Эрязденть арсезь (2010)/Тень эйсэ "пиже шканть" мазычизэяк
[19]
| Тень эйсэ «пиже шканть» мазычизэяк |
ЯВАВТЫЗЬ тантей удомам ды сыргозстимизь чипаень налтнэ. Вадяшизь сынь тодовс апак путо чама ёнксом, палымизь коняс ды пувтымизь. Панжинь сельмень. Кудосонть экше. Лисемс вельксэнть алдо, лембе варястон мелем арась. Окойники кепедия прям, озынь тарканть чирес. Ацазь сон киякссо. Ёзынь каракшон. Вакссон полады ононзо Коля ялаксом. Пильгепесэнь аштить мадезь, порить поревксэст раужо-раужо ревелевкстнэ. Авам котьми каштомикеле.
Вановтом эртевсь стуворонть чирес путозь стопканть эйс. Лангсонзо якстере бока, покш, мик эзь кельге кедьгентень, сельмезэнь мизолдозь ваныця умарь. Истямо покш ды мазый, истямо якстере чама неемс тень эзь савкшно. Вантаяк, натой стопка кургонтень эзь кельге! Каня эрсить истят?!
Путызе те мазычинть, чарькодия, васоло ошсто веть сазь тетям.
* * *
Те ульнесь, карминь содамо школасо тонавтнемстэ, 1939-це иестэ. Трицям-кастыцям, валдо тюс муюконь кандтниця тетям пачколесь Московов, ВСХВ-в. Сеть шкатнестэ ды мейлеяк те ульнесь амарявикс тев, аёвтавикс бажамо — понгомс Московов ды неемс эсеть сельмсэ прявтошонть, се самай Весесоюзонь велень хозяйствань выставкасонть невтевикс эрьмезтнень. Тетянь, агрономонть, кучнизь тов. Кода теньсэ пря а шнамс?! Кода а каштангалемс?! Казнекс тосто тень ускокшнось мештьс понгавтневиця, рубинэкс цитниця ВСХВ-нь тешкске, пекстневиця, зепсэ кандтневиця пеельне ды... якстере, кургс эциця умарь.
Эйкакшпингенть ды сыречинть вановтост эрямонть лангс малавгак аволь вейкеть. Шалныця, свал та-ков капшиця масторонтень совамсто неяви сон кецневтемань пусмокс, валдокс, келеекс, покшокс. Ванан ней стопкас а кельгиця умарь лангс ды арсян: кода истя марявкшнось тень покшокс? Кодамо, кона ёвдо покш? Берякшкеськак [20] а кельги. Те — ней, зярдо ланга-верьга пешкедсь эрямопингень кептерем, зярдо лавкань лавсятне эль а лондадыть неть самай умартнеде-эмежтнеде. Те — ней... Сисемксть кемень нетнеде икеле...