Эрзянь ёвкст (М. Е. Евсевьев, 1928)/16
ЯГА-БАБА ДЫ ТЕЙТЕРЬНЕ.
Мольсть тейтерьнеть вирев умарьс. Пештизь паргинест и тусть кудов. Ве тейтерьне кадовсь вирьстень. Сон якась-якась вирьганть, мусь кудыне. Совась кудостень — кудось чаво. Тейтерьнесь урядызе кудонть; уштызе — явавтызе, соньсь кекшсь каштом удалов. Се кудось ульнесь воронь. Састь вортнэ. Ваныть — кудост урядазь, кудосонть кияк арась. Сыре ворсь мери: „Ки урядызе кудонть — лисезэ. Ули моньдень сыре — улезэ тень патякс”. Тейтерьнесь эзь листь. Ворсь таго мери: „Ки урядызе кудонть лисезэ! Ули моньдень од — улезэ тень сазорокс”. Тейтерьнесь лись и кармась вортнэнь марто эрямо. Вортнэ симсть-ансть эснэнзэ, сон пидесь-паньць тенст, кудо урядась. Тейтерьнесь вортнэнь мельс тусь и кармасть эснэнзэ вечкеме.
Вортнэде аволь васоло эрясь яга-баба. Марясь сон тейтерьнеденть и арцесь сонзэ ёмавтомонзо.
Тусть ортнэ вирев. Сась яга-бабась и мери: „Тейтерьне, мон сынь вачамот; вана тенть каркске кандынь”. И карксызе тейтерьнесть. Ансяк карксызе — тейтерьнесь кулось.
[ 63 ]Састь ортнэ — тейтерьнест кулозь. Аварьцть, аварьцть кисэнзэ, кармасть калмамо пурнамонзо. Ансяк укстизь карксонзо — тейтерьнесь вельмесь. Радувасть ортнэ. Радувась тейтерьнеськак.
Омбоце чистэ таго тусть ортнэ. Сась таго яга-бабась и каясь тейтерьненть кирьгас эрьк. Тейтерьнесь кулось. Састь ортнэ — аварьцть, аварьцть тейтерьненть кисэ, кармасть эснэнзэ калмамо пурнамо. Каизь кирьгастонзо эрькнень — тейтерьнесь вельмесь.
Колмоцеде тусть ортнэ. Таго сась яга-бабась и макссь тейтерьнестень пилекст. Тейтерьнесь ансяк пилекстнэнь путынзе пилезэнзэ — кулось.
Састь ортнэ. Велясть, велясть тейтерьненть перька. Шлизь нардызь тейтерьненть, — пурнызь калмамо, пилекснэнь пилестэнзэ эсьть чаркотть таргамс. Тейтерьнесь эзь вельмек. Ортнэ тейсть сиянь кандо-ласт, путызь эзэзэст тейтерьнесть и путызь кандо-ластнэнь пиче пряс.
Юты пиченть вакска бояр цёранзо марто. Цёрась неинзе кандо-ластнэнь и мери: „Тетяй, давай валтасынек кандо-ластнэнь, — казна ули, тонть улезэ. Тейтерь ули — монь улезэ.” Валтызь — потсост тейтерь. Таргизь пилестэнзэ пилекснэнь — сон вельмесь. Цёрась саизе тейтерьсть никс и чечемень чис эрить вейсэ.