Якстере теште/1924/34/Резолюция Эрзень-Мокшонь Издательской Секциянь тевензэ кувалт
| ←Яков атя | Якстере теште, № 34, 16 ноября 1924 г. редактор Глухов, Пётр Семёнович РЕЗОЛЮЦИЯ Эрзень-Мокшонь Издательской Секциянь тевензэ кувалт |
Вейке сермадума (литературной) кельде→ |
| Якстере теште. Еженедельный орган Мордовской секции при Ц. К. Р. К. П. (б.). — № 34, 16 ноября 1924 г. — с. 2 |
| Эрзянь - мокшонь тонафтыцятнэнь промксонь резолюцият. |
| РЕЗОЛЮЦИЯ Эрзень - Мокшонь Издательской Секциянь тевензэ кувалт. |
Промксось мерсь: Эрзякс-мокшокс кинигань ды газетэнь сермадума тевесь покш тевь тонафтумасонть. Те шкас те тевесь мольсь берянстэ. Парсте эсть сода мезе эрэви эрзенень-мокшонень печатамс Нолдасть истят кинигат газет, конань пек аламо ульнесть ловныцяст велева.
Промксось мери парынестэ витемс-ладямс газетнэнь. Пурнамс таркава газетс сермадыцят (корреспондент). Аравтомс уполномоченнойть губернява, уездга, волостьга ды велева. Редакциянтень сынст юткова эряви теемс паро связь.
Газетас сермадомс ламине велень тевде. Сермадомс велень чарькодевима кельсэ. А эряви сермадомс переводной статьят. Эрьва газетсэнть улезе неень эрямо пингень евтнимат (расказт) ды морот.
Газетсэнть улест эрьва кодат картинат. Сестэ газетэнть седе кармить ловноманзо.
Газетэсь берянь тевень паниця, паро превс путыця. Центрасо ды губернява газетнэнень эряви пурнамс перькаст весе тонавтниця ялгатнень ды эрьва тевень ветицятнень, конат эрьва тевсэ кармить превс путомо.
Сермадомс газетс эряви декрет.
Кадомс газетс таркине, косо сермадомс антирелигиозной тевде. Нолдамс кинижка, „кода лемдизь эрзетнень-мокшотнень“.
Центральной эрзень-мокшонь Секциянть тевензэ те шкас мольсть аволь пек парсте.
1] Нолдазь кинигатне пек питнейть, веленень а рамавить.
2) Кинигань пурнамсто парсте эсть ван, мезе эряви ней велев.
Парсте витемс тевенть — промксось мери тейнимадо конкурст (кие седе парсте сермады, сень нолдамс киниганзо). Конкурст эрявить тейнемс тонафтума кинигань (учебникень) ды эрьва лия кингань сермадомсто. Знярдо эряви капшавтомс кодамояк кинига, эряви зняроненьгак вейцэ анокстамс.
Кодат анокстамс печатамс кинигат, эряви сынст кувалт сермадомс газетс. Эрьва тевень ветицясь ды куш кие эрзя мокшо ломань евтавлизе, кода сон арси нетне кинигатнень кувалт.
Печатамс зняро, зняро эрявить велев.
Кода нолдыть кинигат велень хозяйствань кувалт, эряви содамс, месть кортыть агрономт коське кизэтьнень кувалт, ды ташто сокамо видима койтнень кувалт.
Эряви икелевгак нолдамс истят кинигат, косо улест сермадозь евтнимат (рассказт) пьесат, морот, кода седикелень истя неень. Те тевентень эряви седе ламине нолдамс тарка, лучи лия кинигат седе аламо нолдамс.
Эрьва редакциява (центрасо ды губернява) пурнамс литературной (сермадыцень) кружок.
Центральной Издательской Секцияв аравтомс тевень тееме колмо ломать.
Тердемс сермадомо газетс, ды тонавтума (учебникень) кинигань сермадомо учительтнень.
Те шкас аламо нолдазь общественно-политической кинигат. Эряви седе ламине нолдамс.
Седе курок нолдамс полной эрзень—ды мокшонь словарь.
Ваномс кода нолдыть стенной газетнэнь эйсэ эрзень—мокшонь велева.
Нолдамс листовкат эрьва кодамо компаниясто (покш тевень теемстэ) эрзень-мокшонь кельсэ.
Седе парсте ладявозо эськельсэ тонавтума тевесь школава, ды весе тонавтыцятне содавольть кода седе парсте ладямс те тевенть, эряви нолдавтомс „тонавтумань лист“ (педагогической листок) эрзень ды мокшонь кельсэ.