Эрязденть арсезь (2010)/Сюкпря, азербайджан-цёрат!
[181]
| Сюкпря, азербайджан-цёрат! |
Важодема чим прядовсь. Олячинь марязь, апак эрязкале эскелян ошонь куншкава электричкас — пачкодемс кудов. Чугункань кинь вокзалонь келей кузтеманть каршо аштить-кортнить, ванан, зярыя азербайджан-цёрат. Вейкесь содавикс, Раманасто. Ютынь юткозост. Эрьвантень максынь кедь. Кунсолынь-кунсолынь, пшкадинь рузокс. Мезде-бути пелькстазевинек. Вал, [182] омбоце... Кургстон, монськак эзия редя, либорк менсть рузонь эрьванень содавикс «твою мать» сёвнома валтнэ.
Цёрынетнень келест кундатотсть. Сельмсэст, вановтом вакска эзь юта, кивчкадсть кежень сяткинеть, варштасть, прок чатьмонезь кевкстнесть вейкест-вейкест: мезе теемс мартонзо? «Ичемс?» «Чи-и-йть, цёра!» — выськ мерсь нряудсмсэнь кармавтомась, ды ношкстынь кевень келей, аволь сэрей кузтемаванть перрононтень. Мельган, марян, бот-бот-бот чиить, секень вант, кундасамизь цёратне. Чиян келень лисезь. Ливтязь ливтян. Вана меельце, монень самай малавикс вагоноськак. Ансяк кирнявтынь эйзэнзэ, кенкшесь... чо-жо-олк пекставсь. Электричкась сыргась. Кундыцян кадовсть мелест марто — «вачкамс» тень топодемга.
Молян вагононть кувалт. Ваннан тей-тов. вешнян чаво тарка. Муинь. Сиземадонть лоцьк озынь. Яла тень эзь кемеве — оргодевинь. Сасавлимизьгак — ирдезэнь, маряви тень, лововлизь... Тук-тук-тук, — капши-кенярды седеем. Сеедьстэ лексян. Ливезденть нардтния пацинесэ чамам, киргам.
«Мезень кис? Мезень кис? Мезе берянь теинь тенст?» — педясь превезэнь кевкстемась. Эзь чарькодеве. Виде, валтнэ «бога мать», «твою мать» аволь мазыйтнеде. Мейле мезе? Мейле мезе авадот визькс вал ёвтасть? Рузтнэ «...твою матнень» эрьва вал мельга понгавтнить. Аламо «мать» — педявтнить «бога». Киньгак ёжо понанзояк а стить. Кияк, мезеяк тень кис а мери. Теке истя эрявияк. А уш тюрьгадомадо — кортамскак а мезть.
* * *
Ютасть ламо иеть, ламо тундот ды сёксть. Се умонь шкань аламодо а кирвазиця недявкстонть арсян ней лиякс.
Рузтнэнь марто зярыя пингень перть вейсэ эрязь, теевинек истямо а мариця ды «ялатекень» вечкиця ломанекс, конанень покордамонь, аволь чуросто марязь визькс валтнэ мезекскак а марявить. Мерть «туво», «верьгиз» эли «жирафа», ёвтыть некеть жо нульгодькс валтнэнь, конатнень кис эль эзимизь «ичекшнэ» азербайджанонь цёратне, «вайк» кияк а мери.
Паро мельсэ, мик сельмень сявадозь ледстнян сеть раужо сельме, раужо прячерь цёрынетнень, сынст анокчист стямс аваст, сазорост-патяст кис. Миненек вана... ялатеке. Миллионт маштовсть войнатнес — ялатеке, ёмамо лангсо эрзянь чачома келенек — ялатеке, чамсть велетне — ялатеке, [183] войнавтомо азгондить миллионт тетявтомо-ававтомо эйкакшт — ялатеке, миллионт ваить палыця ведентень — ялатеке, сельгенить ды сельгенетяно визькс валсо аванок лангс — таго ялатеке...
Кие-бути инетнеде мерекшнесь: совиндеряйть раськенть кельс оронь-салыцянь, визьксэнь асодыцянь валт, мельть ды бажамот, валскень чизэ те раськенть а ули. Видеть валтнэ.
Сюкпря тенк, седейсэнь-превсэнь эриця азербайджан-цёрат! Сюкпря, паро уроконк кис. Тынь тень умонь се маней чистэнть ульниде сельмень панжицякс эрямонть вейке ёнксонзо лангс. Тынь невтинк кодамо рузонь раськесь азербайджанонь раськенть коряс. Сюконян тенк, раужо, прят, омбоцеде.