Эрзянь Мастор/2006/03/Улевельтькак Иерэнь кондят...

←План работы ТОЦ на 2006г

Эрзянь Мастор, № 3 (227), 9 февраля 2006 редактор Нуянь Видяз, Кшуманцянь Пиргуж Улевельтькак Иерэнь кондят... Ёвтнема. сёрмадызе Нуянь Видяз

"Монь вайгелем" - лиссь од книга→

Статья на сайте газеты: № 227, 09.02.2006, Улевельтькак Иерэнь кондят... Нуянь Видяз. Ёвтнема.

 

Улевельтькак Иерэнь кондят... Нуянь Видяз. Ёвтнема.

 

←Начало в «ЭМ» 2/226

Апак учо Иер кувакасто лекстясь ды тоцк лоткась. Оймсеме? Венелев молемазо сась? Учотано — арась, учотано — арась. А арсияк. «Мезе-бути лия, аволь венелькс», — ютась прявам.

— Но-о-о, Иер, но-о-о, — чевтестэ, пеедькшнезь ладсо мерсь ветицясь ды весть-кавксть ноцковтсь ведьметнесэ. Букась марикскак эзь тее. Прок лемензэяк стувтызе. Аламос аштезь таго «но-о-о», каршонзо теке — а сырк, а сорк. «Вантака, теке арастянокак», — пеняцязь пшкадсь Митя лелям лангозом варштазь.

— Но! Но! — эзь кирдеве, ацирьгадозь серьгедсь «прявтом» ведьметнесэ варсодемстэ акунсолыцянть каряз ланга. Лезэвтеме. Пильге чалгавксонзояк эзизе полавто. Аштесь таркасонзо, мерят, пильгензэ каназкадсть.

— Варчик тень, — венстинь кинть чиресэ эрьбань куракшсто седе курокке керязь суронь эчксэ илёв.

— Эрьга, — маринь нусманясто каршо; Митя саизе кедьстэнь «кармавтомканть» ды аволь пек виевстэ, ёжонь марязь, зярыяксть аваждызе ракшанть пильге ланга ды лия таркава. Таго теке: эзь киртято ве санозояк. «Каня овсе уш а марят сэредькс?» — токимим седей ризкс пайстомо буканть лангс ванозь. Арась, эзь маря. Монь эзь маря, монь мелявксом.

Ютынь икелензэ. Юкстия ажия пес сюлмазь панст ведьменть ды таргия чирькентень пезнавтозь чобластонть. Вадяшия ускицянок келей пондакш конянзо ды «но»-ть дёлязь, кольневтезь ладсо ёвтнезь, пединь ведьмесэнть тердеме-ускомо икелев. Эзимим чарькоде. Эзь варштая лангозом. Прок кулось. Стядо. Ней мезе теемс?

Ушодынек «вельмевтемензэ» кавто ёндо: мон ноцкиян панст новтасонть, Митя лелям «каванякшны» Иерэнь удалдо — ведьметнесэ ды илёвсонть. Стяконь мелявкст! Чавт куш куломозонзо — чаво. Аволь путомс вий, нежедемс, ноцковтомс, сыркак а теи.

Чарынек-кармавтнинек «тракторонок» перька час малава. Аволь ансяк «кайсинек» тензэ, кортынек, энялдынек, тердезь, молемс мельган, андыя кши кочомонокак. Ялатеке тевенек эзь лисе. Аштесь Иер ажиятнень ютксо — теке кежть пандсь.

Мезе теемс? Кода улемс?

— Сави шождалгавтомс, — арсезевезь ды стакасто лекстязь ёвтызе мелензэ Митя лелям ды ёртозь ёртынзе ведьметнень буканть лангс, — лиякс, вантака, мезеяк а лиси.

Верде алов бухаинек чочктнеде зярыя. Кадынек пель улав. Кеминек: тень уш Иер изнясы. Мезе те сонензэ?

Саинь лангстонзо ведьметнень.

— Но-о-о, Иер, но-о-о, Нузяй!

Бабань пеште! Содась майсевтицянок текень: а сырк, а сорк. Аштесь, мерят, почо видьс ваясь модантень.

— Сави таго зярыя валгстомс, — меринь кежтнень кирдезь ды ёжонь каладозь.

— Сестэ уш чаво крандаз кадови. Сон мезе, ормазкадсь? — машнетезь серьгедсь Митя лелям ды вырк кузсь крандазс. Мон мельганзо.

Кадынек ниле-вете, седе эчктнеде, чочкт.

Ней уш...

Виде, сюракшонок, прок лангсонок пейдезь — изнинь! — тейсь тарск ды чи-и-корк улавось сыргась таркастонзо, буканок састо эскелязь поладызе кинзэ.

Ну и тевть...

Вана пандопряськак.

«Мезе, ниле-вете чочко марто седе тов, кудов? Кадсынек лиятнень? Эли кандтнемат сявдикс лангсо? Васоло. Пель вайгельбешка. Вельть уш псить кармить пенгтне. Теяк: кандомо туемстэнек буканок а туи-сези кудов?» — кашкасть кевкстнематне прясом.

— Туи-арась, карматано кандтнеме, — теке маринзе арсемам, путсь пе кавтолдоматненень эзналям ды туинек мерезенть топавтомо.

Састь сундерькст. Тия-тува пувавсть-вельместь оланя тештинеть. Маряви, цитнить-конштнить ды паронь арсезь тошкить миненек: «Капшадо, цёрат, капшадо! Кизэнь весь аволь раужо сёксень. Пачкодиде кудов куш ашолгадомадо икеле». Псилгадынек. Оно зяро карязт яжинек. Чинь псинть матрамозо дух а маряви.

Кепедьсынек, петнес кундазь, кандонть, путсынек лавтов лангс ды сеедьстэ-стакасто лексезь, лунтик-пентик икелев, пандыненть тёкшкес, косо учи, кемтяно, буканок. Зяро истят «»рейст» теинек? Эзинек лово. Корты эйстэст лангсом майкась — хоть пурдык, лоподсь сурень пес. Кецневтсь лиясь. Васня машнетинек, рангомас пачколинек, мекс ракшанок кевензась, таркастонзо а сыргави, ней мекевланг — кецнинек аштемазонзо, зярс тукшнынек алов. Окойники носкозь-пувсезь пачтинек меельце кандонть. Модас апак нолдтне кепединек ды кода эряви аравтынек улавонтень.

«Илязо таго ордадо...» — токимим навола кельме мельне ведьметнень саемстэ. Сюк Инешкинтень — истя эзь лисе. Иер нежедсь пильгсэнзэ модантень, венстизе, ускозь, сивексстэнть прянзо ды крандазось чикор-чикор сыргась таркастонзо.

Ва-ай! Прась, марявсь, лангстонок аонкставиця сталмо.

Шкась моли. Вана Иерэнь эскельксэнзэ седе келейгадсть, тусь седе эрязасто. Минь дубор-габор мельга-мельцек кузинек чочктнень лангс.

И на Тихом океане
Свой закончили поход... —

кеняркстонть, сиземанть лангс апак вано, серьгедсь верьга вайгель Митя лелям — колызе моросонзо вень удыця каштмолеманть.

...Ёгань ды Микеень кудосост вензэ перть палсь тол. Эзть удо. Учость цёраст, вирев пенгс туицяст. Сыненст мурдамоль-самоль чинзэ валгома шкасто. Мадсь чипаесь. Сундерьгадсь. Сась ве, кармась ашолгадомо. Цёратне яла арасельть, арасельть...

 

*  *  *

«Иердема» ды эйстэнзэ лисиця «иердамс» валтнэде карминь содамо допрок шержейгадома ды чувто пряс кадовикс сормсевезь умарекс шкастом. Секс, чарькодеви, а содылинь Иер буканть лемдензэяк. Валкстнэва азгондямстон-шатамстон эртевинь эйзэст ды эль эзинь аймельгадо кецнемадонть: «иердемс» — теемс мезеяк киньгак апак кунсоло, мезе лангскак апак вано, эсеть ладсо-мельсэ. Рузокс — «упрямство», «упрямиться». Те рузокс. Теде соды эрьва-эрьва пакшась. Эрзякс вана... Секскак ёнкставинь талнозевинь мельденть: кодамо сюпаволь эрзянь келесь валсо-гайтьсэ!

Виде. Валонть зэмензэ а содылия. Сень кис ламоксть автобуссо-косо, мик кудосояк, савкшнось марсемс, седе сеедьстэ рузтнэнь кургсто: «мордовское упрямство», «упрямый, как мордвин». Койсэнь, те малавгак а виде. Васняяк, кие те «мордвинэсь»? Эрзятне? А кемеви. Уливельтькак икеле, умок-умок эриця эрзятне, покштянок покштяст Иер буканть кондямо иерат-иердицят, Модаст, Чачома Масторост, келест ды кортамост-морост лия раськенень аволизь максо, аволизь тонго пряст ят ёнксонь ашконтень.