دل میں میرے پھر خیال آتا ہے آج
دل میں میرے پھر خیال آتا ہے آج
کوئی دلبر بے مثال آتا ہے آج
کیوں پڑا بے ہوش اٹھ ہاتف سے اب
ہے ندا صاحب جمال آتا ہے آج
سنگ رہ ہوں ایک ٹھوکر کے لیے
تس پہ وہ دامن سنبھال آتا ہے آج
مشتری و زہرہ باہم سعد ہیں
اس لیے ابرو ہلال آتا ہے آج
تم سوا چنداؔ کے دل میں یا علی
کس کی عظمت کا جلال آتا ہے آج
|
This work was published before January 1, 1929, and is in the public domain worldwide because the author died at least 100 years ago. |