Эрямос совамо/Андрей Понксарев/3
III
Самодо мейле Андрей пшкадсь Валянень:
[ 86 ]— Алтыть, кадык ней сы знярс ули тарка, сермадт тензэ.
— Тон иля машнете, сермадт тонсь, яла теке. Эщо вана мезень кисэ энялдан икелет: Иля яка сеедстэ камандировкав. Монень чистэ-чис стака, курок чаман. Ладна, Андрей?
— Ладна, сяткинем, — вечкевть мазый вановтсо вансь Валянь сельмс.
Яла теке неявсь, што Андрей мезьде бути стакасто арьси.
Андрей курок сермадсь серма Московов, серманть пес сермадсь аламо валсо: „Потмом те сермасонть эзь чамдав ды акода ульнеськак. А содасынек вейке-вейкень мельтнень. Ансяк аштить мельсэн кивтёлды сельмет...“
Ответэсь кувать учомс эзь саво. Тейтересь сермадсь: „Монь мельскак кадовсь кеме кедь виет. Ульть шумбра ды...“
Андрей кенярдозь ловнызе серманть, сезьнизе ды сермадсь тензэ од: „Паряк тон пейдят, кеман, видькстан — тон пек туить мелезэн обоцят кисэ. Валянь тон содасак кодамо а кортавиця, теи эсь койсэнзэ. Яла тарги башка, ков бути тонавтнеме. Аштян мартонзо пильгало соркс. Роботамо таркасон максть тень выговор, ансяк сонзэ трокс. Эх, весе а евтневить. Бути седейсэт ули сардошка вечкема, то венстик кедеть. Минь васттано весела, счастливой семиянь эрямо лувсо. Евтык мелет. Серманть кучик, — „почта до востребования“. Ошонть уш содасак. Бути курок сат, кортнетяно теск“.
Серманть нолдызе ды тусь командировкав. Се шканть Анфиса кучсь ответ Андреень серманть лангс. Но каршозонзо ответ арась. Машнети тейтересь Московсо. Сермадсь омбоце, но омбоценть кучизе роботамо тарказонзо.
Валя ризны мекс кувать а сы камандировкасто мирдезэ, мольсь кевкстеме роботамо тарказонзо ды [ 87 ]тосто максызь тензэ серманть. Сон капшазь панжизе серманть, ловны: „вечкема Андрей, ансяк а обидямс Валянь. Мон согласян куть знярдо... Мекс кашт молят? Кучинь серма тонь лемс до востребования, тосо сермадозь весе, мезе ульнесь седейсэн. Палатанзат, Анфиса“.
Учось ли Валя истямо тев? Пиштяканть мельсэяк арасель. Сон пурнызе серманть зепезэнзэ ды ризназь тусь.
Андрей те чинть чокшне сась командировкасто. Сон учось икеле ладсо Валя моли кутмордасы, паласы. Арась. Весе велявтовсь мекев лангт.
Валя аштесь мадезь конек лангсо, мутна вановтсо ваны Андрей лангс. Андрей стамбарнэ мольсь Валянень. Кедензэ путызе штеказонзо ды пшкадсь:
— Валя, ойме кошткем, нать ежот марясак берянь? — Андрей комась паламонзо.
— Аштек, — Валя аравтызе кедензэ, — тонь палцимат Московсо, ойме кошткет Анфисасо, — ды велявсь ендонзо.
Андрей потазевсь, кедензэ веньстинзе ды талакадозь пшкадсь:
— Мон а чуман. Анфиса сонсь нахалка. Мон чуман мейсь сермадыя терьдима серманть, — тусь эйстэнзэ.
— Течи а карман чумондомо тонь, но а простятангак. Валске кавнек получасынек серманть. Карми неявомо. Якинь, но эстемет эзизь макссо...
Мадсть вейс.
Валскенть Андрей сыргойсь рана. Валяяк ульнесь пильге лангсо.
Шабрасонзо эрясь ялгазо. Андрей содась ялганть тевдензэ, ялгась содась Андреень тевтнеде. Чийсь ялгантень.
— Кунсолок, брат, беда!.. На монь командировочной удостоверениянть ды чик почтав. Тосо ули монь лемс серма, получик. Мон козейканть кирьдса, — теке марто тусь.
[ 88 ]Кудосонть Валя анокстась завторкамс ды пурнась-сэрьнясь почтав.
— Аштек Валя аламос. Мон теян отчет. Ютамсто максса канцелярияс.
— Ладна, — согласясь Валя. Андрей сатснесь, шкась содась эсинзэ. Сави сыргамс, ялгась яла арась. Те лангс апак вано Андрей кемсь, што меньгак серма тосо а ули.
— Монь койсэ кенгели Анфиса. Эли превтеме, мон, кода могу содамо, што сон тозонь кучи, коли арась минек ютксо мезеяк, теде арасель кортазьгак.
— А содан кода лиссь тевесь, но ули факт.
Сынь мольсть башка-башка.
Почтасонть кевкстизь серманть. Алкукскак сермась ульнесь тосо. Андрей мик таймаскадсь. „Кода истя, эли Федя эзь кенерь саеманзо...“ Мезть ансяк сермасонть арасель сермадозь! Но меельсь пелев вана неть валтнэ таго идизь Андреень.
„Тон монь седейстэ а тукшнат. Неяви, што тонеть те козоньгак а токи. Тонь ули седейшкава вечкема Валят. Кучт серма, кода ванат монь потмо валон лангс. Анфиса“.
— Вана теть задушевной ялга, — мерсь Андрей.
— Нахалка, — согласясь Валя. Валя тусь кудов Андрей — канцелярияв.
Андрей канцелярияв совась прок мезеяк мартонзо эзь ульнеяк. Но здоровакшность мартонзо такода а седейшкава.
— Андрей! — пшкадсь кабинетстэнть заведующеесь. Андрей совась. — Тон ломанесь тонавтозят, чаркодят тевтнесэ. Те лангс апак вано роботат беряньстэ. Минь кеминек лангозот, макстнинек покш тевть, пестэ-пес эзить прядт вейкеяк...
— Да, — тандадозь отвечась Андрей. Ды ансяк сестэ чаркодсь, мекс сермась эзь получав ялгантень.
— Кавоненк судятадызь. Ялгат уш ашти милициясо.
— Простимизь. Мон честнасто карман роботамо...
[ 89 ]— Аватнень ков?
— А карман больче, кемимак, — Андрей шаштсь столенть малас, — простимизь, нинть марто эрятан парсте ды эринек а беряньстэ.
— А седе тов?
— Истяжо седе товгак. Монь пельде больше а лиси берянь, — Андрей энялдсь. Эсь потмованзо арьсесь „месть тонавтат, монсь содаса кода эряви эрямс“.
Андрей стясь, нолдызе прянзо. Туемстэ пшкадсь:
— Илимизь пане роботасто. Витьсынь ильведевксэн, — ды ематотсь кенгш удалов.