Тывам сенде (Ооржак Аржаан)
Тывам сенде
Базарга көк, эдерге хек,
Базым санай эртинелер,
Көжээ даштар, бижимелдер,
Көжүп-шуушкан хоор малы,
Уран-чараш ыдык черим,
Урянхаайым - Тывам сенде!
Аңныг-меңниг тайгалары,
Аңгыр куштуг хөлдери-даа,
Талыгырже чапты берген,
Тарааларлыг ховулар-даа,
Угулзалаан ыдык черим,
Урянхаайым - Тывам сенде!
Хөөмей-сыгыт чаңгыланып,
Хөгжүм үнген алыс дөзү,
Хөрек сыңмас каргырааның,
Хөйже үнген чуртту болур,
Уянзынган ыдык черим,
Урянхаайым - Тывам сенде!
Алдын-мөңгүн кедип алган,
Алдай-Саян ээлери боор,
Бурунгу мээң өгбелерим,
Бурганчыткан адаларым,
Улуг-чаагай ыдык черим,
Урянхаайым - Тывам сенде!
Мөчек-мөчек шыңганнарлыг,
Мөге-шыырак сайын эрлер,
Даңның чырык херели дег,
Даңгыналар, чараш кыстар,
Уям болган ыдык черим,
Урянхаайым - Тывам сенде!
Кызыл
2013
2013