Тӧлӧй, тӧлӧй

by Чупров Яков Иванович

Тӧлӧй, тӧлӧй, муса тӧлӧй,
Шоныд, небыд, югыд тӧлӧй,
Зарни, юмов, чӧскыд тӧлӧй!
Кыті ветлан?
Кытчӧ волан?
Ассьыд нэмтӧ кытчӧ колян?
Кӧні гортыд, кытӧн олан?
Овлӧ тӧвтӧм,
Сэки кытчӧ эськӧ вошлан?
Овлӧ кӧдзыд,
Сэки кутшӧм кышан кышлан?

«Кытӧн мольыд,
Кытӧн вольыд,
Кытӧн сьӧлӧмыдлы долыд,
Сэтӧн ме и ола.
Кытӧн кокньыд ветлӧ лолыд,
Быдлаӧ ме вола:
Муяс вылӧ,
Юяс вылӧ,
Кытысь сьӧлӧм меным кылӧ,
Кытӧн лэбач сӧмын сьылӧ,
Ылӧ-ылӧ саридз сайӧ —
Кытысь еджыд ру век кайӧ».

Ветлін ывті,
Юяс йывті,
Юяс йывті,
Муяс вывті,
Ёна уна быдтор тӧдан,
Нӧшта уна тӧдны мӧдан,
Висьтав меным,
Кӧні овны сэтшӧм долыд,
Кӧні кокньыд ветлӧ лолыд?

«Овны сэтӧн босьтӧ гаж,
Кытӧн олӧм абу важ,
Овны сэтӧн меным долыд,
Кытӧн овны ме ог мудз.
Кокньыд сэтӧн ветлӧ лолыд,
Кытӧн вӧчны выйим удж.
Мыйкӧ кӧть да век ме вӧча:
Джуджыд тола тӧлын тэча,
Верма лэдзны уна лым,
Верма вайны ыджыд гым;
Тьӧскӧн вевт выв лёкысь нӧйта,
Либӧ мортӧс ваӧ вӧйта,
Либӧ мыйкӧ мукӧдтор;
Арын бадьлысь,
Либӧ кыдзлысь
Лета кор.
Либӧ поводдясӧ вежа —
Лунсянь асыв-войӧ кежа;
Либӧ лета турун йыв,
Либӧ лэбачлысь бордтыв;
Либӧ мортӧс
Саридз сайӧ йӧрта,
Либӧ мыйкӧ кыськӧ берта;
Либӧ гыӧн кыркӧтш дорӧ варта,
Либӧ изки бордъяс гарта,
Либӧ пыжа дорӧ лэчча,
Парус бӧрысь ӧдйӧ вӧтча,
Либӧ саридзвывса гыкӧд
Топта кутчысьла да ворса;
Либӧ звер моз лёкысь горза,
Либӧ йики идйысь шердъя;
Либӧ нораа зэв бӧрда,
Кодыр бӧрдӧм кыськӧ кыла;
Либӧ сьыла, шутьляла, ог пов
Сӧмын некор весь ог ов.
Сійӧн кокньыд ветлӧ лов».