Эрязденть арсезь (2010)/Молевлинь умбравс, ды...
[40]
| Молевлинь умбравс, ды... |
Чизэ кузсь бодидень кудост удало сэрей, оска пря пекшеденть верев. Тосто уш ахоли тень! Вальманок ало лугавтомо таркинесэнть «сокан» вейсхозонь кувака-келей пакся. Лезды тень лембесэнзэ мизолдозь ахолиця валскень чипаесь.
«Трактором» — очкинень кондямо кшниперькс. Эйзэнзэ ладсинь болтт-мезть. Те — моторозо, вана те — те трактористэнть озамо тарказо. Чаровтомо? Гусеницавтомо? Мейле мезе? Кажось а покш! Сень кис, кунсолок, кунсолок, кода урны! Ур-р-р... Шкань-шкань, зярдо «сокапенчтне» туить алга, стакачиденть мик цирнезеви. И-и-и...
Сокамс кадовсь аламо. Ютан зярыяксть мекев-васов, ды паксям ули прядозь. Ардан «кузницяв». Шказо. Тозонь сыть лиятнеяк. Эряви керосин каямс, ваднемс, витнемс мезеяк, анокстамс «тракторонть» вандынень.
[41] Эзия редяяк, сась ды стясь вельксэзэм Миша ялгам.
— Адя умбравс! — сезизе пшти вайгелезэ урномам. — Просикев...
— Ур-р-р! — каршонзо. Марикскак эзинь тее.
«Каня а неят, сокан?» — ютась прявам. Монсь керш кедь сурсон невтнян пильгень лангс. Сынь таргозсть вачо аштематнеде, цитнить, теке суликань. Таргозьксэсь, содан, чамасонгак. Васов молемась... А пачкодян.
Прядыя паксянь сокамонть. «Трактором» лоткась урномадо.
— Азё, Миша, ськамот. Моненьгак кандт зярыя лопинеть, — пшкадинь лавшо вайгельсэ. — Вельть уш васоло Просикесь.
— Кандан, муиндеряй, — нусманясто мерсь ялгам ды, кода-бути чиремкшнезь, прянь нолдазь, тусь кудост ёнов.
Сонензэяк васов молемась...
* * *
Война...
Мекс сонтемензэ ломантне-раськетне кодаяк а эрявить? Ламонь содыйтне ловизь: мода-масторось, маряка, эрясь апак тюре ансяк колоньгемень-ниленьгемень иеть. Косояк ды леднить, косояк ды верь валыть, косояк ды повсить, лазныть, пултыть... Келя, истя, тюрезь, вейкень-вейкень маштнезь, ломантне эскелить икелев, седе ванькс-паро эрямос, превиить, капшить покш культурас. Келя, вейкень-вейкень апак разде, апак сезне, икелев молема а ули.
Мекс а арсеви лиядо: мезес пачтьсы те самай «молемась», те самай «прогрессэсь» мода-масторонть ды эрицянзо? Мекс икелев капшамсто а варштамс удалов, ютазенть лангс?..
Просик...
Те Пичепень паксянть трокс таргавозь колмо-ниле метрань келесэ кепедезь модань леха. Сон мольсь Сарансто саезь Симбирскойс. XVII-це пингень омбоце пелькссэ, Казаненть саемадо мейле, Алексей рузонь инязорось теевтекшнизе те буенть масторонзо келейгавтомга. Орданьбуесь, чачома велем, сонзэ томбалень. Рузонь масторс, лисни, совавтозь арасель.
Сеть умонь шкатнестэ касыль тия, веленек пева, а ютавиця тусто вирь. Чувттнэнь сявордсть буенть кувалт кода понгсь — илязт ютаво рузонь масторонть ёнов ятт. Васняяк, ласте. Тень эйстэ теевськак «прбсск» валось. Тесэ валсть ливезь ды верь Орданьбуень цёратнеяк. Савкшнось тенст, содазь, тюремскак.
[42] Рузтнэнь ды ногайтнень каршо...
Колмо пингень перть лехась-просекесь эзь соксеве. Ланганзо кассь луга. Вастневсь эрьва кодамо тикшетнень юткова умбравгак. Секс Миша тердекшнимимгак тов. Ней просекесь эри ансяк атятнень превсэ-ледстнемасо. Аволь аламо иеть ютасть, кода сонзэ сокизь. Од трактортнэнень тень теемс а стакаль. Ды кияк эзь арсе: сон ульнесь умонь шкатнень неицякс, рузтнэнь кедест алов эрзятнень понгомадо ледстницякс.