Шонді петігӧн дзоридз косьмис

by Нёбдінса Виттор

Йӧз:

СОПРОН ВАСЬКА — олӧма морт, гӧль крестьянин.

ПЕКЛА — сылӧн гӧтыр.

ИВАН — налӧн пи.

МАРПА — налӧн суседка.

УРАДНИК.

СОТСКӦЙ.

ПИЛЯ, Арсень, Анна — суседъяс Сопрон Васькалӧн.

МИКОЛ — висьысь.

ЙӦЗ: мужикъяс, нывбабаяс, нывъяс, зонъяс, челядь.

МЕДВОДДЗА ВӦЧӦМ

Вӧчсьӧ Сопрон Васька ордын. Прӧстӧй керка, веськыда — ӧдзӧс посводзӧ; шуйгавылас — пызан, гӧгӧр лабич, кык ӧшинь, веськыдвылас — пач. Тӧвся рыт.

1-ой петкӧдчӧм

Занавес восьтігӧн Васька дӧмлӧ тюни. Пекла печкӧ. Иван пызан сайын лыддьысьӧ.

ИВАН (лыддьӧ нюжйӧдлӧмӧн). Крес-тья-нин па-шет, окотник с-стре-ля-ет, пе-тук по-ёт, с-сес-тра плачет, брат гу-гу-ля-ет... (Юрсӧ лэптӧ.) Мам!.. Кылан? Мамӧ! Кор нӧ ме велала?

ПЕКЛА. Ог тӧд, сёшайтӧй... Он кӧ дышӧдчы, регыд велалан. Лыддьы, дитя, лыддьы...

ИВАН. Мам! Кор ме велала да ыджыда быдма, сэки менӧ лэдзанныд Гриша дінад?

ПЕКЛА. Ог тӧд, зарни пиӧй, — кыдзи ен шуас.

ИВАН. Гришаыд нӧ дыр-ӧ велӧдчис, мам? Сійӧ, кӧнкӧ, рочнад ёна тӧдӧ?

ПЕКЛА. Дерт, тӧдӧ: квайтӧд во нин со роч муын ветлӧ да. (Шогпыр.) Нинӧм нин ӧні оз кывсьы, кӧні мый и ветлӧ, коньӧрӧй.

ИВАН. Мыйла нӧ эськӧ лэдзинныд, мед гортын оліс.

ВАСЬКА. Оз тай ков лэдзӧм, ачыс пышйис.

ИВАН. Пышйис? Бать-мам дінысь?

ВАСЬКА. Оз тай ӧнія пияныд зэв видзӧдны бать-мамыд вылӧ. Мый думыштасны, сійӧс и вӧчӧны.

ПЕКЛА. Эн шу прӧстӧ: миян Гришукыд абу на кывтӧм пемӧс, нинӧм на эг аддзылӧ сысянь лёксӧ.

ВАСЬКА. А мый бурсӧ аддзылім? Кос нинӧм на эз вӧв, да оз и ло. Наперво тай велӧдӧмыс сувтіс меным шайт сё кымынӧ-а.

ПЕКЛА. Велӧдӧмыд оз на вош.

ИВАН. Дыр-ӧ нӧ, мам, Гришаыд велӧдчис?

ПЕКЛА. Сійӧ ӧд кык школаын велӧдчис, во квайт кымын, буракӧ.

ИВАН. Квайт во!? Меным нӧ квайтӧс жӧ лоӧ?

ВАСЬКА. Тырмас! Велӧдім нин тай со ӧтикӧс, — мый сэтысь пӧльзаыс... Паськӧм кисьтӧм кындзи, бара, некутшӧм пӧльза абу. Урадникӧдз он жӧ во-а.

ПЕКЛА. Гашкӧ, коркӧ отсалас на да.

ВАСЬКА. Ок, отсавсьӧма нин сы помысь. Квайт во со кӧнкӧ ветлӧ да, квайт шайт эз на мӧдӧдлы, нинӧм и водзӧ виччысьны.

ПЕКЛА. Ен кӧ видзас, отсалас на. Мам-батьсӧ оз на Гришукыд вунӧд. (Синъяссӧ чышкӧ, нора.) Кӧні бара, коньӧрӧй, ветлӧ-а. Гашкӧ, война вылӧ нин нуисны да?

ИВАН. Бать, тэ мӧдысь ещӧ на вай заводсьыд меным азбукатӧ, сэтшӧмӧс жӧ, кӧні тай гижӧма: Андель, Бура, Воздух, Гора, Дева, Ева, — тӧдан?

ВАСЬКА. Вокыдлысь кор, сылӧн ӧд бура уна эм книгаясыд.

ПЕКЛА. Иван! Ылалін тай сёрнинад. Велӧд, дитя, уроктӧ, эн дышӧдчы. Лыддьы, лыддьы зільджыка!

ИВАН (тільӧ синъяссӧ). Аттӧ, делӧ жӧ нин тайӧ лыддьыны... кор нӧ ме велала прамӧясӧ? (Лыддьӧ.) Крестьянин пашет, окотник стреляет, петук поёт, сестра плачет, брат гуляет... (Лэптӧ юрсӧ.) Мам, тӧдан, миян школаын эм ӧти роч учитель, средньӧйясӧс велӧдӧ, сійӧ пыр миян учительницалысь юасьӧ, кыдзи пӧ лоӧ комиӧн «лошадь» да «баня», либӧ мыйкӧ мӧдтор. Мыйла нӧ, мамӧ, сійӧ юалӧ?

ПЕКЛА. Ме бара ог тӧд... Лыддьы, лыддьы, дышӧдчыны тай кутін тэ.

ИВАН. Ме думысь кӧ, со мый понда сійӧ юасьӧ: ачыс роч, коминад оз куж, а школьникъясыдлы мыйкӧ кӧнкӧ кӧсйӧ висьтавны. Мыйкӧ тай пыр ӧдзӧс ичӧтика восьтыштас, юрсӧ мыччас дай юалас: «Как пӧ будет по зырянскому лошадь?» Ме со ӧні сідз жӧ лыддя дай думайта, мый, мися, тайӧ лоӧ (видзӧдӧ гижӧдӧ). Крестьянин пашет... Пашетыс вӧд гӧрӧм? Крестьянин гӧрӧ... А кыдз нӧ лоӧ крестьяниныс?

ПЕКЛА. Му пасьта, дитя, ставыс крестьянин. Коді кристослы юрбитӧ, сійӧ и крестьянин.

ИВАН. Сідзкӧ нӧ ме крестьянин жӧ, мамӧ? Ме тай нӧ эськӧ ог куж гӧрныыд.

ПЕКЛА. Тэ, дитя, абу на сполнӧй крестьянин, сӧмын крестьянин пи на.

ИВАН. Со мый вӧлӧма. (Лыддьӧ.) Окотник стреляет. Тайӧ нӧ мый лоӧ, мамӧ?

ПЕКЛА. Стреляет — лыйсьӧ. Окотник лыйсьӧ пищальысь. Тӧдан, кыдзи Ӧсип чожыд лыйсьӧ... Тэ, дитя, батьыдлысь юав, сійӧ бӧльӧ тӧдӧ.

ИВАН. Батьӧ, «окотник стреляетыс» збыльысь лоӧ чожӧлӧн пищальысь лыйсьӧм? Кылан, бать, висьтав...

ВАСЬКА. Ачыд велӧд. Ме кӧ кута велӧдны, оз и школаад ков ветлыны тэныд.

ИВАН. Мам! Оз висьтав батьӧыд да. Мыйкӧ тай зэв скӧр.

ПЕКЛА. Сійӧ ӧд пыр на татшӧм вӧвлі: ӧти кыв весиг некор оз висьтав... Сьӧкыд жӧ, тыдалӧ, коми йӧзыдлы велӧдчыны. Гришукыд тай этша и бӧрдліс-а. Тэ моз жӧ вӧлі лыддяс, лыддяс да тінь, сідзи и бӧрддзас, коньӧрӧй: нинӧм тай нӧ, шуас, мамӧ, ог гӧгӧрво. Ме эськӧ том дырйи этша рочнад кужлі жӧ да, вунӧма нин ставыс-а. Коркӧ ӧд ме Перымын овлі слугаын, важӧн нин сылы, гашкӧ, во кызь вит кымын нин да...

ВАСЬКА. Тайӧс кӧ нӧ он тӧд, мый нин сэсся велӧдчӧмсьыд, колӧ ставсӧ шыбитны.

ИВАН. Тэныд, дерт, лӧсьыд шуныыд, рочнад кужан да. Ме кӧ тэ ыджда вӧлі, гашкӧ, мастерджык на эськӧ тэ дорысь вӧлі да.

ВАСЬКА. Миянӧс тай эз ковлыв велӧдӧм школаясын, асьным велавлім.

ИВАН. Ок, ещӧ и асьныд дай! Школатӧг? Эн на ылӧдлы...

ПЕКЛА. Батьыд эськӧ, пиӧ, некӧн абу велӧдчывлӧма да, салдатӧ ветлігӧн да заводын уджалігӧн и велавлӧма рочнад.

ИВАН. Мам! Сідзкӧ, лэдз менӧ Гриша дінӧ. Сійӧ пӧ, кӧнкӧ, шуанныд, заводын жӧ олӧ да?

ПЕКЛА. Дзик жӧ на тэ кычи вежӧра. Сьӧкыд ӧд, дитяӧй, заводад уджавнытӧ.

ИВАН. Гриша тай нӧ эськӧ уджалӧ жӧ...

ПЕКЛА. Гришукыд ӧд, кӧнкӧ, гижысьын, сылы кокньыдджык...

ИВАН. Ме тшӧтш сыкӧд кута гижны.

ВАСЬКА. Дерт, коркӧ кутан гижны: перӧ ручканад кӧ он велав, пила ручканад век жӧ нин гижан...

ПЕКЛА. Ланьт, Васька. Колӧ жӧ кӧть неуна пиян дорыд думыштлыны: кыдз-мый верман колӧ олӧмсӧ налысь кокньӧдыштны... Ачыд ӧд тӧдан, кутшӧм миян олӧмыд, век ӧтарӧ удж мыджам, лун и вой он тӧдлы шойччӧг.

ВАСЬКА. Шойччӧг? Со тай Гришаыд шойччӧдӧ, мый нӧ сэсся колӧ? Велӧдім, нинӧм шуны, бур вылӧ да кокни олӧм вылӧ... Сы помысь, мися, прамӧй морт оз нин ло.

ПЕКЛА. Он на ӧд тӧд, ме шуа, мый лоӧ водзӧ. Гришукыд тай ачыс казяліс, кутшӧм омӧль миян олӧмыд, сы понда ӧд и пышйис, кӧнкӧ, коньӧр, кокни удж корсьны...

ИВАН. Мам! Вай водзӧ велӧдам. (Лыддьӧ.) Петук поёт. Тайӧ лоӧ петук сьылӧ, сідзи ӧд, мамӧ?

ПЕКЛА. Сідзи, петук сьылӧ, либӧ чуксасьӧ.

ИВАН (лыддьӧ). Сестра плачет, чой бӧрдӧ?..

ПЕКЛА. Сідзи, дитя, сідзи.

ИВАН. Мам, менам ӧд чойӧй абу?

ПЕКЛА. Абу, дитя... Водзӧ, водзӧ лыддьы!

ИВАН. Мыйла нӧ эськӧ Мишук Павеллӧн эм, либӧ Опонь Васька Сенялӧн куим чой?

ПЕКЛА. Ен сетӧма да и эм.

ИВАН. Мыйла нӧ сідзкӧ енмыс оз ӧткодя быдӧнлы сет?

ПЕКЛА. Дугды сёрнинад! Велӧд уроктӧ...

ИВАН (лыддьӧ). Брат гуляет...

ВАСЬКА. Гуляет тай! Квайтӧд во нин гуляет.

ИВАН. Энлы тэ торклы. Брат — сійӧ вок. «Гуляет»-ыс нӧ заводӧ ветлӧм, али мый?..

ВАСЬКА. Кӧть кытчӧ, ӧткодь. Нинӧм кӧ керны — гуляет; сы помысь уджыд водзӧ оз нин мун. Сэки толькӧ гуляй-валяй...

ПЕКЛА. Ме тай со шуа, мися, кокни уджысь некод оз пышйы. Гришукыд кӧ пышйис, ме чайта да, сылы сьӧлӧмӧдзыс жӧ мӧрччис заводскӧй чуркаыд...

ВАСЬКА. Буретша. Эз на сылӧн зэв оръясьны сӧнъясыс, кӧть и заводас на да... Аснырнас босьтіс да и пышйис. Кысь нин нӧ велӧдчӧм мортлы пес керавны? Налы мед эськӧ самӧвар дінын пукавны да тшай юны. Прӧста ӧд оз шуны: «Чай пить пӧ не дрова рубить...»

ИВАН. Кыдз нӧ, бать, Гришаыд пышйис?..

ВАСЬКА. Кыдз пышйис! Кокнас.

ИВАН. Мыйла нӧ эськӧ эн кут!

ВАСЬКА. Ку-ут! Эг тай тӧдлы, ладнӧ, сёрӧн нин кватитчи... Суи кӧ эськӧ, петкӧдлі жӧ сэки сылы пышйӧм, трасичалы!.. (Кылӧ гольӧдчӧм.)

ПЕКЛА. Кодкӧ, кылӧ, локтӧ? (Петӧ.)

2-ӧд петкӧдчӧм

ИВАН (лыддьӧ). Крестьянин пашет, окотник стреляет, петук поёт, сестра плачет, брат гуляет, солдат трубит, лошадь скачет... Он и велавлы...

ВАСЬКА. Он кӧ ӧд, некод на оз невӧлит, гӧр помад ӧд оз на ков ыджыд грамота... Некутшӧм пӧльза жӧ ӧд абу велӧдчӧмсьыд... Мун да вод лучшӧ!

3-ӧд петкӧдчӧм

Пекла пырӧ Марпакӧд, сійӧ печкана.

МАРПА (пыригмоз). Лэдз, Васька дядь, рытйысьны.

ВАСЬКА. Лок, Марпа, тӧран ӧд керкаас.

МАРПА (пуксьӧ лабичӧ). Пышйыны лои гортысь: миян веськыд Содом-кар.

ПЕКЛА. Мыйкӧ тай нӧ, Марпа, зэв шоча миянӧс видлавлан?

МАРПА. Некор ӧд, Пекла тьӧт, дзик некор: юр вылысь уджным унджык. (Заводитӧны печкыны.)

ВАСЬКА. Батьныд нӧ мый нин керӧ, Марпа?

МАРПА. Мыйкӧ тай рытывбыд камгӧ-а, ме ог тӧд, мый и вӧчӧ. Джодж шӧрӧ додь пыртіс да мыйкӧ сы дінын век ӧтарӧ ковгӧ, пельяс дзикӧдз сьӧдмисны.

ИВАН (очсалӧ). Мам, ме урокӧс кужа нин...

ПЕКЛА. Лыддьы на ещӧ, водз на водныыд талун.

ИВАН (очсалӧ). Мам, батьӧ водны жӧ нин тшӧктӧ. Тырмас нин талун кежлӧ сэсся...

МАРПА (Иванлы). Эн дышӧдчы, Ванюк, зіля велӧдчы. Велӧдчӧм миянлы, пемыд коми йӧзлы, зэв колантор. (Матыстчӧ.) Мый нӧ велӧдан?..

ИВАН (индӧ). Со тай: «крестьянин пашетсӧ».

ВАСЬКА. Помтӧг тай пыр дольӧ ӧтарӧ «крестьянин пашет».

МАРПА. Велӧдчы, пиӧй, бура да зіля; быдман да ковмас быдтор тӧдны. Велӧдчытӧм мортыд ӧд дзик синтӧм кодь: письмӧтор оз куж гижны ни, лыддьыны ни. Прӧста ӧд оз шусьы: «Ученье пӧ свет, а неученье — тьма». Миян ногӧн кӧ: «Велӧдчӧмыд пӧ югыд, велӧдчытӧмыд пемыд». Сійӧ сідзи и эм...

ВАСЬКА. Югыд, дерт. Со тай миян Гриша кӧнкӧ квайтӧд во нин югъялӧ.

МАРПА. Мыйкӧ нӧ кывсьӧ оз? Письмӧяссӧ нӧ ыстылӧ жӧ?

ВАСЬКА. Эгӧ на аддзывлӧ. Вошӧм морт миян сійӧ, сэсся нинӧм.

МАРПА (бокӧ). Висьтавны абу-а?.. (Пеклалы гусьӧн.) Гришасянь письмӧ тэныд эм.

ПЕКЛА (повзигмоз). Чӧ-ӧв?.. Сьӧлӧмшӧрӧй... (Синъяссӧ чышкӧ.)

МАРПА (сідз жӧ). Позьӧ оз Васька дядь дырйи лыддьыны?

ПЕКЛА. Кодлы нӧ гижӧ?

МАРПА. Тэнад ним вылӧ.

ПЕКЛА. Лыддьы. Часлы жӧ, мед Иван водас.

ВАСЬКА. Мый нин нӧ ті сэні вашкӧдчанныд?

МАРПА (гораа). Мый вашкӧдчам? Сідзи... Ме талун вичко дорӧ ветлі да бура унатор и кывлі; Пекла тьӧтлы со сэсся и висьтала.

ПЕКЛА (Иванлы). Мун нӧ, дитя, вод, аски водзджык чеччан да велӧдан уроктӧ. (Иван пачводз дорӧ мунӧ да водӧ.)

ВАСЬКА (Марпалы). Мыйкӧ нӧ война йывсьыс кывсьӧ оз? Апония нӧ оз на кӧсйы дугдыны?..

МАРПА. Шуалӧны тай эськӧ мыйкӧ да, быттьӧ пӧ кывсьӧ миритчӧм. Арсень Ёгорлӧн пиыс воӧма, шуйга кисӧ гырддза выйӧныс вундӧмаӧсь...

ПЕКЛА. О, господьӧ! Мыйта йӧзӧс, кӧнкӧ, виисны, сё батюшкоӧй!..

МАРПА. Мыйкӧлӧн пӧ тай, кыдз нин сійӧ шусьӧ, Кирӧ Семӧлӧн пиыс усьӧма жӧ.

ПЕКЛА (полігтырйи). Ӧлексейыс? (Пернапас чӧвтӧ.) Сарство небеснӧй!.. Унаӧн, коньӧръяс, и юрнысӧ пуктісны. Гашкӧ, миян Гришукным сэні жӧ вӧлі да! (Марпалы.) Вай жӧ, дитя, лыддьы письмӧсӧ...

ВАСЬКА (юрсӧ лэптӧ). Кутшӧм письмӧ?

МАРПА да Пекла (тшӧтш). Гришасянь воӧма...

ВАСЬКА (матыстчӧ). Но, зонмӧ! Вай жӧ но сідзкӧ лыддьы...

МАРПА (питшӧгсьыс перйӧ письмӧ, ставныс лӧсьӧдчӧны). Меным сетіс тайӧс старшина, тшӧктіс тіянлы вайны... (Лыддьӧ конверт вылысь.) Село Космырское, получить Пекле Максимовне Сигеровой. (Косялӧ конвертсӧ да перйӧ письмӧ.)

ВАСЬКА (шеныштӧ кинас). Мамыслы гижӧ!.. (Бӧр мунӧ местаас.) Мый нӧ сійӧс кывзан, абу меным гижӧма да.

ПЕКЛА. Кывзан жӧ ӧд аслад пиыдлысь, мый нӧ тэ сёрнитан. Абу ӧмӧй ӧтсяма, кодлы гижӧма — ставнымлы ӧд инмӧ.

МАРПА (лыддьӧ). «Муса батьӧй, Василий Сопроновичӧй!» (Васькалы.) Абу, шуан, тэныд? Тэсянь и заводитчӧ да. Ставсӧ комиӧн гижӧма, мед гӧгӧрвоанджык... (Видлалӧ.) Видзӧдтӧ, мыйтӧм гижӧма! (Васька матыстчӧ.) Пиыдлысь ӧд юӧртӧ кывзан жӧ... (Лыддьӧ.) «Муса мамӧй, Пекла Максимовнаӧй!» (Пекла синъяссӧ чышкӧ.) «...Зарни вокӧй Иванушкоӧй!..»

ПЕКЛА (нора). Сьӧлӧмшӧрӧй! Некодӧс абу вунӧдӧма.

МАРПА. «Ыджыд рӧдняясӧй, дона Коми муӧй, став бур мывкыда коми йӧзӧй, ставныдлы ыста сьӧлӧмсянь зэв ыджыд бурсиӧм...»

ПЕКЛА (синъяссӧ чышкӧ). Сёшайтӧй!.. Сьӧлӧмшӧрӧй! (Тадзи письмӧ лыддигкості Пекла частӧ шуалӧ.)

МАРПА (лыддьӧ). «Ме чайта да, ті зэв жӧ нин ёна ме вылӧ лӧгасинныд, — батьӧ, эськӧ, дерт нин менӧ оз и пи пыдди лыддьы да».

ВАСЬКА (юрсӧ гыжъялӧ). Быдсямаыс вӧвлі.

МАРПА. «Пӧшти квайт во нин, кыдз ме гортысь петі, ас керкаысь, муні ас чужан муысь... Эг на ме вунӧд нинӧм, ставыс на син водзын: ӧнӧдз на со быттьӧ кылӧ муса мамлӧн менӧ колльӧдігӧн бӧрдӧмыс. Эг вермы ме сэки сійӧс некыдзи бурӧдыштны, — аслам сьӧлӧмӧй сэки оз вӧлі некытчӧ инась...».

ПЕКЛА (сідз жӧ). Со ӧд, дитяӧй, сьӧлӧмшӧрӧй...

МАРПА. «Быттьӧ горш вылын вӧлі гӧрддзасьӧма, ӧти кыв эг вермы шуны. Помнита на ставсӧ... Кор дадь волысӧ юрӧс сюйи да мӧдӧдчи мунны, ёна на бӧрвылӧ ме видзӧді, кытчӧдз эз тупкысь асланым керкаӧй да кытчӧдз эз берд ӧшинь улысь шогсьысь мамӧй... Мунім ми кызь кык лун Богословӧдзыс. Быдсямасӧ жӧ ме сэки тӧдлі. Шляка кӧть, кӧдзыд кӧть, пурга кӧть, век ӧтарӧ дзижгим; асъя войсянь да рытъя войӧдз кыссям. Тюниясыд оз и косьмыв, паськӧмыд сідз жӧ ставыс ва. Гашкӧ, меным сӧмын кажитчис туйыд сэтшӧм сьӧкыд да, сійӧ ӧд менам вӧлі медводдза туй. Дзонь недель чӧж эг вермы ветлыны...»

ПЕКЛА. Коньӧрӧй!

ВАСЬКА. Тӧдан ӧд — нежнӧй.

МАРПА. «Миянӧс пес керавны индісны дас ӧкмыс верст сайӧ Богословсяньыд. Сэтчӧ ас вылын даддьӧн катлім став припасъяс, сэсся кирпич, — вӧчим пӧжасян пач да пывсян. Куреньын ми олім бура унаӧн; чом тыр тай вӧлі йӧз-а, ставныс миян сиктса. Кор удж вылӧ ме батьӧкӧд петі площадь вылӧ, вӧлисти и тӧді заводын уджалӧм. Лым пиын лунтыр ноксян: югдігӧн петан да пемыдын пыран, — пилитан, поткӧдлан да тэчан чипасӧ сизим весьта пес. Чомъяд воан да ужыныд дум вылад оз усь. Нар вылад уськӧдчан да кулӧм морт моз унмовсян... Сэні менам ичӧтика синъясӧй пондісны воссьыны. Первой ме куті думайтны: кодлы нӧ, мися, ми татшӧма уджаламӧ? Пемыдсянь пемыдӧдз тільсям, а нажӧтка некутшӧм. Регыд ме гӧгӧрвои: став уджсӧ, вӧлӧмкӧ, вӧчам ми озыръяслы, став выннымӧс да эбӧснымӧс орӧдам озыръяс понда, став пӧсьнымӧс да вирнымӧс лэдзам найӧ вӧсна. Ми уджалам, а найӧяс гажӧдчӧны, чӧскыда сёйӧны да юӧны... Сэсся мыйкӧ кӧ лоӧ, кутшӧмкӧ кӧ сьӧкыдтор суас, некодсянь некутшӧм отсӧг... Со, ӧтчыд ми батьӧкӧд пу пӧрӧдім, зэв ыджыд пожӧм да кыдзкӧ веськалі Яков дядь вылӧ. Сылӧн кокыс чеги; куим тӧлысь больничаын куйліс, уджавны эз вермы. Долгсӧ весиг вештыны эз вермы да некод ӧд нинӧм эз и шу: со пӧ талы колӧ отсавны либӧ мый ли».

ВАСЬКА. Сійӧ веськыда сідзи.

МАРПА. «Сэсся, мый вылӧ нӧ ме велӧдчывлі? Мый вылӧ нӧ менӧ ті, бать-мамъяс, велӧдлінныд?... Пес керавны озыръяслы, али мый... Сэсся батьӧкӧд эгӧ кутӧ лӧсявны. Тадзтӧ со ме думайті-думайті дай пышйи куреньсьыд».

ВАСЬКА (юрсӧ гыжъялӧ). Пышйис, трасичаыд.

МАРПА. «Места меным эз ков дыр корсьны, регыд сюри: заводскӧй контораӧ гижысьӧ пыри. Сэсянь сэсся менам эз нин некор юрысь петавлы дум лёк олӧм йылысь, бӧра олӧм йылысь... Мый ме вӧчи тайӧ квайт вонад, зэв дыр лоӧ гижны. Ветлі сэсся Манчжурияӧ воюйтны...»

ПЕКЛА. Коньӧрӧй, ме сідзи и чайті.

МАРПА. «Сэтчӧ ветлӧм мысти менам ещӧ на паськыда синъясӧй воссисны... Унатор ме сэні тӧді... Ті некодлы энӧ висьталӧ, мый кута ме водзӧ гижны... Тайӧ письмӧсӧ лыддьӧм бӧраныд косялӧ...»

ВАСЬКА. Мый бара нин сэтшӧмсӧ вӧчӧма?

МАРПА. «Ті ӧд оланныд сьӧд вӧр шӧрын, нинӧм онӧ аддзӧ, немтор онӧ кылӧ, синъяснытӧ тіянлысь тупкӧны...»

ВАСЬКА. Прӧста дзик сӧрӧ, некод на ӧнӧдз синъяс эз кӧртавлы.

МАРПА. «Мый понда вӧлі пансьӧма Япониякӧд татшӧм ыджыд тышыс?.. Мый вӧсна лыд ни тшӧт уджалысь йӧзӧс виисны? Бара жӧ, ме шуа, озыръяс вӧсна...»

ПЕКЛА (полӧ). О, господьӧй, мый нӧ лоӧма Гришукным?..

МАРПА. «Миян сар вӧлӧм кӧсйӧ мырддьыны йӧзлысь муяс, пыр на сылӧн горшыс абу тырӧма». (Дугдӧ.) Мый нӧ тайӧ лоӧма?.. Ме бара сэсся ог лысьт водзӧсӧ лыддьыны. (Пуктӧ письмӧсӧ пызан вылӧ.)

ВАСЬКА. Сар йылысь тадзи гижӧ... Вот и морт.

ПЕКЛА (пернапасасьӧ). О, господьӧ, господьӧ!

ВАСЬКА (Марпалы). Мед эськӧ огӧ жӧ сюрӧ ставным. Аттӧ, трасичаӧ, детина. Мыйкӧ нӧ сійӧ думайтӧ али оз?.. Вай сэті коль да водзӧ лыддьы...

ПЕКЛА (полӧ). Гашкӧ, оз и позь да...

ВАСЬКА. Толькӧ бара, сё загреки, некодлы жӧ энӧ висьталӧ, ставнымӧс юрӧн нуасны. Вай ньӧжйӧникӧн лыддьы.

ПЕКЛА (зэв полӧ). Бласлӧ кристос... Мый нӧ Гришукным лоӧма?

МАРПА (босьтӧ письмӧ да лыддьӧ колялӧмӧн). «Ог вермы ме терпитны... уджалысь... коньӧръяс. Регыд лоӧ... Сэсся кӧсъя гӧтрасьны». (Письмӧ усьӧ кисьыс.)

ПЕКЛА (повзьӧ). Гӧтрасьны? Чӧ-ӧв!..

ВАСЬКА (скӧра). Гӧтрасьны?! Медтыкӧ заводитлас.

МАРПА (ньӧжйӧникӧн лэптӧ письмӧсӧ, аслас чужӧмыс зэв ёна вежсьӧ). Сідз кӧ гижӧ-а? (Лыддьӧ.) «Кӧсъя гӧтрасьны... Ті, гашкӧ, понданныд мыйкӧ шуасьны да... Энӧ дивитӧ менӧ... Сэтшӧм нывсӧ этша зэв аддзан: зэв бур да тӧлка. Кӧть и абу озырлӧн, — сьӧлӧмыс аслас став зарнисьыс донаджык на... Мый нӧ озырлунсьыд? Мый деньгасьыд? Сійӧ меным оз ков... Ме босьта аслым нэм кежлӧ бур сьӧлӧма пӧдруга!..»

ПЕКЛА. О, господьӧ... Пӧдруга... Гришукӧй, Гришукӧй, мый нӧ тэ керсян?.. Вунӧдін тай менӧ, дитяӧй... (Гусьӧникӧн бӧрдӧ.)

МАРПА (дрӧжжитӧ). «Кора тіянлысь, муса мам-батьӧй, рӧдительскӧй благӧслӧвенньӧ... (Дугдылӧ, нора.) Онӧ кӧ ыстӧ, сытӧг олас... Гижыштӧ сэсся асьныд регыдджык... Ловйӧн, дзоньвидзаӧн ӧні кежлӧ коля тіян пи Григорий Сигеров». (Пуктӧ письмӧсӧ пызан вылӧ, ачыс кольӧ шемӧс.)

ВАСЬКА (недыр мысти). Оз ло сы ногӧн! Некутшӧм благӧслӧвенньӧ месянь оз ло! «Сытӧг, — шуӧ,— гӧтрася...» Ог тӧд, мый сэки лоӧ. Ен ёрас... (Кост.) Дзикӧдз дурмӧма, трасичаыд... Кутшӧмкӧ гуляйтысь ныв сюрӧма да и гӧтрасьны... Оз на сідзи ло...

ПЕКЛА. О, господьӧ... Мый нӧ сыкӧд лоӧма?.. Прӧста ӧд ме колян вой эг вӧтась сэтшӧм омӧля... Сідзи и думайті, мися, кутшӧмкӧ шог лоӧ... Вӧтася да быттьӧ, кылӧ, сарайӧ вӧла кайис; петі, видзӧда: сарай шӧрын сьӧд вӧла сулалӧ, а Гриша быттьӧ доддяс пукалӧ; сьӧд корадодь, да зэ-эв ёна быттьӧ мыйыськӧ, коньӧрӧй, шогсьӧ... Со тай мый водзын. О, господьӧ... Гӧтрасьны...

ВАСЬКА. Оз ло, мися, сы ногӧн! Мый нӧ миянлы куш бӧжа чикышсьыд?.. Мунасны на купеч нывъяс сы сайӧ...

ПЕКЛА. Мый нӧ ӧні сэсся вӧчан?.. Мый сылы гижан?

ВАСЬКА. Мый гижам?.. Благӧслӧвенньӧ пыдди кузь леторос ыстам... Аттӧ, трасича детина.

МАРПА (нора). Ме нӧ эськӧ мыйла виччыси Гришукӧс?.. Эштӧма нин сэсся ӧні ставыс... Ок, ок, ок... (Пызан вылӧ лэдзчысьӧ, бӧрдӧ гусьӧник.)

Занавес ньӧжйӧникӧн тупкысьӧ.

Мӧд вӧчӧмӧдзыс кольӧ куим во.

МӦД ВӦЧӦМ

Вӧчсьӧ бара Сопрон Васька ордын; стенас ӧшалӧ свидетельство.

1-ой петкӧдчӧм

ИВАН (ӧтнасӧн пызан сайын гижӧ. Недыр мысти кызӧктӧ да гижӧдсӧ босьтӧ киас). Нолтӧ, мый артмис... (Лыддьӧ.) «Любезнӧй брат мой, Григорий Васильевич Сигеров, здравствуйте! Это письмо от брата вашего Ивана Васильевича Сигерова. Во-первых строках сего письма я пишу от господа бога доброго здравия и сякого благополучия делак рук вашик, того и вам желаю». (Дугдӧ.) Ок, лӧсьыд! (Водзӧ лыддьӧ.) «И вам желаю... ещӧ уведомляю я вам любезнӧй брат, Григорӧй Васильевич Сигеров, што я жыв-здоров, того жӧ и вам желаю. Што ты нас забыл здесь? Ещӧ уведомляю вам с любовью низко кланяюсь от неба до сырой земли слава богу за настоящӧй лето кончил и получил свидетельство...» (Индӧ стенӧ.) Тонӧ, стенын ӧшалӧ... «Учился четыре года: один — младшӧй, один средньӧй, один старшӧй да один ещӧ так кодил. Ещӧ уведомляю вам, што ты приезжай домой, работать помогай, отец старой уже, мать тоже старой будет, я тоже ещӧ молодой. Ещӧ уведомляю вам, дорогой брат, Григорӧй Васильевич Сигеров, што ты женился али нет, но мы тебе не писали рӧдительскӧй благӧслӧвенньӧ, мать крепко скучит, говорит иди домой жениться, но ты ещӧ не пришол. Ещӧ уведомляю вам и посылай мне балалайка либӧ тальянскӧй гармошка за што я буду скоро бурлачить... Ещӧ уведомляю вам почему я тебя не знал и крепко скучил и окота мне вас видится... Ещӧ уведомляю вам любезнӧй брат, Григорӧй Васильевич Сигеров, зачем ты не пошлёш нам деньги, коли тебе легко жить, тогда ты зачем забыл нас, тяжело жить крестьянскӧй работа, я которой ты писал письмо три года повсегда читал. Ещӧ уведомляю вам што ты некорошо писал на сара за то мать да отец крепко тебя ругал, перод такой письмо не давай». (Босьтӧ пызан вылысь письмӧ.) Со на ӧд сійӧ! (Бӧр пуктӧ, лыддьӧ водзӧ.) «Ещӧ уведомляю вам, лошадь Воронко умер и мы купили другой лошадь — Рыжко, очень ярой. Осип чож манастырӧ жыл да тоже лошадь затоптал сарство небеснӧй, потому што он кончился и погребали его там, и игумен ему сам гроб положил кипариснӧй крест и я за поминальник писал: отрока Осипа. Ещӧ уведомляю вам што меня ущитель Митрӧпан Никандрӧвич за што я писал сквернӧй слово на его толстой бруко, выключал из школа да ладнӧ мать понёс ему масло да клюква да принимал обратно... Ещӧ уведомляю вам дорогой брат, Григорӧй Васильевич Сигеров, Марпато пошёл замуж за Туру Микола, ещӧ братан Мелентий утонул на Вычегда... Ещӧ теперь труднӧй пора — страда, клеб заморозил пуж... Ещӧ я вам уведомляю посылай мне какой-нибудь корошӧй книга: салтыр или часослов... Ещӧ кланяюсь вам и посылаю низкий поклон ваш брат Иван Васильевич Сигеров, того жӧ и вам желаю, пиши ответ нетерпением... Это письмо писал и руку приложил ваш брат Иван Васильевич Сигеров». (Дугдӧ. Недыр мысти.) Ставыс, буракӧ, лои. Оз, ме чайта, ысты балалайкатӧ... Часлы жӧ, сы йылысь ещӧ содта. (Гижӧ, сэсся лыддьӧ.) «Ещӧ на вас прошу не забывай, посылай мне балалайка...» Ӧні сэсся шань, конверт пытшкӧ сюям дай олас. (Заводитӧ конверт гижны.)

2-ӧд петкӧдчӧм

Пырӧны урадник да сотскӧй.

УРАДНИК (пыригмоз). Кӧзяиныс гортас?

ИВАН (повзьӧ). Абу... Ме кындзи, некод абу...

УРАДНИК (скӧра). Мед ӧти здукӧн вӧлі.

ИВАН (полігтырйи). Батьӧ?

УРАДНИК. Ме ог тӧд коді... Тані олӧ Сопрон Васька?

СОТСКӦЙ. Тані, вашӧ высокородие, тані.

УРАДНИК (ветлӧдлӧ джодж кузя.) Кӧн нӧ шӧйтӧ? Мед дзик пыр явитчас.

СОТСКӦЙ (Иванлы полігтырйи). Мун да ӧдйӧджык кор.

ИВАН. Мыйла нӧ?

УРАДНИК (гораа). Не тэныд юасьны, зырымбедь! Корсь, мед тайӧ жӧ здук вӧлі тані.

Иван петӧ пызан сайысь.

СОТСКӦЙ (Иванлы). Мун, мися, ӧдйӧджык корсь! Мун, мун! (Кыскӧ киӧдыс.) Мед пырысьтӧм-пыр жӧ локтас батьыд... Мун...

ИВАН. Батьӧ, бара, оз лок уджаланінсьыд: найӧ ӧд мамӧкӧд кӧбрег дорын вундӧны.

УРАДНИК (зэв гораа). Знать не знаю! (Нетшкӧ Иванӧс пельӧдыс. Иван горзӧ: «Ой, ой, ой!») Ещӧ-й тшӧкӧлдывайтны... Жыво! (Тойыштӧ Иванӧс посводзӧ.) Марш.

3-ӧд петкӧдчӧм

УРАДНИК (ветлӧдлӧ джодж кузя). Тыдалӧ, тані ёна лоӧ гудрасьны: видзӧдтӧ, кутшӧм сопляк лысьтӧ прӧтивляйтчыны... Пыдӧ, тыдалӧ, пырӧма вужйыс. Он кӧ сійӧс нетшышт ставнас, аддзылан и мырсьӧм. Колӧ ставнас песовтны! (Кинас петкӧдлӧ песовтӧм.) Колӧ став позсӧ пазӧдны! Меным кӧ сюрӧ поводыс, оз бара, небось, мын... (Сотскӧй лэдзчысьӧ аслас бедь вылӧ да вугралӧ.) Ме бара, майбыр, кӧртвомала... Ставсӧ кык ки костын лязӧда... (Петкӧдлӧ.) Революция ковмӧма! Грабитны!.. Сарӧс чӧвтны колӧ... Государство бергӧдны... Киясныд на дженьыдӧсь!.. Пекляясыс тырмасны на... (Сотскӧйлы.) Веськыда сувт... Эн узь! (Чуньнас сотскӧй ныр водзын грӧзитӧ.) Тэ, смотри менам, кывтӧ зэв эн нюжйӧдлы: кодлыкӧ кӧ кывсяс, став ныр-вомтӧ разя, тюрьмаын сісьта. Сибырӧ юрнад мӧдӧда, кылан?

СОТСКӦЙ (полӧ). Ен мед видзас, батюшко, ваше высокородие, господин урадник. Кыдз нӧ сійӧ позьӧ...

УРАДНИК (пуктӧ бумага чукӧр папка пызан вылӧ). Сэк сэсся ачыд тӧд, позьӧ али оз... Ме тай со водзвыв висьтала, тшуп тайӧс нырад... Мый нӧ та дыра оз лок?.. Виччысьны лоӧ кутшӧмкӧ лёк няйт мужикӧс...

СОТСКӦЙ (восьтӧ ӧдзӧс да бӧр пӧдлалӧ). Абу на, ваше высокородие... Регыд локтас, господин урадник...

УРАДНИК. Мун ачыд ветлы да ӧдйӧджык кыскы... Жыво!.. Мед кок пӧлыд вӧлі тані. Марш!

СОТСКӦЙ. Дзик пыр, ваше высокородие. (Петӧ.)

4-ӧд петкӧдчӧм

УРАДНИК (ӧтнас ветлӧдлӧ джодж кузя). Нолтӧ, мый пондан тэ мойдны, Васильӧй Сопронӧвич. Бур вылӧ питӧ велӧдӧмыд, нинӧм шуны. Быдтӧмыд, дӧзьӧритӧмыд. Сы понда миянӧс тшӧтш кыскалӧны, протоколъяс да дознанньӧяс тшӧктӧны вӧчны. (Перйӧ папкаысь бумага, лыддьӧ.) «Экстренно. Совершенно секретно. Предписываю полицейскому Ураднику пятого участка экстренно произвести согласно прилагаемой телеграммы дознание, отправить с нарочным. Пристав второго стана такой-то...» А со и телеграммаыс. (Листыштӧ да лыддьӧ.) «Спешно допросите родителей крестьянина Космырской волости Григория Васильевича Сигерова о его прежней жизни, произведите у них тщательный обыск, обращайте внимание на переписку. Сын проживал в Богословском Округе, принадлежал социал-демократической рабочей партии (большевиков), поставившей целью ниспровержение существующего строя, ныне пойман и предан военно-окружному суду. Соблюдайте при всём строгий секрет...» (Бӧр сюйӧ бумагасӧ.) Лӧсьыд... Кужны колӧ толькӧ татчӧ кутчысьны. Но да, менам аддзас на тайӧ (чуньнас плешас татшкӧдӧ), оз на менӧ ков велӧдны... (Ветлӧдлӧ.)

5-ӧд петкӧдчӧм

Пырӧны сотскӧй, Васька, Пекла да Иван.

ВАСЬКА (пыригмоз). Но-о, збыльысь тай воӧма гӧсть. Олан-вылан, господин урадник!.. (Урадник ассьыс кисӧ оз сет.)

ПЕКЛА (пыригмоз, бокӧ). Аминьӧй, аминьӧй, урадник!.. Кутшӧм загреки нин бара суис-а?

УРАДНИК (Васькалы скӧра). Та дыра тэнӧ колӧ виччысьны? (Пуксьӧ пызан дорӧ, перйӧ бумагаяс да лӧсьӧдчӧ гижны. Ставыс мукӧдыс сулалӧны. Иван ньӧжйӧникӧн босьтӧ ассьыс гижӧдъяссӧ да нуӧ пачводз дорӧ. Сэсся Гришалысь письмӧсӧ пач костӧ сюйӧ. Урадник видзӧдӧ сы вылӧ.)

ВАСЬКА. Ме ӧд эг тӧд водзвыв тэнсьыд локтӧмтӧ...

СОТСКӦЙ. Ме паныдаси нин накӧд, ваше высокородие.

УРАДНИК. Ланьт, тырмас!.. (Ставныслы.) Ті петалӧ недыр кежлӧ кытчӧкӧ ставныд, а Васька мед кольччас. Сотскӧй, петкӧд! (Петӧны ставныс, керкаӧ кольӧны урадник да Васька.)

6-ӧд петкӧдчӧм

УРАДНИК. Ним-овыд кыдзи тэнад?

ВАСЬКА. Василей Сопронӧвич Сигеров на пыр.

УРАДНИК (гижӧ, сэсся бара юалӧ. Быд юалӧм бӧрын гижӧ). Кымын арӧс?

ВАСЬКА. Ме бара ог и тӧд прамӧя — ветымын нёльӧд вылӧ кӧ петі-а... Гӧтрасигӧн вӧлі комын. Гришалы, буракӧ, пӧкрӧв вечерняӧ тырӧ кызь куим, сэсся со ачыд и лыддьы, кымын арӧс... Гижлы наперво ветымын нёльӧс да...

УРАДНИК. Грамотнӧй абу?

ВАСЬКА. Мый нӧ миянлы сэтысь? Ещӧ грамотанад кытчӧкӧ юрнад сюран ми вок кодьыд... Абу... Тайӧ нӧ тэныд, господин урадник, быдтор йылысь лоӧ юасьны?

УРАДНИК. Мый оз юавны, эн висьтав... Сулав шы ни тӧв... Православнӧй?

ВАСЬКА. Кыдз нӧ, крестьянин... Православнӧй... Дерт, эськӧ грекыд рушку тырыд жӧ да.

УРАДНИК. Коді нӧ сійӧс тэнсьыд юалӧ?.. Эн мешайт меным... Коркӧ нӧ судӧ сюрлін эн?

ВАСЬКА. Мун, зонмӧ, господин урадник... Ен мед видзас...

УРАДНИК. Эн, сідзкӧ, судитчыв? Висьтав веськыда...

ВАСЬКА. Эг, мися, эг. Дай водзӧ кежлӧ мед оз ло. Сыысь омӧльыд нинӧм нин абу...

УРАДНИК. Тіян нӧ челядьыд эм жӧ?

ВАСЬКА. А миян челядь пӧшти абу кодь. Ыджыд пиӧй пышйис, а мӧд помсьыс некутшӧм отсӧг на абу...

УРАДНИК. Пышйис али мый, шуин? Мый нӧ сылӧн нимыс?

ВАСЬКА. Гриша. Пышйис тай, мый сэсся керан... Уджалігкості куреньысь пышйис да со тай ӧнӧдз на кӧнкӧ шӧйтӧ. Ӧкмыс во нин, буракӧ, тӧвся Микӧла дырйи лои. Коді нӧ сылысь тӧдӧ... Зэв ӧд асныра вӧлі; сэсся неуна велӧдышті жӧ дай... Со тай мый лои миян грамотасьыд: сӧвсем эновтіс крестьянскӧй уджтӧ. Грамотанад тай оз зэв уджыд вӧрзьы...

УРАДНИК. Кутшӧм пӧраын нӧ сійӧ пышйис?

ВАСЬКА. Сійӧ, бара, помнитсьӧ, стретенньӧ гӧгӧр кульыштіс...

УРАДНИК. А он помнит, кутшӧм воӧ?

ВАСЬКА. Вот сійӧ ог куж висьтавны, которӧй годын вӧлі. Эз-ӧ девятьсотӧйын вӧв?.. Сы гӧгӧр бара, ме чайта.

УРАДНИК. Мыйкӧ нӧ гижлӧ али оз?

ВАСЬКА. Немтор на эгӧ пӧлучитлӧ... Веськыда кӧ шуны, дзик, бара, сійӧ вошӧм морт...

УРАДНИК. Тэ, Васька, смотри, эн соссьы, сэки, бара, юрнад мунан. Висьтав ставсӧ, мый вӧвлі...

ВАСЬКА. Менам сійӧ и перевод весигтӧ абу, мый прӧстӧсӧ бур йӧзӧс ылӧдлыны... Ме ногӧн кӧ эськӧ, Гриша йывсьыд нинӧм и юасьныыс. Вошӧм морт, мися, сійӧ, ме шуа.

УРАДНИК. Тэ ногӧн кӧ, збыль позьӧ шуны вошӧм мортӧн?

ВАСЬКА. Вошӧма и эм да, мый сэсся шуан.

УРАДНИК. Сідзкӧ нӧ Гришаыд гортад этша и овліс?

ВАСЬКА. Сӧвсем этша: велӧдчигас да челядь дырйиыс сӧмын и оліс. Кончитӧм бӧрас муніс писарӧ, сы бӧрын сэсся Богословӧ. Сэтысянь и пышйис. Некор пӧшти эз и вӧвлы гортын.

УРАДНИК (гижӧ бура дыр). Сэсся нӧ нинӧм он куж висьтавны Гриша йывсьыд?

ВАСЬКА. Мый нӧ сэсся висьталан? Ставсӧ, мый тӧда, висьталі нин-а. Сэсся нинӧм. Дай нинӧм унасӧ сёрнитны сы йылысь.

УРАДНИК. Но, ладнӧ... Вот кывзы ассьыд висьталӧмтӧ. (Лыддьӧ.) «1909 года июля 24-го дня, я, полицейский урадник 5-го участка 2-го стана, Чабыров, с соблюдением 842 статьи устава уголовного Судопроизводства, опрашивал нижепоименованный мне, которые показали следующее: Первое, крестьянин Космырской волости и села Василий Сопронович Сигеров (Васька юрнас личкыштӧ), 54 лет, неграмотный, православный, женатый вторым браком, несудившийся, показал: я имею два сына, один из них Григорий уже девять лет не живет при мне, а именно, около 1900 года, около 2-го февраля он убежал из куреня близ Богословского завода и с тех пор ни слуху ни духу. Детство да учение он только и был дома, после чего пошел писарить, а после сего пошел в Богословский завод и после чего совсем пропал, никакого письма нам не посылал и совсем можно читать его пропащим, больше по сему делу показать ничего не могу». Вернӧ?

ВАСЬКА. Ачыд ӧд тэ бӧльӧ тӧдан... Статтьӧсӧ нӧ пасйӧма жӧ?..

УРАДНИК. Ставыс эм.

ВАСЬКА. Сідз кӧ, дерт, вернӧ. Олас, ме вӧсна.

УРАДНИК. Вай кырымась этатчӧ. (Индӧ.)

ВАСЬКА. Ог ӧд ме куж.

УРАДНИК. Пӧлинӧ ӧд, тэ неграмотнӧй... Пукты ассьыд ыж пастӧ.

ВАСЬКА (гижӧ). Сійӧ позьӧ... Со тай, колӧкӧ.

УРАДНИК. Но, мун сэсся ачыд петав да ысты бабатӧ.

ВАСЬКА. Пеклаӧс?

УРАДНИК. Ме ог тӧд, кыдз сійӧ тэнад шусьӧ. Тэнад ӧд абу дас гӧтыр...

ВАСЬКА (сералігмоз). Вернӧ... Васяыс кулі салдатӧ ветлігкості... Дзик пыр ыста. Кыдзкӧ нӧ оз-ӧ позь регыдджык, господин урадник, лэдзны? Вунданным со тайӧн миян кольӧ, кӧть эськӧ порсьӧдз колі жӧ чукӧртны.

УРАДНИК (скӧра). Но-о, вундыссяс на. Жыво.

Васька ӧдйӧ петӧ.

7-ӧд петкӧдчӧм

УРАДНИК (ӧтнасӧн, бумагаяссӧ видлалӧ). Дзик жӧ нин, бара, тайӧ бӧлбан... Мамыс кӧ оз мыйкӧ висьтав, нинӧм тайӧ дознанньӧсьыд. Колӧ заводитны обыск вӧчны... А детинаыс, тыдалӧ, сюсь.

8-ӧд петкӧдчӧм

Пырӧ полігтырйи Пекла.

УРАДНИК. Лок матӧджык, этатчӧ сувт... Тэ смотри, мый кута юавны, веськыда висьтавлы. Пӧръялан кӧ, ме вылӧ эн норась.

ПЕКЛА. Чӧ-ӧв, сё батюшко... Ставсӧ веськыда висьтала. О, господьӧ! (Ышловзьӧ.) Мый нӧ пансис сэтшӧмыс миян кузя, сё батюшкоӧй? (Синъяссӧ чышкӧ.)

УРАДНИК. Эн на бӧрддзы... Кыдз нӧ тэнӧ шуӧны?

ПЕКЛА. Нимӧй?.. Пекла, сё батюшко!..

УРАДНИК (гижӧ, сэсся бара юалӧ). Мый овна?

ПЕКЛА. Максимовна, Кутш Пиля Максимлӧн ныв вӧвлі...

УРАДНИК. Кымын арӧс?

ПЕКЛА. Нелямын вит, квайтӧд вылын.

УРАДНИК. Православнӧй?

ПЕКЛА. Ме, бара, тайӧ ог и тӧд...

УРАДНИК. Енлы веруйтан?

ПЕКЛА. О, господьӧ, — кыдзи нӧ, сё батюшко, Сус кри-кристос, спаситель, югыд шонді миян, пречистая богородица...

УРАДНИК. Грамотнӧй абу?

ПЕКЛА. Абу бара велӧдлӧмаӧсь.

УРАДНИК. Войдӧр эн судитчывлы?

ПЕКЛА. Господьӧй видз! Эг на, мыйысь нӧ? Мед ен видзас...

УРАДНИК. Кӧн нӧ тэнад пиыд ветлӧ?

ПЕКЛА. Гришукыд?.. Ог тӧд, сё батюшко, кӧні, коньӧрӧй, ветлӧ. Нинӧм оз кывсьы со дасӧд во нин, буракӧ... Тэ нӧ, гашкӧ, сы йылысь да?

УРАДНИК. Пӧшти сы йылысь.

ПЕКЛА (радлӧ). Господьӧй!.. Сідзкӧ, Гришукӧй ловъя на?.. Сьӧлӧмшӧрӧй. (Чышкӧ синъяссӧ.)

УРАДНИК. Мый нӧ, сійӧ нинӧм эз и гижлы та дыра ветлігкостіыс? Сідзи и вунӧдіс бать-мамсӧ?

ПЕКЛА. Ог тӧд, батюшко, мый сійӧ кӧні вӧчӧ. Эз жӧ, буди, вунӧд-а? Кӧні, бара, коньӧр, ветлӧ-а? Ёна жӧ нин и шог вӧчис меным, кымынкӧ синва менам киссьыліс жӧ нин сы понда.

УРАДНИК. Дзик прӧста... Коді мам-батьӧс вунӧдӧ, абу жӧ нин сійӧ бур пи, сэтшӧмтӧ нинӧм жалитны. Кутшӧма нӧ сійӧ том дырйиыс овліс?

ПЕКЛА. Кыдзи нӧ абу жаль. Мам сьӧлӧмыд тай век на жӧ...

УРАДНИК (торкӧ). Ме тэнсьыд юала, кутшӧма, мися, пиыд овліс том дырйиыс?

ПЕКЛА. Зэв бура, сё батюшко... Велӧдім кык школаын... пыр вӧлі, коньӧрӧй, норасьӧ сьӧкыд олӧм вылӧ...

УРАДНИК. Норасьӧ, шуан? Мый нӧ вӧлі шуалӧ?

ПЕКЛА. Быдсяматорсӧ вӧлі висьталас, сёшайтӧй... Медъёна вӧлі тӧждысьӧ, коньӧр, гӧль йӧз вӧсна да велӧдчӧм вӧсна.

УРАДНИК. Тэ нӧ он тӧд, мыйла пышйис Гришаыд куреньсьыс?

ПЕКЛА. Дерт, бара, ме чайта, сьӧкыд вӧснаыс. Сэсся забеднӧ жӧ мортыдлы, кӧнкӧ, лои: велӧдчис, велӧдчис да пес керавны ыстісны... Мыйла нӧ тэ, батюшко, Гришук йывсьыс тадзи юасян? (Полігтырйи.) Эз-ӧ кутшӧмкӧ притча су?.. Ме чайта да, прӧста менам сьӧлӧмӧй оз жӧ вись... Пыр ӧд сійӧ менам дум вылын... (Ньӧжйӧник.) Гашкӧ, кутшӧмкӧ мыжӧ нин сюри да?.. Мед эськӧ Микайлӧ Аркандел, лов сетысь, лов босьтысь, видзас жӧ быдсяма притчаысь менсьым муса пиӧс. (Ышловзьӧ.) Ок, ок, ок, ко, ко, ко... Кӧні бара, коньӧрӧй, ветлӧ-а? (Чышкӧ синъяссӧ.) Кувтӧдз, кӧнкӧ, ог нин аддзыв сьӧлӧмшӧрӧс...

УРАДНИК (Пекла сёрнитігкості гижӧ, сэсся гижӧдсӧ киас босьтӧ да лыддьӧ). Кывзы: «Вторая, крестьянка той же волости и села Пекла Максимовна Сигерова, 45 лет, неграмотная, православная вероисповедание, несудимая, показание добавила: когда Григорей был мальчиком, всегда говорил против бедного народа да против учения. А што из куреня убежал, потомушто лень стало дрова рубить и где теперь он ходит безизвестно. Больше показать по сему делу ничего не имею». Тадзи?

ПЕКЛА. Кыдз гижан, сідзи и шань, батюшко.

УРАДНИК. Кырымасьнытӧ он жӧ куж? Пукты татчӧ куим крест. (Индӧ. Пекла пуктӧ.) Но, сэсся мун да ставнысӧ кор.

ПЕКЛА. Кора, батюшко, дзик пыр кора. (Петӧ.)

9-ӧд петкӧдчӧм

УРАДНИК (ӧтнасӧн). Ичӧт дырсяньыс нин вӧвлӧма замашкаясыс... Но ещӧ обыск вӧчам дай тырмас. Мый сюрны сюрӧ, а сэсся менам ас пайысь ставсӧ лоӧ вӧчӧма по закону.

10-ӧд петкӧдчӧм

Пырӧны сотскӧй, Васька, Пекла, Иван да бура уна бокӧвӧй йӧз.

СОТСКӦЙ. Энӧ валитчӧ, энӧ... Оз позь татчӧ пырны... Тані господин урадник... (Кодсюрӧ пырӧны.) Мунӧ татысь, мунӧ, петӧ... Оз, мися, позь... Но... Разӧдчӧ, шуа... Мый нӧ татысь эн аддзылӧй? Мунӧ, петӧ... (Тойлалӧ йӧзсӧ. Кодсюрӧ: «Аминьӧй, аминьӧй, урадник!.. Локтӧ мунамӧ! Аминьӧй, загреки». Кодсюрӧ петӧны, морт куим-нёль кольччӧны.)

УРАДНИК (бокӧвӧй йӧзлы скӧра). Мый нӧ ті зыртчанныд? Мый тіянлы тась колӧ? Убирайтчӧ ставныд!.. Марш!.. (Матыстчӧ йӧзлань. Найӧ тойласигтырйи петӧны.)

СОТСКӦЙ. Дзик пӧгибӧ вои наӧн: кыв ни вом оз тӧдны, сюйсьӧны дай сӧмын, господин урадник.

УРАДНИК. Лоӧ неуна кытсюрӧ тіянлысь видлалыштны. По закону кӧ шуны — обыск вӧчны. Вай жӧ, кӧн мый эм, ставсӧ петкӧдлӧ!

ПЕКЛА (зэв повзьӧ). Мый нӧ, кӧсъянныд шобны али мый?... О, господьӧ, кутшӧм притча нӧ миянӧс суис?

ВАСЬКА (Пеклалы). Тайӧ, ме чайта, ставсӧ мыйкӧ Гришаыд панӧма. Сы помысь ме эг чайтлы некор некутшӧм тӧлк. Со тай мыйӧдз воштіс миянӧс аслас грамотанас. Некор на эз вӧвлы татшӧм дивӧыд. Мый ӧд сэсся, мед шобӧны.

Пекла Иванкӧд сёрнитӧны. Иван чуньнас индӧ пач вылӧ.

УРАДНИК. Ӧдйӧнджыка, некор меным виччысьныыс. Кытысянькӧ вайӧ заводитамӧ. (Заводитӧ гӧгӧр видлавны. Иван ӧдйӧ мунӧ пачводз дорӧ да перйӧ гижӧдсӧ пач костысь. Урадник казялӧ сійӧс, матыстчӧ сы дінӧ.) Нолтӧ, вайлы татчӧ кабалатортӧ. (Иван гижӧдсӧ вомас сюйӧ. Урадник сійӧс кутӧ, перйӧ вомсьыс гижӧдсӧ...) Он на ньылышт, зырымбедь, виньдан... (Иван бӧрддзӧ.) Видлам, кутшӧм тайӧ гусятор... (Веськӧдлӧ, лыддьӧ. Васька Пеклакӧд гусьӧн сёрнитӧны. Пекла унаысь уськӧдчылӧкодь гижӧдсӧ мырддьыны, да оз лысьт. Кинас бокъясас швачӧдӧ.)

ПЕКЛА (зэв шогпырысь). Сёшайтӧй, Гришукӧй, ёна жӧ тэ мыжмӧмыд мыйыськӧ... Мый бара, сьӧлӧмшӧрӧй, вӧчин-а? (Чышкӧ синъяссӧ.)

ВАСЬКА. Ме тай шулі, мися, вошӧм морт сійӧ. Велӧдім жӧ, зонмӧ, ассьыным юр янӧдӧм вылӧ...

УРАДНИК (лыддьӧм мысти гижӧдсӧ сюйӧ папкаӧ). Кымынысь ме тіянлысь юавлі, гижӧдъястӧ, мися, ыстыліс эз Гришаыд. Мыйла нӧ соссинныд? Энлӧ, петкӧдла ме тіянлы соссьӧм!

ВАСЬКА. Мый нӧ сійӧ лёк гижӧдтӧ петкӧдлан бур йӧзлы.

ПЕКЛА. Прӧстит, сё батюшко. Ме эг лысьт висьтавны сы йылысь, мед эськӧ, мися, Гришуклы омӧль оз жӧ ло. Позьӧ кӧ, косяв, сё батюшко, сійӧ гижӧдсӧ.

УРАДНИК (сералӧ). Де-рт. (Скӧра.) Ставныд ті революционеръяс! Кутшӧм пиныд, сэтшӧмӧсь и асьныд! Эмӧсь на ӧд, кӧнкӧ, ещӧ гижӧдъясыд сысянь? Вайӧ, колӧкӧ, бурӧн!.. (Ставныс шемӧс сулалӧны.)

ПЕКЛА. Абу, сё батюшко, сэсся... Ӧтикӧс и мӧдӧдліс, сёшайтӧй миян...

УРАДНИК. Бур сёшайт. Кыксё татшӧм сёшайтыд сулалӧ.

ПЕКЛА (зэв полӧ). Мый нӧ сійӧ вӧчӧма?..

УРАДНИК. Ме тай шуи нин: тіян пиыд революционер.

ПЕКЛА (пернапасасьӧ). Благӧслӧви да кристос. Мый нӧ сійӧ люционерыс лоӧ?

УРАДНИК (мӧдӧдчӧ мунны сотскӧйкӧд). Эн на ӧмӧй кывлы? Пиныд тіян, Гришаныд, сюрӧма политика йылысь. Эм сэтшӧм партия, шусьӧ социал-демократическӧй. Коді сэтчӧ пырӧ, сійӧ и вошӧм морт. Найӧ нуӧдӧны сэтшӧм ныр, «политика», мед эз вӧв сар, мед сьӧд йӧз государствоӧн бергӧдлісны.

ПЕКЛА (сідз жӧ). О, господьӧ... благӧслӧви да кристос. Кыдз нӧ сійӧ сэтчӧ веськалӧма?

УРАДНИК. Велӧдчӧм мортыд тай аддзӧма туйсӧ пырныыс. Ӧні Гришанытӧ ыджыд суд кутас судитны, военнӧй окружнӧй суд. Сэн дыр оз чеченитны: голяӧ пекля да крук йылӧ... (Сотскӧйлы). Мунам! (Петӧны. Ставныс дыр сулалӧны шемӧс.)

11-ӧд петкӧдчӧм

ВАСЬКА. Со тай мый вӧчыштіс пинымлӧн грамотаыд: ассьыс юрсӧ воштіс... Ме шулі, мися, сійӧ вошӧм морт... Ӧти пи, буракӧ, быри миян. Аттӧ, трасича, детина... Мый вӧчис... (Юрсӧ ӧшӧдӧ.)

ИВАН. Мыйла нӧ Гришалысь гижӧдсӧ босьтіс? Сэсся нинӧм эз коль сылӧн гортӧ...

ПЕКЛА (нора, бӧрдігтырйи). Гришукӧй, Гришукӧй, сьӧлӧмшӧрӧй менам дай пиӧй, мый нӧ тэ, коньӧрӧй, вӧчин?.. Кутшӧм асъя бара менам узьсьӧма-а? О, господьӧй, батюшко спасительӧй, мынты жӧ сылысь став грексӧ. (Иван вайӧ пызан вылӧ ассьыс гижӧдъяссӧ да заводитӧ гижны. Васька юрсӧ довкйӧдлӧ, тыдалӧ, шогсьӧ.) Ойя жӧ да, ойя... огӧ и аддзысьлӧ... Нор сьӧлӧмнад, коньӧрӧй, воштін ассьыд том олӧмтӧ. Коді менсьым шогсӧ пальӧдас?.. Югыд шондіӧй менам, Гришукӧй, Гришукӧй!.. (Бӧрдӧ.)

Занавес ньӧжйӧникӧн тупкысьӧ.

Коймӧд вӧчӧмӧдзыс сизим во да джын.

КОЙМӦД ВӦЧӦМ

Вӧчсьӧ бара жӧ Сопрон Васька ордын, сӧмын мӧд керкаас. Керка пытшкӧсыс гажаджык воддза дорысь: стенас уна картинаяс ӧшалӧны, ен джаджъяс тырыс ӧбразъяс; пач боксӧ краситӧма лӧзӧн, паччӧр вылас занавеска. 1917 во. Шуйгавылас ӧшинь дорын сулалӧ крӧвать.

1-ой петкӧдчӧм

Занавес восьтігӧн керкаын некод абу. Крӧвать вылын куйлӧ Микол, неуна вӧрӧдчӧ, ружтӧ. Недыр мысти пырӧ Пекла, бура ёна пӧрысьмӧма.

ПЕКЛА (матыстчӧ Миколлань, бура дыр видзӧдӧ сы вылӧ, сэсся нора). Коньӧрӧй. Оз тай, батюшко, войнаыд йӧзтӧ сӧвмӧд... Со мыйӧдз, коньӧр, воӧма... Бать-мамыд, кӧнкӧ, виччысьӧны, тӧждысьӧны, шогсьӧны... Енмыс тӧдӧ, коркӧ волас оз нин гортас... Пыр ӧтарӧ омӧльтчӧ, коньӧр... (Ышловзьӧ.) Ой, господьӧ, коймӧд во нин ӧд кыссьӧ войнаыс.

МИКОЛ (сӧрӧ). Ог, ог, ог... Абу ме... Мун.

ПЕКЛА. Со ӧд, коньӧрӧй, кутшӧм биа. (Ньӧжйӧник.) Миколай, горшыд косьмӧ оз?

МИКОЛ (сідз жӧ). Дзебсьы, дзебсьы!.. Мам, эн бӧрд, локта.

ПЕКЛА. Коньӧр. Мамыс жӧ дум вылас. (Недыр мысти.) Тэ, гашкӧ, ен кӧ видзас, волан на мамыд дінӧ... Менам сёшайтӧй, Гришукӧй, некор нин оз во. (Чышкӧ синъяссӧ.) Регыд, ме чайта, Иванушкоӧс босьтасны ерманечкӧд воюйтны. Коркӧ бара помасьлас оз тайӧ-а?

2-ӧд петкӧдчӧм

Пырӧны Марпа, Пиля да Анна.

ПЕКЛА (пырысьяслы). Ньӧжйӧнджык...

МАРПА (пуксьӧ Пекла дінӧ). Пыр на ӧткодь? Оз на кокньӧдышт?

ПЕКЛА. Некутшӧма, дитяӧй, оз... пыр биа.

ПИЛЯ (пуксьӧ лабичӧ). Кытысь нӧ тайӧ ачыс?

ПЕКЛА. Кытыськӧ тай Печӧраысь висьтасис-а. Война вылысь коньӧрӧс лэдзӧмаӧсь да ог тӧд, аддзылас оз гортсӧ-а. Витӧд лун нин со миянын куйлӧ. Вӧзйысигас шуӧ меным: «Эн жӧ пӧ, бара, тьӧткаӧй, менӧ вӧтлы, гашкӧ пӧ неуна кокньӧдас». Зэв ӧд ачыс, тыдалӧ, бур сьӧлӧма... Кымыныськӧ мамсӧ казьтыліс нин. Ёна, тыдалӧ, сійӧс радейтӧ... (Ышловзьӧ.)

МАРПА. Унатор жӧ, тыдалӧ, тайӧ аддзылӧма нэмнас. Быдтор тӧдӧ. Висьтавны кутас да быттьӧ тэ ачыд тшӧтш сыкӧд ылын-ылын лэбалан. Гӧлӧсыс дзик Гришукыдлӧн кодь, дай чужӧмыс зэв ёна мунӧ сылань... Мукӧд дырйи меным кажитчӧ, быттьӧ Гришукыд сёрнитӧ.

МИКОЛ (сӧрӧ). Кут, кут! Сьӧлӧмӧй сотчӧ... Эн шогсьы.

МАРПА (Пеклалы). Кывзы, кывзы...

МИКОЛ (сідз жӧ). Абу... абу... эз коль...

ПЕКЛА (Миколлы). Миколаюшко, кыт нӧ тэнад висьӧ? Садьтӧм...

МАРПА. Ёна жӧ мыйыськӧ полӧ... Тӧрыт лӧсьыдджык нин вӧлі-а. Бура дыр ми такӧд сёрнитім... Зэв дӧзмӧма озыръяс вылӧ... Шуӧ: «Озыръяс пӧ гӧльяслысь нэм чӧж вир юӧны». Сэсся бара жӧ (ньӧжйӧник) озыръясӧс да сарӧс зэв оз радейт, на вӧсна пӧ, шуӧ, войнаыс лоис.

ПЕКЛА (полігтырйи). Дзик карактерыс Гришукыдлӧн кодь, сарство небеснӧй! (Пернапасасьӧ.)

ПИЛЯ. Колӧ урадниклы висьтавны... Кулӧ кӧ ӧд загреки, Пекла, тэ жӧ мыжман-а. Гашкӧ, тайӧ кутшӧмкӧ лёк морт да?

ПЕКЛА. Морттӧ ӧд первойсяньыд аддзан кутшӧм... Господьӧй, видз урадникысь... Ньӧтчыд ог вунӧд... Мыйта шогсӧ вӧчис сійӧ миянлы. Сы кузя и Гришукным воши... Не урадникыд кӧ, гашкӧ, сёшайт, ӧні на ловъя да. (Синъяссӧ чышкӧ.)

АННА. Зэв кӧ омӧль, даръявны колӧ.

МАРПА. Шуліс тӧрыт Пекла тьӧт да оз пӧ ков. Попъясыд пӧ сӧмын аслыныс олӧны... Кыдз мый вермӧны йӧзлысь пӧ деньга пычкӧны.

МИКОЛ (вӧрӧдчӧ, сӧрӧ). Регыд помасяс. Регыд... Со... со... со...

АННА. Зэв жӧ, тыдалӧ, биа... Кутшӧм висьӧм нӧ талӧн?

ПЕКЛА. Господьыс тӧдӧ. Дерт, татшӧмӧн гортсьыс эз пет.

ПИЛЯ (куритчыны вӧчӧ). Мыйкӧ нӧ кывсьӧ оз Васька йылысь... Оз на кӧсйы гортӧ петны?..

ПЕКЛА. Некод нинӧм оз тӧд. Со тай эськӧ воӧмаӧсь Кузьма Семӧяс да нинӧм оз висьтавны. Шуӧны: Богословӧ на пӧ колины. Ыджыдлун кежлӧ шуасьӧма локны да, код тӧдас сылысь...

ПИЛЯ. Нэм чӧж лои Васькалы заводӧ ветлыны. Пиянтӧ эськӧ велӧдінныд жӧ да мыйкӧ тай эз жӧ удайтчыны.

МАРПА. Ми вок коддьӧмлы нӧ мыйкӧ удайтчылӧ.

АННА. Мыйла? Со тай нӧ Иваныс Пеклалӧн служитӧ.

ПИЛЯ. Шӧрӧ вошӧм жӧ ӧд: сельскӧй писарыд ӧд абу на урадник... Урадникӧдз кӧ эськӧ велӧдчис, морт вӧлі.

МИКОЛ (синсӧ восьтӧ). Мам эз на лок? Тьӧтка, код ордын нӧ ме?..

ПЕКЛА. Микулай... (Сетӧ ва.) Неуна кӧтӧдышт вомтӧ... Кыті нӧ тэнад, коньӧрӧй, висьӧ?.. (Микол юӧ). Ю, ю, кокньыдджык лоӧ.

МИКОЛ (юӧм бӧрын, небыдик гӧлӧсӧн). Аттьӧ тэныд, бур тьӧткаӧй... Менам тэ кодь жӧ бур мам эм гортын. Пыр менӧ жалитіс... Муса мамӧй!.. (Гораджыка.) Эг жӧ эськӧ ме чайтлы татшӧмӧдз воны да... Лои тай. (Сёрнитӧны.)

МАРПА (ставныслы). Кывзӧ, кывзӧ...

МИКОЛ (юрсӧ лэптӧ). Тэнад нӧ, бур тьӧткаӧй, эм абу мужикыд?

ПЕКЛА. Эм на... Богословын ӧні, заводын.

МИКОЛ (сьӧкыда лолалӧ). Тӧдлі и ме заводын уджалӧм... дас нёль арӧн ме мунлі сэтчӧ...

ПЕКЛА (аслыс). Дзик менам Гришук кодь. (Синъяссӧ чышкӧ.)

МИКОЛ (Пекла вылӧ видзӧдӧ). Эг думыштлӧ, кодлы ми сэні тшыг нисьӧ пӧтсӧ мырсим!.. Озыръяслы, озыръяслы вын-эбӧснымӧс вузавлім, тьӧткаӧй. Ми уджалам, а найӧ миян гӧрб вылын йӧктӧны... О! Оз на судзсьы, тьӧтка, миян вынным!.. Сӧмын воас кад и уджалысь йӧз садьмасны...

ПЕКЛА (полігтырйи). Вод, бур мортӧй, вод. Узьышт... Регыдджык кокньӧдас... Оз ӧд позь, кӧнкӧ, тэныд ёнатӧ сёрнитны?.. Вод, Микулай, дитя, вод. Кокньыдджык лоас.

МИКОЛ. Меным ӧні кокньыдджык, тьӧтка!.. Уджалысь йӧзыд олӧ сьӧкыда... Эмӧсь мукӧд пӧлӧс йӧз, озыръяс. На вӧсна киссьӧ ӧні война вылын уджалысь йӧзлӧн вир!.. На кузя жӧ му вылын став шогыс!.. Ставыс озыръяс вӧсна да миян вир юысь сар вӧсна!..

ПЕКЛА (повзьӧ). Сё батюшкоӧй, эн жӧ бара тадзи казьтыв миянлысь югыд шондіӧс, сар-батюшкоӧс!.. Загреки суас ставнымӧс!..

МИКОЛ. Энӧ полӧ... Менӧ ӧні оз нин нинӧм су! Менам олӧмӧй эштӧма нин. Мый ме терпитлі на вӧсна, сыысь омӧльыс ӧні оз нин ло!.. Тэнад нӧ, бур тьӧткаӧй, вӧвлі эз мӧд пи, Ивансьыд кындзи?..

ПЕКЛА (синъяссӧ чышкӧ). Эн нин, Микулай, дойд менсьым сьӧлӧмӧс! (Ышловзьӧ.) Коркӧ эськӧ и менам вӧвлі муса пи да колис тай нэм кежлӧ шогсьыны... Гришукӧй, Гришукӧй... сарство небеснӧй. (Кост.) Уна и синва менам сы вӧсна киссис. Гришукӧй вӧлі сюрӧма люционерӧ, пӧлитика вӧсна... Кӧкъямысӧд во нин кӧнкӧ йӧз муын, сёшайтӧй, куйлӧ, дари ни пӧкаянньӧ... Ловъя кӧ эськӧ вӧлі, ӧні сылы комын кык арӧс... Абу тай ен шулӧма овны сылы!..

МИКОЛ (зэв сьӧкыда лолалӧ). Со аддзан, тьӧтка, тэнад пиыд кужӧма овнысӧ... Абу прӧстӧ ловсӧ пуктӧма... уджалысь-мырсьысь йӧз вӧсна. А ӧні война вылас код вӧсна ловсӧ пуктӧны?.. Озыръяс вӧсна... мед налы водзӧ кежлӧ ещӧ лӧсьыдджык лоӧ... Оз тӧрны му вылад, пыр налы колӧ унджык... (Пуксьӧ.) Но помнитлы, тьӧтка, регыд воас налы пом! Уджалысь йӧз садьмас, сувтас да ыджыд гӧлӧсӧн горӧдас: «Тырмас!» Сэки вӧлись пуксяс тӧлка олӧм му вылын!

ПЕКЛА (полӧ). Вод, Микулай, шойччышт. Эн ёна ассьыд эбӧстӧ видз...

МИКОЛ. Кытчӧдз му вылын кутас овны кык пӧлӧс йӧз: уджалысьяс да дась нянь сёйысьяс, сэтчӧдз оз ло некутшӧм сяма олӧм, сэтчӧдз оз быр тыш да кось!.. (Кост.) Иваныд тэнад тӧлка лоӧ... Ме сылы висьталі нин та йылысь. (Кост.) Ачыд тэ, бур тьӧткаӧй, думышт: ставсӧ вӧчам ми, ставсӧ уджалам ми, а коді нӧ миян вӧчӧмнас красуйтчӧ?.. Коді нэм уджавтӧг кокни олӧмнас олӧ?..

МАРПА. Дерт, эськӧ сідзи да. Мый керан? Он, буракӧ, пӧсӧбит!..

МИКОЛ. Босьтам войнатӧ... Регыд сылы пом... Сэсся сувтас, ёнмӧдчас уджалысь йӧз да чукӧстас: «Став мувывса уджалысьяс, став мувывса эмбуртӧмъяс, ӧтувтчӧй!» Найӧ путкыльтасны важ лёк олӧмсӧ, восьтасны туй югыдлань, ыджыд шуда олӧмлань, коді шусьӧ социализмӧн. Сэки ставыс лоӧ выль ногӧн!..

ПЕКЛА. Страсть тэнсьыд и кывзыныыс. Зэв тай эськӧ бура висьталан да...

АННА. Колӧ эськӧ, ме думысь кӧ, дарйӧдны да...

МАРПА. Ланьт!.. Кывзы... Ставсӧ збыль висьталӧ.

МИКОЛ. Коми йӧзыд кӧн олӧ?.. Пемыд сьӧд вӧр шӧрын. Коркӧ татчӧдз на социализмлӧн югӧрыс воас! Му пасьта сійӧ кутас дзирдавны куслытӧг!.. Челядьясӧс... медъёна... колӧ видзны да дӧзьӧритны... Миян помысь нинӧм нин виччысьны... Лоӧ, мися, ставыс выль ногӧн... Школаясыд мӧд пӧлӧсӧсь лоӧны. Ӧнӧдз коми челядьӧс первойсяньыс велӧдлісны рочӧн... чегъявлісны, тшыкӧдлісны став том олӧмсӧ… (Кутӧ морӧссӧ кинас, водӧ, ружтӧ.) Ог вермы, ог, ме чайта, удит висьтавны...

АННА (Пеклалы). Висьтасьны тай со кӧсйӧ...

ПЕКЛА (Миколлы). Микулай, он-ӧ висьтась? Гашкӧ, кокньӧдас. Попӧс ог корлӧй?..

МИКОЛ (кинас ӧвтӧ). Эн гарав, тьӧтка, сы йылысь!.. Некутшӧм поп ни ен оз кокньӧд менсьым олӧмӧс! Мый нӧ сійӧ попыд? (Шензьӧны.) Сійӧ ӧд ас пондаыс попалӧ... Найӧ тшӧтш озыръяскӧд да саръяскӧд пемыд йӧзӧс ылӧдлӧны!.. А енмыд сійӧ абу...

ПЕКЛА. Сё батюшко... Кыдзи нӧ татшӧм кывъяс шуалан?

МИКОЛ. Ме ог эскы енлы. Озыръясӧн да попъясӧн лӧсьӧдӧм енмыд видзӧ сӧмын озыръясӧс, на вӧсна тӧждысьӧ. (Юрсӧ кутӧ кинас.) Ок, унатор колӧ висьтавны да ог вермы... Бур тьӧткаӧй! Ивантӧ эн жӧ торк олӧмсьыс... Ми сыкӧд сьӧлӧмысь войдӧрлун сёрнитім... Зэв сійӧ тӧлка... Аттӧ, кутшӧма сьӧлӧмӧй висьӧ! (Вунӧдчӧ.) Мамӧй!.. Муса мамӧй! Эн шогсьы!

ПЕКЛА (водтӧдӧ). Бара коньӧрӧс топӧдіс... Водышт, водышт...

МИКОЛ (водӧ). Виччысьӧ!.. Регыд!.. Мамӧ (Кылӧ «Смело, товарищи, в ногу» сьылӧм.)

МИКОЛ (дрӧгнитӧ, юрсӧ лэптӧ). Кывзӧ! Кывзӧ!.. Мый нӧ тайӧ? (Сьылӧм матыстчӧ.) Вӧля йылысь!.. Кывзӧ!.. Кывзӧ!.. (Кӧсйӧ чеччыны крӧвать вылысь.) Ме сэтчӧ жӧ!.. (Нетшкысьӧ.) Воӧма!.. Воӧма!.. Лэдзлӧ менӧ!..

ПЕКЛА (кутӧ). Ланьтыштлы... Микулай!..

3-ӧд петкӧдчӧм

Пырӧ Иван зонъяскӧд сьылігтырйи.

ИВАН (нимкодясьӧ). Микулай!.. Мамӧ!.. Революция!.. Сартӧ чӧвтӧмаӧсь... Ставсӧ вежӧмаӧсь... Вӧлисти миянлы олӧмыд воссьӧ!..

ПЕКЛА (пернапасасьӧ). Благӧслӧви кристос!.. Мый нӧ тэ сӧран?..

МИКОЛ (чепӧсйӧ). Збыль?.. Збыль?.. (Сьӧкыда лолалӧ.)

ИВАН. Збыль... Правлениеӧ гижӧд воис...

МИКОЛ (долыда). Югыд шондіӧй!.. Дыр жӧ ме тэнӧ виччыси! (Шог пыр.) Кыптан тай эськӧ, зарниӧй, да менам олӧмӧй кусӧ... Сӧмын тайӧ заводитчӧмыс на. Медъён революция гыыс водзын на... сійӧ кыптас, паськалас став мирас... (Кост, ышловзьӧ.) Мамӧй!.. Муса мамӧй!.. Ме ӧд тэнад пи!.. (Ставныс шемӧс.)

ПЕКЛА (видзӧдӧ ӧти здук). Тэ... Гришукӧй... Ловъя?.. Сьӧлӧмшӧрӧй! Муса пиӧй!.. (Кутлӧ бӧрдігтырйи.)

ИВАН (сідз жӧ). Тэ менам вокӧй! Гришукӧй!? (Матыстчӧ, йӧз тшӧтш жӧ матыстчӧны Гришалань да шензьӧны.)

МАРПА. Ме тай шулі...

ПЕКЛА. Сёшайтӧй! Эштылі жӧ ме тэ вӧсна шогсьыны. Мый понда нӧ тэ, зарниӧй, та выйӧдзыс воин? (Шогсьӧ.)

ГРИША. Сьӧкыд меным, муса мамӧй, ставсӧ казьтывны... Дас сизим во нин ӧд ме тіянӧс эг аддзыв, уна мука тӧдлі... Кӧкъямыс во нин менӧ лыддяд кулӧмаӧн... (Тшӧкыда лолалӧ.) Мамӧ... кызь во кежлӧ менӧ катарга вылӧ... мӧдӧдісны... Квайт во сэні песси... Сэсся колян во пышйи... Во чӧж гортӧ локті... йӧз нимӧн... дзебсясигтырйи... нюръясӧд, вӧръясӧд. Став дзоньвидзалунӧй воши... Гортӧ вои да эг лысьт висьтавны... сюрӧмысь... полі. Мед эськӧ, мися, бӧр оз кутны...

ПЕКЛА (шога). Сьӧлӧмшӧрӧй!.. Дитяӧй!

ГРИША (сьӧкыда). Мамӧ, эн шогсьы!.. (Кост.) Ӧти олӧм кӧ вошӧ, сё олӧм выльысь чужӧ!.. Уджалысь йӧз вӧсна, мамӧ, кокни кувнытӧ... Сӧмын тадзтӧ кувны сьӧкыдджык... Косьын, косьын кӧ — нӧшта кокни кувнытӧ. (Сьӧкыда лолалӧ. Иванлы.) Тэ... муса вокӧй!.. Кыдз верман... тӧждысь уджалысь йӧзлы... кокньыд олӧм лӧсьӧдӧм вӧсна. Накӧд мун!.. Пет найӧ вӧля вӧсна косьӧ... Косьыс эз на ӧд помась, сійӧ ӧзйӧ, ӧзйӧ яр биӧн. (Сьӧлӧм дінас кутчысьӧ.) Эн пов... мун водзӧ... воссьӧм выль туйӧд!.. Мун!.. мун водзӧ... (Гораа.) Югыдлань! Выль олӧмлань. (Бура дыр кызӧ, сэсся киргӧ да ланьтӧ. Кулӧ.)

ПЕКЛА (видзӧдӧ шемӧса). Гришукӧй! (Уськӧдчӧ.)

ИВАН (копыртчӧ). Вокӧй!..

ПЕКЛА (кывзӧ Гришалысь сьӧлӧм тіпкӧм). Оз тіпкы... Гришукӧй!.. Мый нӧ тэ?.. Гришук? (Кост.) Кулӧма! (Ньӧжйӧникӧн.) Кулӧма сьӧлӧмшӧрӧй!.. (Пернапасасьӧ.) Прӧсти благӧслӧви, Гришукӧй. (Сыркъялӧмӧн бӧрдӧ.)

ИВАН (юрсӧ лэптӧ, видзӧдӧ вокыс вылӧ). Кусін, муса вокӧй! Шонді петігӧн, зарни дзоридзӧй, косьмин!.. (Гораа.) Гришукӧй, мый понда тэ косьмин, сійӧ некор оз кус!.. Ті ӧзтінныд, ми паськӧдам. Узь долыда, уджалысь йӧз вӧсна тӧждысьысьӧй!.. Бурӧн казьтыласны тэнӧ найӧ!

Ылісянь матысмӧ кыпыд музыка.

Занавес.