| دڵەی شەیدای مەست، دڵەی شەیدای مەست
|
ئەر تۆ عاشقنی، شێتی شەیدای مەست
|
| شەرتی بەقاو بەین «قەیس»ی «لەیل» پەرەست
|
هەرتا زیندەنی تۆ مازەش جە دەست
|
| ئەر تۆ گەرەکتەن یار دیدەن کەری
|
هۆر گێرە شێوەی قەیسی «عامر»ی
|
| شێوەت ئیحسان بۆ چەنی ڕەقیبت
|
تا دیدەن دڵدار بۆ وە نەسیبت
|
| «مەجنوون» چەندێ بێ پەی «لەیلێ» وێڵ بێ
|
دێوانە و سەر سام، بیابان گێڵ بێ
|
| مەگرەواوسەیلاو نە دیدەش مەوەشت
|
ڕوێ و پەی تەقدیر کەردش عەزمی گەشت
|
| خاتر پوڕ جە داخ، دەروون جە خەم کەیل
|
هۆردارا بێشەرم، فەریاد پەرێ لەیل
|
| لەیلش بە ئاواز بەو تەور مەلاونا
|
سەدای زاری ئەو، سەنگ مەتاونا
|
| بەو دەشت و دەردا سێر گێڵا خەیلێ
|
ئاخر شی وەلای هەوارگەی لەیلێ
|
| دیش خێڵی لەیلێ نەو جا هۆر کەندەن
|
مەنزڵ وێرانەن کەس تێش نەمەندەن
|
| مەجنوون خۆ وێڵ بێ، بەتەر بی هەردە
|
هەڕ داش بە سەردا، چوون ئازیز مەردە
|
| دیوارێ و دەس چن لەیلی نازار بێ
|
سایەش شیفای دەرد قەیسی بیمار بێ
|
| شی نە پای دیوار مەجنوونی دڵ ڕێش
|
تاسای ئەو کەرۆ، زامانش ساڕێش
|
| دیش سەگێ زەعیف، ڕێشی کوهەن ساڵ
|
ها نەپای دیوار، کەفتەن وە بێ حاڵ
|
| سەر تا پای تەنش چەنی زامان ڕێش
|
زوان کەردەن تێغ پەی زامانی وێش
|
| مەماڵۆ نە زام، زوان چوون نەشتەر
|
وە ڕووی زامی سەخت، مەشانۆ وەشتەر
|
| ئێندە مەشوو مۆر ها نە ڕووی زامش
|
بیەن چوون دەوار، سیا ئەندامش
|
| چەن وەختەن کەسێ نانێ نەدان پێش
|
سازان چەنی زۆخ ئیستخوانی وێش
|
| غەیر جە قورسی «بەدر»، مانگی "دوو" هەفتە
|
هەرگیز چەم بە شکڵ نانێ نەکەفتە
|
| شی بە نزیکش قەیس سارا گەرد
|
کێشا پەی حاڵش، ئاخی سیا سەرد
|
| وات ئەی پاسەبان، سیای خەیمەی یار
|
ئێشکچی شەوگار نە دەوری دیوار
|
| چەرخەچی شەوان، ڕۆ نە دەرو دەشت
|
«بەبر»ی «شێر» شکار، پەرێ «ئاهوو» چەشت
|
| پوڵنگان ئەوسا فکری تۆشان کەرد
|
حەساری کۆشان، پەرێ وێشان کەرد
|
| نەعرەتەی دەنگت هەرکۆ مەیاوا
|
مەنزڵانی چۆڵ مەکەردش ئاوا
|
| ئینە چە حاڵەن تۆ پەنەت یاوان
|
چمان ئەندامت بە تێغ شکاوان
|
| جە کۆچی لەیلێ، شای بەینەت داران
|
تۆنی جێ مەندەی کۆنە هەواران
|
| خەیلێ پی دەستوور پەشێو بی پەرێش
|
ئەحواڵی لەیلێ خەبەر پەرسا لێش
|
| ناگا تەماشای دەشت و سارا کەرد
|
دیش کە «صەیاد»ی پەیدا بی جە هەرد
|
| یەک ئاهووش کوشتەن، وستەن نە شاندا
|
مەویەرۆ بە جەخت، نەو بیاباندا
|
| شی وەلای «صەیاد» قەیسی جەفا کێش
|
تا چوون سائیلان، گۆشت بوازۆ لێش
|
| واتش ئەی «صەیاد» تۆ عەشقی پیرت
|
ببەخشە پێمان، ئارۆ نەچیرت
|
| «صەیاد» چوون مەردان، مەردانەگی کەرد
|
لاشەی نەچیرش بە مەجنوون سوپەرد
|
| مەجنوون هۆر گێراو ئاما بە شیتاب
|
گنا نە خەیاڵ کارسازی کەباب
|
| ئاهووی «صەیاد»ش قیمە کەرد بە تێغ
|
لاشە و جەرگ و دڵ، پێکا وە ڕووی سێخ
|
| بە دڵەی پوڕ سۆز هیجران وەردەوە
|
بە ئاهی دەروون، ئایر کەردەوە!
|
| کەبابێ کەردش بە سەد سۆزو خەم
|
نمەکاوش کەرد بە ئەسرینی چەم
|
| ئاورد وەلای سەگ، بە تەعجیل و دەو
|
واتش ئەی زەعیف، بێ خۆراک و خەو
|
| یە تەعمەی کەباب قەیسی چۆڵ گەردەن
|
تۆ زامدارەنی، پەی تۆم ئاوەردەن
|
| دەسا مەیل کەرە، شیفای جەستەت بۆ
|
مەرهەم پەی زامان جەستەی خەستەت بۆ
|
| چەندێ پی دەستوور کەباب کەرد پەرێش
|
تا کە زامانش یەک یەک بی ساڕێش
|
| قووەتش جە قووت، کەباب بی تازە
|
تەی بی نە سارا، کەردش جانبازە
|
| دیسان جە نۆوە شی وەلای لەیلێ
|
وێش وست نە دامان خاک پای لەیلێ
|
| شەو پاسەبانی یانەی لەیل مەکەرد
|
ڕۆ چەنی «شوان» مەگێڵا نە هەرد
|
| جەو دما هەر وەخت قەیس بێش ئارەزوو
|
تا دیدەن کەرۆ لەیلی عەنبەر بۆ
|
| سەگ پێش مەزانا، چوون ساحێب فامان
|
مەشی وە پێشواز، مەگرتش دامان
|
| بەو تەور کە ئەغیار پەنەش نەزانا
|
مەجنوونش وەلای لەیل مەرە سانا
|
| مەجنوون بە دیدار لەیلێ مەبی شاد
|
کۆگای خەرمانان، خەم مەداش وە باد
|
| ئەر پێش مەزانا ڕەقیبی ڕا چەفت
|
ئاخر وەلای لەیل، کەی ڕاگەش مەکەفت
|
| سەیدی داد جە دەس بەدخوویی ڕەقیب
|
نمازۆ دیدار یارش بۆ نەسیب
|
| ئەر سەد ساڵ چەنیش بکەری خاسی
|
خاسیش هیچ نیەن، غەیر جە ناڕاسی
|
| سەگ پێشەش مەدەی وەفاش پی تەورەن
|
ڕەقیب گەنجش دەی، پیشەش هەر جەورەن
|
