| داخ وە بان داخ، داخ وە بان داخ
|
دەرد وە بان دەرد، داخ وە بان داخ
|
| جە داخ دووری شای بوڵەند دەماخ
|
من جە گەرمەسێر ئەو شی وە لێڵاخ
|
| جەو پەی داخینم تا مەرگ سامان
|
یانە باوانش ئاماوە دامان
|
| ئیمساڵ نەو وەهار وەنەم «دەیجوور» بێ
|
پەی چی؟ کە دیدەم جە دیدەش دوور بێ
|
| ئەو شی وە لێڵاخ چون بێ بەینەتان
|
من مەندەن پەی دەرد سزای مەینەتان
|
| تەرسوون جە بازی بازاڕ گەردوون
|
جە کەج نەردی چەرخ دەور دنیای دوون
|
| مەجنوون هاشت وە داخ سزای دەردەوە
|
قاپی خەم نە بەخت فەرهاد کەردەوە
|
| یەک یەک هامسەران جە گیان بێزار کەرد
|
ڕۆی ڕۆشن جە عەین دەردینان تار کەرد
|
| ئەو ئەردە وە بەخت قەیس و مەجنوون شەند
|
بەرد بنچینەش جە بنیاد هۆرکەند
|
| مەتەرسوون جە بەخت منیچ بشانۆ
|
سزای ئەو یاران پەنەم بنمانۆ
|
| ئێدیچ وە قسمەت «ابن سلام» م بۆ
|
من وەی دەردەوە دەور دنیام بۆ
|
| یا شائی نەردە نشانیم وە بەخت
|
ئەر بۆ مەرگم بۆ وەرجە وادە و وەخت
|
| مەرگم خاستەرەن من جەو ژیانە
|
جەی زندەگی پووچ شاد پەشیمانە
|
