| ئەر بۆپڕووزێ وە مەڵاڵەوە
|
بەیۆ وە لای تۆ جە شەماڵەوە
|
| ئانە بۆپڕووز سفتەی جەرگمەن
|
مەعلووم بۆ مەعدووم وادەی مەرگمەن
|
| ئەنیسی خەیاڵ دەردانی پڕ زام
|
مەرهەم جەستەکەی خەستەکەی ناکام
|
| خەیلێن نە گێجاو بەحری مەهجووری
|
نە دەوری دوەی تەنوورەی دووری
|
| پووشەکەی جەستەم وە پەنا کەفتەن
|
سامیعەم خەبەر یاران نەشنەفتەن
|
| ئینشەلڵا، چەنی خۆشحاپی ی، شادی
|
نە شاخەی شۆخی گەردەن ئازادی
|
| چەنی وەشبەختی دوو دەس نە گەردەن
|
عومرتان وە عەیش عوشرەت ویەردەن
|
| نەک چون من جە دەس بێ مەیلی دڵبەر
|
مەکێشوو هەر سات هەزار دەردی سەر
|
| دایم دڵ ڕەنجوور هیجرانی یارم
|
زنجیری جەفای زڵفی نیگارم
|
| خسووس شەرارەی دووریی زۆر کەردەن
|
مەزرەعەی هەستیم وای سەبوون بەردەن
|
| کەس بە وێنەی من پڕ مەینەت نەبۆ
|
گرفتاری دۆس بێ بەینەت نەبۆ
|
| هیچ کەس موبتەلای دووری یار نەبۆ
|
چون من سەرگەردان، بێ قەرار نەبۆ
|
| کەس نەبۆ چون من یاری بەد کاران
|
زامداری موژەی دیدە خوماران
|
| جە هاژەی هووناو دەروونی پڕ دەرد
|
نە گەردشی چەرخ گەردوونی چەپگەرد
|
| تا جە تۆ بڕیام، وە مەرگت قەسەم
|
ساتێ ئاسایش نەدیەنم بە چەم
|
| نەکەری خەیاڵ گلەیی کەردەن
|
نەواچی بادەی بێ شەرتیش وەردەن
|
| ئەر زەلیلی دەست بێ شەرتان نەبوون
|
کەی مەبۆ مەیلت فەرامۆش کەروون
|
| ئەو تووڵی قامەت قیامەت خێزەن
|
وەڵگی شاخی شەوق دەردینان ڕێزەن
|
| تافی سافی ناز زۆر ئاوردەن لێش
|
خەمەن چوون قامەت خەمبارەکەی وێش
|
| دیدەم مشکین زڵف، جەمین زەڕنیگار
|
دووریت شەو و ڕۆ لێم کەردەن وە ژار
|
| ئەی شەو وە سەرگەرد جەوان مەردیت بام
|
یا زووم تەمام کەر، یا زوو بەر تەمام
|
| ئیمشەو ئەسڵەن ویر بەیانیت نیەن
|
وێنەی هیجری من پایانت نیەن
|
| مەشنەفتم کە شەو فیراق توول دارۆ
|
نە یەکجار وەی ڕەنگ غەزەب لێت وارۆ
|
| یا فەڵەک چارەم سیا پەروەردەن
|
یا خەیر تۆ کلیل سوبحت گوم کەردەن
|
| ڕۆ بە ڕۆ ماچوون بە ڕۆڕۆ و زاری
|
وە ڕۆی ئاخری ئاخر نەداری؟
|
| سادەی ئاخر بەر، یا ئاخر باوەر
|
ئاخر گیان جە دەس دووریی خەلاس کەر
|
| شەو و ڕۆ جە داخ زوڵف و دیمی تۆ
|
داوا و باسمەن چەنی شەو و ڕۆ
|
| چون شەو شێوەی زڵف موشکینت دارۆ
|
ڕۆ کەمێ شوعاع جەمینت دارۆ
|
| وە سەر گەردت بام ئاوات واستەی وێم
|
جەوانیچ تەسکین نمەیاوۆ پێم
|
| ماجەرای ئاخر يوم الماتمەن
|
نەومێدی بڕیای قەتع حەیاتەمەن
|
| ئەحمەد سەراپاش ئالوودەی دەردەن
|
یە ئاخر وشکاو سەر چەشمەی فەردەن
|
