ئەی دیلبەرێ
ئەی دیلبەرێ، ئەی دیلبەرێ
وەی نازکێ دێم قەمەرێ
قامەت ژ مووم و فەنەرێ
وێران ئەزم، مالم خراب
ئەی دیلبەرا گەردەن لەتیف
وەی نازکا قامەت ئەلیف
قامەت ژ رەیحانا زەریف
وێران ئەزم، مالم خراب
ئەی دیلبەرا بەژن زراڤ
دێم شووشەیا تژی گولاڤ
وەی ئەسمەرا تلی زراڤ
وێران ئەزم، مالم خراب
ئەی دیلبەرا گەردەن ژ عاج
وەی نازکا مسلێ زوجاج
قامەت ژ رەیحانا قراج
وێران ئەزم، مالم خراب
ئەی دیلبەرا قامەت میسال
وەی نازکا دێمی شەپال
عشق و مەحەبەت من ل بال
وێران ئەزم، مالم خراب
ئەی دیلبەرێ، وای دیلبەرێ
فەریاد ژ دەستێ کەدەرێ
جورعەک ژ ئاڤا کەوسەرێ
وێران ئەزم، مالم خراب
سوبحان ژ شاهێ زولجەلال
وەی نازکا ساحب جەمال
ژ خوەندنێ کرم تەتال
وێران ئەزم، مالم خراب
چاڤان هلتینی ب مەستە
جندییا مسری ب دەستە
ل کوشتنا من تە ب قەستە
وێران ئەزم، مالم خراب
تو ب قەستا من د کوژی
تو کافرا، دل نا سوژی
گەلەک سۆتم کرم رژی
وێران ئەزم، مالم خراب
گەلەک سۆتم کرم کباب
کریە ب من سەد رەنگ خراب
«يا ليتنی كنت تراب»
وێران ئەزم، مالم خراب
«يا ليتنی كنت فخور»
وەی نازکا من تە ژ دوور
بێ هش کرم خالێ د هوور
وێران ئەزم، مالم خراب
بێ هش کرم خالێ د قەر
بسکێ سیاهـ زلفێد قەمەر
عشق و موحبەتا من ل سەر
وێران ئەزم، مالم خراب
سۆتم براشتم بێ حساب
لێ پرسی بۆ کرمە کەباب
کریە ب من سەد رەنگ عەزاب
وێران ئەزم، مالم خراب
سوبحان ژ شاهێ ب تنێ
خالەک ژ خالا گەردەنێ
ئەز دین کرم بەردام دنێ
وێران ئەزم، مالم خراب
عشقا مەزاج پەیدا بوویە
ئیرۆ ل من دژوار بوویە
هیڤی دکم حەقیقییە
وێران ئەزم، مالم خراب
|
This work was published before January 1, 1929, and is in the public domain worldwide because the author died at least 100 years ago. |