Эрязденть арсезь (2010)/Кенярксонь чадыведь ды калавтозь кемемат
[273]
| Кенярксонь чадыведь ды калавтозь кемемат |
...Прядовсь медьковось. Ушосонть маней ды кизэкс пси. Пиземетне шлизь менель чачонть, сэньштенть, сон ваньсь-[274]кадсь седеяк. Мелявкссо-чийнемасо, эзть марявгак, ютасть кизэнь седей ковтне. Чинь-омбоцень ютазь сыть эрьва ендо — Пензань, Самарань, Оренбургонь. Ульяновскоень, Эрзянь Масторонь ды лия-лия ёнкстнэстэ — эрзят ды мокшот, зярыя пингень ютазь панжови Инекужось, сыретне-одтнэ кармить арсеме мезе теемс келенек идемга, кода эрямс тенек седе тов.
Вана учовсь каршо чиськак. Вокзалсо, редакциятнесэ, Культурань кудосонть, сонзэ икеле вастовомат, чамань келес мизолкст, содавиксэкс теевемат, покшчинь оймеёжот... Ламот састь Мордовиянь ды СССР-нь томбальде. Сарансо кой-кить васенцеде.
Умарьковонь 3-це чи. Менельксэсь обуцянзо-коронзо эзизе полавто. Седеяк, марявсь, манейкс ды кенярксонь явшинякс. Культурань кудонть 1 [келе. фойесэ, залсо нивтордыця вановтт, кецнемадонть мизолдыця турват, жойниця вайгельть. Л амот аватнестэ оршазь эрзякс. .Аволь аламо эрьва кодат покшчить нейнинь, кецнемань истямо чадыведь — васенцеде. Мезе теевсь сыцятнень марто? Мекс коштоськак, маряви, тустомгадсь эрьгела, мештьс а кельгиця ёжотнеде? Паряк, иредстинзе ломантнень «олячи» ламбамо валось?
Залось тыц. Вейке тёжа кавтосядт таркатнестэ чаво тарка арась вейкеяк.
Шказо ушодомс.
Гайгезевсь, пештизе залонть, теке менельстэ валгиця, нусманя моро.
Масторавась лужакадсь, |
Лужакадсь Масторавась пиземень аразде. Седеем монь вана арси-корты лиядо: лужакадсь келенек пес пачкодемадонзо.
[275] Морось энгамсь. Сценанть икеле чирес лиссть Инекужонь панжомадо яволявтомо артистэсь Храмов Миколь ды «Чилисема» журналонь важодицясь, «Масторава» вейсэндявксонь ушодыцятнестэ вейкесь Маризь Кемаль. Кавонест прясто пильгс оршазь эрзякс. Кецневти, седей вити Миколень лангсо эрзянь викшнезь ашо панарось, седеяк мазыйстэ кувтолдыть Кемалень руцянзо-палянзо, мазыйдеяк мазый пангозо. Якстере, ашо ды раужо тюстнэ сюлмавить мазый пусмокс. А стяко, а стяко Евсевьев усксесь авань оршамот Парижев! А стяко максозель сынст мазычист кис сырнень медаль.
Кочкави президиум. Мон — секретарь.
Кортамотне.
1. Духовная культура эрзян и мокшан и задачи «Масторавы» (Надькин Д. Т.)
2. Эрзянский и мокшанский языки, их статус.
3. Мордовская литература, искусство и культура.
4. Прошлое, настоящее и будущее мордвы.
5. Экология, экономика, демография в контексте мордовской кулътуры. Проблемы школы.
6. Устав и Программа «Масторавы».
Рузокс. Ков молят... сави. Кунсолыцятне — фкя раськень ломанть. Кортамс сави фкя кельсэ. Надькин, мерема, кода ламот лиятнеяк, кортась эрзякс.
Ютко шка. Ютан кувака коридорганть — морыть, киштить; лисинь кенкш лангс, ушов — морыть, киштить; совинь мекев ды кузинь омбоце этажонь фойес — ... киштить-морыть, налксить-эльнить баянт-гармоният, седе лия таркасо раксить, сеерить, симить брагадо. Пря шныть вайгельсэст, морыть-киштить Самарасто, Пензасто, Ульяновскойстэ, Оренбургсто сазтне. Эстониясто ансамблянзо марто састь Татарстанонь цёрась Данилов Виктор... Вай, козонь понгинь? Кодамо планетас? Косан? Марявсь тень, ломантне азмангадомо кармасть, иредсть кенярксстонть ламо иень перть лепштязь эрямодонть мейле олячис менемадонть. А концертэсь, концертэсь! Истямо Сарансо монь эрямга зярдояк арасель. Ветясть, морасть, ёвтнесть, ловность ансяк эрзякс ды мокшокс. Истят дюниянь тевть неть стенатнень ютксо, Сарансо зярдояк, зярдояк эзть невтневе.
[276]
* * *
Эх, киштицят-морыцят! Куш киньгак превс мельпене соваволь — юты шка ды прят карми лазнотомо янксемадонть: эрямосонть стякодо мезеяк а максови, эряви пандомс эрьва штелькскенть, эрьва панкскенть кис. Сави, сы шка, пандомс те чадозь чадыця эрьведеманть, те концертэнть кис покштояк покш питне — олячинь мекев саема.
Эзимизь содавтне неть арсематне сестэ. Кеман, Надькинэньгак, Маризь Кемаленьгак, лиятненьгак. Эринек ве чинь эрямосо. Кеминек: «эесь сыргась», мекев а велявтови. Мекс човоньсэ превейтяно? Ярмакт зяро-азяро макссть, максызь залонть, лездасть серьгедемс ломантнень, президиумсояк ульнесть кой-кить олячинь сайсицятнеде. Те мезе, мерят стякодо? Эряволь тешкстамс ды чарькодемс: ютыть ковт-иеть ды сынь, «менельсэ эрицятне», ледстясызь «элякалематнень», пандовтсызь эрькень келешка ды эрькекс жойниця кецнеманть питнензэ. Арась, эзинь арсе, кода лиятнеяк, валскень чиденть.
Ютасть се кенярксонь коволдонть мейле комсь иеть. Кортыть: «Ломаненть содамга сэвема пондо сал». Виде. Кеменде ламо иеть эрявсть чарькодемс «Масторавань» пургондамсто-пурнамсто нолдазь сехте покш ильведьксэнть — эзинек арсекшне, кода а теевемс «виевтнень» икеле мендявозь аштицякс.
1990-це иетнень ушодксост — лыкиця-чатыця шка. Пукштор-пукштор каладсь, яжавсь малав кавксоньгемень иень перть вачказесь. Масторонь ды тескень ветийтне зярс-бути ёмавтокшнызь ванома ёнксост. Таймазкадокшность, теке валскень кельме чавокшнынзе, эзть сода мезе, кода теемс, кона ёнов кирдемс ажиятнень, мезес нежедемс. Сень кис эзть талакадокшно покш ёрокчи марто ванстыцяст (сестэ лемезэль КГБ), тарскак эзть тее, содасть мезестэ ушодомс: вейсэндявкстнэнь, демократиянь ушодкстнэнь, пурнамс-сэрнямс, кода нарвицька, ярмаксо эждиця сёлмост алов.
Эрзянь раськенть, интеллигенциязо, аволь ве пингень перть ламодояк ламо «зачисткатнесэ» истя чуролгавтызь, истя човсизь ломанекс ды раськекс марямонь ёжост, эль лексить. Секскак «операциянть» — теемс сынст, васняяк прявттнэнень, менчевицякс, пикске вельде ветсевицякс — топавтомс ульнесь вельть шождыне.
1992-це иестэ, ансяк омбоце пельиень ютазь «Масторавань» Ине-кужодонть мейле, та-косто сась-теевсь «Съезд мордовского народа». Ютавтови Промксозо. Пурныцянзо-ветацянзо, васняяк, [277] Республикань «вере этажтнесэ» эрицятне. Прявтокс зярс кочкави Надькин Дмитрий. Истя «Масторавась» кирякстозель латко чирес. Калмазель. Виде, васенце «мордовской съездсэнть» зярс ульнесть эсь мельсэ, тей-тов апак ванно кортыцяткак, ульнесь «верцетнень»-«алцстнень» ютксо кельсэ-валсо тюремаяк. Кулисатнень удало аштицятнень мельс те эзь тукшно. Эрявсь ванськавтомс «Съездэнть» лиякс арсицятнеде, теемс сонзэ новта вельде кирдевицякс. Онкстямс.
1992-це иень медьковонь 15-це чистэ, ниле ковонь ютазь «Съездтэнть» мейле, апак учо Суоминь масторсо кулы Надькин, «Масторавань» теицятнеде вейкесь, весемеде виевесь. Вельть уш поэтэнть моронзо лиятальть, вельть эсензэ вайгельсэ кортыцянь! Документэнь коряс «урядызь», а мерят. Те чарькодеви превсэ сэредицяненьгак. Уликс тевтне вана кортыть самай теде — «урядамодонть». Кода илязо уле, мезес бажасть — топавтозель, вейсэнь тевтне, вейсэндявкстнэ, «сьездтнэ-мезтне» теевсть кунсолыця, ков эряви кучневиця цёрынекс, понгсть власттнень кедькоморо, сынст превсэ арсицякс, сынст кельсэ кортыцякс. Ведьметне понгсть «кемевикс» кедьс ды ветясть, ветить раськень «вельмевтицятнень» ков тенст эряви, ков мерить ласте аштицятне. Меремаст сынст содави: теемс вейке кель — рузонь.
Вана истямо панжиковонь балягакс панжовиця «Масторава» вейсэндявксонть уцясказо. Арась, эзть максо тензэ эрямс, кецневтемс седейть, нурькинель пингезэ. Видьметне тензэ эзть саеве. 2005-це иень чадыковонь 28-це чистэ топодевельть тензэ кеветее иеть, 2010-це иестэ — комсь. Минденек, «Эрзянь Мастор» газетадонть башка, те валдо, кемемань кандый датадонть валгак кияк эзь ёвта. Те корты ламодо.
Нолажтсь латко чирес лиядояк.
1989-це иень «Масторавань» пурнамонь васень читнестэ-тарготнестэ Шарононь Сандра ды Маризь Кемаль макснесть мель теемс эрзянь вейсэндявкс. Эрзянь «Масторава». Те пек видель. Ансяк кияк юткстонок, видькстан, монгак, сынст эзинек кунсоло. Те ульнесь покштояк покш ильведькс. «Мокшотнень марто вейсэ, «марса» седе виевтяно!» — кирдевсь превсэнек. Неть «марсатне» ды «виевтянотне», ламонь кувалма, калавтызьгак, яжизьгак кудонть, конань лазнэнь-лазнэ, чочкинень-чочкине пурнакшнызь ды мейле стявтокшнызь эрзятне. Минсь, эсенек кедьсэ-превсэ куломанть совавтокшнынек те кудонтень.