| دڵە زوخاڵ بای، دڵە زوخاڵ بای
|
بە ئاهی قوورەت، بە کۆی زوخاڵ بای
|
| چەنی غەم، خەریک شادی بەتاڵ بای
|
چوون مورغی بێ پەڕ، شکستە باڵ بای
|
| یاخوا جە ئاسمان غەزەب وارۆ لێت
|
یە تۆ کەردەن پێم، نەژنەوای سەر شێت
|
| چەند واتم بە عەشق بارگەی ئیمامان
|
مەگنە وە سەودای نەوتووڵ نەمامان
|
| بێ سوودەن سەودای عشقی نازداران
|
نازداران تا سەر وەفا نەداران
|
| ئەر تۆ بکێشی سەد ساڵ جەفاشان
|
تا سەر چەنی کەس نیەن وەفاشان
|
| نەشنەوای پەندم، چوون ناپەسەندان
|
تا کەفتی چوون «صەید»، نە دامی ڕەندان
|
| تا پێچیای بە قەید بەندی دامەوە
|
تەن بە ئێش و دەرد، زۆخ و زامەوە
|
| نە بە شەو قەرار، نە ڕۆ خاوت بێ
|
پەی دووری دوڵبەر، گلاراوت بێ
|
| دڵە هەر شەیداو وێڵوو نەفام بی
|
جەفای یار کێشای، سا وەفاش کام بی
|
| ئاخر جەلای یار خۆ کەفتی وە بێز
|
پارە پارە بای دەک وە تێغی تێز
|
| ناڕەواو کەساس، کەس نەسەندەی وێت
|
چەقیای هەڕگاو، ئەرامەندەی وێت
|
| خجڵیای بە دەرد چەرخی پوڕ ستەم
|
هەرگیز ڕۆی شادی نەوینی وە چەم
|
| بە دەشنەی قەساب بکێشا قیمەت
|
تۆ سەیدیت کەردەن پووڵی بێقیمەت
|
