| ئیبتیدا بەنام جەهان ئافەرین
|
بواچووم سەنای شای نۆش ئافەرین
|
| حەرفێ مەواچووم نەپەردەی دەروون
|
بزانووم دەوران تا چون مەبۆ چوون
|
| خانا چێش کەرۆ چەرخی چەپی واز
|
یەکسەر فەنا کەرد ئەی ساز و ئاواز
|
| شای نۆش ئافەرین بەوشۆخی و ڕەندی
|
سوڵتان ئیبراهیم بەو دڵپەسەندی
|
| یەکایەک بادەی دەوران کەردن نۆش
|
جە دونیا بەرشین شین وەجای خامۆش
|
| بواچووم درستان سوڵتان ئیبراهیم
|
چەنی ڕەفیقان نگین دایم
|
| جەنۆ شازادە سەرجە سەودای دەرد
|
ئارەزووی جەماڵ نوش ئافەرین کەرد
|
| بێ سەبر و ئارام هۆرێزا وە پا
|
لوا وە پابۆس شای حۆری لەقا
|
| شازادە چون شێر چەنی یاوەران
|
لوان وە تۆی باغ گوڵباغچەی ڕزوان
|
| یاوان بە خزمەت شۆخ شەم ڕوخسار
|
تا نیشتن وە بان کورسیی زەڕینکار
|
| شای نۆش ئافەرین هۆرێزا وە پا
|
واتش دێر ئامای شێر دڵارا
|
| هەر دوو وەسەد ناز نشتن وە بان تەخت
|
دەس دا نە زوڵفان شاهـ شیرین بەخت
|
| چون بوڵبوڵ بەناز نەرووی گوڵ مایل
|
دوودەست نەگەردەن کەردن حەمایل
|
| دەست نەرووی گەردەن بەناز و نیاز
|
دەم جە ناو دەم بە گوفتارو ڕاز
|
| دەردەم کەنیزان شەیدای شۆخ شەنگ
|
موبارەک گۆیان بە ئاواز و چەنگ
|
| جە زەمزەمەی ساز چەنگ و چەقانە
|
سەدای مووسیقا و ساز زەمانە
|
| جەیەک لا سەمتوور سازو ئاوازە
|
یەک لا نۆشانۆش بنواز بنوازە
|
| ئەی دنیای بێ پۆ ئەی تامەندەی دەیر
|
کەس نمەزانۆ بە پێش کەرۆ سەیر
|
| هەر کەس بونیۆ ئەی شۆخ شەنگان
|
بەوێنەی مەجنوون مەشۆ وە کۆهان
|
| فەڵەک حەیران بی، پەری ماتەم پۆش
|
جە سەدای ساقی و جام نۆشانۆش
|
| ساقی پەیاپەی بادە مەکەرد کەیل
|
مەدا بەیاران مەنۆشان بەمەیل
|
| نۆش ئافەرین وات مەرگ من بنۆش
|
ئەو دەست مەکێشا پەی حەڵقەی گیسۆش
|
| زانوو پەرێ هەم تەکیە کەردەبێن
|
ڕاحەت بەتەکیەی زانوو بەردەبێن
|
| شازادە دەست بەرد پەی یەقەی جامەش
|
گرتش نەرووی دەست دوگمەی شەمامەش
|
| گامە بۆساوە و گامەکەرد ئەفشار
|
گاگا مەنۆشا پیاڵەیێ گوڵنار
|
| گا دەست نەزوڵفان مەوەرد وە چیندا
|
پەخش مەکەرد بە ڕووی جام جەمیندا
|
| موات من ئیمشەو نەکامەن بەختم
|
(سەنەی) دڵداری بییەن وە تەختم
|
| زوڵف نازدارم بییەن وە تاجم
|
مەعرووف عامەن سکەی ڕەواجم
|
| یە شەربەت یە جام یە بادە و ساقی
|
یەمەزەی شەراب یە عومر باقی
|
| یە عەیش یە نیشات یە کامەرانی
|
ئینە بەزم خۆش یە شادمانی
|
| ئینە نەوبەهار دیدار یاوەر
|
یە شیرەی نەبات یە ڕێزەی شەکەر
|
| یە لەعل لەبان حەیات باقی
|
یەشەراب و کەیف یە ئیمای ساقی
|
| یاوان وە مەتڵەب موراد وێشان
|
هیچ ئارەزوویێ نەمەندەن پێشان
|
| عیشرەت مەکەردن تا وە سوب سەحەر
|
تاوەقت و وەعدەی ئەڵاهوئەکبەر
|
| شازادە جەیار ڕوخسەت تەڵەب کەرد
|
تەشریف بە مەنزڵ مەکان وێش بەرد
|
