دیوانی مەولەوی/ق
قیبلەم تۆم نە دڵ
[edit]| قیبلەم تۆم نە دڵ ... | تا ڕۆی قیامەت هەر تۆم ها نە دڵ |
| فیدای شێوەت بام جەمین پەڕەی گوڵ | دڵ جە تاسەی تۆ دایم مدۆ چڵ |
| ماتم وێنەی سەنگ، زەردم چون خەزان | دایم پێچ مدەو چون ماران گەزان |
| گەستەی مار خاسەن ساتێ دوو ساتەن | ئەر نەمرۆ زیندەی ڕووی سەر بساتەن |
| ئەما من دەردم چون دەردەداران | دایم هەر وە سۆن چون گەستەی ماران |
| جە هیجرانی تۆ هەر سات مەرگمەن | قەترە قەترەی زووخ نە ڕووی جەرگمەن |
| کاشکی هەر ڕۆ یەک سیا مارێ | هەردوو پام مەگەست چەند جار نەک جارێ |
| سەر منیام وە سای گڵکۆی تازەوە | چەنی حەسرەتان بێئەندازەوە |
| نەک بەی تەور دیدەم مەردەی زیندە ڕەنگ | هەر ساتێ سەد جار سەر مدۆم وە سەنگ |
| پەشێو و مەلوول ئیمان هەردەنان | روێ تا سەد جار پەی تۆ مەردەنان |
| فیدای وەفات بام یا وەفات نییەن | یا خود بەدکاران مانیعت بییەن |
| قیبلەم تۆ خودا و گشت پەیغەمەران | ئەگەر مەیلت هەن وێنەی دڵبەران |
| بکیانە پەرێم گاهێ پەیامێ | بنویسە وە لام دوعا و سەلامێ |
| با وەس بنیشوو مات و پەشێو حاڵ | با وەس بکێشوو هەناسانی کاڵ |
| پەی چێش بێمەیلیت کەردەن وە پیشە | گاهێ تۆیچ پەی من ئاهێ بکێشە |
| باقی وەسسەلام، قیبلەی میحرابم | بڵێسەش بەرزەن جەرگی کەبابم |
قوربان قوربانەن جەژنەن شادییەن
[edit]| قوربان، قوربانەن، جەژنەن، شادییەن | دەس نە گەردەنەن، ڕۆی ئازادییەن |
| هەی دەس بۆس دەس بۆس وەش نیگارانەن | خەیر پا بۆس پا بۆس خاتر دارانەن |
| کۆن کوشتێ و باردێی گوڵ جەمینانەن | هەی سەر، هەی ئەڕواح دڵ خەمینانەن |
| هەرکەس گیان وە کەف پەی نیگارێوەن | هەریەک قوربانیی وەفادارێوەن |
| سیوای سەودایی هەراسانەکەت | مەحرووم جە کەفتەی پای ئاسانەکەت |
| نە پەی چەم سورمەی گەردی پاڵاتەن | نە پەی گیان قوربان بەژنی باڵاتەن |
| مەرد پەی ئۆسا دەی بێ درێغەکەت | بیسمیللا، تەکبیر دەس بە تێغەکەت |
| پەی قوربانکەردەی ناڵە نەی ڕەنگ بەی | چێش مبۆ ئەر بەی؟ وەی پەی من ئەر نەی! |
| سا تۆیچ من وەرە، وە قوربانی کە | من وە قوربانی ڕای ڕەببانی کە |
| ئەوسا تۆیچ پەی وێت خەیرێت کەردەبۆ | منیچ کەمتەر زووخ دەردم وەردەبۆ |
| مەعدوومیی بەدبەخت ناتەمامەنی | راسەن بێ دەوڵەت خەیاڵ خامەنی |
| قوربانی مشیۆ جە عەیب بەری بۆ | فیدایی پەسەند ڕای دڵبەری بۆ |
| تۆ پا شکستەی بەردی هەردەی دەرد | چەم کۆری مەینەت، تەن زایف، ڕەنگ زەرد |
| خەیاڵێت کەردەن جە ڕووی نادانی | چ لایق وە تۆن ڕوتبەی قوربانی |
قیبلەم کەردەنی
[edit]| قیبلەم کەردەنی ... | جە نامەت بەی تەور ئیزهار کەردەنی |
| نویسیابێ لێش تۆ دڵسەردەنی | دڵ هەر یەکێوەن تۆ وێت بەردەنی |
| دوو حاڵەن جە لات زنجیرت کەردەن | ئەر گەرمی گەرمەن، وەر سەردی سەردەن |
| ئیتر تۆ جە کەس مەپەرسە خەبەر | بیناییم، نەزەر وە حاڵی وێت کەر |
| راستش هەر ئێدەن ئیزهارم کەردەن | قەسەم بەو کەسە نەزا و نەمەرگەن |
| شەرتم شەرتێوەن مەجنوون شەرت کەردەن | لەیلی من تۆنی تا وە ڕۆی مەردەن |
| تۆ خواجەمەنی، من کەمتەر غوڵام | پەی تۆ غوڵامم، باقی والسّلام |
قوربان ئەر چەندێ نامام وە لاتان
[edit]| قوربان، ئەر چەندێ نامام وە لاتان | چەم ڕۆشن نەوی وە گەردی پاتان |
| هەی ڕۆ نەواچان ئەو غەم پەروەردە | ئەڵبەت مەیلمان نە دڵ بەر کەردە |
| خەیر وەڵڵا تا گیان نە تۆی قەفەس بۆ | کەمکەم ئامۆشۆی ئامای نەفەس بۆ |
| حەیاتم وە مەیل باڵای یارانەن | مەیلم هەر ئەو مەیل هەردە جارانەن |
قوولەی بایەقوش سوب وە هەردەوە
[edit]| قوولەی بایەقوش سوب وە هەردەوە | زامی کۆنە و نۆم تازە کەردەوە |
قسەیێ ئەکەم بە ڕێو جێ وێ
[edit]| قسەیێ ئەکەم بە ڕێو جێ وێ | کە لەیلێ نەوو، با بەییجێ وێ |