Үҙемдең күңелем

← Мин Ҡояшҡа китеп барам

Үҙемдең күңелем (Шиғыр) автор Лилиә Һаҡмар

Мәл →

Ижад итеү ваҡыты: 2002.. Нәшер ителгән: 2006 йыл. Сығанаҡ: Һаҡмар Л. Эстафета: Шиғырҙар, поэма. – Өфө: Китап, 2006. – 176 бит. (56-сы бит) ISBN 5-295-03798-3

Үҙемдең күңелем

Үҙемдең күңелем, үҙемдең донъяма
Һуҡмаҡты ярырға самалап,
Шырлыҡта сырмалам:
Шиктәрем, әрнеүем –
Энәле ҡыуаҡҡа ҡамалам.

Ҡанаһын йөрәгем, энәгә ҡаҙалып,
Табырмын ахырын ғазаптың –
Хоҙай бит кешене хыялын белергә,
Шиктәрен еңергә яралтҡан.

Томанға уранам,
Үҙемдә юғалам.
Бәхетем утрауы – йөрәгем.
Ҡайҙарға китһәм дә
Был юлдар минеке,
Бер ҡасан юҡ унда өҙәрем.

Бәхетле был мәлем –
Йәшәйеш томанда,
Бары тик күңелем салт аяҙ.
Урамда һары көҙ,
Йөрәктә йәм-йәшел
Үләндәй йәшәреп, шыта яҙ!

---

Иҫкәрмәләр

• Авторҙың башҡа әҫәрҙәре Author:Лилиә_Һаҡмар