Эрязденть арсезь (2010)/Кие казни ёрокчитнень?
[9]
| Кие казни ёрокчитнень? |
Перкайтне — шабранок. Олгсо вельтязь покш кудост пешксе ломанде: шабрат, ялгат, малавикст, эйкакшт, покшт. Перкайтне пурнасть-сэрнясть ды течи туить уцяскаст вешнеме васоло-васоло масторов, кодамо-бути Амур ёнов. Ломантне пуромсть ильтемест.
Сюпавольть туицятне, седеяк вадря эрямонь вешницятне. Кардазост П-буквакс. Покш-покш. Куншкасонзо — лисьма. Куш сядо скалт симдть. Кудось ды кардтнэ, виде, вельтязь шкадонть раужкадозь олгосо. Авам панжизе ушов кенкшенть, ды совинек тенст кардазонь пачк ютазь.
Сыцятнеде ламот аштить озадо эземсэ, лиятне — стядо. Цёрань, авань кортамот ... Кодак соват, вановтот эшкеви стенасонть понгавтозь конёвонь картинанть эйс.
... Теле. Ласте ардыця ушмант. Ахолить торосост — панить, а нолдыть, ков молевельть, ламодояк ламо цёраломантнень. Кавто ёндо телень якшамо сувсо копачазь кевень сэрей-сэрей кудот. Ушманокс оршазь вейке ластесь нучкась камбразстонзо, кепедизе торонзо ды норови керямс икелензэ празь цёранть прянзо. Тона сонзэ ванстомга аравтызе кедензэ. Полгаря сельмсэнзэ тандадома ды энялдома. Ловонть ланга пракшнозь маштозь-томбавозь ломанть. Таркань-таркань ашось артозь верьсэ...
Мекс Перкайтне кадокшнызь эрямо юртост, чачома масторост, мезе тенст эзь сатно, уш ней кияк тень а ёвтасы. Сындест мейле, юртсост эри-ашти уш омбоце кудо. Теяк сыречиденть судонзо нолдызе.
* * *
Косто саеви кодамояк тевсэ ёрокчись? Талантось? Косто, кодамо лисьмапрясто сонзэ амольдямс? Яла мерить: а мезть пря яжамс, ёрокчитнень Пазось явши. Истя меремс — мезеяк а [10] меремс. Улема, эйдесь чачи истямокс. Мекс вана «истямокс» — ёвтамс а шождыне. Мекс, видеяк, ламодояк ламо неезенть ютксто превезэнь кадовсь самай се картинась?
Мейле уш, якшамо-пси аволь аламо телетнень-кизэтнень ютазь, чарькодекшныя: стенас педявтозель «Кровавое воскресенье» картинанть репродукциязо, мельсэнь кирдевсь эйсэнзэ невтезь ломантнень кежест, пелемаст, куломаст...
Надяй патянь валонзо коряс, Перкайтне тусть велестэнть «ярмаков» эрямонь вешнеме 1938-це иестэ. Монень ульнесть, тагояк мерян, ниле иеть. Зяросо, лиси, «сыргозинь» ды ушодынь совамо эрьва мезде пешксе эрямонтень.