Чăтăрлăсем

by Çитăр Ехримĕ

Пулки Петра хĕрĕ
Ашшĕпе кайнă тăм илме.
Тăм шăтăкне кĕне те –
Тăм ишĕлсе аннă та,
Тăм айне пулнă:
«Чăтăрлă тăвĕ – çÿл(л)ĕ ту,
Анатарах çырлă ту.

Тăм шăтăкне кĕтĕм те –
Ишĕлнĕ анчĕ çурри ту.
Шурă тăман шăтăкне
Мĕншĕн кĕрес ун ăшне?
Пĕр вилĕмрен хăтăлтăн,
Сыхлан ĕнтĕ малашне.
Тăм шăтăкне кĕтĕн те
Тухаймарăн çаврăнса.
Таврăн ĕнтĕ савăнса.
Тăм айне пултăн та,
Алтрĕç пилĕк çынпала.
Шухăшламанччĕ сывă тесе,
Сикрĕм тăтăм чунпала.
Таврăн ĕнтĕ çулпала…»

Таврăннă чухне
Юрă юрласа таврăннă:
«Шыв хĕрринче хурлăхан
Пиçет айĕ шурлăхран.
Пĕр турă та пĕр ырă çын
Хăтарчĕç мана хурлăхран.
Утçăм утать, юртать юр çинчен,
Йĕрри юлать çĕр çинче.
Тавтапуç пĕр турра,
Çамрăк пуçăм çын çинче».

1910 ç. тĕлĕ