جُو پھرا کہ اس نے منہ کو بہ قفا نقاب الٹا
جُو پھرا کہ اس نے منہ کو بہ قفا نقاب الٹا
ادھر آسمان الٹا ادھر آفتاب الٹا
نہ قفس میں ایسے مُجھ کو تُو اسیر کیجو صیاد
کے گھڑی گھڑی وُہ ہووے دم اضطراب الٹا
میرے حال پر مغاں نے یہ کرم کیا کے ہنس ہنس
میرے ننگے سر پہ رکھا قدح شراب الٹا
تیرا تشنہ لب جہاں سے جُو گیا لحد پہ اس کی
پس مرگ بھی کسی نے نہ سبوے آب الٹا
میری آہ نے جو کھولی یہ قشون اشک بیرق
وہیں برق و رعد لے کر علم سحاب الٹا
جُو خیال میں کسو کہ شب ہجر سو گیا ہو
نہ ہو صبح کو الٰہی کبھی اس کا خواب الٹا
میرے دم الٹنے کی جُو خبر اس کو دی کسی نے
وہیں نیم رہ سے قاصد بہ صد اضطراب الٹا
جُو علی کا حکم نافذ نہ فلک پہ تھا تُو پھر کیوں
بہ گہہ غروب آیا نکل آفتاب الٹا
اگر اس میں تُو سہ غزلہ جُو کہے تُو کام بھی ہے
نہیں مصحفیؔ مزہ کیا جُو دو رو کباب الٹا
|
This work was published before January 1, 1929, and is in the public domain worldwide because the author died at least 100 years ago. |