣѣ:
Прїимѝ, всебл҃гомо́щнаѧ, пречтⷭ҇аѧ гпⷭ҇жѐ, влⷣчце бг҃ороди́тельнице, сїѧ̑ честны̑ѧ да́ры, тебѣ̀ є҆ди́нѣй прикла̑дныѧ, ѿ на́съ недосто́йныхъ рабѡ́въ твои́хъ, ѿ всѣ́хъ родѡ́въ и҆збра́ннаѧ, всѣ́хъ тва́рей нбⷭ҇ныхъ и҆ земны́хъ вы́шшаѧ ꙗ҆́вльшаѧсѧ. Поне́же бо тебє̀ ра́ди бы́сть гдⷭ҇и си́лъ съ на́ми, и҆ тобо́ю сн҃а бж҃їѧ позна́хомъ, и҆ сподо́бихомсѧ ст҃а́гѡ тѣ́ла є҆гѡ̀ и҆ пречтⷭ҇ыѧ кро́ве є҆гѡ̀. Тѣ́мже бл҃же́нна є҆сѝ въ ро́дѣхъ родѡ́въ, бг҃обл҃же́ннаѧ, херꙋві́мѡвъ свѣтлѣ́йши и҆ серафі́мѡвъ чтⷭ҇нѣ́йши сꙋ́щаѧ. И҆ ны́нѣ, всепѣ́таѧ прест҃а́ѧ бцⷣе, не преста́й молѧ́щисѧ ѡ҆ на́съ недосто́йныхъ рабѣ́хъ твои́хъ, є҆́же и҆зба́витисѧ на́мъ ѿ всѧ́кагѡ совѣ́та лꙋка́вагѡ и҆ ѿ всѧ́кагѡ ѡ҆бстоѧ́нїѧ, и҆ сохрани́тисѧ на́мъ невреждє́нымъ ѿ всѧ́кагѡ ꙗ҆дови́тагѡ прило́га дїа́вольскагѡ. Но да́же до конца̀ мл҃твами твои́ми неѡсꙋжде́нныхъ на́съ соблюдѝ: ꙗ҆́кѡ да твои́мъ застꙋпле́нїемъ и҆ по́мощїю сп҃са́еми, сла́вꙋ, хвалꙋ̀, бл҃годаре́нїе и҆ поклоне́нїе за всѧ̑ въ трⷪ҇цѣ є҆ди́номꙋ бг҃ꙋ и҆ всѣ́хъ созда́телю возсыла́емъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.
Мл҃тва в҃ ко прест҃ѣ́й бцⷣѣ:
Ѽ прест҃а́ѧ гпⷭ҇жѐ влⷣчце бцⷣе! Вы́шши є҆сѝ всѣ́хъ а҆́гг҃лъ и҆ а҆рха̑гг҃лъ, и҆ всеѧ̀ тва́ри чⷭ҇тнѣ́йши, помо́щница є҆сѝ ѡ҆би́димыхъ, ненадѣ́ющихсѧ надѣ́ѧнїе, ᲂу҆бо́гихъ застꙋ́пница, печа́льныхъ ᲂу҆тѣше́нїе, а҆́лчꙋщихъ корми́тельница, наги́хъ ѡ҆дѣѧ́нїе, больны́хъ и҆сцѣле́нїе, грѣ́шныхъ сп҃се́нїе, хрⷭ҇тїа́нъ всѣ́хъ поможе́нїе и҆ застꙋпле́нїе. Ѽ всемлⷭ҇тиваѧ гпⷭ҇жѐ, дв҃о бцⷣе влⷣчце! Млⷭ҇тїю твое́ю сп҃сѝ и҆ поми́лꙋй ст҃ѣ́йшыѧ патрїа́рхи правосла̑вныѧ, преѡсщ҃є́нныѧ митрополі́ты, а҆рхїепⷭ҇кпы и҆ є҆пⷭ҇кпы, и҆ ве́сь сщ҃е́нническїй и҆ и҆́ноческїй чи́нъ, и҆ всѧ̑ правосла̑вныѧ хрⷭ҇тїа́ны ри́зою твое́ю чⷭ҇тно́ю защитѝ: и҆ ᲂу҆молѝ, гпⷭ҇жѐ, и҆з̾ тебє̀ без̾ сѣ́мене воплоти́вшагосѧ хрⷭ҇та̀ бг҃а на́шего, да препоѧ́шетъ на́съ си́лою свое́ю свы́ше на неви̑димыѧ и҆ ви̑димыѧ врагѝ на́шѧ. Ѽ всемлⷭ҇тиваѧ гпⷭ҇жѐ влⷣчце бцⷣе, воздви́гни на́съ и҆з̾ глꙋбины̀ грѣхо́вныѧ, и҆ и҆зба́ви на́съ ѿ гла́да, гꙋби́тельства, ѿ трꙋ́са и҆ пото́па, ѿ ѻ҆гнѧ̀ и҆ меча̀, ѿ нахожде́нїѧ и҆ноплеме́нныхъ и҆ междоꙋсо́бныѧ бра́ни, и҆ ѿ напра́сныѧ сме́рти, и҆ ѿ нападе́нїѧ вра́жїѧ, и҆ ѿ тлетво́рныхъ вѣ̑тръ, и҆ ѿ смертоно́сныѧ ꙗ҆́звы, и҆ ѿ всѧ́кагѡ ѕла̀. Пода́ждь, гпⷭ҇жѐ, ми́ръ и҆ здра́вїе рабѡ́мъ твои̑мъ, всѣ̑мъ правосла̑внымъ хрⷭ҇тїа́нѡмъ, и҆ просвѣтѝ и҆̀мъ ᲂу҆́мъ и҆ ѻ҆́чи сердє́чныѧ, є҆́же ко спасе́нїю: и҆ сподо́би ны̀ грѣ̑шныѧ рабы̑ твоѧ̑, црⷭ҇твїѧ сн҃а твоегѡ̀, хрⷭ҇та̀ бг҃а на́шегѡ: ꙗ҆́кѡ держа́ва є҆гѡ̀ бл҃гослове́на и҆ препросла́влена, со безнача́льнымъ є҆гѡ̀ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ є҆гѡ̀ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.