| تۆ نەبینن، نووری ئەم چاوانە بۆچ!
|
بۆ نیساری تۆ نەبێ، ئەم جانە بۆچ!
|
| جیلوەی ئەو حوسنە نیە گەر کارگەر
|
بۆ جەمادیش، ئاینە حەیرانە بۆچ!
|
| دڵ لە سینە ھیجرەتی کرد و وتی:
|
بوونە، عومرێ فەرشی ئاتاشخانە بۆچ!
|
| چۆڵی دی سینەم لە دڵ، بۆ سووتنی
|
ئەمری دا، شیری نەبێ ئەم لانە بۆچ!
|
| خوێنی جەرگ و کونجی عوزلەت بەسمە بەش
|
بەر منەت بوونی مەی و مەیخانە بۆچ!
|
| سائیلی ئەو بەر دەرەم، وتم و وتی:
|
تۆ گەدای، ئەم نەخوەتی شاھانە بۆچ!
|
| ھەر بە تیری غەمزە کوشتن، نەک بە شیر
|
حەیفە، خوون ئالوودە ئەو دامانە، بۆچ!
|
| زاھید ئەو زوڵفەی لەسەر روو دی، وتی:
|
کوفری وا روو پۆشی ئەم ئیمانە بۆچ!
|
| ھەر بە حەسرەت، نەک بە زەربەت، کوشتمی
|
دا نەڵێن ئەم قەتڵی بێ تاوانە بۆچ!
|
| تاقە خانێکە لەسەر رێی ئاخیرەت
|
زادی رێ ھەڵناگری لەم خانە بۆچ!
|
| ((مەحویا)) بازێکی تۆ، قودس ئاشیان
|
بوونە بوومی شوومی ئەم وێرانە بۆچ!
|
